Nai Paulus namneob on anbi kesel Agripa in matan
26
Lalit kesel Agripa anlelu nai Paulus nak, “Tabug iij, ho mube'i mumneob om. Hai ok-oke' miloitan he mneen ko.”Nai Paulus na'aiti in animan, lalit in naguab am nak,
2 “Aam kesel Agripa le' au 'tuna ma ulatan ko. Au utenab, au neek ee nmenua, natuin ho mfee kau meinuan he au uguab, ma au ama' ala ki he mneen kau, saa'-saa' le' atoni Yahudis sin nasaeb sanat ma ntu'matan sin noi kau. 3 Au uhiin 'ak, ho muhine namneo, hit atoni Yahudis hit atolan halat, ma hit lasi 'monit ma 'maten. Es on naan au 'toti ko he ho mneen muleko' au 'guab ii.
4 Anmulai na'ko au aan'-ana', sin nanoni' kau lee he amoni utuin hit atoni Yahudis hit halat. Nahunut, nanoni' kau anbi au kuan; lalit au 'uum uskool a'tein 'bi Yerusalem. Atoni Yahudis abiten Yerusalem, sin nahine au 'monik, ma sin nahine nalek-leko' kau. 5 Kalu anaet een lasi palsait Yahudi sin nlomin, sin nabe'i natu'in nani nak sin nahine kau na'ko un-unu'. Fun au le' iij, au 'taam amnono Farisi. Atoni mfaun sin ok-oke' nahinen nak, hai atoni Farisis, hai es le' matani' mnesi mituin lasi palsait Yahudi in atolan.a 6-8 Au ma toog Israel na'ko sin uuf bo'es am nuug een, hit atpao he Uisnenog anmo'e natuin le' In anpaa' nanij noi kit. Manpaa' le' naan, In natoon nalalij noi hit babaf na'ko faijan unun. Es on naan antee tabug iij, hit ala kit at'onen faij-manas, he Uisnenog In manpaa' naan anjali nai. Manpaa' naan in nesan nak, of In he namonib nafani' amates een.
Aam kesel Agripa. Sin nmaklasi een nok kau, natuin au 'palsai 'ak Uisnenog of namonib amates. Au he 'toti, nansaa' am es tuaf na'ko hi ala ki le' iij, abjaan ka mlomi fa he mpalsai mak, Uisnenog nabe'i namonib amates een? Namneo In nabe'i!
9 Nahunut, au ube'i 'mo'e saa'-saa', ma au 'malaban matani' 'oi atonin le' natuin Nai Yesus, atoni Nasaret naan. 10-11 Tabug naan, anaak lasi palsait Yahudi sin anaakf een anfee kau hak he au 'nao ma hamu'i Nai Yesus Inin anbi meel am meel. Au 'heke sin, lalit au 'heel 'eki sin neman anbin Yerusalem, ma au utaam sin anbin ume buij. Au ufeek 'ok he nhukum na'mate abjaan amsa'. Au 'taam 'oi ume onen een, ma 'hamu'i sin, ma au useke' sin amsa' he natotan Nai Yesus. Tenij-tenij au 'ami sin nok neek maputu'. Lamun au 'neen 'ak apalsait een noi Nai Yesus et meel am meel, maski sin anteen pah abjaan amsa', au 'ami sin piut!”b
Nai Paulus natu'in nafani' saa' le' in annaben niit ee
12 Nai Paulus anluut antein in aguab ee mnak, “Tabug mese, anaak palsait een sin anfee kau sulat kuasa he au 'ami tuaf le' natuin Nai Yesus anbi koot Damsik. Es on naan au 'nao. 13 Aam kesel Agripa! Tabug hai amboni lalan, of ai' manas ee na'puup, nok askeken, apinat mese na'ko nenog antoom kau ma au aok-abjaan sin amsa'. 14 Hai mtiloto mani amtee naijaan, natuin apinat naan in matanin. Lalit au 'neen hanaf mese naguab nok kau neki aguab Aramc nak, ‘Hoe, Saulus! Nansaa' am es ho mhamu'i Kau piut-piut? Amsusa mmaet kalu ho mlaban Au alomik ee piut.’ 15 Au 'neen hanaf naan, mes au ka 'iit fa in tuan. Es on naan au 'toti m 'ak, ‘Usi'. Ho sekog ko?”
Lalit hanaf naan natae kau mnak, ‘Au le' iij, Nai Yesus le' ho mhamu'ij piut-piut. 16 Saulus! Amfeen nai! Au ukliil Ok on le' iij, nok in salit on ii: Au 'pili 'ani ko mjali tuaf le' Au 'palsaij. Ho lo he mnao mutoon moi mansian ok-oke', saa'-saa' le' ho miit mulali sin een nenog iij mu'ko Kau. Of Au uklila' a'teni' ko lasi fe'ug abjaan, he ho mube'i mutoon moi mansian ok-oke'. 17 Of ho mupeni susal huma'-huma'. Mes Au 'panat ko a'ko tuaf een le' he nhamu'i ko, maski na'ko atoni Yahudis, ai' atonis abjaan. Teeb! Au 'lelu ko 'oi atonij abjaan le' ka atoni Yahudis sin fa. 18 Ho mnao mfai sin maatk een, he sin nabe'i nahinen ma nmoni anbi miu-sine'. Lalit sin nasaitan sin laal mesi'ookn een. Ma ho lo he mlulu sin lalan noi 'monit amneot. Ho mufetin mani sin mu'ko nitu le'uf een sin anakat in kuasan, lalit meki sin moi Uisnenog. Nok lalan nanet, he Uisnenog ansako nani sin saant een ok-oke'. Ma sin anjalin Uisnenog In anah een, nabguan nok tuaf abjaan le' Uisnenog anpili naan sin, natuin sin anpalsain noi Kau. Au 'guab antuu' on naan, Saulus!”’
Nai Paulus natu'in in mepug
19 Nai Paulus anluut in aguab een, nak, “Aam kesel. Mepug le' au 'simog na'ko sonaf neno tunan naan, au unaob ee. Tal antee tabug iij, au lo he 'mepu piut-piut, ka nabe'i fa he au 'tet-koot. 20 Nahunut, au utoon Usif Yesus In Laal A'honis 'oi atoni Yahudis sin anbin Damsik. Lalit au 'uum utoon 'oi atoni Yahudis sin anbi Yerusalem, ma propinsi Yudea anfuun am nateef. Lalit au 'nao 'fuun am u'eku atonij abjaan sin pah-pah. Au uguab 'oi sin nok muti' monas, he sin anpoin na'kon sin laal penu le' asanat, lalit sin nnona' sin neek een ma sin tuak een noi Uisnenog. Sin lo he anmo'en 'mo'e alekot noi tuaf abjaan, he anjali taka nak, sin nmoni fe'ug anbi Uisnenog.d 21 Natuin au 'mepu on naan, es nanet atoni Yahudis sin anheke kau anbi Ume Onen Uuf et Yerusalem. Ma sin he nlolo niis kau. 22 Mes Uisnenog anbaban kau. Es on naan au 'moni fe' tal antee tabug ii. Ma au ube'i 'hake 'bi ii, ma utu'in ki, es abaut-anaet, lasij le' anmatoom nok Usif Yesus In Laal A'honis. Saa'-saa' le' au utoon sin le' iij, namnees nok saa' le' baba nai Musa nok Uisnenog In mafefa knino' een nanoni' naan sin. 23 Sin nanoni' ale' saa' le' anmatoom nok Kristus, Tuaf le' Uisnenog anpaa' nanij he anleek Ee neem. Nak, In lo he nasae hamu'it. Lalit In anmaat. Mes In he anjali unu na'ko ale' amates een le' Uisnenog namonib nafani' Ee na'ko 'maten. In es le' he nfee miu-sine' noi atoni Yahudis sin, ma atonij abjaan amsa' anbi meel am meel anbi pah-pinan ii.”e
24 Nai Paulus naguab ma natoon in mepug fe', mes nai Festus ansenu nfeek in aguaban nok haan matani' mnak, “Hoe! Pau'! Ho mneek-maun ge. Ho muhinem bainesi', tal antee nmo'e ho lolem aan namlee'.”
25 Mes nai Paulus natael am nak, “Ama' gubernur le' au 'tola ko. Au ka 'neek-maunuf. Saa'-saa' le' au 'etun tebe on naan. Au ka uguab fa lasi luum-luman. 26 Ama' kesel Agripa, ho muhine kuum, saa' le' au uguab ulali sin. Es on naan au ublani he uguab sin muti' monas. Au 'palsai 'ak ho mneen mulali saa'-saa' een ok-oke, fun saa' le' anjali naan ka anbi fa bale makolo'. Nak, Usif Yesus le' amates naan, anmoni nfaan jen. Ale' too mfaun sin ok-oke' nahinen nalalin lasij naan. 27 Na'ko tabug ahun-hunut, Uisnenog In mafefa knino' een natoon nani ale' lasin le' ii. Au ublani he atmatao 'ak, ho mpalsai msa' mafefa knino' een sin aguab een.”
28 Kesel Agripa nsenu nfeek nai Paulus in aguab een am nak, “Hoe! Pau'! Ka loog fa, of ho he mmo'e kau 'jali atoni' Kristen!”
29 Ma nai Paulus natael am nak, “On ii, kesel. Au 'onen 'oi Uisnenog, he tabug aloog ai' haumaka', ka nuug aa fa aam kesel ho mmees, mes atoni mfaun een le' anenat nenog iij amsa', nabe'i anjalin on le' au, le' Nai Yesus In aanh een! Mes lamun hi ala ki naik amjali atoni ume buij on le' au.”
30 Nai Paulus naguab nalali on nanet, kesel Agripa nok bi Bernike, ma gubernur Festus, ma anaet een anfeen anhaken, ma nasaitan balel naan.
31 Tabug sin annaon npoin, atonin le' naan naguab een es nok es am nak, “Atonij le' iij, in ka nmo'e fa saa'-saa' le' namnees nok le' he thukum tamatel, ai' he tataam ee noi ume buij!”
32 Lalit kesel Agripa naguab noi gubernur Festus am nak, “Aijoo. Oni atoni' iij in naik neki in lasij ansae nteni noi koot uuf Roma. Kaah fa te, lasi iij hit tafeek ee, ma tapoitan.”