Na' Paulus namneob on anbi usif Agripa in matan
26
Nalalit usif Agripa nleun na' Paulus nak, “Tabu ii, ho mubei' mumneob om. Hai ok-oke' miloitan he mneen ko.”Na' Paulus nait in i'niman, oka te in na'uab ma nak,
2 “Aam usi' Agripa le' au 'tuna' ma u'latan ko. Au 'teenb ate, au neek ee nmanua, natuin ho mfee kau sona' he au u'uab, ma sin ama' aal ki he mneen kau, saa'-saa' le' atoin Yahudis sin nbu'u-ntumatan sin neu kau. 3 Au uhiin 'ak, ho muhiin namneo, hit atoin Yahudis hit halat ma atolan, ma hit lasi 'monit ma 'maten. On nane te au 'toit ko he ho mneen mulek-leko' au uab ee, ahoit.
4 Anmulai na'ko au aan'-ana', sin nanoina' kau ween he 'moin utuin hit atoin Yahudis hit halat. Nahunut, nanoina' kau anbi au kuan; oka te au 'oum uskool a'teni 'bi Yerusalem. Atoin Yahudis abiit eun Yerusalem, sin nahiin au monik, ma sin nahiin nalek-leko' kau. 5 Kaul a'naet eun lais palsait Yahudi sin nlomin, sin nabei' nanu'un nain nak sin nahiin kau na'ko un-unu'. Fun au le' ii, au 'taam nonot Farisi. Atoni mfaun sin ok-oke' nahinen nak, hai atoin Farisi, hai es le' ma'tane' mneis mituin lais palsait Yahudi in atolan.a 6-8 Au ma too Israelas na'kon sin uuf bo'es am nua sin, hit tpao he Uisneno nmoe' natuin le' In anba'an nani ye neu kit. Manta'en le' nane, In n'eut nalali ye neu hit bei' ma hit nai' na'ko ahunut. On nane te antia tabu ii, hit aal kit t'onen fai-manas, he Uisneno In manba'an nane anlail nai. Manta'en nane in neesn ee nak, of In he namonib nafani' amaets enu.
Aam usi' Agripa. Sin nmaka'lais eun nok kau, natuin au 'palsai 'ak Uisneno of namonib nafani' amates. Au he utaan, nasaa' am es tuaf na'ko hi aal ki le' ii, bian ka mloim fa he mpalsai mak, Uisneno nabei' namonib nafani' amaets eun? Namneo In nabei'!
9 Nahunut, au ube'i 'moe' saa'-saa', ma au 'laban ma'tane' 'eu atoin eun le' natuin Na' Yesus, atoin Nasaret nane. 10-11 Tabu nane, a'naak lais palsait Yahudi sin a'naakt eun anfee kau hak he au 'nao ma 'ha'mui' Na' Yesus Inin anbin mee-mee. Au 'heek sin, oka te au 'heel 'eik sin neman anbin Yerusalem, ma utaam sin anbin uim o'of. Au 'ok ufeek he nhukun na'maet bian amsa'. Au 'taam 'eu uim onen sin, ma 'ha'mui' sin imsa'. Nalalit au u'seke' sin he nsebuten Na' Yesus. Hae'-hae' au 'aim sin nok neek maputu'. Lamun au 'neen 'ak apalsait eun neu Na' Yesus et eun mee-mee, maski sin antian pen-pene 'teta' msa', au lo mees 'aim sin piut!”b
Na' Paulus nanu'un nafani' saa' le' Usif Yesus anmoe' niit neu ne
12 Na' Paulus antalu ntein in uabn ee ma nak, “Neno wes, a'naak palsait eun sin nfee kau sulat kuasa he au 'aim tuaf le' natuin Na' Yesus anbin koot Damsik. On nane te au 'nao. 13 Aam usi' Agripa! Tabu hai mbi laan atnanan, oin maans ee na'fufu', nok askeken, asnaaf es na'ko neno ntoom kau ma au aok-bian sin imsa'. 14 Hai mlotis main amtia afu, natuin asnaaf nane in ma'tanen. Nalalit au 'neen haanf es na'uab nok kau neik uab Aramc nak, ‘Hoe, Saulus! Nasaa' am es ho mha'mui' Kau piut-piut? Amsuus ammaet kaul ho mlaban Au 'loimk ee piut.’ 15 Au 'neen hanaf nane, mes au ka 'iit fa in tuan. On nane te au utaan am 'ak, ‘Usi'. Ho sekau ko, pah?’
Nalalit hanaf nane nataah kau ma nak, ‘Au le' ii, Na' Yesus le' ho mha'mui' Ye piut-piut. 16 Saulus! Amfeen nai'! Au ukliil Ok on le' ii, nok in sailt ee on ii: Au 'piil 'aan ko mfain tuaf le' Au 'palsai. Ho lo he mnao m'eut meu mansian ee ok-oke', saa'-saa' le' ho miit mulail sin een neno ii mu'ko Kau. Of Au uklila' 'tein ko lais feu' bian, he ho mubei' am'eut meu mansian ee ok-oke'. 17 Of ho mupein susat huma'-huma'. Mes Au 'panat ko u'ko tuaf eun le' he nha'mui' ko, maski na'ko atoin Yahudis, ai' atoni 'teta'. 'Teeb! Au 'leun ko 'eu atoni 'teta' le' ka atoin Yahudis sin fa'. 18 Ho mnao mfei sin malatk eun nane, he sin nabei' nahinen ma nmonin nbin meu'-sine'. Nalalit sin nasaitan sin laan meis'ookn eun. Ma ho lo he mlulun sin lanan neu 'monit amneot. Ho mufetin main sin mu'ko niut amleu't eun sin a'nakat in kuasan, oka te meik sin meu Uisneno. Nok lanan nane te, he Uisneno nsaok nain sin saant eun ok-oke'. Ma sin anlalin Uisneno In aanh eun, nabu-buan nok tuaf bian le' Uisneno npiil naan sin, natuin sin npalsain neu Kau. Au uaba' antuu' on nane, Saulus!”’
Na' Paulus nanu'un in mepu
19 Na' Paulus antalu in uab eun, nak, “Aam usi'. Mepu le' au simo ee na'ko sonaf neno tunan nane, au unaob ee. Tal antia tabu ii, au lo mees he 'meup piut-piut, ka nabei' fa he au 'tet-koit. 20 Nahunut, au 'eut Usif Yesus In Laan A'honis 'eu atoin Yahudis sin anbin Damsik. Nalalit au 'oum 'eut 'eu atoin Yahudis sin anbin Yerusalem, ma propinsi Yudea nfuun am nateef. Nalalit au 'nao 'fuun ma uteef atoni 'teta' sin pah-pah. Au u'uab 'eu sin nok muti' monas, he sin npoin na'ko sin laan penu le' asanat, oka te sin nnona' sin neek eun ma sin tau'k eun ii neu Uisneno. Sin lo he nmo'en 'moe' leko neu tuaf bian, he nlali 'taka' nak, sin nmonin feu' nbi Uisneno.d 21 Natuin au 'meup on nane, es nane te atoin Yahudis sin anheek kau nbi Uim Onen Uuf le' et Yerusalem. Ma sin he nlool niis kau. 22 Mes Uisneno ntulun kau. Etun es au 'moin fe' tal antia tabu ii. On nane te au ube'i 'hake 'bi ii ma unu'un ki, et li'ana' ma 'naek, lasi le' nmatoom nok Usif Yesus In Laan A'honis. Saa'-saa' le' au 'eut sin le' ii, namnees nok saa' le' nai' Musa nok Uisneno In mafefa knion' eun nanoina' nain sin. 23 Sin nanoina' ale' saa' le' anmatoom nok Kristus, Tuaf le' Uisneno nba'an nani Ye he nleek Ee neem. Nak, In lo he napein ha'mu'it. Nalalit In anmaet. Mes In he nlail ahunut na'ko ale' amaets eun le' Uisneno namonib nafani' sin na'ko 'maten. In es le' he nfee meu'-sine' neu atoin Yahudis sin, ma atoni 'teta' amsa' nbi mee-mee nbi pah-pinan ii.”e
24 Na' Paulus fe' na'uab ma n'eut in mepu we, mes na' Festus ansenu nfeek in uaban nok haan ma'tane' ma nak, “Hoe, Pau! Ho mumaunu mlali yeen. Ho muhiin 'teeb-teeb, tal antia nmoe' ho loenm aan namleu'.”
25 Mes na' Paulus nataah ma nak, “Ama' gubernur le' au u'tuna' ko. Au ka umaunuf. Saa'-saa' le' au 'etu we ii, 'teeb on nane. Au ka u'uab fa lais luman. 26 Ama' usi' Agripa, ho muhiin kuum, saa' le' au u'uab a'lail sin. Etun au 'balain he u'uab sin muti' monas. Au 'palsai 'ak ho mneen mulail saa'-saa' eun oke', fun saa' le' nlail nane ka nbin fa bael ma'tolo'. Nak, Usif Yesus le' amates nane, anmoni nfani yeen. Ale' too mfaun eun ok-oke' nahinen nlalin lasi nane. 27 Na'ko tabu ahun-hunut, Uisneno In mafefa knion' eun an'eut nain ale' lasin le' ii. Au 'balain he 'atmanpasan 'ak, ho mpalsai msa' mafefa knion' eun sin uab eun.”
28 Usif Agripa an'ote nfeek na' Paulus in uaban am nak, “Hoe, Pau! Ka 'loo fa te, of ho he mmoe' kau 'fain atoni' Kristen!”
29 Ma na' Paulus nataah ma nak, “On ii, usi'. Au 'onen 'eu Uisneno, he tabu ii a'loo ai' haumaka', ka neu fa aam usi' ho mmees yaah, mes atoni mfaun eun le' anenat neno ii msa', nabei' anlalin on le' au, le' Na' Yesus In aanh enu! Mes lamun hi aal ki kais amfain atoin o'of on le' au.”
30 Na' Paulus na'uab nalail on nane te, usif Agripa nok bi Bernike, ma gubernur Festus, ma a'naet eun anfeen anhaken, ma nasaitan bale nane.
31 Tabu sin nnaon npoin, atoin eun le' nane na'uab eun es nok es ma nak, “Atoni' le' ii, in ka nmoe' fa saa'-saa' le' namnees nok le' he thukun ta'mate, ai' he tataam ee neu uim o'of!”
32 Nalalit usif Agripa na'uab neu gubernur Festus ma nak, “Ailoo. Bait atoni' ii kais neik in lasi nsae ntein neu pah uuf koot Roma. Kaah fa te, lasi ii hit tafeekn aa, ma tapoitan.”