Atahori mana rahine mete nduu' ra, rema se'u Yesus
2
Lele' bonggi Yesus mia kambo Betlehem sia profinsi Yud'ea, mane Herod'es to'u parenda'. Lele' naa, hambu atahori hira mia mamana doo-d'oo' sia langgan rulu, rema risi' kota Yerusalem. Sira, atahori mana rahine mete nduu' ra. 2 Lele' ara losa Yerusalem, ara ratatane reu-rema rae, “Atahori Yahud'i ra manen fo fe'e neneb'onggi' a, sia bee, e? Hai mita nduu' sa sia langgan rulu, mana fee tatanda' nae, bonggi E ena. Naeni de hai 'ima mae be'utee neu E.” 3 Lele' mane Herod'es rena 'o'ola na ra, ma ralan liuali. Naa de basa atahori sia Yerusalem ra o ramed'a ta'o naa boe.4 Basa ma, mane Herod'es na'ab'ue nala basa malangga agama Yahud'i ra malangga na ra roo meser agama ra, de natane se nae, “Hei mifad'e sob'a au dei! Kristus fo, Lamatualain helu-fuli mema' a, neneb'onggi' sia bee, e?”
5 Ma rataa rae, “Sia kambo Betlehem, sia profinsi Yud'ea. Huu Lamatualain mana 'ola-'olan Mika sura' mema' mia dalahulun ta'o ia:
6 ‘Wee, hei atahori Betlehem, mana sia profinsi Yud'ea ra, e.
'Afi' du'a mae, hei kambom naa,
kambo ana' nda na'ena sosoa-ndandaa' sa.
Huu dei fo hambu atahori moko-monaen sa mia naa nema.
Dei fo Ana dad'i manatad'a soa' neu Au atahori Isra'el ngga ra.’”a
7 Rena basa ta'o naa ma, mane Herod'es no'e nee-nee nala atahori mana mete rahine nduu' ra. De natane se, sira rita nduu' naa sou sia lalai a eni bees. Ma ara rafad'e e. 8 Boe ma ana denu se Betlehem reu. Nafad'e se nae, “Mii sangga rereo' Ana' naa sia naa. Mete ma hei mindaa moo E, na, bali' 'ima mifad'e au. Huu au 'ae 'uu be'utee neu E boe.”
9 Ara rena basa mane' a 'o'olan, ma ara lao boe. Tao-tao te, ara rita nduu' fo dalahulun rita mia seri' rulu a. Nduu' a sou mia mata na ra, ma ana lao' de losa Ana' a mamana leleon, ma naloe'.
10 Rita ta'o naa, ma ramaho'o rala seli. 11 Basa de ara ume rala reu, ma rita Ana' a noo maman Maria. De sende' lulu-langga na ra be'utee neu E. Boe ma ara buka mbomboti sud'i 'a saa mafeli na ra, fo fee neu 'Ana' a. Ara fee lilo, kemenyan, noo hau raa ma'ameni'.
12 Nda doo' sa ma, ara hambu meit mia Lamatualain 'oi, “Ama 'afi' bali' misi' mane Herod'es fai.” Naa de ara bali risi' kambo na ra tungga dala' laen.
Yusuf se rela Masir reu
13 Lele' atahori mana mete rahine nduu' ra lao bali', boe ma Lamatualain aten esa mia sorga nema nafad'e Yusuf sia meit na nae, “Wae, Yusuf! Fela lai-lai! Ha'i mala 'Ana' naa noo maman fo mela nusa Masir mii. Leo mihati naa losa fai' bee fo Au 'ufad'e nggi fo ama bali' na dei fo ama bali'. Te mane Herod'es sangga nae nisa 'Ana' naa!”
14 Basa ma Yusuf fela. Boe ma ana nendi saon noo 'Ana' naa tetemba', de rela nusa Masir reu. 15 Ara leo mia naa losa Herod'es mate. Noo ta'o naa Lamatualain 'o'olan dad'i, 'ona' mana 'ola-'olan Hosea nafad'e mema' eni' a mia lele ulu' a nae,
“Au 'o'e bali' Ana ngga, fo lao hela Masir.”b
Mane Herod'es nisa anad'iki-anad'iki' mana sia Betlehem
16 Lele' mane Herod'es nahine nae, atahori mana mete rahine nduu' ra leleko' e, ma ana namanasa seli. De ana parenda sold'ad'u na ra nae, “Mii sia kambo Betlehem ma kambo-kambo mana deka naa ra. Tao misa basa anad'iki tou ana', mana too be'e rua' fo rae neu.” Herod'es parenda ta'o naa, huu ana nasaned'a atahori mahine' ra dud'ui na. Ana reken eni' a ara rita nduu' a sou fefeun mia lalai a.
17 Basa dala' ia ra dad'i, tungga saa fo Lamatualain mana 'ola-'olan Yermia sura' mema' mia lele ulu' a nae,
18 “Rena atahori nggae ei-ei sia kota Rama.c
Rahel nggae ei-ei,
huu basa ana na ra mate ena.
Ana nda nau atahori reu kokoe e sa.
huu basa ana na ra nese ena.”d
Yusuf se bali' mia Masir rema
19 Doo-d'oo ma mane Herod'es mate. Lele' naa Yusuf se fe'e sia Masir. Boe ma Lamatualain aten esa mia sorga, nema natud'u matan neu e mia meit. 20 Ate a nafad'e nae, “Wae, Yusuf! Fela leo! Moo bali' 'Ana' naa noo maman, Isra'el reu. Te atahori fo mana nae tao nisa 'Ana' naa mate ena.” 21 Rena ta'o naa ma Yusuf fela, de ana noo bali' se nusa Isra'el reu.
22 Te lele' ana rena nae, mane Herod'es anan Arkalaus to'u parenda' sia profinsi Yud'ea, boe ma namatau bali' naa neu. Basa ma Lamatualain parenda e sia meit sa fai nae, “Yusuf, 'afi' leo sia Yud'ea.” Naeni de ana neu leo sia profinsi Galilea, 23 sia kambo' sa naran Nasaret. Noo ta'o naa, Lamatualain 'o'olan dad'i teb'e-teb'e' ena, tungga saa fo mana 'ola-'ola na ra sura' mema' rae, “Dei fo ara ro'e E rae, Atahori Nasaret.”e