Bi Sara' nahonis nai Isak
21
1-7 Lalit UISNENOG nateba' noi bi Sara' saa' le' In anpaa' nalalij. Nai Abraham namnaas je, mes bi Sara' na'aap. Tabug in he nahoon, nai Abraham anmoni naan toon natun mese (100). Antee in tabug, in nahoni' li'aan moonl es. Lalit nai Abraham nakanab li'ana' naan, nai Isak (le' in oten ‘in main’).Lalit bi Sara' naguab am nak, “Uisnenog anmo'e kau he 'main, natuin tabug iij au 'maliin. Tuaf abjaan sin nateenb een, au ka nuug he uhoni' fa 'bi tabug au umnasi on le' ii. Fun kahaf, in amneot ee, maski au monel namnasi le'uf een, mes au fe' uhoni' 'aan ne li'aan es. Ma tabug ii, sekom-sekog le' anneen lasij iij, sin of anmanin on le' au msa'.”
Tabug in nmoni naan nenog faan gue, nai Abraham naheli' nai Isak, natuin Uisnenog In aplenat.
Sin anli'u bi Hagar ma in anah nai Isma'el
8 Lalit nai Isak nanae'. Tabug sin he nsolel, amaf nai Abraham anmo'e fesek anaek.
9-10 Tabug mese, bi Sara' nail niit nai Abraham in fee muni' bi Hagar in anah nai Isma'el anma'oki nok nai Isak. Es on naan bi Sara' naguab noi in monel ee mnak, “Amli'u mupoitan atel na'ko Masir naan nok in anah! Natuin au ka 'lomi fa he atel in anah napeni pusaak saa'-saa'. Maut he au anah nai Isak anmese es le' anpaal naan pusaak sin ok-oke'.”
11 Anneen bi Sara' in aguab een nane, nai Abraham annaben ka naleko fa, natuin nai Isma'el naan, in aanh ee msa'. 12 Mes Uisnenog naguab noi nai Abraham am nak, “Abraham! Ho naik mutenab ho fee muni' naa nok in anah. Mutuin bi Sara' in lomin naan. Natuin Au 'ba'an ulali 'ak ho of musuuf ma'ko nai Isak. 13 Mes Au 'fee tetus amsa' 'oi ho fee muni' naan in anah. Natuin in ho peem ho naam ee msa'. In sufan sin of anjalin uuf mese.”
14 Anmiu nok-nok ana' on nane, nai Abraham nabalab oe mninu' noi bi Hagar, ma nasninib ee oel anbi bale' mese, le' anmo'el na'ko pasug. Lalit in nafetin bifeel naan ma in anah he nnaon anmesen. Lalit sin annaon anfuun bale luman anpaumaak Beer Seba.a
15 Tabug sin oe mninu' ee oke ate, bi Hagar nasaitan li'ana' naan anbi hau ana mese in mafon. 16 Ma in natenab am nak, “Kalu in asnasan natfeek am au 'hak-hake te, au nekak ansuus anmaat.” Lalit in naskotub on, ma annao antoko mas naloo' na'ko li'ana' naan of oni' metel bo' niim. Lalit in ankae anme'-me'ul.
17 Uisnenog anneen nai Isma'el ankae msa', lalit In ahake mese neem na'ko sonaf neno tunan, ma no'en bi Hagar am nak, “Hagar! Nansaa' am es ho msuus on le' naan? Naik mumtau, Uisnenog anneen nalali ho anah in kaet. 18 Tabug ii, amfeen ma mnao mail li'ana' naan. Amfuli ma mha'tani in nekan, natuin Au of a'mo'e in sufan sin anjalin too uuf amatanis mese.”
19 Lalit Uisnenog anfai bi Hagar in maatn een, ma in niit oe mata mese anbi naan. Es on naan in neki bale' oel, ma annao nkui oel, lalit in nekij ma na'inut li'ana' naan.
20-21 Es on naan nai Isma'el nok in inaf natguan anbi bale luman Paran. Na'ko nenog noi nenog, in nanae', ma in anjali atoni aklaot alekot mese. Lalit in inaf anmatsaob ee nok bifee munif mese na'ko pah Masir. Lasin iij anjalin, natuin Uisnenog nok nai Isma'el.
Nai Abraham ma kesel Abimelek anmahalan nekaf anbin Beer Seba
22 Tabug naan, kesel Abimelek, nok in meo-pa'e makenat, nai Fikol, neman ma na'ekun nok nai Abraham. Kesel naan naguab am nak, “Abraham! Hai mihine mak Uisnenog nok ko. Ma ho mmo'e saa'-saa' haa, lo he anjalin on naan. 23 Es on naan tabug iij, au 'toti ko he msuup ambi Uisnenog In matan, mak ho of ka mputa-kliun kau fa, 'ok au anah ma sin anah sin ok-oke'. Natuin au 'mo'e alekot 'ok ko, es on nane ho lo he mmo'e alekot mok kau anbi pah iij ee msa'.”
24 Ma nai Abraham natael ee mnak, “Lekog! Au 'suup.”
25 Mes lalit nai Abraham natonan kesel nane mnak, “Aam, ho too nuug nasiik naan au oe maat hani mese.”
26 Anneen on nane, kesel naan natael ee mnak, “Ahh! Au fe' a'neen lasij ii. Nansaa' am es ho ka mutoon fa na'ko un-unu? Au ka uhine fa noi sekog es anmo'e on le' naan.”
27-28 Lalit nai Abraham ma nai Abimelek anmo'en lasi fekat. Nai Abraham naiti bijael ma a'bibi-kasel ma nfee sin noi kesel. Lalit in anpili nteni abibi-kase tipu' mana' hiit. 29 Lalit kesel antotij ee mnak, “Nansaa' am es ho mmo'e on naan?”
30 Es on naan nai Abraham natoon am nak, “Aam, amsimo abibi-kase tipu' een iij, he anjalin ataka' nak aam usi' ho mmanaku' mak au es a'hani oe hani' le' ii.”
31 Natuin sin nua sin anmo'en nalalin lasi fekat anbin balel naan, es na' sin nakanab balel naan Beer Seba. In oten nak ‘Oe Hani Supat’.b
32 Sin ansupan nalalin on nane, kesel nai Abimelek nok in meo-pa'e anfanin noi sin pah Filistin. 33 Lalit nai Abraham anseen hau tamareskac uu' mese anbi Beer Seba. Anmulai na'ko tabug naan, haug naan anjali taka' amnauba' noi nai Abraham, nak in nabees noi UISNENOG le' Amonit Nabal-baal anbi balel naan. 34 Lalit nai Abraham natgua on le' anao-amnemat tal aloog anbi atoni Filistinas sin pah.