8
1a Nai Saulus nok anbi balel naan amsa', ma in anlomi msa' he sin nlolo niis nai Stefanus.
Nai Saulus anha'mu'i Usif Yesus Inin
1b-2 Tabug nai Stefanus anmaat, tuaf fauk le' anneek Uisnenog, sin annaon naiti in ta'un, ma nekij he ansuub. Sin nkaen anme'-me'ul.
Na'ko nenog naan, atoni' anmulai nhamu'i Usif Yesus Inin anbi koot Yerusalem, tal antee sin nsusan nmaten ma nhamu'ij ok. Lalit sin naen anbatis ok noi propinsi Yudea ma propinsi Samaria. Sin ala sin naenan, mes Usif Yesus In haef een sin es le' nabaaln aa anbi Yerusalem.
3 Nai Saulus nami lalan piut he nale'un pukan apalsait noi Usif Yesus. In nami sin anbi meel am meel. In npoi-ntaam umel he nami sin. In anheke bifeel ma atonij, ma nataam sin anbin ume buij.a
Nai Felipus natu'in Usif Yesus In Tu'in Alekot noi abiten propinsi Samaria
4 Maski sin nasusab nonot apalsait noi Usif Yesus tal antee sin naenan nsikasaan ok, mes sin ka nasnasan fa he nsaksii Usif Yesus In Tu'in Alekot noi atonij abjaan anbi balel meel am meel. 5 On le' tabug naan, nai Felipus annao anbi koot mese et propinsi Samaria, ma natoon noi sin am nak, Nai Yesus naan, es le' Kristus, le' Uisnenog anlulu ma anleek nanij na'ko faijan unun. 6 Tabug too mfaun een niit lasi sanmakat le' in nmo'e sin, sin nabguan ma nneen nalek-leko' in aguaban.
7 Tu'in on le': anmu'i ale' anitu-saet een anbi nane msa'. Ma nitu le'uf sin anpoi nasaitan sin nok haan hunun anaek. Ale' ao a'olet ma ameen hae hela' sin, naleko nanin tabug naan. 8 Es on nane, abiten koot naan namlilen nmaten.
9 Anbi koot naan, anmu'i atoni ahinet mese, kanan nai Simon. Nahunut, in anpake in le'u laut een noi abiten Samaria. In na'naeb in tuan, ma naguab am nak, “Sekog on le' au!”
10-11 Es on naan munif ai' mnasif, bifeel ai' atonij anbi koot naan anteek in kanan piut am nak, “Ka ka ka! Atonij ii, matani' le'uf! Saa'-saa' le' in nmo'e sin, neman na'ko Uisnenog In kuasat!” Natuin ale' in le'un le' naan, es nanet, atoni' anpakel ee na'ko faijan unun.
12 Mes tabug ii, sin nneen nai Felipus nanoni' sin anmatoom nok Uisnenog In aplenat. In natoon noi sin lalan he nabe'i sin antaam anjalin Uisnenog Inin, anpake Usif Yesus In kanan. Tabug sin anneen nalalin, too mfaun een anpalsain, ma sin antaman anjalin Uisnenog In nonot. Bifeel-atonij antaman on naan. Lalit naslani sin. 13 Nai Simon anpalsai msa' ma antaam anjali Usif Yesus Inin. Es on naan sin naslanij. Lalit in annao nok nai Felipus anbi meel am meel. Tabug in niit lasi sanmaakt een le' nai Felipus anmo'e sin, in nki'un am nak, “Hoe! Le' iij, lo matani'!”
14 Tabug naan, Uisnenog In haef een le' abiten Yerusalem annenan nak, abiten propinsi Samaria sin anpalsain nalalin noi Uisnenog In Tu'in Alekot. Es on naan sin nsonu' nai Petrus ma nai Yohanis he annaon noi balel naan. 15-17 Tabug sin nua sin anteen balel nanet, sin nahinen nak, apalsait een le' naan ka nsimo fa fe' Uisnenog In Asmana Knino'. Fun sin ala naslanin anpake Usif Yesus In kanan. Lalit nai Petrus nok nai Yohanis antao sin aniimk een anbi sin, ma sin an'onen antotin he abiten Samaria napeni Uisnenog In Asmana Knino' amsa'. Ma sin napeni nanin Asmana Knino' naan.
18 Tabug naan, nai Simon niit atoni nua' een naan antao sin aniimk een anbi apalsait een, es on naan sin napeni Uisnenog In Asmana Knino'. Lalit nai Simon annona' loit noi nai Petrus ma nai Yohanis, ma in ntoti mnak, 19 “Au ama sin! Hi amfee kau kuasat naan amsa'. Maut he tabug au 'tao au 'nimak noi sekom-sekog te, sin napenin Uisnenog In Asmana Knino' amsa'.”
20 Mes nai Petrus ankeko' am nak, “Sukat noi ko mok ho loit een naan! Ho mak of oni' ho mube'i msoos Uisnenog In Asmana Knino' meki loit? Kahaf! Ka tiit fa es he nabe'i ansoos naan Asmana Knino'! 21 Ho ka mmui' fa hak saa'-saa' noi Uisnenog In Asmana Knino', natuin ho nekam nanan anmesi'ook. Ho ala mami ela' he mupeni saa'. 22 Musnaas nai na'ko ho sanat ma penu sin! Leko nnesi, ho m'onen ma mtoti noi Uisnenog, he kalu leko te, In annose nani ho tenab amle'ut naan. 23 Au uhine 'ak, ho nekam naan nahenu nok maufinu ma sinimakat, ma nmu'i lasi le'uf namfaun le' anfutu ko fe'!”
24 Lalit nai Simon antoti sin nua sin am nak, “Au ama' ala ki! Kalu on nanet, hi m'onen maan kau fe', he sukat le' hi mteek ee naan, naik antoom kau.”
25 Lalit nai Petrus ma nai Yohanis natoon Usif Yesus In Tu'in Alekot ok-oke', ma sin natoon amsa' Uisnenog In A'an ma Plenat noi abiten koot naan. Lalit sin nua sin anbelok anfanin noin Yerusalem. Tabug sin annao laal, sin nesi nokan kuan-kuan anbin propinsi Samaria, he natoon Usif Yesus In Tu'in Alekot noi abiten naan.
Nai Felipus nateef nok kase anaek mese na'ko Afrika
26 Lalit ahaket Uisnenog na'ko sonaf neno tunan anlelu' nai Felipus am nak, “Ba'e! Ho mnao nai mutuin lalan le' an'ani 'liij ma ne'ug. Mutuin lalan amnaa' na'ko koot Yerusalem ma mnao mkoon moi kuan Gasa.” 27-28 Tabug in nneen on nane, nai Felipus anpoi nnao nani. Tabug in anbi lalan naan, in niit atonij mese. Atonij le' naan kase anaek mese na'ko pah Etiopia.b In es le' anpao ma n'ulus a'mui'f een na'ko kesel bifeel pah Etiopia. Kesel bifeel naan, sin anteke nak, Kandake. Kase naek le' naan, fe' nok an'onen anbi koot Yerusalem, ma tabug naan in ansae kaleta le bijakasel anheel he anfani noi sin pah. Tabug nai Felipus niit kasel naan antoko ma ntae sulat anbi kaleta in nanan. In ntae sulat anbi sulat na'ko baba nai Yesaya, Uisnenog In mafefa knino'. 29 Uisnenog In Asmana Knino' nlelu nai Felipus he nnao nhaumak-maak kaleta naan, he nateef nok kase naek naan. 30 Ma tabug in anhaumaak, in anneen atonij naan antae na'ko baba nai Yesaya in sulat. Es on naan in antoti mnak, “Aam! Ho muhine saa' le' ho mtael ee naan, ai' kaha?”
31 Lalit atoni' naan natael am nak, “Kahaf. Lo he nmu'i tuaf he natoon kau fe', hena' au uhiin. Amsae uum he amtoko mok kau anbi ii.” 32 Lulat le' in antael ee naan, in hanan nak on ii:
“Sin anheel ee on le' atonij anheel 'bibi-kase,
he nekij he nlolog.
In anjali on le' 'bibi-kase ana' le' atoni' ankateli in funun,
mes in an'ela kuun.
In ka nfai fa in fefan,
ma ka natae fa fefa' mese amsa'.
33 Lalit sin na'akan;
Sin nafekan lasi moel antoom ee.
Tabug naan, sin nlolo nisan,
fun kaah, in ka nmu'i fa sanat saa'-saa'.
Es on naan hit he tak saa' antein?”c
34 Antae nalali on nanet, kase naek naan antoti nai Felipus am nak, “On mee? Baba nai Yesaya anluul anmatoom in tuan ee oo, ai' in anluul anmatoom nok atonij abjaan?”
35 Lalit nai Felipus nanoni' kase naek naan neki Usif Yesus In Tu'in Alekot. In anmulai na'ko baba nai Yesaya in lulat le' naan, ma in natoon lalan noi Usif Yesus. 36 Tabug sin annaon fe', kase naek naan niit oel. Ma in nsenu nfeek nai Felipus in aguaban, neki haan totis am nak, “Ba'e! Ho mail miit fe', anmu'i oel es nae. Kalu ho mlomi te, atsanu he ho muslani kau nai.”
37 [Ma nai Felipus natael am nak, “Kalu ho mpalsai namneo-namneo moi Usif Yesus, ka nmu'i fa ekat. Au 'toti he tsanu he au uslani ko.”
Lalit in nmanaku' am nak, “Au 'palsai namneo-namneo 'ak, Nai Yesus le' naan, Uisnenog es le' anlulu ma anleek nanij na'ko unu'. In le' naan, Uisnenog In Anah.”]d
38 Es on naan atoni' naan anlelu he nasnasab in kaleta naan. Lalit sin ansanun ma antaman anbi oel naan in nanan. Ma nai Felipus naslanij anbi naan.
39 Tabug sin anpoin na'ko oel, Uisnenog In Asmana Knino' neki nai Felipus annao noi bale sona'. Kase anaet naan ka niit antenij fa. Kasel naan annao piut nok neek malinat anaek. 40 Nai Felipus anpoi anbi kuan mese, kanan Asotus.e Na'ko balel naan, in annao piut ma natoon noi too mfaun een Usif Yesus In Tu'in Alekot. In nesi nok kuan-kuan tal antee koot Kaisarea.