Na' Saulus antaam anfain Usif Yesus In ini
9
Tabu nane, na' Saulus ansail piut-piut ma nha'mui' Usif Yesus Inin. In naim lanan he nlool niis sin amsa'. Es nane te, in nnao neu lais palsait Yahudi sin a'naak anesit, 2 ma ntoit suul aplenat he neik sin neu a'naak lais palsait Yahudi sin anbi sin uim oen eun et koot Damsik. In ntoit he kaul in na'euk nok apalsait eun neun Usif Yesus In Laan A'honis, ale' bifee ma atoni', in he nheek ma nfuut sin, ma anheel neik sin neun Yerusalem.3 Ansimo nlail suul apleent eun nane te, in nok in aon-bian sin annaon neun koot Damsik. Tabu in npaumaak koot le' nane, nok askeken ate, piin' es na'ko neno tnanan antana' na'keeh na' Saulus. 4 On nane in anbeel nain antia afu. Nalalit in nneen haanf es na'uab neu na ma nak, “Saulus! Nasaa' am es ho mha'mui' Kau on le' ii?”
5 Na' Saulus nataan ma nak, “Sekau es le' a'uab le' ii, pah?”
Hanaf nane nataah ma nak, “Au le' ii, Na' Yesus, le' ho mha'mu'i. 6 Tabu le' ii, amfeen nai, ma mtaam nai meu koot nane. Anbi nane, Au of a'eut ko saa' le' ho he mmo'e.”
7 In aon-bian sin anneen hanaf nane msa', mes sin ka niit fa sekaum-sekau. On nane sin neek eun namnekun, tal antia sin ka fefa' mese' fa'.
8 Nalalit na' Saulus anfeen anhaek. In he nfei in maatn eun, mes in nfolo nmaet. On nane sin nnaa' in i'niman, ma nok na antaam neu koot Damsik. 9 Neno tenu mfai tenu 'teme-'teme, in ka niit fa saa'-saa'. Ma in ka naah am niun fa saa'-saa'.
10 Anbi koot nane, anmui' apalsait es, kanan na' Ananias. Usif Yesus neem nakliil On neu na' Ananias anbi nanait, ma nak, “Ananias!”
Ma na' Ananias nataah am nak, “Au es kau ii, Usi'!”
11 Usif Yesus an'eutn ee ma nak, “Oum fe'! Ho mnao he maim Au atoni yes. Amnao meu Laan Amneo', meu atoni yes in ume, in kanan na' Yudas. Anbi ume nane, ho mu'euk mok atoni yes, in kanan na' Saulus. In na'ko koot Tarsus. Tabu le' ii, in an'onen. 12 Au 'feen na' Saulus nanait amsa' ma 'eutn aa m'ak, ‘Of anmui' atoni yes, in kanan na' Ananias, neem na'euk nok ko.’ Ho mnao he mtao ho 'nimam he in nabei' niit anfain.”
13 Mes na' Ananias nataah ma nak, “On ii, Usi'! Hai mneen milail pi'ot huma'-huma' anmatoom nok atoni' le' nane. In nhaka'mui' niis Ho too knino' sin abiit eun Yerusalem. Tal antia sin susal, ka kle'-le'o fa'! 14 Tabu le' ii, hai mneen amteni' nak, a'naak lais palsait Yahudi sin a'naakt eun anfeen aa kuasat he neem ma nheek nani tuaf-tuaf le' antaam natuin Ho Laan A'honis, Usi'.”
15 Mes Usif Yesus na'uab antein nok na' Ananias ma nak, “Meski on nane msa', mes tabu ii ho lo mees he mnao! Fun Au 'pili yeen he nfei lanan neu Kau, maut he in neik Lais Leko neu atoni' na'ko uuf ma pah bian, ma neu uisf eun, ma neu too Isra'el amsa'. 16 Au of a'etun, he in nahiin, nak ha'mu'it huma' mee es le' npao nani ye, natuin in npalsai ma nok Kau ween.”
17 Anneen Usi' In a'an on nane te, na' Ananias annao neu ume nane, nalalit in antaam anbi nane. In ntao in i'niman anbi na' Saulus ma nak, “Bae'! Usif Yesus le' ho miit Ee nbi lanan tabu ho oum, In neikn On es anleun kau he 'oum u'euk 'ok ko. In nleun kau he au 'onen ma 'tao au 'nimak neu ko, he ho mubei' miit amfain. In nlomi msa' he ho msium In Ismana Knino.”
18 Tabu nane, na' Saulus natniin ate, saa' es on le' ika' knufan anmouf na'ko in maatn eun, ma in nabei' niit anfain nain. Nalalit in nfeen ma sin naslani. 19a On nane te in naah am niun, tal antia in aon aa nabe'i nfain.
Na' Saulus natoon Lais Leko anbi koot Damsik
19b Na' Saulus fe' natua nabaal akle'o nok Usif Yesus Inin anbi koot Damsik. 20 Ma in nnao ntaam anbi atoni Yahudis sin uim onen, ma in n'eut neu sin ma nak, “Mitniin milek-leko'! Namneo-namneo Na' Yesus nane, Uisneno In Anah.”
21 Ale' too mfaun eun ntaka'manan ma nsanmakan neu na' Saulus in uaban nane. Es nane te, sin na'uab eun ma nak, “In le' ii, es le' anha'mui' Usif Yesus Inin anbi Yerusalem, ai' kahaf? Nalalit in neem neu ii, he nheek sin ma neik sin nnao neu a'naak lais palsait Yahudi sin a'naakt eun! On mee es le' ii!?”
22 Na' Saulus anloim he naklila' bukti ma nak, Na' Yesus le' nane, Kristus le' Uisneno nba'an nani Ye na'ko afi unu', he nfee Ye neem. Na' Saulus nanoina' nok maat-maat tal atoni Yahudis sin ka niis ee fa'. Es nane te, na' Saulus in i'mo'en na'nae piut na'ko tabu nnao neu tabu.
23 Anfini kle'o na'ko tabu nane, atoni Yahudis sin namin lanan he nlool niis na' Saulus. 24 Mes na' Saulus annaben nahiin sin tenab nane. Sin anpao na' Saulus fai ma manas anbi eno' 'poi' koot nane, he nlool nisan. 25 On nane anbi fai yes ate, na' Saulus in aon-bian tuaf fauk neman ma nasnoon neki anbi 'ki'u, nalalit nasaunt ee na'ko baik-lame mnanu' koot nane. Nok lanan nane, in naen nasaitan koot Damsik.a
Na' Saulus annao neu Yerusalem
26 Nalalit na' Saulus annao neu Yerusalem. Anbi nane, in he ntaam nabua nok Usif Yesus Inin. Mes sin aal sin namtausan na' Saulus, natuin sin nateenb eun ma nak, in nmoe's on he nfain on le' antaam apalsait neu Usif Yesus. Nalalit na' in he nheek sin. 27 Mes anmui' atoni yes, in kanan na' Barnabas. In es le' na'ekub na' Saulus nok Usif Yesus In haef eun anbi nane. In an'eut neu sin ale' lasi le' anlail neu na' Saulus anbi laan atnanan. In an'eut nak na' Saulus na'euk nalail nok Usif Yesus amsa'. Ma Usif Yesus na'uab maat-maat nok na msa'. Na' Barnabas an'etu msa' ma nak, na' Saulus lo nbalain he n'eut Usif Yesus In Laan A'honis neu abiit eun Damsik.
28 Annenan on nane te, sin ansimo na' Saulus. Nalalit in natua nok sin anbi koot Yerusalem. In nbalain he na'uab anmatoom nok Usif Yesus In Lais Leko neu es am es, natuin in ka namtausan fa saa' es. 29 In anmatutan uab nok atoni Yahudis fauk le' na'uab eun neik uab Yunani msa'. Mes sin ka nlomin fa he nsium in uaban nane, on nane sin namin lanan he nlool nisan. 30 Mes tabu Usif Yesus Inin annenan ma nak, atoni bian sin nateenb eun amle'ut on nane te, sin naen neik na' Saulus neu koot Kaisarea anbi tasi ninen. Nalalit sin anlenu he nnao nfiin neu in kuan, koot Tarsus.
31 Nalalit Usif Yesus Inin le' abiit eun propinsi Yudea, propinsi Galilea, ma propinsi Samaria, anmonin nok mamut. Sin anlonu wok piut. Ma sin nmoe' natuin Usif Yesus In i'lomin. Ma Uisneno In Ismana Knino' nha'taen sin neek enu.
Na' Petrus naleko' atoin amenat es anbi kuan Lida
32 Tabu nane, na' Petrus biasa nnao neu bale-bale he nkius Usif Yesus Inin. Anbi neno wes, in nnao nkius nonot apalsait abiit eun kuan Lida. 33 Anbi nane, in na'euk nok atoni yes in kanan na' Eneas. Atoni' nane an'oel. Toon fanu ween, in ka nfeen niit fa na'ko in hala 'tupa'.
34 Na' Petrus na'uab neu na ma nak, “Eneas! Tabu le' ii, Yesus Kristus naleko' ko. On nane ho mfeen nai! Mu'ikab ho bale 'tupa'!”
Anneen nalail on nane te, in anfeen nain. 35 Tabu abiit eun kuan Lida ma kuan Saron niit na' Eneas naleok on nane te, sin aal sin anpalsain neu Usif Yesus.
Nai' Petrus namonib nafani' eina' Tabita na'ko in i'maten
36 Tabu nane, anmui' bifee yes, in kanan bi Tabita, le' natua nbi koot Yope et tasi ninen. (Bifee nane, in kanan neik uab Yunani te nak, Dorkas, le' neik hit uab aa te nak ‘luus’).b In anpalsai neu Usif Yesus. In nmoe' alekot piut neu in aon-bian sin, ma ntulun ale' ama'mui't eun. 37 Tabu nane, eina' Tabita nameen, oka te in anmaet. On nane te sin naniu in ta'un, ma sin n'amu, nalalit sin natupa' nbi in ke'an abiit fafon. 38 Tabu nane, sin nneen nak na' Petrus natua ntahan anbi kuan Lida. (Kuan nane, in a'loon aa neno steen es, kalu tnao hae ta'ko koot Yope.) Nalalit sin anleun tuaf nua he nnaon na'auba' na' Petrus ma nak, “Aam! Hai mi'auba' ko, he mkoen om oum labah meu Yope.”
39 Anneen haan 'auba' nane te, na' Petrus nok nain sin. Antian bale nane te, na' Petrus antaam ma ansae nfiin anbi eina' Tabita in ke'an. Ke'an nane naheun nok bifee banu' le' neman ma nkaen nme'-meu'l eun. Sin naklila' sin blua' pake sin ma pake bian antein le' eina' Dorkas ansoo sin, tabu fe' in nmoin.
40 Na' Petrus anleun sin he npoin ok-oke' na'ko ke'an nane. On nane te in nli'tuu ma n'onen. Nalalit in nabain on neu amates nane ma na'uab am nak, “Eina' Tabita! Amfeen nai!” Nok askeken te, bifee nane anfei in matan. Tabu in nkius niit na' Petrus, in nfeen ma ntook. 41 Nalalit na' Petrus annaa' in i'niman ma nfiit nafena'. On nane na' Petrus anboin bifee baun eun ma tuaf bian anbi nane, he nana'at bifee amonit nane neu sin.