Gubernur Festus anpalekas na' Paulus in lasi
25
Tabu nane, gubernur feu', na' Festus, na'oni' neem anbi koot Kaisarea he nanaoba' in iplenat. In aal na'maika' anbi nane neno tenu waah, oka te in nnao nfiin neu Yerusalem. 2 Anbi nane, a'naak lais palsait Yahudi sin a'naakt eun sin neman he nmakhiin eun nok gubernur feu' nane. Sin nteek naan na' Paulus in lasi ye msa'. 3 Sin ntotin, he kaul leko te, gubernur feu' nleun in atoin eun, he neik nafani' na' Paulus neem neu Yerusalem. Te kahaf, sin anma'akool eun nlalin, he nlool niis na' Paulus anbi laan atnanan.4 Mes gubernur ee nataah sin ma nak, “Sin ama' aal ki! On ii. Maut he sin ntaahn ee fe' anbi Kaisarea. Fun au he 'fain labah on naa. 5 On nane te kaul na'ko hi le' ii, anmui' tuaf he n'ulus lasi nane, sin nok kau he mnao meu Kaisarea. Kaul a'teeb atoni' nane anmoe' sanat, leko te, hi mibe'i mlais mokan ambi naa yaah.”
6-7 Nalalit gubernur Festus fe' nabalah anbi Yerusalem oin neno bo'es aah, na' in ntebi nfain neu Kaisarea. Tabu nane, anmui' naan atoin Yahudis fauk nokan, antia naa. Nookf aa on nane te, gubernur ee nfei nafani lasi nane. In nleun he sin neik na' Paulus, he neem neu in matan.
Tabu na' Paulus antaam anbi nane, atoin Yahudis sin anhaken ma nfuun naan na' Paulus, oka te sin nmulai nasaan ee nok sanat huma'-huma'. Mes sin ka nabei' fa he naklila' bukti mese' msa'.
8 Nalalit na' Paulus namneob on ma nak, “Ama' gubernur. Au ka 'moe' 'iit fa lais sanat saa'-saa'. Au ka 'moe' 'iit fa lasi le' anlaban nok hai atolan palsait Yahudi msa'. Au ka ulahib 'iit fa hai Uim Onen Uuf abiit Yerusalem. Ma au ka 'moe' 'iit fa lasi saa'-saa' he 'laban anaa' aplenat Roma in atolan.”
9 Mes gubernur nane, he naim atoin Yahudis sin neek eun ee he nokan. Etun es in nataan na' Paulus ma nak, “Ho mutenab, on mee? Ho mloim, ai' kahaf, kaul au 'atol ho lasi ii anbi Yerusalem?”
10 Anneen gubernur ee in haan tanas, on nane te, na' Paulus nataah ma nak, “Ama' gubernur. Au le' ii, a'mui' hak too Romas. Ma tabu ii, au 'haek es anaa' aplenat pah Roma in matan, le' in nmui' hak he n'ulus au lasi, natuin atolan plenat pah Roma. On nane te au ka 'loim fa he 'nao 'eu Yerusalem, he nafeek au lasi nbi naa. Ho meikn om muhiin mulail mak, au ka 'moe' fa sanat saa'-saa' le' he 'laban atoin Yahudis sin. 11 On nane te kaul a'teeb au 'mo'e 'saan saa'-saa' le' anmatoom nok he nhukun na'maet kau te, au 'simo we. Mes kaul saa' le' sin na'uab nani ye ka namneo fa, natuin in atolan, ka tiit tain fa es he annona' kau neu atoin eun ii sin i'niimk enu. Sin aal naim-naimn ahaa lanan, he nlool na'maet kau luumn aah. On nane te tabu ii, natuin au hak ee te, au 'eik au lasi ye 'sae 'tein 'eu usi 'naek kesel, anbi pah uuf koot Roma. Maut he in es le' neikn on nafeek lasi ii, ahoit.”
12 Anneen na' Paulus na'uab on nane te, gubernur ee nok in apalekas lasi sin, nabuan ma na'uab eun. Nalalit in an'eut neu na' Paulus ma nak, “Natuin ho mtoit mulail he meik ho lasi ye msae mtein meu kesel, es nane te, ho lo mees he mnao meu koot Roma.” Na'uab nalail on nane te, in anleun abuat eun nane he nasaan' ok.
Na' Festus antoit fainekat na'ko usif Agripa neu na' Paulus in lasi
13 Nalalit atoin Yahudis sin usif, kanan na' Agripa,a nok in fetof, kanan bi Bernike, neman nbin Kaisarea. Sin neman he nmatool' eun nok gubernur feu' nane. 14 Sin natuan nok gubernur Festus suuk a'loo. Neno wes te, na' Festus an'etun sin neu na' Paulus in lasi ma nak, “Aam usi'! Anbi Kaisarea le' ii, hai mtahan atoni yes, kanan na' Paulus. Neno nane, gubernur ahuunt ee ka nafeek naan fa in lasi. 15 Neno fauk afiint eun, tabu au 'eti 'bi Yerusalem, a'naak lais palsait Yahudi sin a'naakt eun ma sin atoni mnais haalt eun, neman ma ankalaak na' Paulus. Nalalit sin ntoit kau he au 'huukn ee. 16 Mes au 'eut 'eu sin ma 'ak, ‘Tatuin atolan plenat Roma, au lo he 'tae ma 'tai 'aan lasi nane fe', na' au ufeek. A'aa' laisn ee lo he nabuan fe'. Au he 'neen 'aan 'ak hi misaan ee nok saan saa'. Ma in imsa' lo mees he napein taub sona' he namneob on, hena' au ubei' ufeek lasi nane, ma thuukn ee nok hukun huma' mee.’ 17 Nalalit tabu au 'fain 'oum a'bi Kaisarea, atoin Yahudis fauk nok kau neman anbin ii. Nookf ate, au 'fei ufani' 'ain lasi nane. Au uplenat sin he neik na' Paulus neem neu kau, he au 'neen 'iit in lasi ye in i'naon. 18 Nalalit atoin Yahudis sin nbaisenun ma nmulai na'uab eun neu na' Paulus in saant enu. Mes saa' le' sin an'eut sin nane, ka ma'fena' fa paap mese' on le' au uteenb ee ye. 19 Sin aal nasuiln ahaa, nmatoom nok sin lais palsait eun kuuk. Ma sin nasulin nok na' Paulus, natuin tuaf es, kanan Na' Yesus. Tatuin atoin Yahudis sin, Na' Yesus nane, anmaet nalali yeen. Mes na' Paulus nameep aah nak, Na' Yesus nmonin nfani yeen. 20 Sin nasulin on le' nane, mes natuin au atoin feu' kau, on nane te au ka uhiin 'aan fa le' he tafeek lais palsait ii te, on mee? Etun es au utaan na' Paulus am 'ak, ‘On mee kaul au 'palekas ho lasi ye anbi Yerusalem?’ 21 Mes in ka nlomif. On nane te in ntoit he neik in lasi ye nsae ntein neu kesel anbi pah uuf koot Roma. Etun es au fe' a'taahn ee tal antia au upein sona' he 'soun ee nnao neu Roma.”
22 Anneen anlail na' Festus in uaban on nane te, usif Agripa nak, “Kaul leko te, au he 'neen kuuk atoni' nane.”
On nane te na' Festus nataah ma nak, “Leko! Of au 'atol he noka' ate, ho mneen kuum mu'ko ne, ahoit.”
Usif Agripa nloim he nneen na' Paulus in uaban
23 Nookf ate, gubernur Festus an'atol he usif Agripa nabei' anneen na' Paulus in uaban. Ma in an'atol he too mfaun eun bian amsa' nneen nok na' Paulus. Sin es eun le': solalu 'naakf eun, ma a'naet eun na'ko koot Kaisarea. Nalalit usif Agripa nok bi Bernike ntaam neman, ma sin npaek sin paek usif. On nane te too mfaun eun na'bees ma ntola' neu sin nua sin. Tabu sin nabuan oke', gubernur ee nleun he nok na' Paulus antaam neem.
24 On nane te sin neik na' Paulus antaam. Nalalit gubernur ee na'uab am nak, “Usif Agripa, sin ama' aal ki, ma ale' amnemat sin ok-oke', le' au u'latan ma 'tola' 'ain ki. Atoni' le' ii, kanan na' Paulus. Anmui' naan a'nakat atoin Yahudis fauk le' sin namin lasi nokan. On nane te anmui' tuaf neman neu kau, tabu au 'bi Yerusalem ma 'bi Kaisarea, he na'seke' kau nak, atoni le' ii, in nmoni msa' ka ma'upa' fa'. 25 Etun es au 'paleeks ee, mes au ka upein fa in sanat le' namnees nok hukun a'maten. Mes in neikn on antoti nlail he nasaeb in lasi ye annao nfiin neu pah uuf, es na' leko ai' ka leko' fa te, au lo he 'soun ee nnao neu koot Roma. 26-27 Kaul au 'soun ee, au lo he 'tui 'aan suult es le' anmatoom nok lasi nane. Mes tabu ii, au he 'tui 'ak saa' 'eu usi 'naek ee? Etun es, au ubuaba' ki ok-oke', he hi mneen ee. Amneen milali ye te, au 'toit 'eu usi' Agripa he nfee naan kau faineekt es, he au 'tui sulat le' nabei' usi 'naek ee nsimo ee nok neek leko. Au utniin ate on le' he ka leko fa, kaul au 'sonu' lasi ii annao neu kesel, mes au ka 'eut fa atoni' ii in sanat.
Au uab ee na'tuuk ma na'paal on le' nane, pah.”