Ma in natael Ee mnak, “Au es iij, Usi'.”

2 Lalit Uisnenog anlelug ee mnak, “Amneen mulek-leko'! Maiti ho aan mone mese le' ho mneek misan naan. Mekij amnao moi pah Moria, he motug anjali afgua'-tulu' noi Kau. Amtee ne te, Au of na' uklila' ko in balan et anu'af mese.”

3 Anmiu nfini te, nai Abraham anketu hau meto'. Lalit anfutu sin, ma nasaeb sin anbi bijakase keledai. Lalit in nok nai Isak, ma in ameput tuaf nuug annaon noin balel le' Uisnenog anteek ee naan. 4 Sin annaon nenog nuug een. Ma anmiu, nai Abraham napene niit balel naan et aloog. 5 Ma in nak noi in tuaf ameput nua' een nane mnak, “Hi nua ki ampao kai mbi ii, mok bijakase keledai een! Au 'ok au anah ii, meki-msae moi nae, he m'onen ma mibees moi Uisnenog. Lalit of hai mfani iim moi ii.”

6 Lalit nai Abraham naiti hau meto' een naan, ma naloib sin noi nai Isak. Ma in annaa' neki besij ma nuut aij amsa'. Tabug sin nua sin annaon nabgua, 7 nai Isak nak in amaf ee mnak, “Aam!”

Lalit nai Abraham natael ee mnak, “Saa', Isak?”

Ma nai Isak antoti mnak, “Aam, hit he totu 'tulu'. Hit teki hau meto' nok aij. Mes abibi-kasel le' he tatulu' ee naa, es mee?”

8 Nai Abraham natael ee mnak, “Isak! Uisnenog of nekin On anfee In abibi-kase ana' he anjali 'tulu'.”

Es on naan sin nua sin neki nsaen piut. 9 Tabug sin antee balel le' Uisnenog naklila' nalalij ee naan, nai Abraham anbaki fatug he nmo'e me'i 'tulu'. Lalit in nanono hau meto' een anbi me'ij naan. Ma in anfutu in anah, natupab natkenab anbi hau meto' een naan. 10 Ma in naiti besij he nlolo in anah. 11 Mes nok askeken, UISNENOG In ahaket ankua' na'ko nenog ee mnak, “Hoi! Abraham! Naika fe'! Ampao ba-babaun fe'!”

In natael ee mnak, “Nansaa', Usi'?”

12 Ma hanaf naan nak, “Naik amlolo li'ana' naan! Naik munsaa'-saa' ne! Tabug iij Au uhine namneo, 'ak ho lo mutuin Uisnenog In alomin teeb-teeb, es na' ho mubalab mulalij he mutulu' ho aan mone mese naan noi Ne. ”

13 Lalit nai Abraham niit abibi-kase kesog mese, le' in sunan sin na'heeb ok anbi hau ana' mese in asbaken een. Lalit nai Abraham annao nheke 'bibi-kase naan, ma notug anjali 'tulu' noi Uisnenog, anseek in anah. 14 Es on naan nai Abraham nakanab balel naan Yehova Yire, (le' in oten ee, ‘Uisnenog of nabalab saa' le' hit atpaluug’). Ma antee tabug iij amsa', abjaan sin naguab een am nak, “Anbi nu'af UISNENOG naan, In of nabalab saa' le' hit atpaluug.”

15 Lalit ahaket Uisnenog naan ankua' anteni na'ko nenog ee mnak, 16 “UISNENOG nekin On nak, ‘Au 'suup 'eki Au kanak, on ii: ho mubalab mulali he mfee Kau ho anah afgua mese naan, he anjali afgua'-tulu'. Es on nane, 17 Au of a'fee tetus nathoe noi ko ma noi ho sufam-ka'um sin. Sin of anmasaat on piut, tal antee atso'i ka tabe'i sin fa, on le' akfuun een et nenog, ma asnaen et tasij ninen. Ho anah sin of nisan ma naplenat sin musun. 18 Na'ko ho sufam sin, toog uuf-uuf anbi pah-pinan iij of napenin tetus-athoen, natuin ho munaoba' mulali Au plenat.”’

19 Lalit nai Abraham ma nai Isak ansanun nfanin ma nateef nok sin amepu nuug een naan. Ma sin anfanin noin Beer Seba. Es on naan sin natguan anbin naan.

20 Tabug mese nai Abraham anneen hanaf nak, in olif nai Nahor in feel bi Milka nahonis li'ana' namfau. 21 Aan mone unu', kanan nai Us. In olif, nai Bus. Lalit nai Kemuel (le' anjali amaf noi nai Aram). 22 Lalit nai Keset, nai Haso, nai Pildas, nai Jitlaf, ma nai Betuel. 23 Nai Betuel naan, bi Ripka in amaf. 24 Mes nai Nahor nahoni' nteni li'aan ma'u-sufa' na'ko bifeel es, in kanan, bi Reuma. In nahonis nai Teba, nai Gaham, nai Taes, ma nai Ma'aka.