Na' Paulus in sulat ahunut
neu apalsait eun abiit eun Tesalonika
1 Tesalonika
Taben ma haan se'ot
1
Haan taben na'ko au, na' Paulus kau, ma au soob lekon na' Silas ma na' Timotius.Sulat le' ii, hai msonu' neu ki aal ki too slani' abiit koot Tesalonika. Hi es le' ampiil kiim lanan he mituin hit Ama' Uisneno, ma mituin hit Usi' Yesus Kristus.
Hai mtoit Uisneno he naklila' In nekan leko neu ki, he hi mmoni mbi mamut ma tainine' ma halan nekaf es nok es.a
Na' Paulus antoit makasi, natuin abiit eun Tesalonika npalsain piut
2 Hai misaeb makasi piut-piut meu Uisneno, natuin hi palsait nane. Fai-manas hai m'onen ma mteek ki ok-oke'. 3 Hai mimnau piut-piut meu ale' mepun le' hi mmoe' sin, natuin hi mpalsai Uisneno ma mneek Ee. Hi mtahan piut-piut ambi ale' mepun nane, natuin hi mifneek ma mi'paen meu Usif Yesus. Hai meik sin piut-piut meu Uisneno In human ma In matan, le' hit Ama'.
4 Au aok-bian aal ki! Hai mihiin mak Uisneno nneek ki. Etun In inpiil ma nbeit naan ki nfani In fomili. 5 Neno wes, tabu hai eim meu Tesalonika, hai m'eut ki Uisneno In Lais Leko. Tabu nane, hi mneen hai uab eun lek-leko. Hi ka mneen ahaa fa, mes hi miit kiim Uisneno In kuasan amsa' na'ko In Ismana Knino'. Lasin le' nane, es le' anmoe' ki ma hi msium Usi' In Lais Leko namneo-namneo. Tabu nane, hi miit meik hi matam, hai 'tokom ma hai 'hakem mak, hai mmoe' on mee, he hi mihiin namneo-namneo Usi' In lanan. 6 Natuin hi mlomi ma mpiil he mituin Uisneno In i'lomin, es nane te hi mmoin mituin hai 'heta', ma mmoin mituin Usif Yesus In i'heta'. Mes tabu hi msium Lais Leko, anmui' tuaf le' nasuseb ki. Maski on nane msa', hi nekam nane ka na'oin eun fa, natuin Uisneno In Ismana Knino' anfee ki neek malinat.b
7 Nok lanan nane, hi mitoon a'leta' meu apalsait eun ok-oke' abiit eun propinsi Makedonia ma propinsi Akaya. 8 Mes ka le' nane anmees fa. Uisneno In Lais Leko nane nasiitb on ma nasaan on na'ko ki abiit Tesalonika nane, antia mee-mee. On nane te hai he mi'uab saa' antein, natuin biak eun ok-oke' anneen nalailn een hi neek palsait meu Uisneno. 9 Anbi mee-mee yah, biak eun nanu'un ma nak, nahunu te hi msiom kai nok lek-leko. Oka te hi mait impolin hi 'tuul' eun nane, ma mite'un hi neekm eun nane ma mituin Uisneno le' amneot ma amnonot. Natuin hi le' nane of amfain Uisneno Amonit Inin ki. 10 Sin imsa' nanuu'n eun ma nak, hi fe' ampao Uisneno In Anah, Na' Yesus, he nkoen On neem na'ko sonaf neno tunan. Neno wes, biak eun na'mate, mes Uisneno namonib nafani' In. Kaul Uisneno nloim he nhukun mansian aa te, Usif Yesus es le' ansoi nafetin naan kit na'ko kasat Uisneno.