Bi Sara' anmaat, ma nai Abraham ansuub
23
1-2 Bi Sara' anmaat tabug in anmoni naan toon natun mese bo' nuug am hiit (127). Tabug in anmaat, sin natguan anbin kuan Kiryat-Arba (es le' Hebron), et pah Kana'an. Nai Abraham ankae anme-me'ul. Sin anbe'an amsa'.3 Lalit nai Abraham annao na'eku nok atoni Hetes sin. In naguab am nak, 4 “Au le' iij ala atoni anao-amnemat. Au ka 'mu'i fa balel he 'suub au feel. Es on naan, kalu hi mlomi te, hi misosa' maan kau naijaan pisa mese, he au 'suub au feel anbi naan.”
5 Sin nataen am nak, 6 “On iij, aam! Al-aloog le' iij, hai maan ko mjali atoni mnasi'. Hai mtola ko namneo-namneo. Es on naan ho mpili kuum balel meel es le' naleko nneis, le' anmatoom nok ho lomim. Hai mituin ahaa ho lomim.”
7 Lalit nai Abraham anfeen anhaak ma nabees naijaa tuaf een atoni Hetes sin naan. 8 Lalit in nak, “Kalu hi msimo au haan totis lelon nane, au 'toti he hi mbaban kau he miguab mok aam Sohar in aan monel nai Efron. 9 Amtoti miit, he kalu naleko, in nasosa' kau in nuat Makpela, le' et in po'an ee ninen. In antoti fauk-fauk aah, au 'baen. Au he 'baen ufeek in upan naan anbi hi matam, he anjali au pusaak. Au he uloitan he anjali hai bale subat.”
10 Tabug naan, nai Efron antoko nok anbi atoni Hetes sin naan. In nekin on anneen nai Abraham in haan totis naan. Lalit in anhake ma natae nai Abraham anbi atoni mnasi sin maatk een am nak, 11 “Naik on naan, aam! On ii. Au 'fee ko po'an naan luum-luum aah, nok nani in nuat Makpela naan. Aam, ho msuub ho feel anbi naan. Au 'nona' naijaan naan a'bi au atoni mnasi een sin maatk een. Maut he sin anjalin saksiij.”
12 Lalit nai Abraham nabees anteni noi atoni Hetes sin. 13 Ma in naguab nok nai Efron am nak, “On le' nane msa' naleek, mes hi aal-ala ki amneen miit au haan totis iij fe'. Au he 'soos ufeek naijaan naan, maut he au 'suub au nuug anbin naan.”
14-15 Lalit nai Efron natael ee mnak, “Naijaan naan in upan, aal loi muti' natun haa guah. Hit he taguab upaf naan he saa'? In upan ka nmafena'. Amnao meki ho feel he msuub nai, aam.”
16 Nai Abraham anlomi natuin upaf naan, on le' nai Efron naguab. Es on naan nai Abraham anso'i loi muti' afgua' natun haa, lalit annona' sin noi nai Efron, anbi atoni Hetes sin maatk een he sin ok-oke' anjalin saksiij.
17-19 Es on nane, nai Abraham anpaal nai Efron in naijaan, anjali in pusaak. Es le' naijaan et Makpela, anpaumaak kuan Mamre (es le' Hebron). In ansoos nafeek naijaan naan nok nani in po'an, in nuat, ma in hau naek een ok-oke'. Atoni mnasi' Hetes sin ok-oke' anjalin saksiij nak, naijaan naan nok nani saa'-saa' le' anbi nani naan, nai Abraham in anpaal sin ok-oke'.