Nai Paulus in sulat ahunut
noi apalsait een abiten Tesalonika
1 Tesalonika
Tabe
1
Haan tabes na'ko au, nai Paulus kau, ma au amnono nai Silas ma nai Timotius.Sulat le' iij, hai msonu' ee noi ki ala ki too slani et koot Tesalonika. Hi es le' ampili kiim lalan he mituin hit Ama' Uisnenog, ma mituin hit Usi' Yesus Kristus.
Hai mtoti Uisnenog he naklila' In nekan alekot ee noi ki, he hi mmoni mbi taimamut ma tainine', ma mmahalan nekaf es nok es.a
Nai Paulus antoti makasi, natuin abiten Tesalonika anpalsain piut
2 Hai misaeb makasi piut-piut noi Uisnenog, natuin hi palsait naan. Faij-manas hai m'onen ma mteek ki ok-oke'. 3 Hai mimnau piut-piut noi ale' mepun le' hi mmo'e sin, natuin hi mpalsai Uisnenog ma amneek Ee. Hi malan piut-piut ambi ale' mepun naan, natuin hi mifneek moi Usif Yesus. Hai meki ale mepu sin piut-piut moi Uisnenog le' hit Ama' In human ma In matan.
4 Aok-abjaan ala ki! Hai mihine mak Uisnenog anneek ki. Es on naan In anpili ma anbeti naan ki anjali In nonot. 5 Nenog naa, tabug hai iim moi Tesalonika, hai mitoon ki Uisnenog In Tu'in Alekot. Tabug naan, hi mneen hai aguab een lek-leek. Hi ka mneen ahaa fa, mes hi miit kiim Uisnenog In kuasan amsa' na'ko In Asmana Knino'. Lasin le' naan, es le' anmo'e ki ma hi msimo Usi' In Tu'in Alekot namneo-namneo. Tabug naan, hi miit meki hi matam, hai tokom ma hai hakem een mak, hai mmo'e on mee, he hi mihine namneo-namneo Usi' In lalan. 6 Natuin hi mlomi ma mpili he mituin Uisnenog In lomin, es on nane hi mmoni mituin hai leta', ma mmoni mituin Usif Yesus In aleta'. Mes tabug hi msimo Tu'in Alekot, anmu'i tuaf le' nasusab ki. Maski on nane msa', hi neekm een naan ka na'onin fa, natuin Uisnenog In Asmana Knino', anfee ki neek malinat.b
7 Nok lalan naan, hi miklila' leta' moi apalsait een ok-oke' abiten propinsi Makedonia ma propinsi Akaya. 8 Mes ka le' naan anmese fa. Uisnenog In Tu'in Alekot naan naneenb on ma nanaob on na'ko ki, hi abit Tesalonika naan, antee meel am meel. Es on naan hai he miguab saa' antein, natuin tuaf abjaan sin ok-oke anneen nalali hi neek palsait moi Uisnenog. 9 Anbi meel am meel aah, tuaf abjaan sin natu'in een nak, nahunut hi msimo kai nok alekot. Lalit hi maiti mpolin hi fuat een naan, ma mite'un hi neekm een naan ma mituin Uisnenog le' amneot ma amnonot. Natuin hi le' naan of amjali Uisnenog Amonit Inin. 10 Sin amsa' natu'in een nak, hi fe' mpa-pao Uisnenog In Anah, Nai Yesus, he nkoen On neem na'ko sonaf neno tunan. Nenog naa, tuaf abjaan sin namatel, mes Uisnenog namonib nafani'. Kalu Uisnenog anlomi he nhukum mansian ee te, Usif Yesus es le' of ansoi nafetin naan kit na'ko to'as Uisnenog.