2-5 Atoni Farisis sin annaa' nahelan sin halat atoni Yahudis. In aletan on le' ii: kalu atoni he nbukae, lo he nafanu in animan natuin halat in lomin. On nane msa', kalu anfani neem na'ko 'masa', sin mes lo he naniun fe'. Tal antee sin bale' anbi ume hana' msa', es le' pika', aklaas, posi oel, lo he atfase sin natuin halat in lomin, hena' nabe'i atpake sin he tbukae.

Kalu anmu'i atoni Yahudis abjaan le' ka natuin fa halat sin naan, atoni Farisis sin of namaunun.

Es on nane, sin namaunun tabug sin niit Nai Yesus In asimo anoni' sin anbukaen, mes ka nafanu fa sin aniimk een natuin halat in lomin. Lalit sin neman ma nasaan Nai Yesus am nak, “Nansaa' am es ho asimo anoni' sin anbukaen mes sin ka nafanu fa sin aniimk een? Nane, sin anlaban hit atolan halat na'ko atoni mnasi unun sin!”

6-7 Mes Nai Yesus natae sin im nak, “Hi le' ii on le' atonij le' naguab naik, mes hi mmo'et naik kuun! Nahunu baba nai Yesaya anluul nani Uisnenog In a'an am nak,

Hi paap mese on le' sin amsa'. 8-9 Hi misaitan milali Uisnenog In aplenat ma mituin mansian in halat. Hi hinem ma maloem manenu' le'uf!

10 Nahunu baba nai Musa natoon nalali Uisnenog In aplenat am nak, ‘Amtola' hi amaihonit sin.’ Anluut anteni am nak, ‘Kalu tuaf mese ansekun in inaf ai' in amaf, mes lo he thukum tamatel.’^b 11-12 Uisnenog nanoni' ki on naan, mes hi minoni' naik na'ko naan. Hi mak, ‘Kalu tuaf mese anpaa' nalali he anfee saa' noi Uisnenog, maski in inaf-amaf ansuus anmaat, mes bale le' naan ka nabe'i fa he npakel he nbaban sin, natuin anpaa' nalaal jen he anfeel ee noi Uisnenog.’ 13 Es on nane, lelon Au 'ak ki m'ak, hi mpolin mani Uisnenog In lomin, ma hi mseek ee meki atolan mansian. Anmu'i atolan namfau le' hi mseek ee paap mese on le' naa.”

14 Lalit Nai Yesus no'en tuaf abjaan anbi naan, ma naguab am nak, “Amneen milek-leko', he hi mihiin. 15 Ale' saa' le' antaam noi atoni in tain ka nhai'nisi fa in aon. Mes saa' le' anpoi nfani, es le' neki hai'nisit noi in aon. 16 [Sekog he mneen, amneen he muhiin!”]^c

17 Lalit Nai Yesus nok In asimo anoni' sin annaon nasaitan too mfaun sin naan, ma antaman noin uum les. In asimo anoni' sin antoti leta' nane in oten. 18-19 Nai Yesus natae sin am nak, “Hi ka mihine fa amsa', oo? In oten on ii: saa' le' atoni in anbukae naan in leko kuun. Mes saa' le' anpoi nfani in es ka nleko fa. Saa' le' hit atbukae antaam noi hit taik, lalit anpoi nfaan. (Usif Yesus In salit nak, atoni nabe'i naah saa'-saa'. Ka talas fa.)

20 Mes saa' le' anpoi na'ko atoni in nekan, nane es le' neki hai'nisit, tal antee Uisnenog anmainisin ma ka nlomi fa he nabgua nokan. 21 Lasi le'uf namfau anpoi na'ko atoni in nekan, on le': tenab amle'ut, lasi mapaisa', lasi bakan, lasi malolot, 22 lasi palu', lasi kakel, mo'et amle'ut, a'puta-kliun huma'-huma', sinimakat, maktino', naguab nale'uf es, anhaunaeb on ma namoko on, ka nahine fa atolan, ma nanaak-faat.

23 Ale' 'mo'et amle'ut sin le' naan anpoin na'ko atoni in nekan. Nane es le' nale'un nafani' in aon. Ma Uisnenog anmainisin amsa'.”

24 Lalit Nai Yesus sin nasaitan balel naan, ma annaon noin koot mese, kanan Tirus. Anteen balel naan, sin antaman anbi umel mese, natuin Nai Yesus In ka nlomi fa he tuaf abjaan nahinen nak In eta le' naan. Mes In ka nabe'i fa he nakolo'.

25-26 Anbi naan, anmu'i bifeel mese, le' ka atoni Yahudis fa, le' anmaihonis anbi pah Fenesia et propinsi Siria. Tabug in anneen nak Nai Yesus neem, in annao ma antoti he anli'u napoitan nitu le'uf na'ko in aan feto.

27 Nai Yesus anpolin aguab am nak, “Li'ana sin, sin lo he anbukaen nahunun, lalit na' antokan amnaah nesif sin noi asun.” [Nok salit manifa' nak, Nai Yesus mes lo he nbaban In atoni Yahudis sin fe', na' anbaban atonij abjaan.]

28 Mes bifeel naan natael am nak, “Namneo, Aam! Mes asun naan sin esan me'ij in nupun. Es on naan sin neku amnahat amofut na'ko li'ana sin, sin a'piik een.” [Nok salit nak, tabug li'ana' sin anbukaen, asun naan napenin amnahat amsa'. Maski Nai Yesus aal he nbaab Inin kuun, In lo he nail atonij abjaan amsa'.]

29 Anneen on nane, Nai Yesus naguab am nak, “Aiiih, bifeel iij ee fe'! Ho guabam naan lo namneo! Es on nane ho mfani nai, natuin nitu le'uf anpoi nalaal jen na'ko ho anah.”

30 Lalit bifeel naan anbelok anfaan. Antee in umel, in anah naan antuup anfiin. Nitu le'uf naan anpoi nalaal je.

31 Lalit Nai Yesus sin nasaitan koot Tirus, ma annaon an'abnonon anpe'o lalan tasij ninen, ankono koot Sidon. Na'ko naan, sin annaon ankonon tal antee nefog Galilea. Lalit sin annaon noi pah mese nok koot bo'es, le' sin anteek nanij am nak, ‘Dekapolis’.^d 32 Anbi balel naan, anmu'i atoni amumut mese, le' ankoso nok. In amnono sin nekij annao noi Nai Yesus. Sin antotin he Nai Yesus antao In animan noi amenat naan, he naleko'. 33 Es on naan Nai Yesus nasaitan too mfaun sin, ma annao anmese kuun nok atonij naan. Nai Yesus nataam In aklulun noi atonij naan in luken nua sin. Lalit In antao hapel anbi In aklulun ma anpoe' atonij naan in maan. 34 Nai Yesus anbaisenu noi nenog ma anheel In asnasan, lalit naplenat anpake sin aguab am nak, “Efata!” (In oten nak, “Mutfai nai!”)

35 In naguab aal on le' naan, mes amenat naan in luken een anneen nani tabug naan. Ma in maan le' ka naguab nahine fa anmalule nani amsa', es on naan anmulai naguab naleek.

36 Lalit sin nua sin annao anfanin noin too mfaun. Nai Yesus antaal sin am nak, “Amneen, oo! Naik mitoon moi sekom-sekog mak, Au uleko' ulali atonij le' ii.” Maski Nai Yesus antaal sin nok matani' amsa', mes sin naguab een piut anbin balel-balel. 37 Too mfaun sin le' anneen aguab mantonan naan, ansanmakan. Sin naguab een am nak, “Matani' le'uf! Atonij le' ii anmo'e ale' saa' lo lekog ok-oke'. Akosot anneen. Amumut naguab.”