Nai Paulus sin anbelok anfanin noin Yerusalem
21
Hai mmaseon milali mok atoni mnasi' Kristen sin na'ko koot Efesus nok neek susal, hai msae bnao oel, lalit hai mnao mfiin moi pulau Kos. Anmiut, hai mok abnao oel naan, ma hai mtee pulau Rodos. Na'ko naan, hai mnao mfiin mok abnao oel moi koot Patara. 2 Anbi naan, hai msanu mi'ko abnao oel naan. Lalit hai msae moi abnao oel abjaan, le' he nnao noi propinsi Finisia, anhaumaak Siria. Tabug hai msae abnao oel le' naan, sin nasaeb nani besi tonug, ma hai mnao. 3 Hai mnao ka loog fat, hai mail miit pulau Siprus anbi hai animam aliij, mes hai mnao mfiin jah, tal amtee ma misanut besi tonug anbi koot Tirus et propinsi Siria. Anbi naan, sin he nasanut abnao oel in bale een. 4 Natuin sin nasanut een bale fe', hai msanu ma mnao mami apalsait een. Tabug hai mi'eku mok sin, hai mitgua mok sin nenog hiit. Apalsait een abiten naan, napenin hanaf na'ko Uisnenog In Asmana Knino', he ntaal nai Paulus he naika nnao nfiin noi Yerusalem. 5 Nenog hitu ankono, hai mfani moi bnao oel naan. Apalsait een ok-oke', es bifeel-atonij, abaut-anaet, mnasif ma munif, annao neki kai ntee tasij ninen. Anbi naan, hai mli'tuu ok-oke' ma m'onen. 6 Lalit hai mmaseon, ma hai msae moi bnao oel naan, ma sin anfanin ok-oke'.
7 Hai mfeen mi'ko Tirus, lalit hai mesi mok koot Ptolemais. Anbi koot naan, hai msanu mi'ko bnao oel, ma hai mnao mami apalsait een. Hai mi'eku mok sin, lalit hai mtoko mok sin nenog mese. 8 Anmiu, hai mok abnao oel naan, amnao mteni' na'ko naan, ma amtee koot Kaisarea. Anbi naan, hai mnao mitgua anbi nai Felipus in umel. In le' naan, es le' neki nahun-hunun Usif Yesus In Tu'in Alekot anbi naan. In tuaf mese na'ko tuaf hiit le' sin anpili sin anbin Yerusalem he anbatin bukael noi kulu-banu een.a 9 Nai Felipus anmu'i aan feto haa. Uisnenog npake sin anjalin In mafefa knino' he natoon In alomin.
10 Tabug hai mtoko mok sin of oni nenog fauk, atonij mese, kanan nai Agabus, neem na'ko propinsi Yudea. Uisnenog anpakel he anjali In mafefa' knino' he natoon Uisnenog In alomin amsa'.b 11 In neem na'eku nok kai. Lalit in naiti nai Paulus in pasu 'futu', ma in anfutu in haen-niman neki pasu 'futu' naan. Lalit in nak, “Uisnenog In Asmana Knino' naguab on ii: ‘Pasu 'futu' le' iij in tuan ee, of atoni Yahudis sin anpuun ee nahuum on le' iij anbi Yerusalem. Lalit sin nana'at ee noi atoni' 'teta' sin aniimk een.”’
12 Amneen atonij le' naan in aguab een, hai mtoti namneo-namneo moi nai Paulus, he naik annao nfiin noi Yerusalem. Hai, le' in aanh een kai, ma apalsait een abiten balel naan, antoti on le' nane msa'. 13 Mes in natae kai mnak, “Kahaf! Nansaa' am es hi mkae on naan? Hi mmo'e he mha'feen au nekak. On ii! Anmu'i tuaf le' ka nlomi kau fa, natuin au utuin Usif Yesus. Oni maski sin anfutu kau, ai' sin anlolo niis kau, ai' sin anmo'e kau on meel on meel amsa', mes au uloitan ulali he 'simog.”
14 Tabug hai mneen on nane, hai mihiine mak nai Paulus ka nlomi fa he nneen kaij een, es on naan hai mifetin ee haa mak, “Neu! He tak on meel! Maut he Uisnenog In alomin ee kuun es anjalij.”
Nai Paulus sin anteen Yerusalem
15 Nenog fauk een hai mitgua maan anbi Kaisarea, hai mpainote hai bale een, ma hai mnao moi Yerusalem. 16 Anmu'i apalsait tuaf fauk na'kon Kaisarea, nok kai msa'. Sin nnao nuu naat kai amtee umel mese, lalit hai amtuup ambin. Ume tuaf naan, kanan nai Manason. In na'ko pulau Siprus. In natuin Usif Yesus suuk aloog een. 17 Tabug hai mtee Yerusalem, hai aom-abjaan apalsait een, sin ansimo kai nok neek malinat.
Nai Paulus annao nail nai Yakobus
18 Anmiu on nane, hai ala kai mnao mi'eku mok nai Yakobus ma ale' atoni mnasi' Kristen sin nabgua nanin anbi naan. 19 Hai mmatabe es nok es, lalit nai Paulus naguab noi kai, suuk aloog anmatoom nok ale' lasin le' Uisnenog anmo'e nalali sin anbi meel am meel noi atoni' 'teta'. In nak Usif Yesus anfai lalan he sin anpalsain noin. In natoon amsa', on meel am es Uisnenog anpake in tuan, nok in amnono sin, anbi mepug ii. 20 Tabug sin anneen nalali nai Paulus in tu'in on nanet, sin namlilan ma anbo'is Uisnenog.
Lalit sin naguab noi nai Paulus am nak, “Paulus! Lamun ho muhine kuum, atoni Yahudis sin nifun-nifun le' npalsai nalalin noin Usif Yesus. Sin nnaa' nahelan fe' atolan plenat le' baba nai Musa nahakeb nani sin noi kit. 21 Mes anmu'i atonij le' neem naktuta' aguab nak, ho munoni' atoni Yahudis sin anbi balel abjaan mak, sin naika natuin baba nai Musa in atolan lasi palsait een. Ma sin ankalakan amsa' am nak, ho es amtaal sin he naika natuin halat maheli' noi sin aan monen. Ho es le' amtaal atoni' slani, he naika natuin anteni' hit atoni Yahudis atolan halat abjaan amsa'. 22 Mumnau! Of atoni Yahudis annenan nak ho et ii. Ma nneen aguab anin nanet, sin of namaunun. Es on naan hit tami laal poit, on mee?
23 Es on naan hai mtoti on ii: anmu'i tuaf haa na'ko kai, le' sin anmu'i manpaa' nok Uisnenog. Tabug iij, sin he npiu sin anaak een he anjali taka nak, sin anmo'en nalali sin lasi manpaa' naan. 24 Es on naan kalu leko, ho mtaam mok sin moi Uisnenog In Ume Onen Uuf. Ho mutuin sin amsa', he mmo'e mutuin halat le' he muknino' ho aom naa. Ho lo he amsutai sin baen een le' natuin halat amsa'. Kalu ho mmo'e on le' naan, of too mfaun een nak, ho fe' mnaa' muhel-helan plenat palsait Yahudi, le' baba nai Musa nahake' sin noi kit. Ma sin of nahinen tu'in le' nak, ho mtaal atoni' sin he naik natuin halat lasi palsait Yahudi, naan lasi moel ok-oke'!c
25 Mes noi atonij ka Yahudis fa, le' sin anpalsain noin Usif Yesus, hai msonu' milali sin sulat. Hai mitonan sin anmatoom nok hit fekat nenog naan nak, sin ka npaluu fa, he natuin hit atolan halat Yahudi sin ok-oke'. Le' sin he namnau he nmo'e natuin sin, es le': naik anmakaken ma nmapaisa' kalu ka feel-monel fa. Naik anseel gok nok bale fuat. Ma naik anbukaen amnahat le' sin aok-abjaan Yahudi sin anmainieen sin. On le': naik nekun sisi fuat. Naik nahan naa'. Ma naik nekun sisij na'ko mu'it le' tuaf anfutug ma nak'aal nisan, tal in naa' ee ka nsai anpoi fa.”d
26 Lalit nai Paulus ansimo sin haan totis. Es on naan anmiu on nanet, in nok le' tua haa' een naan, annaon noin Ume Onen Uuf. Nalalit sin naknino' sin tuak een natuin atolan lasi palsait Yahudi. Lalit nai Paulus natoon anaak palsait le' anbi naan nak, aal nenog fauk, na' sin nanokab sin haan manpaa'. Fun kalu tabug naan oke', sin es-es he nataam nani sin afgua'-tulu' sin noi Uisnenog.
Anheke nai Paulus anbi Ume Onen Uuf
27-29 Tabug nenog hiit he noi namsoup, le' sin anmanpaa' he nanokab atolan halat naan, anmu'i atoni Yahudis fauk na'ko propinsi Asia, le' sin niit nai Paulus anna-nao kuun anbi koot Yerusalem nok in amnono tuaf mese, kanan nai Trofimus. Nai Trofimus le' iij, na'ko Efesus, ma in ka atoni Yahudis fa msa'. Es on naan tabug sin niit nai Paulus antaam anbi Ume Onen Uuf, sin nak of ai' in nok in amnono naan antaam noin Ume Onen Uuf in nanan amsa'. Fun kaah, atoni' 'teta' ka nabe'i fa he ntaam noi Umel naan. Es on naan sin naiti lasij le' naan, he anjali alasan mese he sin anmo'en lasij. Es on naan sin anmakoke' nok too mfaun een anbi le' naan, he sin anheke naan nai Paulus. Sin anhunun een ma natonan too mfaun een am nak, “Hoe! Atoni Israel ki! Iim he ambaban maan kai. Atonij le' iij, in es le' nanoni' anbi meel am meel am nak, maiti mpolin halat atoni Yahudis. In naguab nale'uf noi Uisnenog In Ume Onen Uuf iij amsa'. Tabug iij anteni', in ntaam he anhainisi Uisnenog In bale knino' le' iij!”e
30 Annenan on nane, koot Yerusalem in toog ok-oke', sin namaunun namneo-namneo. Lalit too mfaun een naan naen nabguan anbi Ume Onen Uuf. Es on naan sin anheke nai Paulus, lalit sin anheel napoitan na'ko Ume Onen Uuf. Lalit sin na'eek nani nesun een.f
31 Tabug sin ntaisibun he nlolo nisan, solalus Roma sin anaak anaek mese le' npaumaak anbi naan, anneen taisibug naan. 32 Es on naan in no'en naan in solalus een nok sin anaakf een, he sin antaman noi too mfaun ataisibus een sin atnaank een. Tabug sin nail niit solalus een nok sin anaak anaet naan neman on nanet, sin nasnasab matepos noi nai Paulus. 33 Lalit solalu 'nakaf naan anheke nai Paulus, ma nlelu sin he anfutug neki konelit besi nono' nuug. Sin anfutu nalalij, in antoti too mfaun een am nak, “Atonij le' iij, sekog? In sanat saa'?”
34 Mes sin nasulin tonas. Abjaan nak, “In anmo'e on ii.” Abjaan nak, “In anmo'e on nae.” Tal antee solalu 'nakaf naan, in anakan ee nameen. In ka nahine fa lasij naan in anaon, natuin too mfaun een anhunun ma nabaa' tenij-tenij. Es manum in anlelu he neki nai Paulus annao noi benteng. 35-36 Solalus een anheel neki nai Paulus, mes too mfaun een le' naan sin natuin een ok-oke', ma sin ntaisibun antenin. Tabug sin he ansaen elak-fatug, too mfaun een naan sin nasikan he nhake maat. Tal antee solalus een naskau nai Paulus, he too mfaun een naan naik anbaan namatel. Es on naan sin anhunun am nak, “Amlolo misan! Amlolo misan!”
Nai Paulus namneob in tuan anbi too mfaun een sin maatk een
37 Tabug sin he antaman noin benteng on nanet, nai Paulus antoti noi solalu 'nakaf naan, anpake aguab Yunani mnak, “Aam! Au ube'i uguab babaun aa, oo?”
Tabug in nneen nai Paulus naguab on nanet, solalu 'nakaf naan naskeek. Lalit in antoti mnak, “Ho muhine aguab Yunani msa'? On meel am es ho muguab muhiin aguab Yunani? 38 Kalu on naan, au utenab a'saan een. Au 'ak 'ait ho le' iij, atoni Masiras, le' nahunut ho es le' mukoke' too mfaun een he sin anlaban plenat pah Roma. Lalit in neki toog nifun haa, le' sin nekin suni'-kenat, ma sin annaon noin bale luman. Mes ho le' iij, ka ini fa, ai'?”
39 Nai Paulus natael am nak, “Kahaf! Au le' iij, atoni Yahudis. Au iin honi' nahonis kau anbi koot Tarsus et propinsi Kilikia. Au 'toti he ho mkolen maan kau, he au ube'i uguab 'oi too mfaun een le' ii.”
40 Solalu 'nakaf naan anloom. Lalit nai Paulus anfenan anhaak anbi eel-fatug naan in tunan, ma in naiti in animan he ntoti sin he sin an'eeln aah he in naguab. Lalit in naguab neki sin aguab nenog-nenog, es le' aguab Aram. (Fun anbi naan, atoni Ibranis sin naguab een anpaken aguab Aram).g