3 Fai' sa, mbei ma lii' telu bob'on, 'ona' a ana nalamein. Ana nita relo-relo Lamatualain aten esa mia sorga no'e nae, “Kornelis!”

4 Kornelis nita e, ma namatau seli. Ana natane nae, “Ta'o bee, malangga?”

Ate naa nataa nae, “Lamatualain rena hule-o'e ma, ma nasaned'a rala malole ma neu atahori hata-taa' ra. Ana o mete-se'u nggo boe. 5 De ia naa, denu atahori esa kota Yope neu fo no'e nendi atahori esa, naran Simon Petrus. 6 Ana numban sia ume esa sia tasi suun, noo tukan nameu banda rou' sa, naran Simon.”

7 Lamatualain aten mia sorga 'ola' basa ma, ana lao hela Kornelis. De Kornelis no'e mana tao-ues na ra rua noo sold'ad'un esa. Sold'ad'u naa, ralan o hii-nau neu Lamatualain boe. 8 Kornelis dui basa naa ra, ma ana denu se risi' kota Yope.

9 Mbila reorendun ma, Kornelis ded'enu na ra rae deka Yope ena. Lele' naa, Petrus neu hule-o'e mia Simon ume nambeleon ata'.

10 Ana hule-o'e te named'a ndoe. Ana nahati atahori ra tao nanaat mei ata neu. Lele' ana hule-o'e ma, Lamatualain natud'u e 'ona' ana nalamein. 11 'Ona' lalai a sii, ma teme loa-naru' sa sou, doko-d'oko sia bukun kahaa' ra. Teme loa-naru' naa, loe nema. 12 Sia teme' naa, nita banda mata'-mata'. Hambu banda ei haa', banda mananod'o', ma mbui' mata'-mata'.

13 Boe ma ana rena hara' esa denu e nae, “Petrus! Fela leo! Hala banda ra fo mua!”

14 Te Petrus nataa nae, “Nda bisa sa, Lamatua'! 'Afi' ta'o naa! Au nda fe'e 'ua 'ita banda mata' naa ra sa! Hai atahori Yahud'i ra miluli banda naa ra!”

15 Te hara-lii' naa 'ola' bali' nae, “Mete ma Lamatualain nae saa meumare', naa 'afi' mae manggenggeo'!” 16 Teme' naa sou lao telu ma Petrus o rena hara-lii' lao telu boe, 'aib'oi' ma teme' a neneb'oti' bali' lalai ata neu.

17 Petrus fe'e dud'u'a neu-nema nae nahine meit naa sosoan, te Kornelis ana ded'enu na ra losa Simon umen ena. Ara rii-rii sia lelesu mata' ena. 18 Ara ro'e tenu ume' a de ratane rae, “Hai sangga fui' esa numban sia ume ia. Naran Simon Petrus. Ama' nahine e, do?”

19 Petrus fe'e dud'u'a saa fo nita' naa sosoan ma, Lamatualain Dula-d'ale Meumaren nafad'e e nae, “We, Petrus. Atahori^a sia rae' rema sangga nggo. 20 'Onda fo tungga se leo. 'Afi' mumutau. Mae sira nda atahori Yahud'i sa, ho 'afi' melumud'u se mae atahori manggenggeo', tungga atahori Yahud'i ra 'ad'at na. Te Au, mana denu se rema ha'i nggo.” 21 Basa ma, Petrus 'onda de neu nandaa noo se, ma nae, “Au ia, atahori fo hei sangga' a. Hei parluu saa?”

22 Ara rataa rae, “Malangga sold'ad'u Roma esa denu hai 'ima. Eni sold'ad'u natun esa malanggan. Ralan ndoos, ma hii-nau neu Lamatualain. Atahori Yahud'i nae' bub'ulu' malolen ena. Fe'e afis sa, Lamatualain aten mia sorga denu hai malanggam no'e ama' muu sia ume na. Ana nae rena mia ama'.”

23 Petrus rena nala ma, no'e se sunggu' tetemba' naa sia naa. Fetun ma, ara fela de Petrus lao noo se. Lamatua' atahorin hira sia Yope o reu ramalolo' roo se boe.

24 Tetemba' naa ara sunggu' mia dala'. Mbila' neu dei de ara losa Kaisarea. Ara losa Kornelis umen, te ana nahati se ena. Ana na'ab'ub'ue nala bob'onggi na ra ma nonoo na ra sia naa. 25 Petrus nae ume rala neu ma, Kornelis nela' neu, sende' lulu-langgan, fo be'utee neu e. 26 Te Petrus nafefela e nae, “'A'a! Rii-rii leo. 'Afi' be'utee neu au. Te au ia, atahori 'ona' 'a'a boe.”

27 Kornelis rena ta'o naa ma, ana nambarii'. Boe ma ru'a se 'ola-'ola' fo rae ume rala reu. Petrus mete neu ma, nita atahori hetar ra'ab'ub'ue sia naa, rahani e. 28 Ana mete ndule se, ma 'ola' nae, “Toronoo ngga ra, e. Hei bub'ulu' hai atahori Yahud'i ra 'ad'at ma. Hai nda mi'ib'ue moo atahori fea' ra sa. Saa fai, maso' ume na ra rala. Te Lamatualain natud'u au nae, mete ma Eni 'ola' nae saa meumare', na, au 'afi' 'ae naa manggenggeo'. De ia naa, au nda melumud'u atahori fea' ra sa ena. Au musi tao se 'ona' bob'onggi ngga ra. 29 Naa de, hei mo'e ma, au 'uma neu' ena. Au nda nemba-nemba sa, huu Lamatualain nafad'e basa au ena. Te hei mifad'e sob'a dei! Hei parluu saa mia au?”

30 Kornelis dui basa-b'asa' e nae, “Fai haa mana lao' naa, bob'on, au hule-o'e mia ume ngga. 'Aib'oi' ma, tou' esa ririi mia mata ngga. Buan makahahad'o'. 31 Ana no'e au nae, ‘Kornelis! Lamatualain rena basa hule-o'em ena, ma nasaned'a rala malolem neu atahori hata-taa' ra. 32 De ia naa, denu atahori risi' kota Yope fo ro'e atahori sa, naran, Simon Petrus. Ana numban sia ume esa sia tasi suun, sia tukan nameu banda rou' esa naran Simon boe.’ 33 Naa de, au denu atahori reu ro'e ama'. Hai mo'e makasi, huu ama' nema. De ia naa, hai mi'ib'ue mae rena saa fo Lamatualain denu ama' nafad'e hai.”

34 Basa ma Petrus 'ola' nae, “Ia naa, au fe'e bub'ulu' Lamatualain mete-se'u basa atahori 'ona esa' ena. Ana nda pili-tad'a nae atahori Yahud'i, do atahori nda Yahud'i sa.^b 35 Mete ma atahori mia leo bee-b'ee o ralan ndoos, ma ana hii hule-o'e neu Lamatualain, ma tungga Lamatualain hihii-nanaun, na, atahori naa tao namaho'o Lamatualain rala na. 36 Hei bub'ulu' saa fo Lamatualain nafad'e neu hai atahori Isra'el ra, nae Eni haitua Kristus, naeni Yesus. Yesus naa, mate fo nad'ame' atahori noo Lamatualain. Ma Ana dad'i Malangga neu basa atahori ra.

37 Hei o rena saa mana dad'i' sia nusa Yud'ea ena. Dud'ui na eni' a Yohanis nafad'e atahori ra nae, ara musi raloe' mia sala na ra. Boe ma ara musi sarani, fo dad'i bukti sira dame roo Lamatualain ena. 38 Lamatualain fee Dula-d'ale Meumaren neu Yesus, atahori Nasaret naa. Ana o fee koasan neu E boe. De Yesus neu sia kambo-kambo', fo tao dala malole' fee atahori ra. Ana o tulu-fali atahori fo nitu ra malanggan tao na'asususa' ra. Ana tao ta'o naa, huu Lamatualain noo E nakandoo 'a. 39 Te hai ia ra, mita moo mata ma ra, saa fo ana tao mia Yerusalem, ma ndule atahori Yahud'i ra nusa na.

Mae 'ona' naa o, atahori ra fe'e mbaku risa E mia hau nggangge' losa mate. 40 Ana mate teb'e-teb'e', te fini-esan ma, Lamatualain fee Ne nasod'a bali'. Ana natud'u aon fo atahori rahine rae Ana nasod'a bali' ena. 41 Te nda basa atahori rita E sa, 'aka' a hai. Ana nasod'a bali' ma, hai mia-minu moo E. Ma Lamatualain o dud'u hai fo mifad'e Yesus Hara-lii Malolen neu basa atahori sia bee-b'ee.

42 Lamatualain denu hai mii mifad'e relo-relo so'al Atahori fo Ana dud'u eni' a ma'ahulun, naeni Yesus. Lamatualain o so'u E dad'i mana ma'etu' ded'eat fo na'etu' seka nasod'a nakandoo noo Lamatualain, ma seka hoko'. Ana o na'etu' atahori mates ma atahori masod'a' ra ded'ea na ra boe. 43 Mia dalahulun neu, Lamatualain mana 'ola-'ola na ra dud'u Yesus ia, rae sud'i 'a see namahere neu E, dei fo Lamatualain simbo se, ma 'ose hendi sala na ra.”

44 Petrus fe'e 'ola' na'o naa, ma 'aib'oi' ma Lamatualain Dula-d'ale Meumaren maso' basa atahori mana rena' ra. 45 Petrus nonoo Yahud'i na ra mana rema roo e mia Yope, ara o risi' Kornelis umen sia kota Kaisarea. Ara rita atahori hetar simbo Lamatualain Dula-d'alen ma, ara titindindii, huu fe'e rita Lamatualain fee Dula-d'alen neu atahori nda Yahud'i sa. 46 Ara rena atahori mia Kornelis umen 'ola' ded'eat mata'-mata' ma koa-kio Lamatualain.

Basa ma Petrus 'ola' noo nonoo na ra nae, 47 “Hei mete neu' ena! Atahori ia ra simbo Lamatualain Dula-d'alen ena 'ona' hita boe. De ia naa, ata sarani se leo. Te esa nda bisa 'ai sa ena boe.” 48 De Petrus denu nonoo na ra fo sarani Kornelis noo atahori naa ra, fo ara maso' dad'i Lamatua' Yesus atahori na ra. Basa ma, ara ro'e Petrus leo noo sira fai hira fai, dei de fe'e fee ne bali' Yerusalem neu ena.