50
Aman mate ma, Yusuf holu nala e, de nggae ei-ei. Ana 'id'u aman nasafafali. 2 Basa naa ma, Yusuf parenda mana tao mata' mamates ra tao mod'o neu e, fo ao-sisin 'afi' ma'afoo. 3 Basa boe ma, ara linu-afi mamates a losa fai haa nulu, tungga sira 'ad'at na. Basa atahori Masir ra o nggae Yakob mamaten losa fai hitu nulu, 'ona' sira atahori monaen na mate.4 Basa fai kahitu nulun boe, Yusuf nafad'e pagau na ra nae, “Rena! Mendi hara' ia, mii mifad'e mane' a ma'o ia: 5 ‘Ama ngga nae mate ma, ana no'e au 'u'oi e sia rae Kana'an. Dad'i au 'o'e mane' fee au 'uu 'u'oi ama ngga dei. Basa' fo au bali' ia 'uma.’”
6 Mane' a rena nala ma nataa nae, “Mete ma ho helu amam ta'o naa ena, na, muu mu'oi e sia naa leo.”
7 Boe ma Yusuf neu na'oi ama na. Atahori nae' o tungga e boe. Naeni mane' a pagau na ra ma basa atahori monae' Masir ra. 8 Yusuf 'od'i-'a'a na ra roo basa atahori mana tao ues na ra o reu ra'oi Yakob boe. Mana mahani sia Gosen, 'aka' a sao na ra roo anad'iki' ra ma banda na ra. 9 Sold'ad'u nae' o tungga boe. Ruma roo kareta ma ruma sae ndara. Huu mana tungga ra, naen seli, naa de nononggo mana tungga lao' roo mamates a narun seli.
10 Basa se lao losa loe Yordan seri' sia mamana' esa naran Atad. Atahori biasa poko are sia naa. Yusuf se nggae ei-ei aman mamaten ma beb'e'ek tetemba' hitu fai sia naa.
11 Atahori Kana'an sia naa rita se susa 'ona' naa ma, ara 'ola' rae, “Wei! Mita dei. Atahori Masir ra be'e mamates na ra noo sususa' seli o. Ara nggae mata' naa.” Naa de ara bab'ae mamana' naa, Abel-Misraim. Sosoan ‘atahori Masir sususa na’.
12 Basa ma, Yakob ana na ra tao tungga sira helu-fuli na. 13 Ara rendi Yakob ao-sisin, de ra'oi sia luat deka kambo Makpela noo Mamre. Ma'ahulun, Abraham hasa mamana' naa mia atahori Het, naran Efron, de tao dad'i sira mamana rates na.
Yusuf tao manggatetee 'a'a na ra rala na ra
14 Yusuf na'oi basa aman, ma noo 'od'i-'a'a na ra bali' Masir reu. Basa atahori mana tungga reu ra'oi' ra o bali' boe.
15 Ara losa Masir boe ma, Yusuf 'a'a na ra ramatau. Huu aman nese ena, de ara 'ola-'ola' rae, “Wei! Hei du'a dei! Mete ma Yusuf fe'e mbed'a' nasat noo nggita, fo nae balas hita de'ulakan neu e, na, ta'o bee?” 16 Ara rala hara' sa fo fee hara' neu Yusuf rae: “Ama fetor. Hai fe'e misined'a lele' hita aman fe'e masod'an, ana denu hai 17 mifad'e ama' mae, ‘Yusuf musi lilii' hendi 'a'a na ra sala na. Huu ma'ahulun ara tao de'ulaka' neu e.’ Hai o misined'a hita aman namahere neu Lamatualain mia ma'ahulu na. Naa de, hai, fo Lamatualain ate na ra, 'ima mo'e ambon, huu basa hai tao sala' neu ama' ena.”
Yusuf rena ta'o naa ma, ana nggae.
18 Boe ma 'a'a na ra rema mata na ra ma sende' lulu-langga na ra, de 'ola' rae, “Ama', tao hai dad'i ate ma.”
19 Yusuf nafad'e se nae, “'A'a ngga ra, e! Sud'i mimitau fai! 'Aka' a Lamatualain ma hak fo huku-d'oki atahori. Te au ia, hoko'. 20 Ma'ahulun, mema' hei mala hara' fo tao de'ulaka' neu au. Te Lamatualain nggati hei dud'u'a de'ulakam, dad'i malole'. Naa de, Ana so'u au dad'i atahori monae', fo atahori hetar hambu masod'a'. 21 Dad'i ia naa, au 'ufad'e nggi fo sud'i mimitau fai. Au helu dei fo au mete-se'u nggi, moo basa ana ma ra.”
Yusuf 'o'olan naa, tao mangatetee 'a'a na ra rala na.
Yusuf mamate na
22 Basa naa ma, Yusuf leo nakandoo sia Masir noo 'od'i-'a'a na ra. Ana nasod'a losa too natun esa sanahulu. 23 Ana fe'e nita Efraim umbu-ana na ra. Ma ana o na'ab'oi Manase umbu na ra, naeni Makir ana na ra.
24 Yusuf nafad'e 'a'a na ra nae, “'A'a ngga ra, e! Au du'a-d'u'a na, fai mamate ngga deka ena. Te au 'umuhere Lamatualain na'ab'oi nggi. Dei fo, Ana noo nggi lao hela nusa' ia, ma nalalao nggi bali' misi' nusa' fo Ana helu-fuli fee ba'i Abraham, ba'i Isak noo ama Yakob.” 25 Boe ma Yusuf no'e 'od'i-'a'a na ra te'a nae, “Hei musi te'a neu au. Mete ma losa fain Lamatualain noo bali' nggi misi' nusa' naa, naa hei o moo bali' ao-sisi ngga boe.”
26 Yusuf too natun esa sanahulu ma, ana mate sia Masir. Boe ma ara tao mod'o neu ao-sisin, de tao e kopan rala neu.