Nai Paulus namneob on
22
Es on naan nai Paulus anmulai naguab am nak, “Au ama ma au aok-abjaan ala ki ok-oke! Au 'toti ki he hi mitniin maan kau, he au uguab he umneob ok.”2 Tabug naan, too mfaun een nneen nai Paulus naguab anpake sin aguab. Es on naan sin an'ela nanin, he nneen nalek-leko' in aguaban naan. Es on naan in nluut am nak, 3 “Lamun hi ala ki mihine mak, au le' iij, atoni Yahudis. Au ina' nahonis kau anbi koot Tarsus et propinsi Kilikia. Mes au u'nae 'bi iij, koot Yerusalem. Le' nanoni' kau es le' kulu naek anbi iij, nai Gamalial. In nanoni' kau namnuut anmatoom nok baba nai Musa in atolan sin ok-oke'. Au 'makoe msa' he utuin Uisnenog, paap mese on le' hi.a 4 Tabug naan, au ka usnaas fa he li'u ma 'mo'e ususab tuaf een le' natuin Nai Yesus In Laal A'honis. Au 'heel 'eki sin, es bifeel ma atonij, neman noi Yerusalem, lalit au utaam sin anbin ume buij. Tabug naan, anmu'i amates amsa'. 5 Hit anaak lasi palsait Yahudi sin anakaf anaet, ma anaak lasi palsait abjaan amsa', sin nahinen nalalin nak au uguab 'ak saa', tebe on naan! Au ka umoe. Fun sin es le' anfee kau suul kuasat, he au 'nao 'heke 'aan tuaf-tuaf le' natuin Nai Yesus, tal antee koot Damsik. Anbi naan, au he 'heke sin, lalit au he 'heel 'eki sin neman noin Yerusalem. Au utenab 'ak, mautu he afeek lasi palsait een es le' anhukum sin.”b
Nai Paulus natu'in saa' le' in annaben niit
6 Es on naan nai Paulus anluut anteni in aguaban naan am nak, “Es on naan au 'nao 'oi koot Damsik, he au 'ami sin anbi nael. Of on le' manas napuup, aal akle'og te hai he mtee koot naan. Nok askeken, anmu'i naan apinat mese na'ko nenog, antoom kau. 7 Es on naan au 'tiloto 'oi naijaan, ma au 'neen hanaf mese naguab am nak, ‘Hoe, Saulus! Nansaa' am es ho mhamu'i Kau on le' iij?’ 8 Au 'neen hanaf naan, mes au ka 'iit fa tuaf mese msa'. Es on naan au 'toti m'ak, ‘Usi', ho sekog ko?’
Lalit hanaf naan natae kau mnak, ‘Au le' iij, Yesus, atoni Nasaret, le' ho mhamu'ij.” 9 Mes atonin le' annaon nabgua nok kau, sin niit apinat naan, mes sin ka nnenan fa hanaf naan.
10 Es on naan au utae m'ak, ‘Kalu on naan, tabug iij, au he 'mo'e saa'?”
Hanaf naan anlelu kau mnak, ‘Amfeen nai, amtaam nai moi koot in nanan. Anbi naan, na' Au utoon ko ale' lasin le' ho lo he mmo'e mani sin.’
11 Au 'neen ulali on nanet, au 'fena 'haak. Mes au ka ube'i fa he 'ail saa'-saa' antein, natuin apinat le' naan es nafolob kau. Es on naan au aok-abjaan sin nnaa' kau, ma annone kau, ma hai amtaam moi koot Damsik.
12 Anbi naan, anmu'i nani tuaf mese, kanan nai Ananias. Atoni' iij, in nekan ee namneo, ma in annaa' nahelan atolan baba nai Musa amsa'. Ale' atoni Yahudis abiten koot naan, sin anlomij, ma antola. 13 In neem nami kau, lalit naguab am nak, ‘Ba'e! Ho maatm een naan, naleko nalalin. Es nanet, amfai ma mail nai!’ In naguab nalali on nanet, au uaiti' au humak, ma au ube'i 'ail ee. 14 Lalit in nanoni' kau mnak, ‘Uisnenog, le' hit babaf een an'onen noi Ne, tabug iij, anbeti nalali ko. Ho mepug es le' he muhine mulek-leko' In alomin. Ma muhiin muleko' msa' Usif Yesus naan, le' hit atteek Ee tak, “Atoni Knino'” na'ko un-unu'. Tabug iij, Uisnenog anfai lalan noi ko, he ho mneen kuum ma'ko Usif Yesus. 15 In nekin On anbeti nani ko, he mnao mutoon In Tu'in Alekot noi tuaf-tuaf anbi meel am meel. Ho lo he mutoon ale' saa' le' ho miit ma mneen kuum na'ko Na. 16 Naika mpao al-aloog antein. Amnao mak sin, he naslani ko nai, he anjali taka nak, ho mtoti mulali he Usif Yesus ansako nani ho sanat sin.”’
Uisnenog naplenat nai Paulus he neki Tu'in Alekot noi tuaf le' ka atoni Yahudis fa
17 Es on naan nai Paulus anluut anteni in aguaban naan am nak, “Lalit au 'fani 'oi Yerusalem. Nenog mese, au 'nao 'onen a'bi Ume Onen Uuf. Tabug au 'onen, Uisnenog nakliil On noi kau anbi mnitas. 18 Au 'iit Nai Yesus. Es on naan In naplenat kau mnak, ‘Tabug iij, ho lo he mnao musaitan koot Yerusalem nai! Fun abiten balel iij, sin ka nlomin fa he ansimo saa' le' ho munoni' anmatoom nok Kau.’
19 Mes au ka 'lomi fa he 'simo plenat naan, natuin un-unu', anaak lasi palsait sin anlomi kau. Es on naan au utae m'ak, ‘Mes on ii! Sin ala sin nahinen nak, nenog naan au es le' a'poi ma 'taam ume onen anbi meel am meel, au 'heke ma 'tepo atonin le' anpalsai Ko. 20 Sin nahinen nak, tabug sin anpoli na'mate Ho haef, nai Stefanus, au msa' a'bi naa, ma au 'lomi msa'. Tabug sin nabguab een fatug he npoli nai Stefanus, au es le' uhuta sin, ma au es le' a'pao sin soo balug.’c
21 Au umnaub Ee on le' naan, mes Usif Yesus naplenat nafanik kau mnak, ‘Naik am'etu alasan huma'-huma'! Musaitan Yerusalem tabug iij! Natuin Au he 'lelu ko he mnao moi bale aloot een, he munoni' atonij abjaan le' ka atoni Yahudis sin fa.”’
22 Tabug too mfaun een anneen nai Paulus naguab nak, Uisnenog es le' anlelu naan ee, he nnao noi atoni' 'teta', sin ka nlomin fa he nneen antenij. Sin namaunun, lalit sin anhunun een ok-oke' mnak, “Naik amneen atonij le' iij! Amlolo misan! In anmoni msa' ka ma'upa' fa.”
Solalus een neki nai Paulus annaon noi benteng
23 Sin ankua' een on naan, es on naan sin nkasu nani sin soo balug, lalit sin naun afu skuku' ma nakpene', natuin sin namaunun nmaten. 24 Tabug solalu 'nakaf naan niit sin antaisibun anfanin, in nlelu in solalus een he anheel nataam nai Paulus noi benteng. Lalit anakat naan anlelu he antepog, he in nmanaku' nak in anmo'en saan saa', tal atoni Yahudis sin he nlolog. 25 Tabug sin anfutu nai Paulus he antepog, in annike ma antoti solalus atepos am nak, “Natuin atolan plenat pah Roma, meel es namneo? Kalu tuaf mese in nmu'i hak toog Romas, lalit in napeni lasij, hi he mmo'el on mee? Hi mtepog nahunu, oo? Ai' hi mpaleeks ee nahuun?”
26 Anneen on nanet, solalus naan nami in anakat. Ma in natoon am nak, “Aam! Atoni' iij anmu'i hak toog Romas! Es on naan ho he mmo'el, on mee?”
27 Anneen on nanet, solalu 'nakaf naan, in nekin on antoti nai Paulus am nak, “Nak ho mmui' hak toog Romas? Tebe, oo?”
Nalalit nai Paulus natael am nak, “Teeb! Au 'mu'i hak naan.”
28 Lalit solalu 'nakaf naan nak, “Au on nane msa'. Au 'baen anaek, hena' au upeni hak naan.”
Mes nai Paulus natael am nak, “Kalu au, ka 'baen fa saa'-saa'. Anmulai na'ko au ina' nahonis kau, au 'naa' 'ani hak le' nane. Au ama' nnaa' hak le' nane msa'.”
29 Tabug sin annenan nak nai Paulus anmu'i hak toog Romas on nanet, solalus een antet-kotin, ma sin ka nabe'in fa he antepog ma npalekas antenij. Solalu 'nakaf naan namtau, natuin in es le' anlelu he anfutu nai Paulus. In nahine nalali nak in ntanhai atolan.
Nai Paulus anbi bale feek lasi palsait Yahudi
30 Anmiu, solalu 'nakaf naan, in nami he nahine namneo lasij naan in uun ma in anaon, on mee. Lalit in nlelu in solalus een he nnao no'en nabguab tuaf een le' bijaas nafekan lasi palsait Yahudi. Nalalit in nlelu he ansefi nai Paulus in konelit, lalit sin nekij annao nateef nok afeek lasin naan ok-oke'.