Anaak lasi palsait Yahudi sin anakaf sin namin lalan he namate Usif Yesus
(Nai Mateos 26:1-5; Nai Markus 14:1-2; Nai Yohanis 11:45-53)
22
Tabug naan, neno naek atoni Yahudis sin anpaumaak eeh. Neno naek naan, es le' Fesek Utunu' ka malalu taif fa. Anbi neno naek naan sin anlolon abibi-kase he anmo'en fesek Paska amsa'. Sin anmo'en on naan, he namnaun nafani noi tabug unu', tabug sin babaf sin anpoi na'kon pah Masir.a 2 Tabug naan, anaak lasi palsait Yahudi sin anakaf sin ma kulu agama sin namin lalan he namate Nai Yesus. Mes sin namtausan too mfaun sin of antaisibun, natuin sin anlomin he anneen Ee.Nai Yudas nasosa' Usif Yesus
(Nai Mateos 26:14-16; Nai Markus 14:10-11)
3 Na'ko Nai Yesus In asimo anoni' tuaf bo'es am nuug een le' naan, es kanan nai Yudas Iskariot. Tabug anaak lasi palsait Yahudi sin anakaf sin namin lalan he anlolo namate Nai Yesus, nitu nakaf ee antaam anbi nai Yudas in nekan. 4 Lalit nai Yudas anpoi nnao ma namij anaak lasi palsait Yahudi sin anakaf sin ma anaak apaot Ume Onen Uuf. In he nabgua nok sin, he nasosa' Nai Yesus noi sin. 5 Tabug anaet een naan aneen nai Yudas in nekan nanan on nane, sin anmaliin anmaten. Sin anpaa' nai Yudas am nak, “Lekog! Kalu ho mlomi he musosa' kai Nai Yesus, hai mbaen.” 6 Nai Yudas anlomi natuin sin. Es on naan in nami lalan he nasosa' Nai Yesus nok manifa' noi sin, he too mfaun sin naik nahinen.
Usif Yesus In asimo anoni' sin nabaalb een fesek Paska
(Nai Mateos 26:17-25; Nai Markus 14:12-21; Nai Yohanis 13:21-30)
7 Es on naan atoni Yahudis sin neno naek nane antee, ma sin anlolon abibi-kase ana' he anmo'en fesek Paska. 8 Lalit Nai Yesus anlelu nai Petrus ma nai Yohanis am nak, “Hi nua ki mnao mihunu he mibalab bukaet, he hit atbukae tabgua tbi fesek Paska.”
9 Es on naan sin antotin am nak, “Aam! Hai he mnao mibalab bukaet noi mee?”
10 In natael am nak, “Kalu hi amtaam moi koot Yerusalem, hi of mi'eku mok atonij mese nasae aposi' oel aan es. Hi mituin ee mtee in umel. 11 Mitoon moi ume tuaf nane mmak, ‘Hai Aam Kulug antoti naan ke'an mese anbi ho umel, he nmo'e fesek Paska nok In asimo anoni' sin. Nabe'i, oo?’ 12 Es on naan ume tuaf nane of naklila' ki ke'an mese et ume ktuta' naan. In naloitan nalali balel naan. Aal hi nua ki mibalab ahaa bukaet.”
13 Lalit sin nua sin annaon. Es on naan sin niit saa'-saa' namnees on le' Nai Yesus natoon sin noi sin. Es on naan sin nabaalb een bukaet Paska anbi naan.
Fesek Paska
(Nai Mateos 26:26-30; Nai Markus 14:22-26; 1 Korintus 11:23-25)
14 Tabug balab bukaet een nalekon nalalin, Nai Yesus sin neman nteen. In nok In haef een antokon he anbukaen nabguan. 15 Es on naan Nai Yesus naguab noi sin am nak, “Au 'maliin amaat he 'toko ma 'bukae fesek Paska 'ok ki, nahunu na'ko Au mane'at. 16 Mitaka' milek-leko' le' ii. Talali le' iij ee te, Au ka 'toko he 'bukae teni fa fesek Paska 'ok ki. Neno amnemat, tabug mansian sin niit maat fu-fua guah nak, Ama' annaa' aplenat, na' Au 'bukae teni.”
17 Lalit In naiti aklaas le' matua' tua min-kase. Lalit in antoti makasi noi Uisnenog, ma annona' aklaas nane noi sin. Lalit In naguab am nak, “Amsimo aklaas le' iij, he mbukae tuaf mese-mese. 18 Mimnau! Anmulai faij iij, Au ka 'inu teni fa tua min-kase. Neno amnemat te, tabug mansian sin niit maat fua guah nak, Ama annaa' aplenat te, na' Au 'inu 'tein.”
19 Lalit In naiti utunu' afgua' mese, ma antoti makasi noi Uisnenog. Lalit In an'ebi utunu' naan, ma annona' sin. In naguab am nak, “Utunu' le' iij, Au aok le' Au 'nona' 'oi ki ala ki. Ansuun tabug hi mbukae utunu' on le' iij ee te, hi lo he mimnau Kau.” 20 Tabug sin anbukae nalalin, In naiti aklaas matua' tua min-kase. Lalit In naguab anteni mnak, “Tua min-kase le' iij, Au naa' ee. Au naa' le' iij nat'oop ma nsai he nsoi nafetin naan ki. Uisnenog anpake naa' le' iij he nahakeb lasi manpaa' fe'ug noi ki.b
21 Mes ampanat, natuin anmu'i tuaf le' antoko nok kit es me'ij le' iij, of nasosa' Kau.c 22 Namneo! Au, Mansian Namneo-Namneo le' iij, lo he 'maat utuin Uisnenog In alomin. Mes Ampaant om! Tuaf le' nasosa' Kau naan, in of nasae kuun in lasi amle'ut!”
23 Annenan on nane, Nai Yesus In asimo anoni' sin anmulai nmatotin een am nak, “Es on naan sekog es le' he anmaufinu noi Ne?”
Usif Yesus In asimo anoni' sin anmatoena' lasij nak, sekog es le anaek annesij
24 Es on naan Nai Yesus In asimo anoni' sin anmulai nmatoen nak, sekog es le' anaek annesij.d 25 Mes Nai Yesus nakain sin am nak, “Anbi pah-pah le' ka nahinen naan fa Uisnenog, kesel sin naplenat toog een baineisi. Fun kaah, sin anlomin he toog een anteek sin at nak, ‘Ama le' anbaban toog’. 26 Mes hi naik on naan. Tuaf le' he anjali kase naek, in amonin ii namneo-namneo lo he on le' tuaf abaut he antuthae ale' too mfaun. Tuaf le' he anjali anaet, lo he antuthae ale' too mfaun, on le' aan lelu'.e 27 Hi mitenab miit, anaet ee es le' meel? Tuaf le' antoko nbi me'ij, ai' tuaf atuthaes? Atokos me'ij naan, in es le' anaek ee, ai'? Fun kaah, Au ka 'mo'e fa Au tuak ee on naan. Au 'uum he 'tuthae ki.f
28 Hi al-alaki le' iij, es le' mok-mook Kau tabug Au upeni mane'at. 29 Au Ama' npili ma naiti Kau he 'naa' aplenat a'bi In pah. Es on naan tabug iij, Au aiti ma pili ki msa', 30 he hi mtoko ma mbukae mok Kau me'ij mese ambi sonaf neno tunan. Au 'fee ki kuasat amsa', he hi miplenat uuf bo'es am nuug ambi pah Isra'el.”g
Usif Yesus natoon nak, nai Petrus of natotan
(Nai Mateos 26:31-35; Nai Markus 14:27-31; Nai Yohanis 13:36-38)
31 Lalit Nai Yesus natoon noi nai Petrus am nak, “Pe'u! Nitu nakaf ansobal he anbatis ki na'ko Kau, on le' takpesa amnees.h 32 Mes Au 'onen ma 'teek ko, he ho mpalsai Kau piut-piut. Tabug ho mfani uum een moi Kau te, ho lo he mha'tani ho aom-abjaan een sin neek een.”
33 Es on naan Nai Petrus natael am nak, “Kahaf! Au ka nuug he 'aen usaitan Ko fa. Maski au 'taam ume buij ma mate 'ok Ko msa', lekog.”
34 Mes Nai Yesus natael am nak, “Pe'u! Amneen mulek-leko'. Faij iij, manug ka nkokle'o fa fe', ho mutotan Kau hael teen gue mak, ho ka muhine Kau fa.”
Usif Yesus Inin, lo he nabaalb een he ansimo susal
35 Lalit Nai Yesus naguab noi sin am nak, “Tabug mese, tabug Au 'leek ki he mnao mitoon Au Tu'in Alekot ambi meel am meel, Au 'taal ki he naik meki loit, aluk, ma apeni-haef. Tabug naan, hi mkulan saa'?”
Es on naan sin nataen ok-oke' am nak, “Nenog naan, hai ka mkulan fa saa'-saa'.”i
36 Lalit In naguab anteni mnak, “Mes tabug iij, naik. Kalu hi mmu'i loit, mekij. Kalu hi mmu'i aluk mekij. Kalu ka mmu'i fa suni', misosa' hi soo balug mese he msoos. 37 Natuin atoni Yahudis sin naan Kau on le' atoni amaufinut. Ba-baun es anteni te, sin neman he nheke Kau. Naan namnees nok saa' le' baba nai Yesaya anluul nani je, mnak:
‘Sin anteek Ee on le' atoni amaufinut!’”j
38 Sin natonan am nak, “Aam! Hai meki benas nuug.”
Lalit Nai Yesus natael am nak, “Noo guah nai. Naik miguab nane nteni!”
Usif Yesus annao n'onen anbi anu'af Saitun
(Nai Mateos 26:36-46; Nai Markus 14:32-42)
39 Anbukaen nalalin Paska te, Nai Yesus nok In asimo anoni' sin anpoin nnaon noi anu'af Saitun, on le' tefes-tefes sin anmo'en. 40 Anteen nane, In naguab noi sin am nak, “Hi m'onen he hi naik amsisi-klati tabug hi mipeni fulit ma 'taka'.”
41 Lalit In annao naloog ba-babaun na'ko sin. In nlituu ma an'onen am nak, 42 “Aam! Kalu Ho mlomi te, maiti muskotub mane'at iij na'ko Kau. Mes naik natuin Au lomik, maut he natuin Ho lomim ee kuum.” [Lalit Uisnenog In ahaket mese na'ko sonaf neno tunan neem ma nha'tani In nekan. 44 Fun In mane'at naan matani' le'uf, tal antee In pusel ansai on le' naa'.]k
45 An'onen nalali on nane, In anhake ma annao nfani noi In asimo anoni' sin. Mes sin antupan, natuin sin anhaen nmaten, ma nsusan amsa'. 46 Lalit Nai Yesus antoti sin am nak, “Kaa! Hi mtuup noi saa'? Leko nnesi hi m'onen he asu'at ee neem, hi naik ammouf.”
Sin anheke Usif Yesus
(Nai Mateos 26:47-56; Nai Markus 14:43-50; Nai Yohanis 18:3-11)
47 Nai Yesus naguab fe' on nane, nai Yudas (tuaf es na'ko asimo anoni' bo'es am nuug een naan) neem nok toog amfaun. In neem anpaumak-maak Nai Yesus he nhoog ma neek Ee. 48 Mes Nai Yesus nakain ee mnak, “Hoi, Yudas! Ho he musosa' Mansian Namneo-Namneo le' iij, ampake tabes ma maneek-panaf, ka?”
49 Tabug Nai Yesus In asimo anoni' sin nahinen nalali nai Yudas in lolen amaufinut nane, sin antotin noi Nai Yesus am nak, “Aam! Hai mmabaan sin aa, oo? Hai meki benas.” 50 Es on naan tuaf es anhosu benas, lalit ansapi nanoufu atonij es in luken noon es. Atonij naan, anaak lasi palsait Yahudi sin anaak anaek in atel.
51 Mes Nai Yesus naguab am nak, “Noo gah nai! Naik amlaban sin!” Es on naan In anpoel atonij naan in luken, ma naleko'.
52 Too mfaun sin le' neman ma anheke Nai Yesus naan sin es le': anaak lasi palsait Yahudi sin anakaf sin, atoni mnasi halat sin, ma apaot Ume Onen Uuf, ma tuaf abjaan anteni. Nai Yesus antoti sin am nak, “On mee? Hi mitenab mmak Au le' iij atoni amaufinut, es hi iim amheke Kau meki suni' ma haug tukaf? 53 Nenog-nenog Au unoni' 'bi Ume Onen Uuf, mes ka tiit fa tuaf mese he anheke Kau. Mes maut nai! Iij ee hi tabug. Tabug iij, nitu nakaf ee in kuasan!”l
Nai Petrus natotan Usif Yesus
(Nai Mateos 26:57-58, 69-75; Nai Markus 14:53-54, 66-72; Nai Yohanis 18:12-18, 25-27)
54 Lalit sin anheke neki Nai Yesus, ma anheel neki Je noi anaak lasi palsait Yahudis sin anakaf anaek ee in umel. Nai Petrus annao nakol-kolo' anbi sin kotik een. 55 Anbi umel naan in kintal, tuaf abjaan sin anlalan aij. Nai Petrus annao nlaal aij nok sin amsa'. 56 Anmu'i bifee atel mese, nail niit Nai Petrus antoko ma nlaal aij nok. In nail nalek-leko' nai Petrus in human, lalit in natoon noi tuaf abjaan sin am nak, “Hoi! Atonij le' iij amsa', bijaas in nok Nai Yesus!”
57 Mes nai Petrus natotan am nak, “Kahaf.” Au ka uhine fa Atonij naan. Ho muhine saa'?”
58 Ka loog fa te, tuaf mese na'aiti matan ma nail niit nai Petrus. Lalit naguab am nak, “Teeb! Ho le' iij tuaf mese na'ko Nai Yesus Inin ai'?”
Mes nai Petrus anprotees matani' mnak, “Kaa! Kahaf! Ho naik ampe'o alafgua-lafug!”
59 Of oni' jam mese anfini te, tuaf mese anteni naguab am nak, “Hoi! Au uhine, tuaf le' iij Nai Yesus In asimo a'noni es, natuin in atoni Galileas!”
60 Mes nai Petrus natotan matani' nak, “Mumoe nai!” Nateef in naguab on nane, manug ankokle'o.
61 Es on naan Nai Yesus aniik ee ma nail nai Petrus. Lalit nai Petrus namnau aguab een le' Nai Yesus naguab sin am nak, “Faij le' iij, manug sin ka nkokle'on fa fe' ate, ho mutotan mulali Kau ha'el teen.” 62 Namnau niit on nane, nai Petrus anpoi na'ko kintal naan, ma annao nkae nsa'se'ul.
Sin antepo ma nasi'ug Usif Yesus
(Nai Mateos 26:67-68; Nai Markus 14:65)
63 Lalit atonin le' antitu Nai Yesus naan anmulai nakle'at ma nasi'uk, ma antepo nafan-fani. 64 Sin amu In maatn een anpake taima'ug, lalit antotij Ee mnak, “Hoi! Kalu Ho mjali Uisnenog In mafefa knino es, ho mteek miit! Sekog es antepo ko le' iij?” 65 Lalit sin ansekun nisan.
Sin neki Usif Yesus noi bale feek lasi palsait
(Nai Mateos 26:59-66; Nai Markus 14:55-64; Nai Yohanis 18:19-24)
66 Nok-nok ana', anaak lasi palsait Yahudi sin anaakf een, kulu agama sin, ma atoni mnasi halat sin, nabguan nalalin he n'ulus Nai Yesus In lasij. Lalit sin nlelu he anheel neki Nai Yesus neem noi balel le' he nafekan lasi palsait. 67 Tabug In antaam nalali, sin antotin noi Ne mnak, “Ho mutoon miit kai! Ho le' iij, Kristus namneo-namneo, oo?”
In natael am nak, “Maski Au utae namneo-namneo msa', hi ka mpalsai fa. 68 Lalit kalu Au 'toti ki haan totis mese amsa', hi ka mitae Kau fa. 69 Ka loog fa te, Uisnenog anpake In kuasat matani ee, he nanaeb Kau, Mansian Namneo-Namneo le' ii. Lalit Au 'toko 'bi In abnapan ane'ug he uplenat 'ok Ne.”m
70 Annenan on nane, sin aal sin antoti am nak, “Kalu on nane, ho mutenab am mak, ho le' iij Uisnenog In Aanh ee, oo?”
Es on naan Nai Yesus natae nak, “Namneo, hi miguab naan, namneo.”
71 Es on naan atoni a'aa' lasin naan naguab een am nak, “Hit ala kit atneen kuuk, ai'? In naiti kuun in tuan anjali Uisnenog In Anah. Le' iij, lasi ma'akan! Tatuin hit atolan palsait, kalu atoni nanesa' on, on le' Uisnenog, atonij naan lo he nmaat. Es on naan on mee? Hit naik atpaluu saksiij antein. Athukum ta'matel Le nai!”