Gubernur Festus anpalekas nai Paulus in lasij
25
Tabug naan, gubernur fe'ug, nai Festus, nananib neem anbi koot Kaisarea he nanaoba' in aplenat. In aal natgua anbi naan nenog teen guah, lalit in nnao nfiin noi Yerusalem. 2 Anbi naan, anaak lasi palsait Yahudi sin anaakf een nok anaet abjaan sin neman he nmakhiin een nok gubernur fe'ug naan. Sin anteek naan nai Paulus in laasj ee msa'. 3 Sin antotin, he kalu nabe'i, gubernur fe'ug anlelu in atonin, he neki nafani' nai Paulus neem noi Yerusalem. Fun kaah, sin anma'akolan nalalin, he nlolo niis nai Paulus anbi lalan atnanan.4 Mes gubernur ee natae sin am nak, “Au ama' ala ki! On ii. Maut he sin ntaahn ee fe' anbi Kaisarea. Fun au he 'fani labah 'oi nae. 5 Es on naan kalu na'ko hi le' iij, anmu'i tuaf he n'ulus lasij naan, sin nok kau he amnao moi Kaisarea. Kalu teeb atonij naan anmo'e sanat, nalekot, hi mibe'i mmaklasi mokan ambi moi nael ee.”
6-7 Lalit gubernur Festus nabala fe' anbi Yerusalem of ai' nenog bo'es aah, na' in anbelok anfani noi Kaisarea. Tabug naan, anmu'i naan atoni Yahudis fauk nokan, antee nae. Anmiu on nanet, gubernur ee nfai nafani lasij naan. In anlelu he sin neki nai Paulus, he neem noi in matan.
Tabug nai Paulus antaam anbi naan, atoni Yahudis sin anhaken ma antool naan nai Paulus, lalit sin anmulai nasaan ee nok sanat huma'-huma'. Mes sin ka nabe'i fa he naklila' bukti mese amsa'.
8 Lalit nai Paulus namneob on am nak, “Ama' gubernur. Au ka 'mo'e 'iit fa lasi sanat saa'-saa'. Au ka 'mo'e 'iit fa lasij le' anlaban nok hai atolan palsait Yahudi msa'. Au ka 'hainisi 'iit fa hai Ume Onen Uuf anbi Yerusalem. Ma au ka 'mo'e 'iit fa lasij saa'-saa' he 'laban anaa' aplenat Roma in atolan.”
9 Mes gubernur naan, he nami atoni Yahudis sin neek een he nokan. Es on naan in antoti nai Paulus am nak, “Ho mutenab, on mee? Ho mlomi, ai' kaha, kalu au 'ulus ho lasij ii anbi Yerusalem?”
10 Anneen gubernur ee in haan totis, nai Paulus natael am nak, “Ama' gubernur. Au le' iij, a'mu'i' hak toog Romas. Ma tabug iij, au 'hake 'bi anaa' aplenat pah Roma in matan, le' in nmu'i hak he n'ulus au lasij natuin atolan plenat pah Roma. Es on naan au ka 'lomi fa he 'nao 'oi Yerusalem, he nafeek au lasij anbi nae. Ho mekin om muhine mulali mak, au ka 'mo'e fa sanat saa'-saa' le' he 'laban atoni Yahudis sin. 11 Es on naan kalu teeb au 'mo'e 'saan saa'-saa' le' anmatoom nok he nhukum na'mate kau, au 'simog. Mes kalu saa' le' sin naguab nanij ka namneo fa, natuin in atolan, ka tiit tani fa es he annona' kau noi atonin iij sin aniimk een. Sin aal haa nam-nami lalan, he nlolo na'mate kau luum aah. Es on naan tabug iij, natuin au hak, au 'eki au lasij iij a'sae 'teni' 'oi usi kesel anaek, anbi koot uuf Roma. Maut he in es le' nekin on nafeek lasij ii.”
12 Anneen nai Paulus naguab on naan, gubernur ee nok in apalekas laeen sin, nabguan ma naguab een. Lalit in natoon noi nai Paulus am nak, “Natuin ho mtoti mulali he meki ho lasij he msae mteni' moi kesel, es on naan, ho lo he mnao moi koot Roma.” Naguab nalali on nanet, in nlelu abguat een he nbatis ok.
Nai Festus antoti fainekat na'ko kesel Agripa anmatoom nok nai Paulus in lasij
13 Lalit atoni Yahudis sin kesel, kanan nai Agripa,a nok in fetof, kanan bi Bernike, neman anbi Kaisarea. Sin neman he ntola een noi gubernur fe'ug naan. 14 Sin natguan nok gubernur Festus mas aloog. Nenog mese te, nai Festus natonan sin anmatoom nok nai Paulus in lasij am nak, “Aam kesel! Anbi Kaisarea le' ii, hai mtahan atonij mese, kanan nai Paulus. Nenog naan, gubernur ahunut ka nafeek naan fa in lasij. 15 Nenog fauk afinit een, tabug au 'eti 'bi Yerusalem, anaak lasi palsait Yahudi sin anakat een ma sin atoni mnasi halat een, neman ma ankalakan nai Paulus. Lalit sin antoti kau he au 'hukum. 16 Mes au utoon 'oi sin am 'ak, ‘Tatuin atolan plenat Roma, au lo he 'palekas 'aan lasij naan fe', na' au ufeek. A'aa' lasin lo he nabguan fe'. Au he 'neen aan 'ak hi misaan ee anmatoom nok sanat saa'. Ma in amsa' lo he napeni meinuan he namneob on, hena' au ube'i ufeek lasij naan, ma thukum ee nok hukum huma' mee.’ 17 Lalit tabug au 'fani 'uum 'oi Kaisarea, atoni Yahudis fauk nok kau neman anbin ii. Anmiu, au 'fai ufani' aan lasij naan. Au uplenat sin he neki nai Paulus neem noi kau, he au 'neen 'iit in lasij in anaon. 18 Lalit atoni Yahudis sin nbaisenun ma anmulai naguab een noi nai Paulus in sanat sin. Mes saa' le' sin natoon sin naan, ka mafena' fa nahuum on le' au utenab. 19 Sin aal nasulin aah anmatoom nok sin lasi palsait een kuuk. Ma sin nasulin nok nai Paulus, natuin tuaf mese, kanan Nai Yesus. Tatuin atoni Yahudis sin, Nai Yesus naan, anmate nalaal je. Mes nai Paulus anmatoe matani' nak, Nai Yesus anmoni nfaan. 20 Sin nasulin on le' naan, mes natuin au atoni fe'ug kau, es on naan au ka uhine 'ani fa le' he tafeek lasi palsait iij ee, on mee? Es on naan au 'toti nai Paulus am 'ak, ‘On meel kalu au 'palekas ho lasij anbi Yerusalem?’ 21 Mes in ka nlomif. Es on naan in antoti he neki in lasij ansaen nteni' noi kesel anbi koot uuf Roma. Es on naan au 'tahan ee fe', tal antee au upeni meinuan he 'sonu ee annao noi Roma.”
22 Anneen nalali nai Festus in aguaban ee on nanet, kesel Agripa nak, “Kalu nalekot, au he 'neen kuuk atonij naan.”
Es on naan nai Festus natael am nak, “Lekog! Of au 'atol he anmiu, ho amneen kuum mu'kon.”
Kesel Agripa anlomi he nneen nai Paulus in aguab een
23 Anmiut, gubernur Festus naloitan he kesel Agripa nabe'i nneen nai Paulus in aguaban. Ma in an'atol he too mfaun een abjaan amsa' anneen nok nai Paulus. Sin es le': solalu 'naakf een, ma anaet een na'ko koot Kaisarea. Lalit kesel Agripa nok bi Bernike antaam neman, ma sin anpaken pakel kesel. Es on naan too mfaun een nabees ma antola noi sin nua sin. Tabug sin nabguan ok-oke, gubernur ee anlelu he nok nai Paulus antaam neem.
24 Nalalit sin neki nai Paulus antaam. Lalit gubernur ee naguab am nak, “Kesel Agripa, au ama' ala ki, ma ale' tamu een ok-oke', le' au ulatan ma 'tola 'ani ki. Atonij le' ii, kanan nai Paulus. Anmu'i naan anakat atoni Yahudis fauk le' sin namin lasij nokan. Es on naan anmu'i tuaf neman noi kau, tabug au 'bi Yerusalem ma 'bi Kaisarea he naseke' kau nak, atonij le' iij, in anmoni msa' ka ma'upa' fa. 25 Es manum au 'palekas, mes au ka upeni fa in sanat le' namnees nok hukum amaten. Mes in nekin on antoti nalali he nasaeb in lasij annao nfiin noi koot uuf, es naleko' ka naleko', au lo he 'sonu ee annao noi koot Roma. 26-27 Kalu au 'sonu, au lo he 'luul 'aan sulat mese le' anmatoom nok lasij naan. Mes tabug iij, au he 'luul 'ak saa' 'oi kesel naek ee? Es on naan au ubguab ki ok-oke', he hi mneen ee. Amneen milalij, au 'toti 'oi kesel Agripa he nfee naan kau fainekat mese, he au 'luul sulat le' nabe'i kesel anaek ansimog nok neek alekot. Au 'naben on le' he ka lekog fa, kalu au 'sonu' lasij ii annao noi kesel, mes au ka utoon fa atonij ii in sanat.
Au 'guab tuk-tuka' ma pal-pala' on le' naan.”