3 Hai mpoi mi'ko Kaisarea, nookf ate, hai mtian koot Sidon. A'naak solalus na' Yulius in ka nasaa' fa na' Paulus, ma nleek na' Paulus he nnao naim sekau le' in nahiin sin anbi koot nane. In teenb ee, he sin nabe'i nfeen na' Paulus saa' le' in npaluu we tabu sin nbin tasi tnanan.

4 Nalalit hai aal kai msae mfain meu bnao oe nane, ma mnao mfiin. Mes anin na'ko bnao oe nane in matan maneun ee kah een, tal antia bnao oe nane ka nabei' fa he nnao. On nane te sin ntebi bnao oe nane, ma nnao nleuk pah Siprus ma Siria sin atnaank eun, hena' hai kais mipein anin nane. 5 Na'ko nane, hai mnao mleif tasi nbi propinsi Kilikia ma propinsi Pamfilia sin maatk enu. Hai mnao piut, tal hai mtia koot Mira, et pah Likia. Amtia nane, hai msaun misaitan bnao oe nane. 6 Tabu hai mbi Mira, na' Yulius nafuun he nami bnao 'teta' le' he nnao neu pah Itali. In napeni bnao wes na'ko koot Aleksandria, le' he nnao neu Itali. In nleek kai oke' he msae meu bnao oe nane.

7 Hai mnao maan neno fauk een, mes abnao oe nane ka nnao nten-teni' fa, natuin anin na'ko in matan maneun ee kah een. Hai mhae mmaet, tal amhaumaak koot Knidus. Mes anin nane anfuu nameep fe' amsa', on nane te hai mnao mleif meu pah Kreta, he miniinb om mi'ko anin. Nalalit hai mfiin paanf es, kanan Salmone. 8 Bnao oe ii, nnao nok susat ma'ne'at, tal hai mfiin panaf nane, mitun-tuin aah pah Kreta in ninen, na' hai mtian bale es, kanan Labuan Amasat. Bale nane, anmapaumaakn eun nok koot Lasea.

9 Anbi nane, ameupt eun abnao oe nane nasnasan akle'o, fun hai mnao 'loo ween, mes hai fe' ka mtian fa Itali. Tabu nane, Neno Saok Sanat atoin Yahudis anfinin nlali yen.^a In ootn ee nak, ani 'naek ma okin 'naek of he nfoe'. Ameupt eun nmaktaan eun he hai mnao mfiin, ai' kahaf. Anneen on nane te, na' Paulus na'uab am nak, 10 “Au aok-bian aal ki! Au u'uab 'aan akle'o. Au utenab, kaul hit he tnao tfiin, of hit tapein suust am ma'ne'at. Of abnao ii nleman nmaet, blua' eun nleman, ma hit of atmaet oke' msa'.” 11 Mes na' Yulius ka natniin fa na' Paulus. In npalsai neis neu anaa' abnao ma abnao tuaf. Fun sin naloitn eun he nnao npoin na'kon bale nane. 12 In amleu'n ee, Labuan Amasat nane, in ka nmamut fa kalu bnao oe lo he nhaek anbi tabu oikn eun anfoen. On nane te amfaut eun nak sin nlomin he hai mnao mfiin meu koot Feniks. Sin i'loimk eun ii, kaul leko te, hai mitua mtahan ambi nane, tal antia tabu oikn eun nasnasan. Koot Feniks nane, pah Kreta in bale le' anmamut neu bnao oe, natuin in naniinb on na'ko ain toon, ma ka napein fa okin a'naek.

13 Tabu anin na'ko hai kaliim a'lii nmulai nfuu kle'o-kle'o, sin nak, ai' ain leko he sin nabe'i npake, he nnaon neu koot Feniks. Sin nak, “Anin ii, leko. Eim he tnao nai!” On nane te sin nasaeb bonit, ma nasaeb layar, ma hai mnao mibnono aa tasi ninen. 14-15 Hai mnao ka 'loo fa te, nok askeken, anin slutuf anfoe'. (Le' hit tteke tak, ‘anin na'ko aon-bian neon-saet ma na'ko hai kaliim a'ne'u sin atnaank enu’). Anin nane nfuu bnao nane, neki ye neu tasi tnanan. Ameupt eun abnao nane, sin ka nabei' fa he nabaina' abnao. On nane te sin npalaakn aah ee. Ma bnao nane nnao natuin ahaa ain ee in i'lomin.

16 Oikn eun anpesen napoitan kai mtian pah aan es, kanan Kauda. Tabu nane, 'belo' ba'i fe' natuin kai nbi bnao we in kotin, ma sin nheel ee neik tani. Nalalit hai mtoup misaeb 'belo' ba'i nane, neu bnao we tunan. Hai mhae mmaet. 17 Tabu 'belo' ba'i nane antia bnao ee tunan, sin npuun bnao nane neik tani nfuun am nateef, he npanat he kais-kaisa' bnao nane in hau 'been eun natfoin ma oe tasi ye ntaam. Sin namtaun amsa', kais-kaisa' oikn ee anpesen abnao nane, ma npolin neu snaen a'tupu' Sirtis et pah Afrika. On nane te sin nasanut 'boin atboes, he na'bauna' bnao nane in i'naon ee kle'o.

18 Anin slutuf nane, nasnita bnao neu 'lii ma 'ne'u. Nookf ate, ameupt eun nait inpolin blua' bnao nane neun tasi. 19 Anmeu te, anin nane fe' anfoe'. On nane te sin namtaun nsesan. Es nane te, sin nait inpolin bnao nane in iblua' bian he nha'kaaf ee. Ma sin nait inpolin amsa' bnao we in iblua' mepun. 20 Anin nane ka nasnaas niit fa, fai-manas neno fak-fauk. Nipu nmanaa' nok tasi, tal antia hai ka miit fa manas ma kfuun. Hai neekm eun nabatin ma'tane'. Hai mitenab mak, ii hai ka mmoin fa yeen.

21 Hai ka miah fa neno fauk een. Na' Paulus anboin sin oke', ma na'uab am nak, “Au aok-bian aal ki! Bait hi mloim mituin kau he hit kais atpoi ta'ko Labuan Amasat ate, hit ka tsuus fa on le' ii. Ma hit ka tluik fa msa'. 22 Tabu ii, au 'toit ki oke', he mha'taen hi neekm eun nane. Of hit abnao le' ii, anpee' pisa'-pisa'. Mes kais mimtau', of ka tiit fa amates. 23 Au 'loimk ee, hi aal ki mihiin mak, au le' ii Uisneno Iin Ya kau'. In es le' anfee kau mepu. Fiin fai ii, In anleek In ameput tuaf es na'ko sonaf neno tunan, ma in nhake nbi au aok-bian. Nalalit in an'eut kau ma nak, 24 ‘Paulus! Kais mumtau kle'o msa'. Lo of ho mtia kesel le' et Roma, he m'ulus ho lasi. Natuin Uisneno anneek ko, es hi asaet abnao ii, of ka tiit fa es he namleu'. Of ammoin ok-oke'.’ 25 On nane te, au aok-bian aal ki. Kais hi neekm eun nabatin. Au 'palsai namneo-namneo 'eu Uisneno, le' In an'eut kau fiin fai naa, lo of anlail on le' nane. 26 Abnao ii of nasnai nbi pah es.”

27 Tabu nane, anin ma okin anbison kai mok abnao oe nane, ma npesen kai fai bo'es am haa anbi Tasi Atria. Oin fai ye nuu natnaan, ameupt eun na'taak eun nak, hai mhaumaak meto'. 28 Nalalit sin nasanut bonit, he nahiin oe ye mnanun. On nane te sin ansuu' ate, in a'taamn ee, nehe bo' nua'. Nalalit abnao nane nnao maat antein, ma sin nasanut antein bonit nane, ma nahiin nak oe tasi ee 'taamn ee nehe bo'es am niim.^b 29 Sin namtaun, kais-kaisa' bnao nane na'kai' on anbi faut puutn eun.On nane te sin nasanut bonit kotif fua' haa'. Hai mifneek he nmeu nfiin nai'. 30 Mes ameupt eun abnao nane anma'akool eun he naen nasaitan abnao we mnees-amnees. On nane te sin nasanut 'belo' ba'i, ma nmoe's ok on le' sin he nasanut bonit abiit maat.

31 Mes na' Paulus an'eut neu na' Yulius lais amle'ut nane nak, “Kaul ameupt eun sin ka nbi fa bnao we nane ee te, of hi mmaet oke'.”

32 Anneen na' Paulus na'uab on nane te, solauls eun anleif nafeek a'belo' ba'i in tani, ma npalakab. On nane te ameupt eun nane ka nabei' naenan fa yeen.

33 Anmeu nfin on nane te, na' Paulus nakeo sin oke' he nbukaen. In nak, “Klei nua yeen, hit ala tabe'i ttok-toko waah, hit tafnek-neek aah, ka tiit tain fa saa' es antaam neu hit teik. 34 On nane te au 'toit ki he leko te, hit tbukae taan akle'o fe', he hit tapein tafani' hit neunk ee. Au 'palsai 'ak of ka tiit fa tuaf es na'ko hit aal kit tapein amle'ut. Hit of atmoin oke'!”

35 Na'uab nalail on nane te, na' Paulus nait utunu'. Nalalit in n'onen neu Uisneno ma ntoit makasi nbi sin maatk enu. Nalalit in nait tuuk es, ma anbukae. 36-37 Sin nitan on nane te, sin neek eun namepan nfanin. Nalalit sin nbukaen ok-oke'. Hai abiit abnao nane, tuaf natun nua mbo' hitu mnee'. Hai mbukae oke'. 38 Npeet nalalin on nane te, sin naitin ma n'okal a'kaol aen kase-gandum sin neun tasi, he nsuu' anha'kaaf abnao nane ntein.

39 Anmeu saba te, ameupt eun niit meto'. Mes sin ka nahiin fa pah nane in kanan. Ma sin niit tai siu'f es, le' in ninen masnaen. On nane te sin nafnekan he kaul leko te, sin he neik abnao we nnao nabnonon nleuk faut puutn eun, he ntian tai si'uf nane in ninen nok leko. 40 On nane te sin nleif nafeek boint eun nabalan anbin tasi. Nalalit sin nasanut kemudi neu tasi, he sin nabei' nastiir abnao nane. Nalalit sin nasaeb layar ana' abiit maatn ee, he ain ee nfuu bnao we nnao neu tasi ye ninen. 41 Mes abnao nane ansae naan snaen a'tupu' anbi tasi nanan, ma in nasnai' anbi nane, ma ka nabei' naklelo' ntein fa yeen. On nane te okin 'naek eun anbius naklati' abnao we in kotin.

42 Tabu solauls eun nitan on nane te, sin he nlool niis atoin o'of sin. Fun sin namtaun, kas-kais atoin o'of eun nane nlo'en neun meto', oka te sin naen kukun. 43 Mes a'naak solalus, na' Yulius, anpenan in solauls eun, natuin in he npanat na' Paulus. On nane te in naplenat, he sekaum-sekau kaul anloe' nahiin, an'ookl ok neu tasi ye, oka te nlo'en neu meto'. 44 Neu le' sin ka aloe' ahiint eun, in nleun sin he anna'an a'bena' ai' saa'-saa', oka te antaman neun tasi ye, ma natuin oikn eun npoin neun meto'. On nane te hai ok-oke' mtia meto' nok ao-mina'.