3 Anneen on nane, anaak ulusan naan natenab nuu-mneem am nak, ‘Au mmate! Au he unsaa' tabug iij? Afoi naijaan, au ka ube'i. Atoti loit, au 'mae kuuk. 4 Kalu au ka mepu 'teni' fa 'bi iij, au lo he etu lalan he tuaf abjaan sin anbaban ma ansimo kau.’

5 Es on nane, in anmulai no'en tuaf-tuaf le' natusan loit na'kon in kesel. In antoti ahunut ee mnak, ‘Hoi! Ho mutuus fauk et au usi'?’

6 Atoni naan natael am nak, ‘Au utuus mina saitun liter nifun haa (4.000.’^a

Es on naan anaak ulusan naan, naguab am nak, ‘Namneo! Ho sulat le' ho mutuus ee, es le' ii. Tabug iij ampisug, lalit amtoko he mluul suul tusa' fe'ug mmak, ho mutuus liter nifun nuug (2.000) aah.’

7 Lalit in antoti atoni atusat mese am nak, Ho ntein. Ho mutuus fauk?’

In natael am nak, ‘Au utuus anel kalog nifun mese (1.000.’^b

Anaak ulusan naan natoon am nak, ‘Ampisu mpolin ho suul tusa' molof naa, lalit amluul suul tusa' fe'ug, mmak kalog natun faan guah (800).’

8 In anmo'e on naan, tal antee in usin ee nahine in lolen naan. Mes kesel naan lo he nmanaku' nak, in anaak ulusan le' amaufinut naan anputakliun nahine namneo.

Es on naan Au utoon ki aguab mapolin iij, he hi mihine mak, kalu tanesa atoni apalsait, ma ka apalsait sin, lo namneo in maloe nnesi he nmoni nbi toog sin in atnaank een.

9 Es on naan hi mitenab miit. Maski mansian pah-pinan iij anpake in amaus he nmo'e amle'ut, mes naleko nnesi hi mpake hi maus een he mmababan es nok es. Nok lalan naan, hi mipeni amnono namfau. Maski amaus naan oke', mes Uisnenog of naloitan ki balel et sonaf neno tunan.

10 Kalu tuaf ka namoe nahine fa nbi lasij aan'-ana', in of ka namoe nahine fa anbi lasij anaek. Ma kalu tuaf anputakliun anbi lasij aan'-ana', in of anputakliun nahine anbi lasij anaek-anaek. 11 Kalu atoni ka nabe'i npalsai ki fa he m'ulus lasi aan'-ana' anbi pah-pinan iij, Uisnenog he nabe'i npalsai ki he mmo'e lasi anaek, on mee? 12 Kalu hi ka mibe'i m'ulus fa tuaf abjaan een sin amaus een, sekog balani he nfee ki in amaus noi ki?

13 Tuaf ameput mese ka nabe'i antuthae fa kesel tuaf nuug. Fun in of ka nneek fa tuaf es, ma anneek tuaf es. In nakii' anbi tuaf es, mes ka nlae natuin fa tuaf es. On nane msa' hi ala ki. Hi ka mibe'i mneek fa Uisnenog namneees nok hi mneek nonij-loit.”^c

14 Tabug naan, anmu'i atoni Farisis fauk nokan annenan Nai Yesus In aguab een lelon naa. Es on naan sin nakle'at, natuin sin npalu' loit. 15 Mes Nai Yesus natael am nak, “Hoi! Maski hi miknino' hi tuam een anbi mansian een sin maatk een, mes Uisnenog nahine hi neekm een naan, maufinu. Anmu'i lasij namfau le' mansian sin antuna' nalatan sin, mes, Uisnenog naan lasin naan noi maufinug, ma nmainieen sin.

16 Anmulai na'ko baba nai Musa ma mafefa knino' sin napeni Uisnenog In atolan, tal antee tabug nai Yohanis Aslanit neem antee msa', hit atoni Yahudis atmoni tatuin atolan sin naan. Mes tabug iij Uisnenog In Tu'in Alekot natoon On ma naneenb On antee meel am meel. Anmu'i tuaf namfau n'etun lalan ma'tani', he sin nabe'i nmoni natuin Uisnenog In alomin.^d 17 Maski neno tunan ma pah-pinan iij namneek, mes Uisnenog In atolan aan'-ana' amsa', ka namneku fa. Titik mese amsa', ka namneku fa!^e

18 Atonij le' anpolin in feel, lalit ansao nteni bifeel abjaan, naan amakaket. Lalit atonij le' ansao bifee polin naan, anmakake' msa'.”^f

19 Nai Yesus natu'in anteni am nak, “Anmu'i atoni amu'it mese. In bijaas anpake tai amasat. Faij-manas in nfesek piut. 20 Anbi balel naan anmu'i naan atoni ama'mu'it mese, kanan nai Lasarus. In aon, napaap oke'. nenog-nenog, in amnono sin nokan, ma natokob anbi atoni amu'it naan in umel enon he ttaam. 21 In anlomi he napeni mnahat na'ko atoni amu'it naan in amnaah nesif een, mes ka napeni niit fa saa'-saa'. Aal asun ee neman ma nlami in paap oef een.

22 Lalit nai Lasarus anmaat. Es on naan Uisnenog In ahaket een na'kon sonaf neno tunan neman ma nekij ee nnao. Lalit natokob anbi baba nai Abraham in aon abjaan.

Ka loog fa te, atoni amu'it naan anmate msa', lalit sin ansuub. 23 Mes in ka ntaam fa noi sonaf neno tunan. In antaam an'ani ai maputu' ai malala' abal-balat, nabgua nok amates namfau. Anbi balel naan, in napeni susal-hamu'it ma mane'at piut. Tabug mese, in na'aiti matan on iij, in niit nai Lasarus antoko ma nmalin-maliin kuun anbi baba nai Abraham in aon abjaan. 24 Es on naan in ankua' ee mnak, ‘Baba Abraham! Koijoo, mkasian maan kau fe'! Amlelu nai Lasarus he nalepa in aklulun tunan ee noi oel, he neem napeet naan au maak ee tunan. Au he mate kuuk een es ai abal-balat iij!’

25 Mes baba nai Abraham natael am nak, ‘Koijoo, anah! Mumnau mulek-leko' nenog unun fe'! Nenog naan, tabug ho mmoni fe' ambi pah-pinan, ho mupeni mani ale' kanan alekot. Mes nai Lasarus aal napenij haa susal. Es on naan tabug iij, Uisnenog nhatanij anbi ii. Mes ho mupeni susal ma mane'at. 26 Anneis-neisi nteni, et ho ma hai, Uisnenog anbeti kit. Anmui' kefan amnanu' ma meinuan. Es on naan tuaf anbi iij, ka nabe'i netin fa noin naan, ma tuaf abiten naan ka nabe'i neman fa noin ii.’

27 Lalit atoni amu'it naan antoti mnak, ‘Kalu on nane, baba mlelu nai Sarus he nfani noi au ama' in umel fe'. 28 Au 'mu'i olif tuaf niim et nael ee fe'. Amlelu nai Sarus he annao namnauba sin, he sin anbelok anfanin nai noi Uisnenog. Maut he sin nmaten ate, sin naik antaman noi bale amleut le' ii.’

29 Mes baba nai Abraham natael am nak, ‘Uisnenog anfee nalali sin baba nai Musa ma In mafefa knino' een sin lulat een. Sin ho oli' nabe'i ntae nafan-fani' sin, he nahinen namneo-namneo Uisnenog In lomin.’

30 Mes atoni amu'it naan anprotees am nak, ‘Baba Abraham. Naan ka nanokab fa fe'! Sin ka nfaloli fa Uisnenog In A'an ma Plenat naan! Lo he nmu'i amates anpoi na'ko opug, he annao natoon noi sin, na' sin anlomin he natninan.’

31 Mes baba nai Abraham natael am nak, ‘Kalu sin ka nlomin fa he natninan baba nai Musa ma Uisnenog In mafefa knino' een sin hanak een, maski amates sin anpoin na'ko opun amsa', sin of ka natninan fa.’”