Na' Paulus namneob on
22
On nane te na' Paulus anmulai na'uab ma nak, “Sin ama' ma au aok-bian aal ki oke'! Au 'toit ki he hi mitniin maan kau, he au u'uab he umneob ok, pah.”2 Tabu nane, too mfaun eun nneen na' Paulus na'uab anpaek sin uab. On nane te sin ntaa' nanin, he nneen nalek-leko' in uaban nane. On nane te in ntuut ma nak, 3 “Na haa hi aal ki mihiin mak, au le' ii, atoin Yahudis. Au eina' nahonis kau nbi koot Tarsus et propinsi Kilikia. Mes au u'nae 'bi ii, koot Yerusalem. Le' nanoina' kau ee, es le' kulu 'naek nbi ii, na' Gamalial. In nanoina' kau namnuut anmatoom nok nai' Musa in atooln eun ok-oke'. Au 'makoe msa' he utuin Uisneno, paap mese' on le' hi.a 4 Neno wes, au ka usnaas fa he 'liu' ma 'moe' ususab tuaf eun le' natuin Na' Yesus In Laan A'honis. Au 'heel 'eik sin, et ko bifee ma atoni, neman neun Yerusalem, oka te au utaam sin anbin uim o'of. Tabu nane, anmui' amates amsa'. 5 Hit lais palsait Yahudi sin a'naak anesit, ma a'naak lais palsait bian amsa', sin nahinen nlalin nak au u'uab 'ak saa' ate, 'teeb on naan! Au ka upoib ok fa'. Fun sin es le' anfee kau suul kuasat, he au 'nao 'heek 'aan tuaf-tuaf le' natuin Na' Yesus, tal a'tia koot Damsik. Anbi nane, au he 'heek sin, oka te au he 'heel 'eik sin neman neun Yerusalem. Au utenab 'ak, maut he afeek lais palsait eun es le' anhukun sin.”b
Na' Paulus nanu'un saa' le' Usif Yesus anmoe' niit neu ne
6 On nane te na' Paulus antalu ntein in uaban nane ma nak, “On nane te au 'nao neu koot Damsik, he au 'aim sin anbin naa. Oin on le' maans ee na'fufu' te, ala kle'o te hai he mtia koot nane. Nok askeken ate, anmui' naan asnaaf es na'ko neno ee, antoom kau. 7 On nane te au 'beel 'eu afu, ma au 'neen haanf es na'uab ma nak, ‘Hoe, Saulus! Nasaa' am es ho mha'mui' Kau on le' ii?’ 8 Au 'neen hanaf nane, mes au ka 'iit fa tuaf es amsa'. On nane te au utaan am 'ak, ‘Usi', ho sekau ko?’
Nalalit hanaf nane nataah kau ma nak, ‘Au le' ii, Yesus, atoin Nasaret, le' ho mha'mu'i Ye!’ 9 Mes atoni' le' annaon nabu-bua nok kau, sin niit asnaaf nane, mes sin ka nneen fa hanaf nane.
10 On nane te au utaah ma 'ak, ‘Kaul on nane, tabu ii, au he 'moe' saa', pah?’
Hanaf nane, anleun kau ma nak, ‘Amfeen nai, mtaam nai meu koot in nanan. Anbi nane, na' Au 'eut ko ale' lasi le' ho lo he mmoe' main sin.’
11 Au 'neen ulail on nane te, au 'fena 'haek. Mes au ka ubei' 'iit fa saa'-saa' ntein, natuin snaaf le' nane es nafolob kau. On nane te au aok-bian sin nnaa' kau ma nheel kau, oka te hai mtaam meu koot Damsik.
12 Anbi nane, anmui' nain tuaf es, kanan na' Ananias. Atoni' ii, in neekn ee mneo', ma in annaa' namepan atolan nai' Musa msa'. Ale' atoin Yahudis abiit eun koot nane, sin nlomi ye, ma ntola' ee. 13 In neem naim kau, oka te na'uab ma nak, ‘Bae'! Ho maatm eun nane, nalekon nlalin. Es nane te, amfei ma mnuu' nai!’ In na'uab nalail on nane te, au u'aiti' au humak, ma au ubei' 'iit ee. 14 Nalalit in nanoina' kau ma nak, ‘Uisneno, le' hit bei' ma hit nai' sin n'oen eun neu Ne, tabu ii, nbeti nlail ko. Ho mepu we es le' he muhiin mulek-leko' In i'lomin. Ma muhiin mulek-leko' Usif Yesus nane, le' hit tteek Ee te tak, “Atoni Knino'” na'ko un-unu'. Tabu ii, Uisneno nfei lanan neu ko, he ho mneen kuum mu'ko Usif Yesus. 15 In neikn On anbeit nain ko, he mnao m'eut In Lais Leko neu tuaf-tuaf anbi mee-mee. Ho lo he m'eut ale' saa' le' ho miit ma mneen kuum na'ko Ne. 16 Kais ampao 'loo-loo mtein. Amnao mak sin he naslain ko nai, he nfani 'taka' nak, ho mtoti mlail he Usif Yesus ansaok nain ho saant enu.”’
Usif Yesus naplenat na' Paulus he neik Lais Leko neu tuaf le' ka atoin Yahudis fa
17 On nane te na' Paulus antalu ntein in uaban nane ma nak, “Oka te au 'fain 'eu Yerusalem. Neno wes, au 'nao 'onen a'bi Uim Onen Uuf. Tabu au 'onen, Usif Yesus nakliil On neu kau nbi mnitas. 18 Au 'iit Ee. On nane te In naplenat kau ma nak, ‘Tabu ii, ho lo he mnao musaitan koot Yerusalem nai'! Fun abiit eun bale ii, sin ka nlomin fa he nsium saa' le' ho munoina' anmatoom nok Kau.’
19 Mes au ka 'loim fa he 'sium plenat nane, natuin un-unu' te, a'naak lais palsait sin anloim neu kau. On nane te au utaah ma 'ak, ‘Mes on ii, pah! Sin al-aal sin nahinen nak, neno nane au es le' a'poi ma 'taam uim onen anbi mee-mee, au 'heek ma 'bius atoni' le' anpalsai neu Ko. 20 Sin nahinen nak, tabu sin anpoil na'maet Ho haef, na' Stefanus, au a'bi nane, ma au 'lomi msa'. Tabu sin nabuab eun fatu he npoil na' Stefanus, au es a'huita' sin, ma au es le' a'panat sin paken.’c
21 Au umnaub Ee on le' nane, mes Usif Yesus naplenat nafani' kau ma nak, ‘Kais maim lasi 'sukif huma'-huma'! Musaitan Yerusalem tabu ii! Natuin Au he 'leun ko he mnao meu bale 'loo sin, he munoina' atoni 'teta' le' ka atoin Yahudis sin fa'.”’
22 Tabu too mfaun eun anneen na' Paulus na'uab nak, Uisneno es le' anleun nani ye, he nnao neu atoni 'teta', sin ka nlomin fa he nneen antein' ee. Sin nato'an, oka te sin nhuun eun ok-oke' ma nak, “Kais amneen atoni' le' ii! Amlool misan! In nmoni msa' ka ma'upa' fa'.”
Solauls eun neik na' Paulus annaon neu benteng
23 Sin nkoa' eun on nane, nalalit sin nholo' nain sin paken, oka te sin nnaun afu skuku' ma na'pene', natuin sin nato'an nmaten. 24 Tabu solalu 'nakaf nane niit sin antaisibun nfanin, in nleun in solauls eun he nheel nataam na' Paulus neu benteng. Nalalit a'nakat nane anleun he nbiso we, he in nmanaku nak in nmo'en saan saa', tal atoin Yahudis sin he nlolo we. 25 Tabu sin nfuut na' Paulus he nbiso we te, in nniik ma nataan solaul abiust ee ma nak, “Natuin atolan plenat pah Roma, mee es namneo? Kaul tuaf es in nmui' hak too Romas, oka te in napein lasi, hi he mmo'e on mee? Hi mbiso we nahuun? Ai' hi mpalekas nahuun?”
26 Anneen on nane te, solalus nane naim in a'nakat. On nane te in an'eut ma nak, “Aam! Atoni' ii nmui' hak too Romas! On nane te ho he mmo'e on mee?”
27 Anneen on nane te, solalu 'nakaf nane, in neikn on nataan na' Paulus ma nak, “Nak ho mmui' hak too Romas? 'Teeb, ai' kahaf?”
Nalalit na' Paulus nataah ma nak, “'Teeb, pah! Au 'mui' hak nane.”
28 Lalit solalu 'nakaf nane nak, “Au on le' nane msa'. Au 'baen ee 'naek, hena' au upein hak nane.”
Mes na' Paulus nataah ma nak, “Kaul au te, ka 'baen fa saa'-saa'. Anmulai na'ko au eina' nahonis kau, au 'naa' 'ain hak le' nane. Au ama' annaa' hak le' nane msa'.”
29 Tabu sin nneen nak na' Paulus anmui' hak too Romas on nane te, solauls eun antet-kotin, ma sin ka nbalanin fa he nbiso we ma npalekas antein' ee. Solalu 'nakaf nane namtau, natuin in es le' anleun he nfuut na' Paulus. In nahine nlail nak, in ntanhai atolan.
Na' Paulus anbi bael feek lais palsait Yahudi
30 Nookf ate, solalu 'nakaf nane, in naim he nahiin namneo lasi nane in uun ma 'naon ee, on mee. Lalit in nleun in solauls eun he nnao nboin nabuab tuaf eun le' biasa nafekan lais palsait Yahudi. Nalalit in nleun he nseif na' Paulus in koleen besi, oka te sin neki ye nnao na'euk nok afeek lasin nane ok-oke'.