4 Kalu ho aom-abjaan anmo'e nsaan ha'el hiit anbi nenog mese, es on naan in nlomi he napiis, lalit in neem haef hiit he ntoti sakot, ho lo he mniken mani in saant een naan ha'el hiit.”

5 Tabug mese, Nai Yesus In asimo anoni' sin^b neman ma nak Ee mnak, “Aam Kulug! Hai neek palsait ka nmatani' fa. Amhatani maan kai!”

6 Es on naan Nai Yesus natael am nak, “Kalu hi mmu'i neek palsait noi Uisnenog In kuasan, maski aan'-ana', mes hi mibe'i miplenat haug anaek iij ee mmak, ‘Mutfaki' ma munani' nai moi tasij!’ Haug iij of natuin nani hi plenat naan.”

7 Lalit Nai Yesus naguab anteni mnak, “Taiti 'leta'. Anmu'i atel le' an'ote naijaan anbi lelel, ai' npao abibi-kase anbi mnefu'. Anmepu nalali te, atel naan anfani noi umel. Ka nuug fa he in usin nak ee mnak, ‘Uum he hit nua kit atbukae nai!’ 8 Kahaf! Le' bijaas ate, in usin naan naplenat ee mnak, ‘Amnao muloitan amnahat noi kau. Lalit ho meku mbi kotin nae.’ 9 Kalu atel naan anmo'e natuin kesel naan in alomin, hi mak kesel naan of antoti makasi noi ne, ka? Kahaf! 10 Hi on le' nane msa'. Kalu hi mmepu milali ale' saa'-saa' le' Uisnenog nana'at ma nba'an ki sin, hi miguab am mak, ‘Hai le' iij, aal Ho atel kai le' ka maso'it fa. Hai ka m'etu fa he munaeb ma mbo'is kai. Hai aal minaob ahaa hai mepug le' Ho muna'at kai sin.’”

11 Tabug Nai Yesus sin annaon noin koot Yerusalem, sin anteen mahiun propinsi Galilea ma propinsi Samaria. 12 Tabug sin he ntaman noi kuan mese, anmu'i atoni ameen atho'al atlaku' tuaf bo'es neman he na'eku nokan. Sin anhaken anbin aloog, 13 lalit ankua' een nabguan am nak, “Yesus! Usi'! Amneek maan kai!”

14 Tabug Nai Yesus niit sin on nane, In nlelu mnak, “Hi mnao miklila' hi aom een noi anaak lasi palsait, maut he in naplekas ki nak, hi meen atho'al atlaku' naan namnekun nalalin, ai' kaha.” Annenan on nane, sin annaon. Mes anbin lalan atnanan on nane, nok askeken, sin naleko nanin.^c

15 Sin annaon nfinin ma nmalilan nmaten. Mes tuaf es anbelok anfani neem ma nateef nok Nai Yesus. In ankua' am nak, “Pules ma bo'is noi Uisnenog! Au uleko ulaal je!” 16 Es on naan in nlituu ma ntoti makasi anaek-anaek noi Nai Yesus. (Fun kaah, in ka atoni Yahudis fa. In le' naan atoni Samarias le' anmaklasi een piut nok atoni Yahudis sin.)

17 Es on naan Nai Yesus antoti noi tuaf een le' nok Ne le mnak, “On mee? Lelon Au uleko' tuaf bo'es, ai'? Tua seo' een, etan mee? 18 Nansaa' am es atoni teta' iij anfani neem he ntoti makasi noi Uisnenog, ma nbo'is?”

19 Es on naan Nai Yesus naguab noi atonij naan am nak, “Ho muleek gue, natuin ho mpalsai namneo-namneo moi Kau. Es on naan amfeen nai, ma mfani nai nok ao-mina'!”

20-21 Tabug mese, anmu'i atoni Farisis fauk neman ma antoti Nai Yesus am nak, “Aam Kulug! Mutoon miit kai fe'! Leka' Uisnenog anmulai nanaob In aplenat?”

Es on naan Nai Yesus natael am nak, “On ii! Naik mak Uisnenog nanaob In aplenat nok a'taka' huma'-huma' anbi pah-pinan iij, he atoni nabe'i niit ee neki matan afguan. Atoni ka napeni fa 'taka he nak, ‘Mail miit iij! Fun Uisnenog nanaob In aplenat, es iij!’ ai', ‘Es nae!’ Kahaf! Natuin In nanaob In aplenat anbi hi sonam ma hi tnaanm een et tuaf mese-mese in nekan nanan ok-oke.”

22 Lalit Nai Yesus naguab noi In asimo anoni' sin am nak, “Ka loog fa te, Au Mansian Namneo-namneo le' iij, ka ubgua 'ok ki fa lee. Of anbi neno ma'nukat sin, hi mlomi he miit Kau tabug Au 'fani 'uum. Mes Au ka 'uum fa fe'. 23 Lalit kalu tuaf-tuaf neman ma natoon noi ki mnak, ‘Kristus es iij!’ ai', ‘Kristus es nae!’, hi naik amtaisibu he maen nuu-mneem, fun sin aguab een naan, puta-kliun aah. 24 Fun tabug le' Mansian Namneo-Namneo naan anfani neem, in a'taka' naan mamnita' maat-maat, on le' limat le' naliim he nmo'e nenog ansinak na'ko tukan noi tukan. 25 Mes In lo he nasae hamu'it huma'-huma' fe'. Ma mansian batan muni' iij, ka nlomi fa he nnenan ma ntita' napoitan Ee. 26 Mes tabug In anfani neem, mansian sin anmonin maufinu on le' bijaas, nahuum on le' nai Noh in batan.^d 27 Tabug naan, sin anbukaen, anmo'en fesek matsaos, tal antee tabug nai Noh antaam noi bnao oel naan. Mes mansian sin ka nlomin fa he natninan. Nok askeken, noe sako' ansaen sin ma nalemab sin ok-oke'.^e

28 Naan paap mese amsa' on le' mansian sin le' anmonin maufinu tabug nai Lot in batan. Tabug naan, sin anbukaen kuuk, nasosa' een kuuk, nmepun lelel, anmo'en umel, ma nmonin maufinu on le' bijaas sin anmo'en. 29 Mes mansian sin ka nlomin fa he natninan. Lalit nok-nok ana naan, tabug nai Lot naen nasaitan koot Sodom, nok askeken, uul aij ma fatu-foon anmofu neem na'ko nenog ma notu naklati' sin ok-oke'.^f

30 Es on naan hi mpaant om! Naik-naika Mansian Namneo-Namneo naan anfani neem, ma mansian sin aal anmonin on le' bijaas. Mes nok askeken, In anbool neem. 31 Nenog naan, tuaf le' antoko nbi umi folis, naik amtaam amteni moi umel nanan he mpainote umel. Tuaf le' anmepu nbi lelel, naik amfani he maiti mteni bale' et umel.^g 32 Mimnau nai Lot in feel tabug naan. In on mee? In anmaat, natuin in namnau in bale' een etan in umel.^h

33 Atoni le' ka nlomi fa he natuin Kau, natuin in anneek In tuan, in amonin, of luumn am palsuum sona. Mes tuaf le' annona' in amonin natuin in anneek Kau, Uisnenog of ansoi nafetin ee na'ko in sanat ma penu sin, ma in nmoni nabal-baal nok Ne.ⁱ 34 Au utoon 'ani ki! Tabug Mansian Namneo-Namneo iij ankoen On anfani neem, kalu anmu'i tuaf nuug antupan anbin hala, nok askeken, Uisnenog naiti tuaf es, ma ka noki fa tuaf es. 35 Kalu anmu'i bifeel nuug napaun anel, Uisnenog of naiti tuaf es, ma ka noki fa tuaf es. [Kalu anmu'i tuaf nuug antofan anbin lelel, Uisnenog of naiti tuaf es, ma ka noki fa tuaf es.^j

37 Annenan on nane, Nai Yesus In asimo anoni' sin antotij Ee mnak, “Aam Kulug! Of ale' lasin naan anjalin anbin mee?”

Es on naan Nai Yesus anpolin aguab noi sin am nak, “On ii! Kalu hi miit kolo amneku punu een naplele nabguan noin meel, hi mihine mak, naan anjali taka' am nak, sin niit punu ee balan.” [Anpake salit manifa', tabug Kristus ankoen On anfani neem, in a'taka' sin of mamnita', kalu atoni nahinen.]