3 Hai mpoi ma'ko Kaisarea, anmiut hai mtee koot Sidon. Anaak solalus nai Julius in ka nansa'an fa nai Paulus, ma anleek nai Paulus he nnao nami sekog le' in nahine sin anbi koot naan. In tenab nak, he sin nabe'i anfeen nai Paulus saa' le' in anpaluug tabug sin anbi tasij atnanan.

4 Lalit hai ala kai amsae mfaan moi bnao oel naan, ma mnao amfiin. Mes anin na'ko bnao oel naan in matan manenu le'uf, tal antee bnao oel naan he ka nnao nabe'i fa. Es on naan sin anbelok abnao oel naan, ma nnao npe'o pulau Siprus ma Siria sin atnaank een, he nak hai naik mipeni anin naan. 5 Na'ko naan, hai mnao mlefi tasij anbi propinsi Kilikia ma propinsi Pamfilia sin maatk een. Hai mnao piut, tal hai mtee koot Mira, et pah Likia. Amtee naan, hai msanu misaitan abnao oel naan. 6 Tabug hai mbi Mira, nai Julius an'etu ma nami bnao abjaan le' he nnao noi pah Itali. In napeni bnao mese na'ko koot Aleksandria, le' he nnao noi Itali. In anleek kai ok-oke he msae moi bnao oel naan.

7 Hai mnao maan nenog fauk een, mes abnao oel naan alak itij ka nnao naan fa leen, natuin anin na'ko in matan manenu le'uf. Hai mhae mmaat, tal amhaumaak koot Knidus. Mes anin naan anfuu naheel fe' amsa', es on naan hai mnao mlefi moi pulau Kreta, he mininib om na'ko anin. Lalit hai mfini panaf mese, kanan Salmone. 8 Abnao oel iij, annao nok susal mane'at, tal hai mkoon panaf naan, mitaa-tuin aah pulau Kreta in ninen, na' hai mtee balel mese, kanan Labuan Amasat. Balel naan, anmapaumakan een nok koot Lasea.

9 Anbi naan, ameput een abnao oel naan nasnasan babaun, fun hai mnao aloog ee, mes hai ka mtee Itali fa fe'. Tabug naan, Neno Sako Sanat atoni Yahudis anfini nalaal je.^a In a'taka' nak, ani naek ma okin anaek of he nfoe. Ameput een anmatotin een he hai mnao mfiin, ai' kaha. Anneen on nanet, nai Paulus naguab am nak, 10 “Au aok-abjaan ala ki! Au uguab 'aan babaun. Au utenab, kalu hit he tnao tfiin, of hit tapeni susal ma mane'at. Of abnaog iij anleem nmaat, bale een anleem, ma hit of atmate ok-oke msa'.” 11 Mes nai Julius ka nneen fa nai Paulus. In npalsai nanesib noi anaa' abnaog ma abnao tuaf. Fun sin nabaalb een he nnao anpoin na'ko balel naan. 12 In amle'un, Labuan Amasat naan, in ka ntainine fa kalu bnao oel lo he anhake anbi tabug okin anfoen. Es on naan amfaut een nak sin nlomin he hai mnao mfiin moi koot Feniks. Sin alomik een, kalu nalekot, hai mitgua mtahan ambi naan, tal antee tabug okin een nasnasan. Koot Feniks naan, pulau Kreta in balel tainine noi bnao oel, natuin in naninib on na'ko anin na'ko nenog tesan ma ka napeni fa okin anaek.

13 Tabug anin ane'ug anmulai nfuu babaun-babaun, sin nak, ai' ani leko he sin nabe'i npakel, he annaon noi koot Feniks. Sin nak, “Anin iij, lekog. Iim he tnao nai!” Es on naan sin nasaeb besi tonug, ma nasaeb layar, ma hai mnao abnono haa tasij ninen. 14-15 Hai mnao ka loog fa, nok askeken, ani nautus anfoe. (Le' hit teek ee tak, ‘anin na'ko neno-saet ma aliij sin atnaank een’). Anin naan anfuu bnaog naan, nekij noi tasij atnanan. Ameput een abnaog naan, sin ka nabe'i fa he nbelok nafani' abnaog. Es on naan sin ka nokij fa. Ma bnaog naan annao natuin ahaa anin in alomin.

16 Okin een anpesan kai mtee pulau ana mese, kanan Kauda. Tabug naan, abelo ba'ij natuin kai anbi bnaog ee in kotin fe', ma sin anheel neki tanij. Lalit hai mheel misaeb abelo ba'ij naan, noi bnaog tunan. Hai mhae mmaat. 17 Tabug abelo ba'ij naan antee bnaog tunan, sin anpuun abnaog naan neki tanij anfuun am nateef, he anpanat he naik-naika bnaog naan in hau 'been een natsefi een, ma oe tasij antaam. Sin namtaun amsa', naik-naika okin ee anpesan abnaog naan, ma anpolin ee noi snae fatug Sirtis et pah Afrika. Es on naan sin nasanut besi tonug le natboe, he na'baun abnaog naan in anaon ee babaun.

18 Ani naek naan, nasni'at abnaog noi aliij ma ane'ug. Anmiu, ameput een naiti npolin bale' bnaog een naan noin tasij. 19 Anmiu ntein, anin naan fe' anfoe. Es on naan sin namtaun nloul gok. Es nanet, sin naiti npolin abnaog naan in bale' abjaan he nhanaaf ee. Ma sin naiti npolin amsa' bnaog in bale mepun. 20 Anin naan ka nasnaas niit fa, faij-manas nenog fauk-fauk. Nipug sin ansanu naijaan, tal antee hai ka miit fa manas ma kfuun. Hai neekm een nabatin matani'. Hai mitenab mak, iij hai ka mnoni fa len.

21 Hai ka meku fa nenog fauk een. Nai Paulus no'en sin ok-oke, ma naguab am nak, “Au aok-abjaan ala ki! Bati hi mlomi mituin kau he hit naik atpoi ta'ko Labuan Amasat, hit ka tsuus fa on le' ii. Ma hit ka tluki fa amsa'. 22 Tabug iij, au 'toti ki ok-oke, he mha'tani hi neekm een naan. Of hit abnaog le' iij, anpee' pisa'-pisa'. Mes naik mimtau, of ka tiit fa amates. 23 Au lomik, hi ala ki mihine mak, au le' iij Uisnenog Inij kau. In es le' anfee kau mepug. Faij naa, In anleek In ahaket tuaf mese na'ko sonaf neno tunan, ma in anhake anbi au bnapak. Lalit in natoon kau mnak, 24 ‘Paulus! Naik mumtau babaun amsa'. Lo of ho amtee kesel et Roma, he m'ulus ho lasij. Natuin Uisnenog anneek ko, es hi asaet abnaog iij, of ka tiit fa es natfuun. Of ammoni ok-oke'.’ 25 Es on naan au aok-abjaan ala ki. Naik hi neekm een nabatin. Au 'palsai namneo-namneo 'oi Uisnenog, le' In natoon kau faij naa, lo of anjali on le' naan. 26 Abnaog iij of antuu' anbi pulau mese.”

27 Tabug naan, anin ma okin antepo kai mok abnao oel naan, ma npesan kai faij bo'es am haa anbi Tasij Atria. Of oni' faij ee noi natnaan, ameput een annaben een nak hai mhaumaak meto'. 28 Lalit sin nasanut tani lot, he nahine oel amnanun. Es on naan sin an'ukul, in amnanun ee, nehel bo' nuug. Lalit abnaog naan annao maat anteni', ma sin nasanut anteni tani lot naan, ma nahine nak oe tasij in namnanun ee nehel bo'es am niim.^b 29 Sin namtaun, naik-naika bnaog naan ankalaant on anbi fatu putun een. Es on naan sin nasanut besi tonug kotif afgua' haa. Hai mifneek he anmiu nfini nai. 30 Mes ameput een abnaog naan anma'akolan he naen nasaitan abnaog ee namek-meka'. Es on naan sin nasanut abelo ba'ij, ma anmo'es ok on le' sin he nasanut besi tonug matan.

31 Mes nai Paulus natoon noi nai Julius lasi le'uf naan nak, “Kalu ameput een sin ka nbi fa bnaog nane, of hi mmate ok-oke.”

32 Anneen nai Paulus naguab on nane, solalus een anlefi nafeek abelo baij in tanij, ma ka noik je. Es on naan ameput een naan ka nabe'i naenan fa lee.

33 Anmiu nfini on nanet, nai Paulus anfuli' sin ok-oke he anbukaen. In nak, “Kliij nuug een, hit aal tabe'i tok-took guah, hit tafneek aah, ka tiit tani fa saa' es antaam noi hit taik. 34 Es on naan au 'toti ki he nalekot, hit tbukae taan babaun fe', he hit tapeni tafani' hit nenuk. Au 'palsai 'ak of ka tiit fa tuaf mese na'ko hit ala kit tapeni amle'ut. Hit of atmoni ok-oke!”

35 Naguab nalali on nanet, nai Paulus naiti utunu'. Lalit in an'onen noi Uisnenog ma antoti makasi anbi sin maatk een. Lalit in naiti tukaf mese, ma anbukae. 36-37 Sin niit on naan, sin neek een antainine nfanin. Lalit sin anbukaen ok-oke'. Hai abit abnaog naan, tuaf natun nuug am bo' hitu mnee. Hai mbukae ok-oke. 38 Mimseen on nanet, sin naiti ma npolin ane-gandum sin noi tasij, he nsobal anhanaaf abnaog naan anteni'.

39 Anmiu nfiin, ameput een niit meto'. Mes sin ka nahinen fa pulau naan in kanan. Ma sin niit tasi tukaf mese, le' in ninen masnaen. Es on naan sin nafneek, kalu lekog, sin he neki bnaog annao an'abnonon anpe'o fatu putun een, he anteen tasi piis ana' naan in ninen nok alekot. 40 Es on naan sin nlefi nafeek besi tonun nabaaln aa anbi tasij. Lalit sin nasanut kemudi noi tasij, he sin nabe'i anfole abnaog naan. Lalit sin nasaeb layar ana' abit matan he anin anfuu bnaog ee nnao noi tasij ninen. 41 Mes abnaog naan ansae naan asnae a'tupus anbi tasij nanan, ma in anhiu anbi naan, ma ka nabe'i annao nteni fa lee. Es on naan okin anaek een antepo naklati abnaog in kotin.

42 Tabug solalus een niit on nanet, sin he nlolo niis atoni buij sin. Fun sin namtaun, naik-naika atoni buin naan nalo'en noin meto', lalit sin naenan kuuk. 43 Mes anaak solalus, nai Julius, antaal in solalus een, natuin in he anpanat nai Paulus. Es on naan in naplenat, he sekom-sekog kalu nalo'e nahinen, anpolin ok noin tasij lalit nalo'en noin meto'. 44 Noi le' sin ka alo'e ahinet een, in anlelu sin he anna'an a'bena' ai' saa'-saa', lalit antaam noin tasij ma natuin okin een anpoin noin meto'. Es on naan hai mtee meto' nok ao-mina' ok-oke'.