Atoni Farisis sin he nanofu Usif Yesus anpaken lasi matsaos ma mapolin
(Nai Mateos 19:1-12; Nai Lukas 16:18)
10
Lalit Nai Yesus sin annaon anfuun ma nateef anbi propinsi Yudea, ma anbi balel abjaan antein et noel Yarden in panin neno-saet. Anbi meel am meel, too mfaun sin neman ma nauban naan Ee. Ma In nanoni' sin on le' bijaas.
Nai Markus 10:1-31
2 Atoni Farisis tuaf fauk neman he nanofug. Sin antoti mnak, “Natuin hit atolan lasi palsait, atoni amatsaos mese nabe'i anpolin in feel, ai' kaha?”
3 Mes Nai Yesus natae sin am nak, “Mimnau miit fe'! Atolan anmatoom nok matsaos feel-monel le' baba nai Musa nba'an nanij noi kit naan, nak on mee?”
4 Sin nataen am nak, “Baba nai Musa in atolan ii nak, atoni nabe'i anpolin in feel, mes lo he anluul sulat mapolin nahunu ma annona' sulat naan noi in feel.”a
5 Mes Nai Yesus natae sin am nak, “Amneen Kau fe'! Baba nai Musa anluul on naan, natuin hi mi'naak-fatu anbainesi'! 6 Hi naika mniken leta' un-unu' tabug Uisnenog anmo'e neno tunan ma pah-pinan! Fun malula et Sula Knino' mnak,
‘Uisnenog anmo'e mansian sin, atonij ma bifeel.b
7 Es on nane, atonij mese lo he annao nasaitan in inaf ma in amaf,
he nmoni nabguan nekaf mese ma ansaof mese nok in feel,
8 henati' sin nua sin anjali mese.’c
9 Kalu Uisnenog nekin On am nameseb sin, ka nabe'i fa he mansian anbatis sin!”
10 Lalit Nai Yesus nok In asimo anoni' sin antaam anmesen anbin umel mese. Anbi naan, sin antoti Nai Yesus anmatoom nok In anoni' le' lelon.
11 Nai Yesus natae sin am nak, “Sekog le' anpolin in feel, ma ansao anteni' bifeel 'abjaan, naan antaam lasi kakel amsa'! 12 On nane msa' bifeel! Kalu in anpolin in monel, lalit in ansao nteni' atonij abjaan, naan antaam lasi kakel amsa'!”d
Usif Yesus naguab ma anfee tetus noi li'ana sin
(Nai Mateos 19:13-15; Nai Lukas 18:15-17)
13 Anbi tabug mese, sin neki sin anah sin neman noi Nai Yesus, ma antotin he In naguab anfeen sin tetus. Mes Nai Yesus In asimo anoni' sin nakain sin.
14 Tabug Nai Yesus niit lasij nane, In namaunun In asimo anoni' sin. In naguab am nak, “Mifetin li'ana' sin naan he neman anteen Kau! Naik mikain sin! Natuin atoni le' paap mese on le' sin le' naan, es le' anjalin Uisnenog Inin. 15 Mimnau milek-leko'! Sekog le' anlomi he neem anhaumaak Uisnenog, sin lo he namnau nisan, on le' li'ana sin namnau sin inaf-amaf. Kalu ka on nane fa, ka nabe'i fa he atteek sin tak Uisnenog Inin.”e 16 Lalit Nai Yesus anhoo naan li'ana sin naan, ma anpohan In animan noi sin mese-mese he naguab anfeen sin tetus.
Atoni amu'it nami lalan he nmoni nabal-baal nok Uisnenog
(Nai Mateos 19:16-30; Nai Lukas 18:18-30)
17 Tabug Nai Yesus sin he annaon ankonon, anmu'i atoni amu'it mese naen neem he na'eku nokan. In naluli' anbi Nai Yesus In matan, ma antoti mnak, “Aam kulug le' au 'tola 'ani. Au he 'toti babaun. On ii, Aam. Of au he 'mo'e on mee, henati' nabe'i au 'taam 'oi sonaf neno tunan, he 'moni ubal-baal 'ok Uisnenog?”
18 Nai Yesus natael am nak, “Nansaa' am es ho amteek Kau mmak, ‘le' au 'tola 'ani’? Ka tiit fa tuaf mese le' he ttola tanij aal Uisnenog anmese Kuun. 19 Ho muhine mulali aplenat ahunut na'ko Uisnenog le' nak,
‘Naik amlolo atoni;
naik amkake;
naik mubaak;
naik amsaksii mimoe;
naik amputa-kliun atoni in bale';
ma amtola noi ho ina' ma ho ama'.”’f
20 Atonij naan natael am nak, “Namneo, Aam kulug! Au unaoba' ale' kanan atolan sin le naan 'mulai u'ko tabug au fe' munif kau.”
21 Nai Yesus ankasian atonij naan, ma naguab am nak, “Namneo! Mes anmu'i lasij mese antein. Ho mfani nai ma musosa' mani ale' kanan ho 'mu'im sin. Lalit meki loit een le' ho mupeni sin naan ma amnao he mbati mani sin noi amamu'it sin. Lalit ho mbelok amfani uum nai he mutuin Kau. Uisnenog of anseek banin ko anpake amaus neno tunan.”
22 Tabug in nneen Nai Yesus In aguaban on nane, in nekan ansuus anae le'uf. Ma in anfani nok neek susal natuin atonij le' naan, amu'it namneo-namneo.
23 Ma Nai Yesus nail anfuun am nateef ma naguab noi In asimo anoni' sin am nak, “Amneen, oo! Amu'it susal mafena' he antaam noi sonaf neno tunan!”
24 Anneen lasij nane, In asimo anoni' sin naki'un. Ma Nai Yesus naguab anteni am nak, “Amneen milek-leko'! He atjali Uisnenog Inin susal ka aan'-ana' fa! Naik mitenab am mak manaf le'uf. 25 Atoni amu'it mese he antaam noi sonaf neno tunan ma anjali Uisnenog In anah, in susal paap' mese on le' bijakase unta he ntaam noi in pa'an, annao antaam anpe'o anet mese in abolan.”
26 Nai Yesus In aguaban naan anmo'e sin namkaak anteni. Ma sin anmatotin een am nak, “Kalu namneo on nane, sekog es le' nabe'i napeni 'honis nabal-baal?”
27 Nai Yesus nail sin mese-mese, lalit naguab am nak, “Natuin mahinef ma manoef mansian of ka anjali fa saa' es. Mes mimnau, natuin mahinef ma manoef Uisnenog, ka tiit fa saa' es, le' of ka njali fa.”
28 Lalit nai Petrus anmulai naguab am nak, “Aam! Hai mniken mani ale' kanan saa'-saa' he mituin Ko. Es on naan hai of mipeni saa'?”
29-30 Nai Yesus natael am nak, “Au he utoon ki m'ak on iij: sekog es le' natuin Kau, ma annao naloo' na'ko in inaf-amaf, in olif-tataf, in anah sin, in lelel, in mepug, nok ale' in umel nanan, he nnao natoon Uisnenog In Tu'in Alekot anbi mee-mee, in of ansimo nafani' natun mese. Ale' saa'-saa' le' in nasaitan sin naan, of napeni nafani' sin annesi anteni na'ko naan. In of napeni hamu'it amsa', natuin in natuin Kau. Mes tabug pah-pinan iij namle'u, in of anmoni nabal-baal nok Uisnenog. Lasij le' naan, es le' anjali seun banin noi ne! 31 Mimnau, oo! Natuin Uisnenog In tenab sekog nanaeb in aon, of nabaun. Ma sekog napalan in aon natuin Uisnenog In tenab, of nalatan.”g
Iij ee haan tonas hae' tenu anmatoom nok Usif Yesus In amaten
(Nai Mateos 20:17-19; Nai Lukas 18:31-34)
32 Tabug naan, Nai Yesus sin annaon noin Yerusalem. Anbi pukan le' naan, Nai Yesus es le' ahunut. Ma In asimo anoni' sin nok tuaf abjaan antein anbin In kotin. Sin namnau In aguaban neot es le' nak, tuaf abjaan sin of namatel anbi Yerusalem. Es on naan sin anmunekun ma namtaun amsa'. Anneen on nane, Nai Yesus no'en naan In asimo anoni' sin anmesen, ma naguab anteni saa' le' tuaf abjaan sin of anmo'el anbi Yerusalem.
Nai Markus 10:32-52
33 In naguab am nak, “Hi mneen, oo! Tabug ii, hit tnao toi Yerusalem. Au le' ii, Mansian Namneo-Namneo. Mes anbi Yerusalem sin of nasosa' Kau noi anaak lasi palsait Yahudi sin anakaf sin ma kulu agama sin. Lalit sin of anhukum namate Kau. Ma sin annona' Kau noi tuaf abjaan le' ka nahine fa Uisnenog. 34 Lalit sin na'akan Kau le'uf-le'uf. Sin nakinu Kau. Sin antepo Au aok tal papa' oke'. Lalit sin nlolo niis Kau. Namneo, Au 'maat. Mes anmiu ntein Au 'moni 'faan.”h
Nai Yakobus ma nai Yohanis antotin he anjalin kase naek
(Nai Mateos 20:20-28)
35 Lalit Nai Sebedius in anah sin, es le' nai Yakobus ma nai Yohanis, sin neman noi Nai Yesus. Sin antotin am nak, “Aam kulug! Hai he miguab maan babaun.”
36 Nai Yesus antoti sin am nak, “Hi he miguab saa'?”
37 Sin nataen am nak, “On ii, Aam! Nati' tabug Ho amtoko ma mnaa' aplenat, hai mtoti he Ho mutokob kai, tuaf es anbi Ho 'nimam aliij, ma tuaf es antein anbi Ho 'nimam ane'ug, he hai mnaa' mok aplenat amsa'.”
38 Nai Yesus natae sin am nak, “Hi nua ki ka mihine mani fa saa' le' hi mtotij. Au le' iij, of upeni susal ma mane'at namfau'. Es on naan on mee? Anbi hi tenab mak, hi mibe'i he amnaben susal ma mane'at tal ammate mok Kau, oo?”i
39 Sin nataen am nak, “Hai mibe'i.”
Nai Yesus naguab antein sin am nak, “Namneo. Hi of amnaben susal ma mane'at amsa' on le' Au. 40 Mes sekog es le' antoko anbi Au 'nimak aliij ai' ane'ug, Au ka 'selo Ok fa 'bi lasij naan. Natuin lasij naan, Uisnenog es nafeek. Ma In nafeek nalali sekom-sekog es le' he antoko anbi balel naan.”
41 Tabug asimo anoni' abjaan sin anneen nai Yakobus ma nai Yohanis sin haan totis on nane, sin namaunun anae le'uf. 42 Lalit Nai Yesus no'en sin ok-oke' ma naguab am nak, “On ii! Hi mihine milail jen, ai' kaha? Kase naek le' anna'an aplenat, sin of es anhamu'i toog. Tal antee toog ka nabloti naleko fa. Ma anakaf-anakaf anbi pah-pah le' ka nahine fa Uisnenog, sin nanaoba' atolan ma aplenat huma'-huma', tal sin toog ka nabe'i fa he naiti sin anaak een. 43 Mes ka nabe'i' fa he hi mmo'e on le' naa! Sekog na'ko ki le' anlomi he njali kase naek, in lo he njali on le' abaut he ntuthae in amnono sin.j 44 Ma sekog es anlomi he anjali anakaf, in lo he anmo'e in aon on le' atel ma anmepu nenog-nenog on le' naa.k 45 Fun Au, Mansian Namneo-Namneo, es le' ii. Au ka 'uum fa he atoni antuthae Kau, mes Au 'uum he 'tuthae too mfaun sin. Au 'uum he 'fee Au monik nok atemen, he 'soi 'aan too mfaun sin na'ko sin sanat ma penu sin.”
Usif Yesus naleko' atoni afolot
(Nai Mateos 20:29-34; Nai Lukas 18:35-43)
46 Nai Yesus nok In asimo anoni' sin ma too mfaun sin neem anteen koot Yeriko. Tabug sin he annaon ankonon, sin niit atoni afolot tuaf mese antoko ma antoti piut-piut anbi lalan in ninen. In kanan nai Bartimeos, nai Timeus in anah. 47 Tabug in anneen nak, akonot naan Nai Yesus na'ko Nasaret, in anhunun naheel naan jon am nak, “Yesus! Ho le' naan, sufa'-ka'uf na'ko nai Daut! Hai mpao Ko 'ala loog ee. Ambaban maan kau!”
48 Anneen in hanan nane, too mfaun sin nakain ee mnak, “Hoi! Mumeka'!”
Mes in anhunun naheel anteni mnak, “Yesus! Nai Daut in sufan! Mumnau maan kau!”
49 Ma Nai Yesus anhake mnak, “Hi mekij neem!”
Lalit sin annaon noi nai Bartimeos am nak, “Noog aah nai! Aam kulug no'en ko. Uum nai!”
50 Anneen on nane, nai Bartimeos anpolin nani in tai nusat, lalit anfeen ma annao lab-laab he na'eku nok Nai Yesus.
51 Lalit Nai Yesus antoti mnak, “Ho mlomi saa' he Au 'fee' le' noi ko?”
Atoni afolot naan natael am nak, “Koi, Aam! Au totis es le' kalu naleko te, au 'iit!”
52 Nai Yesus naguab anteni mnak, “Natuin ho mpalsai mulali mak, Au ube'i uleko' ko, es on nane tabug ii ho muleko nai! Amnao amfani nai!”
Lalit nai Bartimeos in matan afolot een naan naleko nanin. Es on naan in nok annao nuu naat Nai Yesus.