Ii lais leko anmatoom nok Uisneno In Anah.^a In kanan Yesus Kristus, le' Uisneno anlulu ma anleek nani na'ko un-unun. In lasi na'uub on na'ko ii:

2 Nahuun na'ko Na' Yesus nait In mepu, Uisneno anleek atoni yes neem nahuun. Atoni le' nane, na' Yohanis. Na' Yohanis le' ii, lo mees in he neem nahuun he nfei lanan neu Na' Yesus. Mes nahuun na'ko na' Yohanis he neem, Uisneno ansonu' nahunun In mafefa knino' tuaf es, kanan na' Yesaya. Na'ko afi ahunut, na' Yesaya antui nalail, nak on ii:

4-6 Biasa sin nteek na' Yohanis, nak ‘Aslain Atoni’. In natua nbi bael luman. In iblua' pake anmo'e na'ko bikaes pah asnaen in funun. In pasu 'futu' nmo'e na'ko pasu. In imnahat sii-boi ma niun oin-hau. [Na' Yohanis in i'monin, nahuum on le' mafefa knino' nai' na' Elia afi unu'.]^d

Tabu nane, too namfau na'ko koot Yerusalem, ma propinsi Yudea in nanan oke, sin neman ma natefan nok na' Yohanis anbi in balan. Sin neman he nitan neik sin matan ma annenan neik sin luken noina' na'ko na' Yohanis. In n'eut ma natoon neu sin ma nak, “Hi lo mees he mmanauk ma misaitan hi sanat ma penu sin ok-oke', maut he Uisneno nnoes nain hi saant enu. Oke te hi lo mees he mislain fe', he nlali 'taka' nak, hi mhalan milali yeen mok Uisneno.’’

Tabu sin nneen nalalin on nane, sin nmanauk sin saant eun, nalalit sin nana'at sin aok eun neu na' Yohanis, ma in naslain sin anbin noe Yarden.

7 In na'uab neu sin ma nak, “Mes ka 'loo fa, Atoni yes of he neem. In ma'tane' nneis na'ko kau'. Au ka maso'ik kau fa, maski au 'fani yaah In ana' lenu', au ka umnees fa okan.^e 8 Au be'ik ii ala neu he uslain ki 'eik oe, mes Atoni nane of anmo'e nneis na'ko kau'. Fun In of natua ma namonib ki neik Uisneno In Ismana Knino'.’’

9 Nalalit Na' Yesus neem na'ko kuan Nasaret le' abit pah Galilea, he nateef nok na' Yohanis. Ma na' Yohanis naslani anbi noe Yarden. 10 Ma tabu Na' Yesus anpoi na'ko noe, nok askeken, neno tunan antalfei. Oke te Uisneno In Ismana Knino' ansaun neem neu Ne, in na'leet on, on le' kool oot kase. 11 Ma hanaf Uisneno npoi neem na'ko neno tunan ma nak,

12 Nalail on nanet Uisneno In Ismanan anheel neki Na' Yesus neu bael sona'. 13 Anbi bale nane, anmui' mui' fui sin. Na' Yesus natua nbi bale nane fai bo' haa ma neno bo' haa'. Anbi bale nane amsa', niut maufinu sin i'naak anesit neem ma nsuu' Usif Yesus he natuin in uaban, mes ka nabe'if. Oke te Uisneno In ameput na'ko neno tunan neem he ntuthae neu Na' Yesus anbi lasi aof ma smanaf.

14 Anbi tabu mese, le' sin nataam nalail na' Yohanis Aslain atoni anbi uim o'of, Na' Yesus annao neu propinsi Galilea, he natoon Lais Leko na'ko Uisneno anbi nane.

15 In na'uab nak,

16 Anbi neno wes, Na' Yesus annao natuin nifu Galilea in ninen. In niit atoni nua'. Es in kanan na' Simon, nok in olif na' Anderias. Sin nua sin an'okal kiif kai he nheken ika'. Mepu le' nane, sin mepu neno-neno. 17 Na' Yesus anhaman sin ma nak, “Hoe, bae'! Eim he mituina' Kau nai! Hi amnaim ika' ki, mes anbi tabu ii, Au he unoina' ki he mfain amnaim atoni neu pukan Uisneno.’’ 18 Anneen nalalin on nane te, sin nua sin nasaitan kiif kai nane, ma annao natuina'.

19 Nalalit Na' Yesus annao nteni 'kle'o. In niit na' Sebedius in aanh enu ta'uf nua'. Ahunut in kanan na' Yakobus, ma in olif kanan na' Yohanis. Sin nua sin nabalab sin kiif kai anbi 'belo' wes in nanan. 20 Na' Yesus anhaman sin im nak, “Hoe, bae'! Eim he mituina' Kau nai!’’ On nanet sin nua sin annao nasaitan sin amaf nok in ameupt eun anbin 'belo' nane, ma sin natuina'.

21 Nalalit Na' Yesus nok ta'uf haa' eun nane, sin neman ntia koot Kapernaum. Neno nane nateef nok atoni Yahudis sin neon onen.^h On nane Na' Yesus antaam anbi uim onen ma nanoina' too anbi nane. 22 Tabu sin nneen In uaban nane, sin nsanmakan, fun In nahiin namneo-namneo noina' nane in nesan. Nane 'teta' na'ko atoni Yahudis sin anoina' lais palsait sin.ⁱ

23 Tabu nane, anmui' atoni mese, le' anniut-sae. In imsa' ntaam nok anbi uim onen. Oke te nitu le' anbi atoni nane anhunun 24 nak, “Hoe! Yesus, atoni Nasaret! Ho oum he mseol saa' mok kai? Ho oum he muleu' kai, ai'? Hai mihiin Ko'. Ho le' ii, Atoni le' Uisneno anba'an nani he anleek Ee neem na'ko un-unu. Ho le' ii, Uisneno In Atoni Knino' le' ka mmui' fa sanat.’’

25 Mes Na' Yesus nakain atoni nane nak, “Kaisa' mufeefb om! Ho mpoi nai mu'ko atoni ii!’’

26 Nalalit niut amle'ut nane, anhasu' namepan atoni nane. Ma in npoi na'ko atoni nane nok haan hunun. 27 On nane abiit eun uim onen nane ansanmakan. Nalalit sin na'uab eun nak, “Ainoo! Saa' es le' ii! In naplenat niut amle'ut eun he npoin, ma sin annenan ma natuin In uaban. Ii noina feu', ai'? Ba'is ii na'uabat lo ma'tane'!’’

28 On nanet sin anmulain n'etun ma natoon 'mo'et na'ko Na' Yesus, na'ko kuan neu kuan annono mnateef anbi propinsi Galilea.

29 Tabu sin npoin na'ko uim onen nane, Na' Yesus annao neu na' Simon ma na' Anderias sin ume. Na' Yakobus nok na' Yohanis nokan amsa'. 30 Na' Simon in baba' feto anmaniin, ma antuup anbi hala'. Tabu Na' Yesus nok In asium lasi sin antaman anbi ume nane, atoni yes neem ma an'etun na' Simon nak, “Ho baba' feto anmaniin.’’

31 On nanet Na' Yesus annao ma nkiso bifee mnasi' amaninit nane. In nnaa' in i'niman, ma anfiit nafena'. Tabu nane, in naleok nain. Nalalit bifee mnasi' nane, anpoi ma ntuthae sin.

32 Tabu manas he nuu ntees, too amfaut neik ale' amenat, ma ale' bian le' anniut-saen. Sin neik sin neu Na' Yesus ma antotin tulun-babat he naleko' sin. 33 Ale' too amfaut abiit eun koot nane neman ma nfuun naan anbin ume nane in enon. 34 Too amfaut nane, amenat huma'-huma', ma Na' Yesus naleko' sin ok-oke'. Ma In nliu' napoitan niut amle'ut namfau. Mes In ka nfee fa manuan neu niut amle'ut sin na'uab eun, natuin sin nahine.

35 Nuu he nmeu ween fe' meis'okan, Na' Yesus anfeen ma annao nasaitan ume nane. In nnao neu bael luman ma na'tolo', he n'onen ma namolok nok Uisneno. 36 Tabu na' Simon nok in aon-bian sin anfenan, sin ka niit Ee fa'. On nane sin nnaon ma nami. 37 Tabu sin na'euk nokan, sin na'uab neu Ne ma nak, “Aam! Too mfaun naim Ko'. Hai mi'auba' he tfain nai, pah.’’

38 Mes In nataa ma nak, “Leko msa'. Mes leko nneis, hit tnao teu kuan bian antein fe', le' anpaumaak et le' ii. Au he 'eut A'an Alekot neu sin imsa'. Natuin Au mepu in uun es le' nane.’’

39 Nalali te In nnao nfuun ma nateef anbi propinsi Galilea, he an'etu ma natoon A'an Alekot na'ko Uisneno anbi uim onen sin mese'-mese'. Anbi nane amsa', In nliu' napoitan ale' kanan niut amle'ut sin na'ko amenat sin.^j

40 Tabu nane, anmui' atoni ameen poko tuaf mese' neem neu Na' Yesus. In nli'tuu ma antoit tulun-babat na'ko Na' Yesus ma nak, “Aam! Ambaab maan kau, pah! Au uhiin 'ak Ho mubei' he muleko' au menas, henati' atoni kaisa' nma'nisin kau ntein. Na he Ho mloim, pah.’’

41 Ma Na' Yesus ankasian atoni nane, on nane In annona' In niman ma annefo ma anpoho. In namolok nak, “Au 'loim! On nane Au uleko' ko nai!’’ 42 Nok askeken te, menas nane namneuk nain, ma in naleko nfain anbi tabu nane. 43 Nalalit Na' Yesus anleun atoni nane he nnao nfain, ma namnauba' 44 ma nak, “Amneen mulek-leko'! Au he 'ba'an ko'! Ho muleko mfani yeen, mes kaisa m'eut neu sekau-msekau. Ho lo mees he mutuina' nai na' Musa in iplenat. On nane ho mnao muhuun neu a'naak lais palsait Yahudi henati' in ntae ho aom, he in nahiin namneo-namneo nak, ho muleko mfani yeen, ai' fe' kahaf? Nalalit ho meik fua'-tulu' he nfani taka' nak, ho mtoit makasi, hena' too amfaut eun nahiin nak ho muleko mfani namneo-namneo ween.’’^k

45 Mes atoni nane anpoi nnao n'eut na'ko bale yes annao neu bale yes anbi mee-mee. Es nane te, too mfaun namin lanan he na'euk nok Na' Yesus, tal antia In ka nabei' fa he nalile' In aon aa anbi koot. On nanet In natua nbi bale-bale le' luman ma na'tolo', le' na'loo' na'ko koot. Ma too mfaun na'ko mee-mee, neman ma nami he na'euk nokan.