Nai Kornelis anhone naan nai Petrus
10
Tabug naan, anmu'i solalu 'nakaf tuaf mese na'ko pah Roma, kanan nai Kornelis. In nanaak solalus tuaf natun mese. Sin neman na'kon pah Itali, balel aloog. In natgua anbi koot Kaisarea. 2 In, ma in umel nanan amsa' anneek niis Uisnenog. Mes atoni mfaun pah Roma sin abjaan, ka on fa naan. Tenij-tenij in anbaban ama'mu'it een, ma in n'onen piut-piut noi Uisnenog. 3 Nenog mese, of oni' leku tenu maans ee nmaab, in niit nok maat mi'ug anbi mnitas, Uisnenog In ahake mese na'ko sonaf neno tunan, neem ma no'en ee mnak, “Kornelis!”
4 Nai Kornelis niit ahaket naan, es on naan in namtau nmaat. Lalit in antoti mnak, “On mee?
Ahaket naan natael am nak, “Uisnenog anneen nalali ho onen totis een, ma In namnau ho nekam alekot noi ale' tuaf abjaan sin. Es on naan Uisnenog niit ko. 5 Es on naan tabug iij, amleek tuaf he nnao noi koot Yope, he anhone neki naan atonij mese, kanan nai Simon Petrus. 6 In natgua et umel mese anbi tasij ninen, nok atonij mese le' in mepug naknino' pasug. In kanan nai Simon amsa'.”
7 Tabug ahaket sonaf neno tunan annao nasaitan, nai Kornelis no'en in aan ameput tuaf nuug, ma nok in solalus mese, le' anneek Uisnenog amsa'. 8 Tabug nai Kornelis natoon nalali ale' lasij nanet, in anleek sin he annaon noin koot Yope.
Nai Petrus neem na'eku nok nai Kornelis
9 Anmiu on nanet, of oni' manas napuup, nai Kornelis in haef een anhaumak-maak koot Yope. Tabug naan, nai Petrus ansae ma n'onen anbi nai Simon in umel in selel a'pakan.
10 Nai Petrus an'onen, mes in annaben te namnaah. In anpao abilut een nabaalb een bukael. Ma tabug in an'onen on nanet, Uisnenog nakliil ee mnitas. 11 Nak, on le' in niit nenog natfai, ma ispalei meinuan mese anbool neem. Ispalei naan mafutu' ma makfili' anbi in susun een haa sin. Ispalei naan ansanu neem. 12 Anbi ispaleij in nanan, in niit mu'it huma'-huma', es le': mui' hae haa', anonok, ma kolog huma'-huma'.
13 Ma in anneen hanaf mese anlelug am nak, “Pe'u! Amfeen nai! Amlolo mu'it een ii. Lalit mubalab sin ma mbukae!”
14 Mes nai Petrus natael am nak, “Ka nabe'i fa! Naik on le' naan! Natuin au ka 'eku 'iit fa mu'it huma'-huma' naan sin sisij! Hai atoni Yahudis minuni mu'it een le' naan sin sisij!”
15 Mes hanaf naan natael am nak, “Kalu Uisnenog nak bale mese knino', ho naik mak ka knino' fa!” 16 Ispalei naan, anpoi haef teen, ma na'aiti on anfani noi neno tunan.
17 Lalit nai Petrus natenab nuu-mneem anmatoom nok amnitas naan in oten saa'. Nateef tabug naan, nai Kornelis in haef een neem anteen nai Simon in umel. Sin anhake nalalin anbin nesug. 18 Es on naan sin no'en ume tuaf naan ma antoti mnak, “Uuu! Hai iim mami tuaf mese, le' natgua ntahan et umel ii. In kanan nai Simon Petrus. Hi mihiin le oo?”
19 Tabug naan, nai Petrus natenab mnitas naan in oten fe', mes Uisnenog In Asmana Knino' natoon ee mnak, “Hae, Pe'u. Anmu'i atoni'a neem nami ko et apinan. 20 Amsanu he mnao mutuin sin nai. Naik ho mubati ho nekam. Maski sin le' naan ka atoni Yahudis fa, mes naik ammainieen sin, ai' mutenab sin anjalin atoni mapasu' mutuin halat atoni Yahudis. Natuin Au es le' a'lelu sin he neem naan ko.” 21 Lalit nai Petrus ansanu ma na'eku nok atoni een naan, ma nak sin am nak, “Au le' iij, es le' hi mamij. Hi mpaluu saa'?”
22 Lalit sin nataen am nak, “Anakaf solalus pah Roma tuaf mese, in es le' anlelu kai he iim moi ii. In nanaak solalus natun mese. In nekan anpalsai ma namnau Uisnenog. Atoni Yahudis amfaun nahine atoni' iij in alekon. Aafj aan, Uisnenog In ahaket sonaf neno tunan neem ma nlelu hai anakaf, he ntoti ko aam, he uum moi in umel, natuin in he nneen ko.”
23 Anneen nalali on nanet, nai Petrus ntoti sin he ntupan faij mese anbi umel naan. Anmiu on nanet, sin nfenan, ma nai Petrus annao nabgua nok sin. Anmu'i tuaf fauk na'ko Usif Yesus Inin le' abiten Yope, annaon nabguan nok sin.
24 Faij naan, sin ntuup lalan. Anmiu on nane, na' sin anteen koot Kaisarea. Tabug sin anteen nai Kornelis in umel, in anpao nani sin. In nabguab in nonot sin ma in aok-abjaan ok-oke' anbi naa. 25 Tabug nai Petrus he antaam noi umel nanet, nai Kornelis naen ansenug anbi mone', ma in nli'tuu anbi nai Petrus in haen, ma naluli' he nabees noi nai Petrus. 26 Mes nai Petrus anfiti nahake' aam Kornelis ma naguab am nak, “Ba'e! Amfeen amhake nai! Naik mubesan kau! Fun au le' iij, mansian on le' ho msa'.”
27 Anneen on nanet, nai Kornelis anfeen anhaak. Lalit nai Kornelis ma nai Petrus naguab een, ma sin annaon antaman noi umel nanan. Nai Petrus niit too mfaun nabguan anbi naan, sin anpao nanij. 28 In nail natefan sin, lalit in naguab am nak, “Au ba'e ma benu' ala ki! Hi mihine mani hai atoni Yahudis hai halat. Kalu tatuin halat naan, ka nabe'i fa he hai mseel gom mok atoni' pah abjaan. Saa' anteni he amtaam moi sin umel. Mes Uisnenog nekin On naklila' noi kau mnak, kalu In es le' naguab am nak, bale mese knino', ka nabe'i fa he au 'ak bale naan metan. Es on naan tabug iij, au ka 'mainisin fa tuaf abjaan anteni'. Au lo he 'aan sin anjalin au nonot 'bi au umel nanan. 29 Es on nane, tabug hi iim maan kau te, au 'feen anao 'uum 'aan. Au ka 'puutl ok fa, natuin Uisnenog natoon nalali kau. Es on naan hi mitoon kau fe'! Hi mo'en kau he saa'?”
30 Nalalit nai Kornelis anpe'o ale' lasij nak, “Nenog haa afinit, of oni' leku tenu manas anmaab, au 'onen anbi au umel le' ii. Nok askeken te, atonij mese anhake anbi au matak. In bale pakel namaas. 31 Ma in no'en kau mnak, ‘Kornelis! Uisnenog anneen ho onen totis een, ma In namnau ho nekam alekot noi too mfaun een. 32 Es on naan tabug iij, amlelu tuaf he annaon noi koot Yope he anhone neki naan tuaf mese, kanan nai Simon Petrus. In natgua ntahan et umel mese anbi tasij ninen, et atonij mese le' bijaas naknino' pasug. In kanan nai Simon amsa'.’ 33 Es on nane, au 'lelu tuaf he naen neit ma anhone neki ko uum moi ii. Hai mtoti makasi ma sukuul na-naek, natuin ho mkoen om uum een. Es on naan tabug iij, hai mibgua he mitniin saa'-saa' le' Uisnenog anlelu ko he mutoon sin noi kai!”
Nai Petrus natoon Usif Yesus In Laal A'honis noi tuaf le' ka atoni Yahudis fa
34 Lalit nai Petrus naguab am nak, “Tabug iij, au fe' uhiin 'ak, Uisnenog naan lo nail mansian ee ok-oke' namnees. In ka npili fa humaf, nak ii atoni Yahudis, ma abjaan sin ka atoni Yahudis fa.b 35 Kalu nmu'i tuaf na'ko uuf meel am meel le' in nekan anmaneo, ma n'onen piut noi Uisnenog, ma natuin In lomin, tuaf naan anhalinab In nekan. 36 Hi mihine saa' le' Uisnenog natoon nalali noi kai toog Israel, nak In nsonu' nalali Kristus, es le' Nai Yesus. Ma Nai Yesus naan anmate he nhalan mansian nok Uisnenog. Ma In anjali Anakaf noi mansian iij ok-oke'.
37 Hi mneen milali msa', saa'-saa' le' anjalin anbi propinsi Yudea anfuun ma nateef. Tu'in naan anmulai na'ko nai Yohanis natoon noi too mfaun een am nak, sin lo he nasaitan sin sanat sin. Ma sin lo he naslanin amsa', he anjalin a'taka nak, sin naleko nfanin nok Uisnenog. 38 Lalit Uisnenog anfee In Asmana Knino' noi Nai Yesus, atoni Nasaret naan. Uisnenog anfee In kuasan noi Nai Yesus amsa'. Lalit Nai Yesus anpoi-ntaam kuan ma balel, he nmo'e lasi alekot noi too mfaun een. In nbaban tuaf le' nitu le'uf een sin anakaf nasusab sin. In nmo'e on le' naan, natuin Uisnenog nokan piut. 39 Hai le' iij miit meki hai maatm een kiim saa' le' In nmo'e sin anbi koot Yerusalem, ma anbi pah atoni Yahudis sin anfuun ma nateef.
Maski on naan amsa', mes sin ankuus nakfilit anbi hau nehe tal anmaat. 40 In anmaat namneo-namneo, mes anmiu ntein, Uisnenog namonib nafani'. Lalit In naklila' In tuan, he anjali bukti nak, In anmoni anfaan. 41 Mes In ka nakliil On fa noi mansian iij ok-oke, aal noi kai mmees. Tabug In nmoni anfaan le' naan, hai mbijaas ambukae mokan. Es on naan Uisnenog anlulu kai he mjali saksiij ma mnao mitoon Usif Yesus In Tu'in Alekot naan moi tuaf namfau ambi meel am meel.
42 Es on naan Uisnenog es le' anlelu kai he mnao mitoon maat-maat, anmatoom nok Atonij le' In anlulu nanij na'ko faijan unun, es le' Nai Yesus. Ma Uisnenog naiti Nai Yesus amsa' anfani Afeek Lasij, he nafeek nak sekog es le' anmoni piut nok Uisnenog, ma sekog es le' kahaf. Nai Yesus naan, es le' nafeek lasij noi amates ma noi amonit een. 43 Na'ko faijan unun, Uisnenog In mafefa knino' een anluul amsa' noi Nai Yesus naan nak, sekom-sekog le' anpalsaij, Uisnenog of ansimo sin ma annose nani sin sanat ma penu sin.”
Tuaf le' ka atoni Yahudis fa, sin nsimo Uisnenog In Asmana Knino'
44 Tabug nai Petrus fe' naguab on nane, nok askeken Uisnenog In Asmana Knino' neem antaam anbi bifeel-atonij sin ok-oke' le' anneen ee. 45 Anbi naan amsa', anmu'i nai Petrus in nonot sin atoni Yahudis, le' neem nokan na'kon koot Yope noi nai Kornelis in umel et koot Kaisarea. Tabug sin niit too mfaun een ansimo Uisnenog In Asmana Knino' naan, sin ansanmakan, natuin sin fe' nitan nak, Uisnenog anfee In Asmana Knino' noi atonij le' ka atoni Yahudis fa. 46 Sin nneen bifeel-atonij le' anbi nai Kornelis in umel, naguab neki aguab huma'-huma', ma sin anpules ma nbo'is Uisnenog.
Lalit nai Petrus naguab am nak, 47 “Hi mail kiim! Sin le' iij, ansimo Uisnenog In Asmana Knino' on le' hit amsa'. Es on naan tabug iij, iim he taslani sin nai. Ka tiit fa es, le' he na'eka anteni sin.” 48 Lalit nai Petrus anlelu sin he naslani nai Kornelis nok ale' bifeel-atonij anbin naan, he sin antaman too slani noi Usif Yesus. Lalit sin antotin, he nai Petrus natgua nabala nok sin nenog fauk anteni, na' sin nafetin nai Petrus he anbelok anfani noi Yerusalem.