23
Anteen nanet, sin anlelu nai Paulus he naguab namneob on. Lalit in nail nalek-leko' atonin le' naan, ma naguab am nak, “Au aok-abjaan ala ki! Au 'hake 'bi iij, nok neek amneot. Uisnenog nahine kau na'ko au aan'-ana' tal antee nenog iij, au nekak knino'.”2 Anneen nai Paulus naguab on nanet, nai Ananias,a in es le' anjali lasi palsait Yahudi sin anaak anaet, namaunun nmaat. Es on naan in naplenat tuaf le' nhake anhaumaak nai Paulus am nak, “Ampaas maan ee paap es noi in fefan!”
3 Es on naan nai Paulus in natae nai Ananias am nak, “Of Uisnenog anpaas nafani ko. Fun ho on le' niij le' fe' nseet nalalij anbi kotin, mes in nanan naem een ansolog. Ho mtoko ambi ii, ma mmo'e ho aom ee, on le' atoni knino'. Lalit ho he mhukum kau, natuin hit atolan halat. Mes ho le' naan amtanhai atolan naan amsa', tabug ho mlelu he anpaas kau.”b
4 Anneen nai Paulus naguab on nanet, atokos apaumakat sin nakain ee mnak, “Hoi! Ka nabe'i fa he ho muguab on le' naan noi hit anaak anaet!”
5 Es on naan nai Paulus natae sin am nak, “Tebe, oo? Kalu on naan, au upaaln ok 'oi ki, natuin au ka uhine fa 'ak, in le' nael, hit anaak anaet. Namneo, Uisnenog anpake tuaf he anluul nani nak, ‘Ka nabe'i fa he hi miguab mile'uf moi hi anakaf sin.”’c
6-8 Tabug nai Paulus niit sin atokos le' he nafekan lasi palsait, in nahine nak, sin na'kon pukan nuug. Abjaan Saduki, le' sin anpalsain nak, amates ka nabe'i fa he nmoni nfaan. Sin anpalsain amsa' nak, Uisnenog ka nmu'i fa ahaket et sonaf neno tunan. Ma ka nmu'i fa asmanaf. Pukan mese anteni' es le' pukan Farisi, le' npalsain am nak, of Uisnenog namonib nafani' amates sin. Sin anpalsain amsa' nak, anmu'i asmanaf, ma Uisnenog anmu'i ahaket et sonaf neno tunan.
Es on naan nai Paulus naguab naheel nain jon nak, “Au aok-abjaan ala ki! Lamun hi mihine ok-oke' mak, au le' iij, atoni Farisis kau. Au ama' ma au babaf, atoni Farisis amsa'. Tabug iij, hi he mhukum kau, natuin au 'palsai 'ak Uisnenog nabe'i namonib amates.”
Tabug nai Paulus naguab on nane, atoni' Farisis ma Sadukis sin anmatoen, tal antee sin ka nmalomin fa leen. Lalit sin anbatis ok anjalin pukan nuug.d 9 Es on naan afeek lasij naan anmatoen, tal antee ntaisibu naek. Lalit anmu'i kulug na'kon nonot Farisi anhaken ma anpesi nok nai Paulus. Sin naguab een nak, “Atonij iij, ka nsaan fa! Naik-naika anmu'i asmanaf, ai' Uisnenog In ahaket sonaf neno tunan es, le' neem naguab nokan!”
10 Kulug sin naan, naguab nalalin on le' naan, mes sin nmatoes manenu le'uf, tal solalu 'nakaf naan anmulai namtau. In natenab nak naik-naika sin n'usa' niis nai Paulus. Es on naan in nlelu solalus een ansanun he anheel nataam nai Paulus noi benteng.
11 Anfait, Usif Yesus neem nakliil On noi nai Paulus. Ma In nha'tani nai Paulus in nekan am nak, “Paulus! Ho naik mumtau! Tabug iij, ho muguab mulali anmatoom nok Kau anbi Yerusalem ii. Mumnau mulek-leko'! Of ho lo he muguab on le' naan anbi Roma amsa'.”
Sin nma'akolan he nlolo nai Paulus
12-13 Nok-nok ana', atoni Yahudis annesi na'ko tuaf bo' haa, sin anma'akolan he na'mate nai Paulus. Sin ansupan am nak, “Hai ka mlomi fa he meku ma minu kalu hai ka fe' amlolo maan fa nai Paulus.”
14 Sin ansupan nalalin on nane, sin annaon natoon anaak lasi palsait Yahudi sin anakaf sin, nok atoni mnasi' halat Yahudi sin am nak, “Hai ama' ala ki! Hai msuup milali mak, hai ka mlomi fa he meku ma minu kalu hai ka fe' amlolo miis fa nai Paulus. 15 Hai lomim een on ii: ama' sin lo he mnao ambaisenu solalu 'nakaf, he mtotij he meki maan nai Paulus noi bale feek lasi palsait. Ammoe' on le' hi he ampalekas mifani' in lasij. Of hai amsenu sin ambi lalan atnana', he hai amlolo misan.”
16 Mes nai Paulus upuf mese anneen sin lasi akolat naan. Lalit in naen noi benteng ma natoon noi in na'if. 17 Anneen nalali upuf naan in haan tonas, nai Paulus no'en naan solalu 'nakaf mese mnak, “Iij ee, au upu. Ho mekij amnao labah moi ho anakat, fun in he natoon naan aguab mese.”
18 Es on naan solalus naan neki aan mone naan noi in solalu 'nakaf. In natoon am nak, “Aam! Nai Paulus le' hit attahan ee naan, in anlelu kau he 'eki aan mone iij neem noi ko. In he natoon naan ko lasi mafeen le'uf mese.”
19 Lalit solalu 'nakaf naan anheel neki li'ana' naan noi bale luman mese, he sin nua sin anmesen. Ma in antotij am nak, “Ho he mutoon kau aguab saa'?”
20 Lalit li'aan mone naan natoon ee mnak, “Anmu'i naan atoni Yahudis fauk anma'akolan he sin nlolo niis au na'ij, nai Paulus. Sin he neman antoti ko, he anmiu, ho meki au na'ij mnao moi bale feek lasi palsait. Nak, sin namoen een he npalekas au na'ij in lasij namnuut. 21 Mes ho naik mutuin sin alomik een naan. Natuin of anmu'i naan tuaf bo' haa, sin of anpao ki anbi lalan he nlolo niis au na'ij, nai Paulus. Natuin sin ansupan nalalin nak, sin ka neku ma ninun fa, kalu sin ka fe' anlolo naan fa au na'ij, nai Paulus. Tabug iij, sin nabaalb een nalalin. Aal sin anpao ko, he ho mutae mak saa'.”
22 Anneen nalali aan monel naan in aguab een, solalu 'nakaf naan nak ee mnak, “Ho naik mutoon moi tuaf mese, mak ho uum mutoon kau lasij ii.” In naguab nalali on nane, in anlelu aan monel naan he nfaan.
Sin neki nai Paulus noi gubernur Feliks anbi koot Kaisarea
23 Lalit solalu 'nakaf anaek naan, no'en in solalus nakaf tuaf nuug. In naplenat sin am nak, “Miloitan maan solalus, tuaf natun nuug; ma solalus le' ansae bijakasel, tuaf bo' hiit; ma solalus amneki aunij, tuaf natun nuug. Hi mnao nai faij ii, leku seo, amnao moi koot Kaisarea. 24 Hi miloitan bijakasel mese noi nai Paulus. Hi mnao mimaat ee lek-leek, antee gubernur Feliks.”
25 Lalit in anluul sulat noi gubernur Feliks, nak on ii:
26 “Ama' gubernur Feliks le' au 'tola 'anij. Tabe. Ao-mina' ao-lekog na'ko kau, Klaudius Lisias.
27 Atonij le' au 'sonu ee neem noi ko iij, kanan nai Paulus. Atoni Yahudis sin anhekel, ala kle'og, sin he nlolo nisan. Nenog naan, au solalus een es anheel napoitan na'ko atoni Yahudis sin aniimk een. Lalit au uhiin amsa' nak in nmu'i hak toog Romas. 28 Au 'ami he uhiin, nansaa' am es atoni Yahudis sin he nlolog. Es on naan au 'ekij annao noi atoni Yahudis sin bale feek lasi palsait. 29 Mes sin ka napeni fa in sanat saa'-saa'. Namneo, in ka nmo'e fa maufinut saa'-saa'. Es on naan atoni' iij, in ka nabe'i fa he ntaam ume buij, ma ka nabe'i fa he thukum ta'matel. Fun kaah, afeek lasin le' anbin bale feek lasi palsait naan, sin anmatoen, natuin sin anoni' een anmatoom nok lasi palsait een nasulin. Es on naan au 'eki atonij ii anbi benteng. 30 Anmiu, au upeni hanaf nak, atoni Yahudis anma'akolan nalalin he sin nlolog. Es on naan au es le' uplenat he sin nekij neem noi ko. Au 'etun amsa' 'oi atoni Yahudis sin le' anmaklasi een nok atonij iij, he sin neman anbaisenu ko. Maut he ho es le' amneen kuum na'ko sin, saa' le' sin nasaan ee noin.
Au sulat le' iij, on le' naan. Na'ko au Klaudius Lisias kau.”
31 Lalit solalus een le' naan nabaalb een nalalin, he nanaob aplenat na'ko sin solalu 'nakaf. Faij le' naan, sin nok nani nai Paulus annaon tal antee koot mese, kanan Antipatris. 32 Anmiu, solalus asae bijakase een, sin annao nuu naat nai Paulus anfini tal antee koot Kaisarea. Mes solalus abjaan sin, anbelok anfanin noin Yerusalem. 33 Tabug sin anteen Kaisarea, sin nnona' sulat naan noi gubernur. Ma sin nana'at nai Paulus noi ne msa'. 34 Antae nalali sulat nane, gubernur antoti nai Paulus am nak, “Ho atonij mu'ko mee?”
Lalit nai Paulus natael am nak, “Aam, au le' iij, atonij u'ko propinsi Kilikia.”
35 Anneen nai Paulus nak on nane, gubernur nahine nani nak nai Paulus anmu'i hak toog Romas. Lalit in naguab am nak, “Au es le' anaa' aplenat a'bi ii. Es on naan au es le' he ufeek ho lasij. Mes hit atpao tuaf een le' sin ankalakan ko neem antee ii, hena' au 'palekas ho lasij.” Lalit in nlelu in solalus een he ntahan nai Paulus anbi sin balel mese anbi sonaf gubernur, le' nahunu kesel Herodes anmo'e nanij.