Usif Yesus nateef nok akoni noni ponij tuaf mese, kanan nai Sakeos
19
Lalit Nai Yesus sin antaman nboni koot Yeriko he annaon nfinin. 2 Anbi naan, anmu'i anaak akoni noni ponij tuaf es noi plenat pah Roma. In kanan, nai Sakeos. In atoni a'mu'it. 3 Tabug in anneen Nai Yesus he neem annao nfiin noi nane, in anlomi he niit Nai Yesus. Mes in ka nabe'i nail niit Ee fa nok alekot, natuin too mfaun sin nauban naan Nai Yesus. Ma nai Sakeos amsa' 'tuuk aan es aah. 4 Es on naan in naen nahuun, lalit ansae nbi haug uu' mese anbi lalan in ninen, le' he Nai Yesus anbonin.a5 Neem antee haug naan in uun, Nai Yesus anbaisenug. Lalit no'en nai Sakeos am nak, “Sakeos! Amsanu uum, labah! Nenog iij Au he 'tuup a'tahan anbi ho umel.”
6 Nai Sakeos ansanmaak. Es on naan in ansanu labah, lalit nok Nai Yesus annaon noi in umel. In anmaliin anmaat. 7 Mes too mfaun sin namunu' een am nak, “Tpuih! Nai Sakeos iij, atoni amo'e amle'ut! Nansaa' am es Nai Yesus antuup antahan noi nai Sakeos in umel? Too mfaun sin nahinen nalali je te!”
8 Neman nteen umel, nai Sakeos anhake nbi Nai Yesus In matan, ma naguab am nak, “Aam Kulug! Anmulai nenog iij, au 'bati au 'maus een batis nuug, he 'fee batis es noi ama'mu'it sin. Kalu au 'koni noni ponij ma anneis-neis, au 'fee ufani' sin hael haa.”
9 Nai Yesus natael am nak, “Lekog. Nenog iij Uisnenog anfee sako sanat ma 'honis noi ho umel nanan, natuin ho mpalsai moi Uisnenog on le' baba nai Abraham. 10 Fun Uisnenog anleek Kau he 'jali Mansian Namneo-Namneo a'bi pah-pinan ii. Au 'uum he etu tuaf-tuaf aseket na'ko Uisnenog In lalan, he 'feen sin sako sanat ma 'honis.”b
Tu'in anmatoom nok atel le' naloitan lek-leek noi in usin in loit een
(Nai Mateos 25:14-30)
11 Tabug naan, anmu'i too mfaun le' nok annenan Nai Yesus In aguaban. Sin he noi ntaman noin koot Yerusalem. Sin nateenb een nak In he nanaob Uisnenog In aplenat labah anbi naan, nahuum on le' kesel. Lalit Nai Yesus natu'in sin leta mese anpake aguab mapolin, 12 am nak, “Anmu'i naan kase naek mese. In he nnao noi pah @@a'pen-pene abjaan, he sin nasaeb ee soo balu-pilug anjali kesel. Lalit na' in he nfani neem anjali kesel noi in pah ee kuun. 13 Tabug in nabalab nalali he annao, in no'en in ameput tuaf bo'es, lalit in nana'at sin loit, tuaf mese te, loi nonij afgua' mese.c In anfee plenat am nak, ‘Hi mpake loit le' iij anjali modal. Tabug au 'fani 'uum, hi mitoon kau mak hi miis fauk eeh.’ Lalit in annao nfiin.
14 Mes in toog ee abjaan, ka nlomij fa. Es on naan sin anleek tuaf annao noi balel nae, ma natoon am nak, ‘Hai ka mlomi fa tuaf le' iij he in annaa' aplenat noi kai.’
15 Maski on nane msa', mes sin nasaeb ee soo balu-pilug. Lalit in anbelok anfani neem. Neem antee in sonaf, in no'en ameput tuaf bo'es le' naan, lalit antoti sin am nak, ‘Hi miis maan fauk eeh na'ko loi nonin le' au 'fee sin naan?’
16 Ameput ahunut natoon am nak, ‘Usi'! Au 'iis hael bo'es na'ko modal le' ho mfee kau gue na.’
17 Es on naan kesel nane nak ee mnak, ‘Lekog! Ho le' iij, amepu alekot es. Natuin au of 'palsai ko 'bi lasi aan'-ana', es on naan tabug iij ho mnaa' aplenat noi koot bo'es.’
18 Es on naan ameput es natoon am nak, ‘Usi'! Au 'iis loi nonij afgua' niim na'ko modal le' au 'simog.’
19 Lalit kesel nane nak ee mnak, ‘Lekog! Kalu on nane, au 'aiti ko he mnaa' aplenat noi koot niim.’
20 Ameput es anteni neem neki in loi nonij naan. Lalit anbaisenu mnak, ‘Usi', ho loi nonij es ii. Au u'amug ma ukolo' ulek- leko' he naik namneku. 21 Au 'mo'e on le' naan, natuin au umtausan ko. Au uhine 'ak ho atoni amapipit ma amatanis ko. Fun ho bijaas maiti saa' le' ka ho goe fa, ma msiu saa' le' ho ka mseen ee fa.’
22 Anneen on nane, kesel ankekog ee mnak, ‘Hoi, a'olet! Ho guabam naan neki kuun fekat noi ko. Ho mak oni' au amatanis kau, le' au 'aiti saa' le' ka au goe fa, ma siu saa' le' ka 'seen ee fa. 23 Kalu on nane, nansaa' am es ho ka mubelak fa loit iij noi bank? He tabug au 'fani 'uum, au upeni in sufan, maski ba-baun amsa', lekog.’
24 Es on naan kesel naan anlelu tuaf abjaan anbin nane mnak, ‘Maiti in loit naan, ma mnona ee noi ameput le' niis afgua' bo'es lelon na.’
25 Mes sin nprotes een am nak, ‘Usi'! Atonij naan in napeni mas namfau ge. Es on naan nansaa' am es taiti ta'ko tuaf le' anmu'i ba-baun, he taloulu attenin?’
26 Mes kesel nane natael am nak, ‘Mitenab milek-leko'! Fun tuaf le' an'ulus nahine saa' le' tuaf nana'at noin, of in anloulu anteni. Mes tuaf le' napeeh he n'ulus saa' le' tuaf nana'at ee noi ne, of ansai nani saa'-saa' le' in anmu'i sin.d 27 Es on naan tabug iij, hi mnao mheke au musun le' ka nlomi kau fa he 'jali kesel. Meki sin neman noin iij, lalit amlolo sin anbin au matak. Amnao nai!’”e
Usif Yesus antaam noi koot Yerusalem
(Nai Mateos 21:1-11; Nai Markus 11:1-11; Nai Yohanis 12:12-19)
28 Nai Yesus natu'in nalali on nane, sin annaon nfinin noin koot Yerusalem. Nai Yesus nahuun. 29 Tabug sin he nteen kuan nuug, es le' kuan Betfage ma kuan Betania, le' etan anu'af Saitun in ninen, In anleek in asimo anoni' tuaf nuug he annaon nahunun. 30 In anlelu sin am nak, “Hi mnao moi kuan le' abit matan nae. Hi of miit bijakase keledai aan es mafutu' et naan. Atoni ka nsaen niit ee fa fe'. Hi msefij, ma mheel mekij neem. 31 Kalu tuaf antoti ki mnak, ‘Nansaa' am es hi nsefi bijakase keledai naan?’ Hi mitae mmak, ‘Hai Usi' he npakel.’”
32 Lalit sin nua sin annaon ma niit bijakase keledai ana' naan, on le' Nai Yesus naguab. 33 Tabug sin ansefi bijakase keledai naan, in tuan ee antoti sin am nak, “Hoi! Nansaa' am es hi msefi hai bijakasel ee?”
34 Es on naan sin nataen am nak, “Hai Usi' he npakel.” 35 Bijakase tuaf naan anloom, lalit sin nua sin anheel neki bijakase keledai naan noi Nai Yesus. Sin na'peni' bijakasel naan anpaken betik. Es on naan sin nasaeb Nai Yesus.f 36 Too mfaun sin naiti sin tais ma betik een ma sin beti ana' een, lalit na'been sin anbin lalan, he nsenu Nai Yesus on le' kase naek. 37 Tabug In anmulai nnao neki nsanu na'ko nu'af Saitun, too mfaun sin ma In asimo anoni' sin anmulai ankua' een, ma ansakanan neki pules-bo'is noi Uisnenog, natuin ale' kanan kuasat sin a'taka' le' sin niit sin naan. 38 Sin ansakanan am nak,
“In le' iij, Usif le' Uisnenog anleek Ee neem!
Uisnenog anfee tetus noi Ne!
Tabug iij, mansian sin nabe'i nmahalan nfani nok Uisnenog et sonaf neno tunan.
Pules-bo'is noi Uisnenog le' antuun On ma naplenat et neno alaat le'uf.”g
39 Mes anmu'i atoni Farisis anbi too mfaun een sin atnaank een. Sin naguab noin Nai Yesus am nak, “Aam Kulug! Mukain sin he naik ankua' ma nabaa' een on le' naan. In on he bainesi'!”
40 Mes Nai Yesus natael am nak, “Hoi! Au utoon 'ani ki, he! Kalu too mfaun een iij anfefa temen, fatun le' iij of anbo'is Uisnenog!”
Usif Yesus ankae noi koot Yerusalem
41 Tabug sin npaumak-makan he antaman noi koot Yerusalem, Nai Yesus nail koot nane, In anmulai nkae ma nsunan, 42 am nak, “Koi, abiten Yerusalem sin! Au 'lomi he nenog iij, hi msimo lasi halan ma mamut le' Au ekij. Mes natuin hi ka mlae mituin fa Uisnenog, es on naan tabug iij hi miloob om. Lasi halan ma taimamut naan naloog ee na'ko ki. 43 Of hi musun natupuk een naijaan atuupgua-tupuk anpe'o hi lape-mnanu, lalit antaman nbaan ki. 44 Sin antepo ki ma ntikalobin mok naijaan, lalit anlolo niis ki ma hi anah een ok-oke'. Sin of ka nfee fa fatu afgua' mese amsa' he anhake, natuin Uisnenog neem nalali he nsoi nafetin naan ki, mes hi ka mihine Le fa!”
Usif Yesus antaam noi Ume Onen Uuf
(Nai Mateos 21:12-17; Nai Markus 11:15-19; Nai Yohanis 2:13-22)
45 Lalit Nai Yesus antaam noi Ume Onen Uuf. Anbi umel naan in kintal, atonij sin anmo'e le anjali 'masa', he nasosa' een mu'it le' anpake sin he natulu' een. Nail on nane, Nai Yesus anli'u napoitan sin na'ko balel naan. 46 In anhaan maslaal noi sin am nak, “Uisnenog In mafefa knino' een anluul nanin am nak,
‘Au ufena' Umel le' iij,
he sekom-sekog haa nabe'i neman an'onen een noin ii.’h
Mes hi mmo'el anjali apaikalut een sin bale buat.”
47 Lalit Nai Yesus neem nenog-nenog anbi Ume Onen Uuf ma nanoni' anbi naan. Mes anaak lasi palsait Yahudi sin anaakf een, kulu agama sin, ma atoni mnasi halat Yahudi sin namin lalan he nlool Goe.i 48 Mes sin ka napenin fa meinuan, natuin too mfaun sin anmalinan nmaten he annenan Nai Yesus In aguaban.