Misaitan monit amaufinut, ma mituin Uisnenog In lalan
13
Tabug naan, anmu'i tuaf natoon noi Nai Yesus am nak, gubernur Pilatus namate atoni Yahudis fauk een na'ko Galilea tabug sin neman noin koot Yerusalem he nekin afgua'-tulu' anbi Ume Onen Uuf. 2 Anneen on nane, Nai Yesus antoti mnak, “On mee? Atoni Galileas le' amates naan, sin sanat een anaek annesi na'ko tuaf abjaan sin ok-oke', ka? Es on nane, sin napenin hukum amaten, ka? 3 Kahaf! Mes kalu hi ka misaitan fa hi 'monim le' amaufinut een naan, he mbelok amfani mituin Uisnenog In alomin, hi of amle'u on le' sin. 4 Es on naan on meel anteni noi tuaf bo'es am fanu sin le' tabug mese fatu mnanu' Siloam natseel ma anbeek niis sin? Sin saant een anaek annesi na'ko tuaf abjaan le' anbin Yerusalem, oo? 5 Kahaf! Mes kalu hi ka misaitan fa hi 'monim le' mme'o moe baanj om, he mituin Uisnenog In alomin amneot, hi of amle'u on le' sin amsa'.”Hau sena le' ka nafuaf, nahuum on le' Uisnenog Inin, le' ka nmo'e niit fa lasi alekot saa' es
6 Lalit Nai Yesus anfee aguab mapolin mese am nak, “Anmui' naan atonij mese, le' anmu'i hau senat mafgua' mesea anbi in po'an. In neem piut-piut he anbaisenu hau senat naan he nahine noi nafgua guen aa oo, ai' kah fe'. Mes hau sena naan ka nafgua fa fe'. 7 Lalit in anlelu aknino' po'an naan am nak, ‘Toon teen gue, au 'uum tenij-tenij he uhine hau sena iij in afguan, mes au ka 'iit fa saa'-saa'. Es on naan amlalu misan he naik neku balel.’
8 Mes aknino' po'an naan natael am nak, ‘Aam, naik mutoo'. Amfee mteni maan ee, tabug toon es. Mautu he au ufo'ij 'iit naijaan le' hau sena iij in uun, lalit a'tao pupuk he nasbeeb. 9 Kalu toon amnemat ma nafgua te, lekog! Mes kalu kahaf fa te, mufae misan.’”
Usif Yesus naleko' bifee ameen akmuni-blotog, nateef nok neno onen
10 Tabug mese, nateef nok atoni Yahudis sin neno onen, Nai Yesus annao nanoni' anbi ume onen. 11 Anbi naan, anmu'i naan bifeel mese le' in akmunin nabloot, toon bo'es am faan gue, natuin nitu le'uf in amo'en. In ka nabe'i anhake nmaneo fa. 12 Nai Yesus niit bifeel naan, lalit no'en ee, ma naguab nok ne mnak, “Oin! Tabug iij, ho muleko nai.” 13 Es on naan Nai Yesus antao In animan noi bifeel naan. Nok askeken, in akmunin ablotog naan, nmaneo nani. Es on naan in antoti makasi, ma nbo'is Uisnenog.
14 Mes ume onen naan in anakaf natoo', natuin Nai Yesus naleko' amenat nateef nok neno onen. Es on naan in naguab noi too mfaun sin am nak, “Akliij es naan, nenog nee he hit tmeep. Es on naan naleko nnesi amenat sin neman anbi nenon le' naan, he namin tuaf he naleko' sin. Naik neman tabug neno onen!”b
15 Mes Nai Yesus natael ee mnak, “Hoi! Ho naik muguab, maik, ma mmo'e maik. Anbi neno onen amsa' hi mmepu, ai' kaha?! Fun hi mnao mifetin hi bijae nuug ma hi bijakase keledai een he ninun oel, ai'?! 16 Bifeel le' iij, baba nai Abraham in sufan, on le' hit. Nitu nakaf anfutug toon bo'es am faan. Es on naan kalu Au uleko' nateef nok neno onen on ii te, ansaan saa'?”
17 Anneen on nane, Nai Yesus in musun sin namaeb ok. Mes too mfaun een anmalinan In mepu alekot naan.
Usif Yesus anfee aguab mapolin anpake afgua ana le' aan-ana nfiin
(Nai Mateos 13:31-32; Nai Markus 4:30-32)
18 Es on naan Nai Yesus anluut anteni In aguaban nane mnak, “Au he unesa' apalsait een 'eki saa'? 19 Fe' unun, sin afgua fauk aah, mes anna-nao te namfaun. Sin nmulain on le' fua bona' afgua mese le' aan-ana le'uf. Atoni anseen anbi po'an. Lalit anmoni, ma anjali hau naek. Es on naan kolon sin neman ma nakunan anbin in asbaken een.”
Usif Yesus anfee aguab mapolin anpake lalu taif
(Nai Mateos 13:33)
20 Lalit Nai Yesus naguab anteni mnak, “Au he unesa' Uisnenog Inin, pake saa' antein? 21 In on le' lalu taif le' bifee nuug naitij ma nselog nok uut sak nuug,c an'uup ee he anmo'en utunu'. Es on naan uut le' an'uup ee naan ansae, natuin lalu taif aan'-ana' naan. Uisnenog Inin anmu'in @@pengaru anaek on nane msa'.”
Sonaf neno tunan in nesun ee, malelat
(Nai Mateos 7:13-14, 21-23)
22 Lalit Nai Yesus sin anmulai annaon noin koot Yerusalem. Anbin lalan atnanan, sin nesi nokan koot ma kuan he In nanoni' tuaf. 23 Anteen balel mese, anmu'i tuaf mese antotij Ee mnak, “Aam Kulug! Of oni' tuaf fauk aah es le' napenin sako sanat ma 'honis?”
24 In natael am nak, “Sonaf neno tunan in nesu tama', anmaleel. Es on naan miloitan hi tuam een lek-leek he mibe'i amtaam ambonin. Fun anmu'i tuaf namfau anlomin he nsobal een antaman anboni naan, mes ka nabe'i fa. 25 Kalu ume tuaf ee nakuus nalali nesug nane, hi of amhake mbi mone', ma mleku nesug naan, ma mmo'en am mak, ‘Usi'! Musoin kai nesug ii je fe'!’
Mes In natael am nak, ‘Hi sekog, ki? Au ka uhine ki fa!’
26 Es on naan hi mak, ‘On mee usi' ho ka muhine kai fa? Koijoo bijaas, hit ttoko ma tbukae tabgua. Ho munoni' kai anbi hai kuan een amsa'.”
27 Es on naan In of natael am nak, ‘Lelon na Au 'ak, au ka uhine ki fa! Hi le' iij mansian amo'e maufinu. Mikloo ma'ko iij!’d
28 Lalit kalu Uisnenog nafeek mansian een sin lasin ok-oke', hi mkae mse'-se'ul ma meku nisim. Fun hi miit baba nai Abraham, baba nai Isak, baba nai Yakop ma Uisnenog In mafefa knino' een antokon et sonaf neno tunan in nanan. Mes Uisnenog anli'u napoitan ki moi mone'.e 29 Mansian sin of neman na'kon pah-pinan iij tuuk am tuuk, na'ko pesit neno-saet tal antee pesit neno-tees, na'ko pesit ponain tal antee pesit haa'-nua, he anbukaen nabguan nok Uisnenog anbi In sonaf.f 30 Mitaka' milek-leko' lasij le' iij: kalu Uisnenog nafeek nalali mansian een sin lasin ok-oke', anmu'i tuaf mese, le' nahunut, sin nak ai' in aan'-ana', mes in napeni tola anaek. Ma tuaf abjaan nahunut nak in atoni anaek, mes kahaf, Uisnenog nak in abaut aah.”g
Usif Yesus ankasian noi abiten koot Yerusalem
(Nai Mateos 23:37-39)
31 Tabug naan, anmu'i naan atoni Farisis fauk neman ma nateef nok Nai Yesus. Lalit sin naguab noi Ne mnak, “Leko nnesi Aam Kulug amnao muloo-loo' moi balel abjaan, natuin kesel Herodes he namate Ko.”
32-33 Es on naan Nai Yesus natael am nak, “Eeh! Anaef naan nahine aal he nale'un aah, on le' metan anbi nasij! Hi mnao mitoon ee mmak, ‘Au li'u nitu le'uf ma uleko' amenat nenog iij ma noka'. Anmiu, na' Au ulali mepug.’ Maski on meel amsa' Au he mepu aan akle'og anteni 'bi lalan le' he eti 'oi koot Yerusalem. Fun abiten Yerusalem sin bijaas namate Uisnenog In mafefa knino' een.
34 Koijoo, hi ala ki abiten Yerusalem! Hi le' iij, es le' bijaas mimate Uisnenog In mafefa knino' een, ma ampoli miis In haef een le' neman ma nalulu' ki lalan. Tenij-tenij Au he ubguab ma 'panat aan ki he u'eka' ki na'ko lasi amaufinut, nahuum on le' manu inaf naspoko naan in aan een anbin in ninen nanan. Mes hi ka mlomi fa. 35 Tabug iij, Uisnenog ka nlae ma nfaloli fa hi ume onen naan. Anmiu ma nsina', in luman. Hi of ka miit amteni Kau fa, tal antee hi mmanaku' mmak,
‘Uisnenog anfee tetus-athoen noi tuaf le' neem neki Uisnenog In kanan,
natuin Uisnenog anleek Ee!’”h