Tu'in anmatoom nok bifee banu es, ma afeek lasij le' amaufinut
18
Tabug mese, Nai Yesus nanoni' In asimo anoni' sin, anpake aguab mapolin, mautu he sin an'onen een naik natfeek ma naik an'ao klati. Sin lo he npalsain piut-piut noi Uisnenog. 2 In tu'in naan on ii: “Anbi koot mese anmu'i afeek lasij le' ka nfaloli fa Uisnenog. In ka nlae natuin fa sekom-sekog amsa'. 3 Anbi balel naan anmu'i bifee banu es, neem piut-piut ma antoti afeek lasij nane mnak, ‘Aam afeek lasij! Mufeek maan kau au lasij. Mufeek ee te, lo he natai!’4 Nahunut, afeek lasij naan ka nlae natuin fa bifee banu' naan. Mes 'loog-aloog te, in nneen bifee banu' naan in hanan. Lalit in antoko ma natenab am nak, ‘Namneo, au le' iij ka faloli fa Uisnenog, saa' anteni mansian. 5 Mes bifee banu' iij, annaak menab kau ge. Es on nane, maut he au ufeek in lasij, natai fe'! Kalu ka fa te, in of anfani neem piut, he nahaeb niis kau.”
6 Hi mitenab miit afeek lasij le' amaufinut naan in aguaban. 7 Kalu nna-nao ma in nbaban bifee banu' naan, Uisnenog of anbaban Inin msa', le' an'onen een faij-manas he ntotin babat na'kon Ne. Mes Uisnenog ka @@tunda-tunda fa. 8 In aan'ulus sin lasin naan labah. Es on naan Au he 'toti ki on ii: tabug Au, Mansian Namneo-Namneo le' iij, abelok afani 'uum ulali, Au of u'eku 'ok atoni apalsait anbin pah-pinan iij, ai' kaha?”
Atoni Farisis tuaf mese, ma akoni noni ponij tuaf mese annaon an'onen een
9 Nai Yesus natu'in anteni anpake aguab mapolin, anmatoom nok tuaf-tuaf le' naan in tuan ee amneot, ma nail anlaksae tuaf abjaan sin. In natu'in am nak, 10 “Anmu'i naan anaef nuug annaon an'onen een anbin Ume Onen Uuf. Tuaf es na'ko pukan nonot palsait Farisi; es anteni akoni noni ponij. [Atoni Yahudis sin naan atoni Farisis sin, atoni knino'. Mes sin naan akoni noni ponij sin, atoni amle'ut.] 11 Anteen ume onen on nane, atoni Farisis naan anfeen anhaak ma an'onen am nak, ‘Makasi Usi', natuin au le' iij, atoni alekot. Au ka maufinu fa on le' tuaf abjaan sin. Au ka ubaak, ka palu', ka mmakake fa 'ok tuaf in feel. Makasi Usi', natuin au ka maufinu fa on le' akoni noni ponij le' ii. 12 Au unaah au tuak ha'el nuug anbi kleij mese in nanan. Au 'fee @@pel na'ko saa'-saa' le' au upeni kuuk sin.’ Atoni Farisis naan, an'onen on le' naan.
13 Mes akoni noni ponij naan anhake naloo-loog anbi kotin nae. In ka nbalani fa he naiti in anakan ma anbaisenu noi nenog. In an'onen, mes in naluli' aah, ma in nekan naklati' am nak, ‘Koi Usi'! Amneek maan kau, mansian asanat le' iij! Amfee maan kau sako sanat noi ale' au sanat sin!’
14 Tabug tuaf nuug een naan anfanin noin sin umen, sekog es le' anmahalan nalaal je nok Uisnenog? Atoni Farisis le' nanaeb on naan ee oo, ai', akoni noni ponij? In lo he ansimo akoni noni ponij le' neek palan naan. Mes In ka nlae naan fa atoni Farisis naan. Fun Uisnenog namofu tuaf le' nanaeb on naan, ma ntuna' nalatan atoni neek palan.”a
Usif Yesus naguab anfee tetus noi li'ana' een
(Nai Mateos 19:13-15; Nai Markus 10:13-16)
15 Tabug mese, amaihonit sin naskau neki sin aan een noi Nai Yesus, he In antao In aniimn een he naguab anfeen sin tetus-athoen. Nail on nane, Nai Yesus In asimo anoni' sin nakain amaihonit een naan. 16-17 Mes Nai Yesus ansenu li'ana' een naan, he neman noi Ne. Lalit In nakain In asimo anoni' sin am nak, “Naik amkaibaat li'ana' een naan neman noi Kau. Hi naik am'eka' sin. Mimnau milek-leko'! Fun tuaf-tuaf le' anlomi he njali Uisnenog inij, in lo he na'pesi' in tuan noi Uisnenog nahuum on le' li'ana' le' napeis jok noi sin inaf-amaf sin.”
Amu'it le' anlomi he ntaam noi sonaf neno tunan
(Nai Mateos 19:16-30; Nai Markus 10:17-31)
18 Tabug mese, anakaf tuaf mese na'ko atoni Yahudis neem antoti Nai Yesus am nak, “Aam Kulug le' matola'! Au he 'mo'e on mee he uhine namneo-namneo 'ak, au ube'i 'taam 'oi sonaf neno tunan ma moni ubal-baal 'ok Uisnenog?”
19 Es on naan Nai Yesus natael am nak, “Nansaa' am es ho museon Kau mmak, ‘le' matola'’? Aal tuaf mese aah le' matola', es le' Uisnenog. 20 Ho muhine mulali Uisnenog In atolan na'ko unu' nak:
naik ammakake;
naik amlolo mansian;
naik mibaak;
naik amjali saksiij amoel;
ma amtola ho ina'-ama' sin.”b
21 Atonij naan natael am nak, “Namneo, Aam! Au utuin ulali atolan sin naan anmulai na'ko au fe' aan'-ana'!”
22 Anneen on nane, Nai Yesus nak, “Lekog! Mes ho mkulan lasij mese. Tabug iij, ambelok amfani nai he musosa' mani ho maus een ok-oke'. Lalit amnao mbati loit een noi ama'mu'it sin. Lalit ambelok amfani uum he mutuin Kau. Fun Uisnenog of anseun bani ko neki amaus sonaf neno tunan.” 23 Anneen on nane, atonij naan nekan ansuus, natuin in anmu'in nfiin.
24 Nail noi in anbelok anfani nok neek susal on nane, Nai Yesus natoon noi In asimo anoni' sin am nak, “Atoni amu'it, susal matani' he ntaam noi sonaf neno tunan. 25 Hit tanesab ee nok lasij abjaan. Ka nuug fa he bijakase unta antaam noi in o'af anboni' anet in a'bolan. On nane msa' atonij le' ala nafneek noi in amaus, mes ka nafneek fa noi Uisnenog, ka nuug fa he in antaam noi sonaf neno tunan.”
26 Too mfaun sin le' annenan Nai Yesus naguab on naan, antotij Ee mnak, “Kalu namneo susal noi atoni amu'it on le' naan, atoni human on le' mee na' nabe'i napeni sako sanat ma 'honis?”
27 Nai Yesus natael am nak, “Noi mansian, namneo lasij namfaun ka nuug he anjali fa. Mes noi Uisnenog, ale' saa'-saa' lo nabe'i anjalin.”
28 Es on naan nai Petrus anluut am nak, “Aam! Hai mnao misaitan hai maus een oke een, he mituin Ko. Es on naan hai of mipeni saa'?”
29 Nai Yesus natael am nak, “Petrus! Amneen mulek-leko'! Atonij le' nasaitan in umel, in feel, in olif-tataf, in inaf-amaf, ai' in anah sin, natuin in nanaob Uisnenog In mepug, 30 lo tebes, in ansimo nafani' sin namfau anbin pah-pinan ii. Lalit anbi tabug neno amsoput, in anmoni nabal-baal nok Uisnenog.”
Haef teen gue Usif Yesus naguab anmatoom nok In amaten
(Nai Mateos 20:17-19; Nai Markus 10:32-34)
31 Nai Yesus annao nok In asimo anoni' sin tuaf bo'es am nuug ma naguab nok sin anmesen am nak, “Hi al-alaki mihine milali mak, tabug iij hit atnao toi koot Yerusalem. Attee nae, ale' lasin le' Uisnenog In mafefa knino' sin anluul sin unu' anmatoom nok Mansian Namneo-Namneo naan, of anjali teb-teeb on le' saa' le' sin anluul sin. 32 Sin of nana'at Kau noi atoni teta' le' ka npalsain fa noin Uisnenog. Lalit sin nakle'at ma nasi'ut Kau, na'palan Kau huma'-huma', npulan hapel noi Kau, 33 antepo Kau, lalit anlolo namate Kau. Mes anmiu ntein on nane, Au 'moni 'faan.”
34 Annenan on nane, Nai Yesus In asimo anoni' sin antakamana, natuin sin ka nheke naan fa In aguab naan in oten.
Usif Yesus naleko' afolot tuaf mese
(Nai Mateos 20:29-34; Nai Markus 10:46-52)
35 Tabug Nai Yesus sin he noi ntaamn een noi koot Yeriko, anmu'i atoni afolot mese antoko ma antoti loit anbi lalan in ninen. 36 Tabug in anneen too mfaun sin annaon nboni nane, in antoti sin am nak, “Hoi! Saa' aan es le' iij?”
37 Es on naan sin natoon ee mnak, “Nai Yesus na'ko Nasaret, neem annao anboni le' ii.”
38 Anneen on nane, afolot naan ankua' naheel-heel am nak, “Yesus! Nai Daut in sufan-ka'un. Amneek maan kau!”c
39 Tuaf-tuaf le' nahunun anbin Nai Yesus In matan nakain ee he nameka'. Mes in ankua' piut, ma naheel-heel am nak, “Auwoo, sufaf nai Daut! Amneek maan kau!”
40 Tabug Nai Yesus anneen on nane, In nasnaas. Lalit In anleek tuaf he annao nnaa' neki afolot naan. Neman nteen Nai Yesus In matan, Nai Yesus antotij ee mnak, 41 “Ho mlomi he Au 'mo'e saa' 'oi ko?”
In natael am nak, “Aam! Au 'toti he au ube'i 'iit.”