Nai Saulus antaam anjali Usif Yesus Inij
9
Tabug naan, nai Saulus ansali piut-piut ma nhamu'i Usif Yesus Inin. In nami lalan he nlolo niis sin amsa'. Es on nane, in annao noi lasi palsait Yahudi sin anakaf anaek, 2 ma ntoti suul aplenat he neki sin noi anaak lasi palsait Yahudi sin anbi sin ume onen sin et koot Damsik. In antoti he kalu in nateef nok apalsait een noi Usif Yesus In Laal A'honis, bifeel ma atonij, in he anheke ma anfutu sin, ma anheel neki sin noin Yerusalem.3 Ansimo nalali suul apleent een nanet, in nok in aon-abjaan sin annaon noin koot Damsik. Tabug in anhaumaak koot le' naan, nok askeken, pina mese na'ko neno tunan antana antoom nai Saulus. 4 Es on naan in antiloot antee nani naijaan. Lalit in anneen hanaf mese naguab noi ne mnak, “Saulus! Nansaa' am es ho mhamu'i Kau on le' ii?”
5 Nai Saulus antoti mnak, “Sekog es le' aguab ii?”
Hanaf naan natael am nak, “Au le' iij, Nai Yesus, le' ho mhamu'ij. 6 Tabug iij, amfeen nai, ma amtaam nai moi koot naan. Anbi naan, Au of utoon ko saa' le' ho he mmo'el.”
7 In aon-abjaan sin annenan hanaf naan amsa', mes sin ka niit fa sekom-sekog. Es on naan sin neek een namnekun, tal antee sin ka fefa' mese fa.
8 Lalit nai Saulus anfeen anhaak. In he nfai in maatn een, mes in anfolo nmaat. Es on naan sin nnaa' in animan, ma nokan antaam noi koot Damsik. 9 Nenog tenu mfai tenu 'teem-teme', in ka niit fa saa'-saa'. Ma in ka neku ma ninu fa saa'-saa'.
10 Anbi koot naan, anmu'i apalsait mese, kanan nai Ananias. Usif Yesus neem nakliil On noi nai Ananias anbi mnitas, ma nak ee mnak, “Ananias!”
Ma nai Ananias natael am nak, “Au es iij ee, Usi'!”
11 Usif Yesus anpaa' ee mnak, “Uum fe'! Ho mnao he mami Au atonij mese. Amnao moi Lalan Maneo Puput moi atoni es in umel. Atonij naan in kanan nai Yudas. Anbi umel naan, ho mu'eku mok atonij mese, kanan nai Saulus. In na'ko koot Tarsus. Tabug ii, in an'onen. 12 Au 'feen nai Saulus amnitas amsa' ma utoon ee m'ak, ‘Of anmu'i atonij mese, kanan nai Ananias, neem nateef nok ko.’ Ho mnao he mtao ho 'nimam he in nabe'i niit anfaan.”
13 Mes nai Ananias natael am nak, “On ii, Usi'! Hai mneen milali benog huma'-huma' anmatoom nok atonij le' naan. In nhamu'i niis Ho too knino' een abiten Yerusalem. Tal antee sin susal, ka ba-baun fa! 14 Tabug ii, hai mneen amteni' nak, anaak lasi palsait Yahudi sin anaakf een anfeen ee kuasat he neem ma anheke nani tuaf-tuaf le' antaam natuin Ho Laal A'honis.”
15 Mes Usif Yesus naguab anteni' nok nai Ananias am nak, “Maski on nane msa', mes tabug ii ho lo he amnao! Fun Au 'pilij leen he nasoitan lalan noi Kau, maut he in neki Tu'in Alekot noi atonij na'ko uuf ma pah abjaan, ma noi kesel sin, ma noi toog Israel amsa'. 16 Au of utoon ee, he in nahine, nak ha'mu'it huma' meel es le' anpao nanij, natuin in npalsai ma nok Kaug ee.”
17 Anneen Usi' In a'an on nanet, nai Ananias annao noi umel naan, lalit in antaam anbi naan. In antao in animan anbi nai Saulus am nak, “Ba'e! Usif Yesus le' ho miit Ee anbi lalan tabug ho uum, In nekin On es anlelu kau he 'uum u'eku 'ok ko. In anlelu kau he au 'onen ma 'tao au 'nimak noi ko, he ho mube'i miit amfaan. In nlomi he ho msimo In Asmana Knino' amsa'.”
18 Tabug naan, nai Saulus annaben saa' es on le' ika' po'at anmofu na'ko in maatn een, ma in nabe'i niit anfani nani. Lalit in anfeen ma sin naslanij. 19a Nalalit in neku ma ninu, tal antee in aon ee nabe'i nfaan.
Nai Saulus natoon Tu'in Alekot anbi koot Damsik
19b Nai Saulus fe' natgua nabala akle'og nok Usif Yesus Inin anbi koot Damsik. 20 Ma in nnao ntaam anbi atoni Yahudis sin ume onen, ma in natoon noi sin am nak, “Mneen milek-leko'! Namneo-namneo Nai Yesus naan, Uisnenog In Anah.”
21 Ale' too mfaun sin namkakan ma ansanmakan noi nai Saulus in aguaban naan. Es on nane, sin naguab een am nak, “In le' ii, es le' nhamu'i Usif Yesus Inin anbi Yerusalem, ai' kaha? Lalit in neem noi ii, he anheke sin ma neki sin annaon noi anaak lasi palsait Yahudi sin anaakf een! On meel es le' ii!?”
22 Nai Saulus anlomi he naklila' bukti mnak, Nai Yesus le' naan, Kristus le' Uisnenog npaa' nanij na'ko faijan unun, he ansonu Ee neem. Nai Saulus nanoni' nok maat-maat tal atoni Yahudis sin ka niis ee fa. Es on nane, nai Saulus in amo'en na'nae piut na'ko tabug noi tabug.
23 Anfini kle'og na'ko tabug naan, atoni Yahudis sin namin lalan he nlolo niis nai Saulus. 24 Mes nai Saulus annaben nahine sin tenab naan. Sin anpao nai Saulus faij-manas anbi eno' 'poit koot naan, he nlolo nisan. 25 Es on naan anbi faij mese, nai Saulus in aok-abjaan tuaf fauk neman, ma nasnono naan ee anbi oba', lalit nasanut ee na'ko baah fatug mnanu' koot naan. Natuin lalan naan, in naen nasaitan koot Damsik.a
Nai Saulus annao noi Yerusalem
26 Lalit nai Saulus annao noi Yerusalem. Anbi naan, in he antaam nabgua nok Usif Yesus Inin. Mes sin ala sin namtausan nai Saulus, natuin sin nateenb een am nak, in nmoo' lon he anjali on le' antaam apalsait noi Usif Yesus. Lalit na' in he anheke sin. 27 Mes anmu'i atonij mese, kanan nai Barnabas. In es le' nahineb nai Saulus nok Usif Yesus In haef een anbi naan. In natoon noi sin ale' lasij le' anjali noi nai Saulus anbi lalan. In natoon nak nai Saulus na'eku nalali nok Usif Yesus amsa'. Ma Usif Yesus naguab maat-maat nok ne msa'. Nai Barnabas natoon amsa' am nak, nai Saulus lo balani he natoon Usif Yesus In Laal A'honis noi abiten Damsik.
28 Annenan on nanet, sin ansimo nai Saulus. Lalit in natgua nok sin anbi koot Yerusalem. In balani he naguab anmatoom nok Usif Yesus In Tu'in Alekot noi sekom-sekog, natuin in ka namtausan fa saa' es. 29 In nmafeen penit nok atoni Yahudis fauk le' naguab een neki aguab Yunani amsa'. Mes sin ka nlomin fa he nsimo in penit ma in aguab een naan, es on naan sin namin lalan he nlolo nisan. 30 Mes tabug Usif Yesus Inin annenan am nak, tuaf abjaan een nateenb een amle'ut on nanet, sin naen neki nai Saulus noi koot Kaisarea et tasij ninen. Lalit sin anleek ee he nnao nfini noi in kuan, et koot Tarsus.
31 Lalit Usif Yesus Inin le' abiten propinsi Yudea, propinsi Galilea, ma propinsi Samaria, sin nmonin nok tainine' ma taimamut. Sin anmalolun piut. Ma sin nmo'e natuin Usif Yesus In lomin. Ma Uisnenog In Asmana Knino' nha'tani sin neek een.
Nai Petrus naleko' atoni amenat mese anbi kuan Lida
32 Tabug naan, nai Petrus bijaas annao noi balel-balel he nail Usif Yesus Inin. Anbi nenog mese, in nnao nail nonot apalsait abiten kuan Lida. 33 Anbi naan, in na'eku nok atonij mese, kanan nai Eneas. Atoni' naan ao a'olet. Toon faan guen, in ka nfeen niit fa na'ko in hala 'tupa'.
34 Nai Petrus naguab noi ne mnak, “Eneas! Tabug ii, Yesus Kristus naleko' ko. Es on naan ho mfeen nai! Ampainote ho bale 'tupa'!”
Anneen nalali on nanet, in anfeen naan. 35 Tabug abiten kuan Lida ma kuan Saron niit nai Eneas naleko on nanet, sin ala sin anpalsain noin Usif Yesus.
Nai Petrus namonib nafani' bi Tabita na'ko in amaten
36 Tabug naan, anmu'i bifeel mese, kanan bi Tabita, le' natgua anbi koot Yope et tasij ninen. (Bifeel naan, in kanan neki aguab Yunani nak, Dorkas, le' neki hit aguab ee nak ‘luus’).b In npalsai noi Usif Yesus. In nmo'e alekot piut noi in aon-abjaan sin, ma nbaban ale' ama'mu'it een. 37 Tabug naan, bi Tabita nameen, lalit in anmaat. Es on naan sin naniu in ta'un, ma sin n'amug lalit sin natupab anbi in ke'an abit fafon. 38 Tabug naan, sin nneen nak nai Petrus natgua ntahan anbi kuan Lida. (Kuan naan, in aloon ee neno steen fes, kalu tnao hae ta'ko koot Yope.) Lalit sin nleek tuaf nuug he annaon anhone nai Petrus am nak, “Aam! Hai mhone ko, he mkoen om uum labah moi Yope.”
39 Anneen haan honet nanet, nai Petrus nok nani sin. Anteen balel nanet, nai Petrus antaam ma ansae nfini anbi bi Tabita in ke'an. Ke'an naan nahenu nok bifee banu' le' neman ma nkaen anme'-me'ul ok. Sin naklila' sin soo balu pakel een ma pakel abjaan antein le' bi Dorkas ansoo sin, tabug in fe' anmoni.
40 Nai Petrus anlelu sin he anpoin ok-oke' na'ko ke'an naan. Es on naan in nli'tuu ma n'onen. Lalit in nabaino' noi amates naan ma naguab am nak, “Oin Tabita! Amfeen nai” Nok askeken, bifeel naan anfai in matan. Tabug in nail niit nai Petrus, in anfeen ma antook. 41 Lalit nai Petrus annaa' in animan ma nfiti nafena. Nalalit nai Petrus no'en bifee banu een ma tuaf abjaan anbi naan, he nana'at bifee amonit naan noi sin.