Maria bonggi Lamatua' Yesus
2
1-2 Lao esa, lele' Kirenius dad'i malangga mana parenda sia Siria, ma mane monae', naran Agustus, fee parenda' nae, “Basa atahori mana sia manaparenda Roma koasan musi bali' kambon fo tungga sensus!” Naa fefeun fo manaparenda Roma reken rauinggu na ra. 3 Dad'i basa atahori bali' kambon fo tungga sensus.4-5 Lele' naa, Yusuf leo sia kambo Nasaret sia profinsi Galilea. Ana nae la'e ana feto' sa, naran Maria, de mana hengge-nee basa' ena. Maria ia, mairu' ena. Yusuf naa, mane Daud tititi-nonosin, de musi bali' risi' Betlehem kota Daud sia profinsi Yud'ea fo tungga sensus.
Naa de ru'a se lao kota Betlehem reu. 6 Lele' ara losa naa ena, Maria fula-fai bob'onggin nae losa boe. 7 Te sia naa, ara nda hambu kama sia ume seseb'a' sa. De ara risi' lalaet bib'i rala. Boe ma ana bonggi Ana ulun, tou'. Boe ma ara ralusa E rendi' teme', ma rasusunggu E sia ha'o rala.
Lamatualain nafad'e manatad'a ra
8 Tetemba' naa, hambu manatad'a hira be'e ranea bib'i lombo na ra sia lenu' sia kota a dea'.
9 'Aib'oi' ma, ara rita Lamatualain aten mia sorga. Boe ma Lamatualain manggarelon naronda rereo' se, de ramatau rae mate. 10 Ma ate naa nafad'e nae,
“Ama 'afi' mimitau dei! Rena malolole, e! Huu Au 'uma 'ufad'e hara-lii malole' sa neu nggi. Basa mana rena hara-lii' ia, ramaho'o.
11 Hara-lii malole' ia liin ta'o ia:
Fai' ia ina' sa bonggi Kristus, sia Betlehem, mane Daud kota na.
Kristus naa, Atahori fo Lamatualain helu-fuli eni' a ma'ahulu na.
Lamatualain denu E nema fo soi-tefa atahori sala-kilu na ra!
Eni ia, dei fo atahori ro'e rae, ‘Lamatua'’, huu Eni mana parenda basa' e!
12 Dei fo hei mihine E ta'o ia: hei mindaa Anad'iki' sa neneb'onggi feu' mana nelusa' noo teme'. Ana sunggu' sia ha'o rala.”
13 Ana 'ola' basa ma, 'aib'oi' te, Lamatualain aten hetar mia sorga rema ra'ab'ue roo E. Boe ma ara koa-kio Lamatualain ma sod'a rae,
14 “Hai so'u minanaru Lamatualain naran!
Eni mana 'endo' parenda sia lalai narun manaseli' a.
Lamatualain nae fee dame neu atahori sia raefafo',
naa tao ralan namaho'o!”
15 Basa de, Lamatualain ate na ra bali' sorga reu. Boe ma manatad'a naa ra 'ola-'ola' rae, “We! Ata Betlehem teu se'u tita Ana' naa dei! Huu Lamatualain fee hara' neu nggita ena.”
16 Boe ma ara lao lai-lai Betlehem reu. De ara randaa roo Maria noo Yusuf. Ara o rita Anad'iki mana bonggi feu' a mana sunggu' sia ha'o rala.
17 Lele' ara rita Ana' a, ma ara dui rae, “Faa' ra Lamatualain ate na ra mia sorga rafad'e hai so'al Ana' ia ena!” Boe ma ara du'i lutu'-lelo' losa basa.
18 Basa atahori mana rena manatad'a ra dud'ui na ra, mbomboo' a. 19 Te Maria mbed'a' basa manadad'i' naa sia rala na. Ma ana du'a-d'u'a sangga nahine dala' naa sosoa na. 20 Basa de, manatad'a ra bali' risi' bib'i lombo na ra. Ma ara so'u rananaru Lamatualain nara na. Ro'e makasi neu E, huu saa fo ara rena ma rita' naa, teb'e 'ona' saa fo Lamatualain aten nafad'e' a.
Ara bab'ae Anad'iki' a naran Yesus
21 Fai falu, ma ara sunat anad'iki' a, tungga ba'i Musa hohoro-lalane na. De ina-ama na ra bab'ae naran ‘Yesus’. Nara' naa, ate mana mia sorga nafad'e neu se, lele' inan nda fe'e nairu E sa.a
Ara roo Yesus nisi' Ume Hule-o'e Huu' a
22 Hambu hohoro-lalane' sa mia ba'i Musa nae, ina mana bonggi basa fai haa nulu musi neu tao tungga 'ad'at nameu-ao' sia Ume Hule-o'e Huu' a. Naa fo ara bisa maso' ume hule-o'e' a rala reu 'ona' biasa. Naa de, Yusuf noo Maria Yerusalem reu, fo tao tungga 'ad'at naa. Ma ara rendi sira Ana mana bonggi feun nisi' Ume Hule-o'e Huu' a, fo fee ne dad'i Lamatualain 'ena na.b 23 Ara tungga Lamatualain hohoro-lalanen mana nae, “Sud'i 'a ina' see bonggi ana ulun, mete ma tou', na, musi fee ana' naa dad'i Lamatualain 'ena na.”c 24 Tungga Lamatualain hohoro-lalanen, mete ma fee ana' naa neu Lamatualain, ama-ina na ra musi fee tutunu-hohotu' mbui teu pasan esa, do mbui lunda mandaa' rua. Naa de Yusuf noo Maria o tao tungga hohoro-lalane' naa boe.d
Tou lasi' Simeon nae Ana mana bonggi feu Yesus naa, naeni Kristus fo Lamatualain helu-fuli' a
25-26 Lele' naa, hambu tou lasi' sa, naran Simeon, leo sia kota Yerusalem. Eni, Atahori rala ndoos ma ralan hii Lamatualain. Lamatualain Dula-d'ale Meumaren nafad'e neu e nae, hela ana nita Kristus, dei fo ana fe'e mate na. Kristus naa, mana fee masoi-masod'a' neu atahori Isra'el ra.
27 Lele' naa, Lamatualain Dula-d'alen nendi Simeon nisi' Ume Hule-o'e Huu' a. Naa nandaa noo Yesus ama-ina na ra roo E nisi' naa, fo fee ne dad'i Lamatualain 'ena na. 28 Nita Ana' a ma, tou lasi' Simeon 'o'o nala E, ma so'u kokoa-kikio' neu Lamatualain nae,
29 “Koa-kio Lamatualain!
Lamatualain tao tungga hehelu-fufulin neu au ena.
Dad'i ia naa, Lamatualain bisa mbo'i au ena,
naa fo au mate noo malole',
30 Huu au 'ita Atahori fo Lamatualain haitua' a ena,
fo fee masoi-masod'a' neu hai mia sala-kilu ma ra koasa na ra!
31 Lamatualain nae pake Ana' ia,
fo fee masoi-masod'a' neu basa nusa' ra.
32 Dei fo Ana 'ona' ronda'
fo mana nendi had'a-hormat neu Lamatualain atahori Isra'el na ra.
Ana o 'ona' manggarelo' a,
fo mana matud'u Lamatualain dala na.
fee basa nusa fea' ra.”e
33 Rena ta'o naa, ma Yusuf noo Maria heran bali-b'ali' neu saa fo tou lasi' a 'ola' so'al sira Ana na. 34 Basa de, Simeon 'ola' papala-b'ab'anggi' fee se. Boe ma ana nafad'e Maria nae, “Yesus maman, e! Dei fo atahori hetar sia Isra'el nda simbo mama Anan ia sa. Te tatao-nono'i na ra mbali E, dei fo ratud'a' bali' se. Mama Anan ia, o tao fee atahori hetar rala na ra ramaho'o. 35 Noo ta'o naa, dei fo Lamatualain soi natud'u atahori ra rala-d'ud'u'a na ra. Te ho, Maria, dei fo hambu doid'oso' naen seli, 'ona' fela tafa' nenembau' nisi' tenda boam rala.”
Bei Hana no'e makasi neu Lamatualain, huu Yesus
36-37 Sia Ume Hule-o'e Huu' a o hambu bei' sa, naran Hana. Ana too falu nulu haa ena. Aman, naran Fanuel, mia leo Aser. Ana sao too hitu, boe ma saon mate hela e. Bei Hana ia, Lamatualain mana 'ola-'ola na. Ue-tataon, naeni hule-o'e ma puasa sia Ume Hule-o'e Huu' a, fo be'utee neu Lamatualain hatu'-rerelo na.
38 Lele' Simeon 'ola' noo Yusuf ma Maria, Hana o neu deka-d'eka boe. De ana rena se, ma ana so'u kokoa-kikio' neu Lamatualain. Basa ma ana 'ola' so'al Yesus neu basa atahori mana rahani Mane' fo Lamatualain helu nae haitua nema fo mbo'i atahori Isra'el ra.
Yusuf, Maria ma Yesus bali' risi' kambo Nasaret
39 Lele' Yusuf noo Maria tao tungga ba'i Musa hohoro-lalane na ra sia kota Yerusalem ena, boe ma ara bali' risi' sira kambon Nasaret sia profinsi Galilea.f 40 Boe ma Yesus boe na'amoko. Ana boe ma'ad'ere, boe nahine, ma nahine dala' nae' sosoa-ndandaa na ra. Lamatualain o natud'u rala malolen neu E.
Monetena' Yesus sia Ume Hule-o'e Huu' a
41 Tungga too, Yusuf noo Maria reu raa fefeta Paska sia Kota Yerusalem.g 42 Lele' Yesus too sanahulu rua, ara reu risi' Yerusalem fo tungga fefetas 'ona' biasa na. 43-44 Lele' fai-fai Paska basa ena, boe ma Yusuf noo Maria lao bali' Nasaret reu ramalolo' roo atahori hetar mana rae bali' Galilea reu. Te nda bub'ulu' rae, Yesus fe'e sia Yerusalem sa. Ara rae ne'o Ana lao namalolo' noo nonoo na ra. Te losa bob'o' ena, nda rita E sa. Boe ma ara sangga E reu-rema sia bob'onggi na ra ma nonoo na ra. 45 Huu nda hambu randa roo E sa, de ara lao bali' Yerusalem reu, fo sangga E sia naa.
46 Losa naa, ara sangga E losa fai telu, dei de hambu E mia Ume Hule-o'e Huu' a rala. Ana 'endo' naselu-b'ale noo meser agama Yahud'i ra. 47 Basa atahori mana rena se mbomboo' a, huu Ana nahine teb'e-teb'e' Lamatualain Susura Meumaren sosoa-ndandaan, ma Ana nataa netane na ra noo malole'. 48 Rita ta'o naa ma, ina-ama na ra titindindii' a. Boe ma inan nae, “Yesus! Ta'o bee de tao hai susa 'ona' ia? Au 'oo ama ma susa-susa sangga rereo' nggo.”
49 Te Yesus nataa nae, “Ta'o bee de papa noo mama susa-susa sangga Au? Bub'ulu' ena, to? Au hambu ue-taos sia Ama ngga Ume na.” 50 Te ara nda rahine Yesus 'o'olan noo matetu' sa.