23
Antian nane te, sin nleun na' Paulus he na'uab namneob on. Nalalit in nkius nalek-leko' atoin eun le' nane, ma na'uab ma nak, “Au aok-bian aal ki! Au 'hake 'bi ii, nok neek amneot. Uisneno nahiin kau na'ko au aan'-ana' tal antia neno ii, au neek ee knino'.”2 Anneen na' Paulus na'uab on nane te, na' Ananias,a in es le' anlail lais palsait Yahudi sin a'naak anesit natoo' anmaet. On nane te in naplenat tuaf le' nhaken npaumaak na' Paulus ma nak, “Ampaas maan ee paap es neu le' fefan nane!”
3 On nane te na' Paulus in nataah na' Ananias ma nak, “Of Uisneno npaas anbalas ko. Fun ho on le' nii le' fe' nseet nalali nbi kotin, mes in naan ee naem eun ansolo we. Ho mtoko mbi ii, ma mmoe' ho ta'um on le' atoni knino'. Nalalit ho he mhukun kau, natuin hit halat ma hit atolan. Mes ho le' nane amtanhai atolan nane msa', tabu ho mleun he npaas kau.”b
4 Anneen na' Paulus na'uab on nane te, atook apaumaakt eun nakain ee ma nak, “Hoe! Ho ka mubei' fa he mu'uab on le' nane neu hit a'naak anesit!”
5 On nane te na' Paulus nataah sin ma nak, “'Teeb, ai'? Kaul on nane, au ufneekn ok 'eu ki, te au ka uhiin fa nak, in le' naa, hit a'naak anesit. Namneo', Uisneno npaek tuaf he ntui nain nak, ‘Ka nabei' fa he hi mi'uab amle'ut meu hi a'naakt enu.”’c
6-8 Tabu na' Paulus niit sin atokos le' he nafekan lais palsait, in nahiin nak, sin na'kon pukan nua'. Bian Saduki, le' sin npalsain nak, amates ka nabei' fa he nmonin nfain. Sin npalsain amsa' nak, Uisneno ka nmui' fa ameput et sonaf neno tunan. Ma ka nmui' fa smanaf. Pukan es antein es le' pukan Farisi, le' npalsain ma nak, of Uisneno namonib nafani' amates sin. Sin npalsain amsa' nak, anmui' smanaf, ma Uisneno anmui' ameput et sonaf neno tunan.
On nane te na' Paulus na'uab namep-meep nak, “Au aok-bian aal ki! Na haa hi mihiin ok-oke' mak, au le' ii, atoin Farisi kau. Au ama' ma au nai', atoin Farisi amsa'. Tabu ii, hi he mhukun kau, natuin au 'palsai 'ak Uisneno nabei' namonib amates.”
Tabu na' Paulus na'uab on nane te, atoni Farisi ma Saduki sin nmatoen, tal antia sin ka nmalomin fa yeen. Nalalit sin nbaits ok anlalin pukan nua'.d 9 On nane te afeek lasi nane anmatoen, tal antia taisibu 'naek. Nalalit anmui' kulu na'kon nonot Farisi anhaken ma anpeis na' Paulus. Sin na'uab eun nak, “Atoni' ii ka nsaan fa'! Kais-kaisa' anmu'i smanaf, ai' Uisneno In ameput sonaf neno tunan es, le' nema na'uab nokan!”
10 Kulun nane na'uab nalalin on le' nane, mes sin nmatoes ee maneun le'uf, tal solalu 'nakaf nane anmulai namtau'. In natenab nak kais-kaisa' sin n'usa' niis na' Paulus. On nane te in nleun solauls eun ansanun he nheel nataam na' Paulus neu benteng.
11 Mabe' te, Usif Yesus neem na'kliil On neu na' Paulus. Ma In nha'taen na' Paulus in nekan ma nak, “Paulus! Ho kais mumtau'! Tabu ii, ho mu'uab mulail anmatoom nok Kau nbi Yerusalem ii. Mumnau mulek-leko'! Of ho lo he mu'uab on le' nane anbi Roma amsa'.”
Sin anma'akool eun he nlool na' Paulus
12-13 Anbi nok-nook ana' te, atoin Yahudis anneis na'ko tuaf bo' haa, sin anma'akool eun he na'maet na' Paulus. Sin nsupan am nak, “Hai ka mloim fa he miah ma miun, kaul hai fe' ka mlool maan fa na' Paulus.”
14 Sin nsuup nalalin on nane te, sin nnaon n'etun a'naak lais palsait Yahudi sin a'naakt eun, nok atoni mnasi' halat Yahudi sin ma nak, “Sin ama' aal ki! Hai msuup milail mak, hai ka mloim fa he miah ma miun, kaul hai fe' ka mlool miis fa na' Paulus. 15 Hai 'loim eun on ii: ama' sin lo he mnao mbaiseun solalu 'nakaf, he mtoti ye he meik maan na' Paulus neu bale feek lasi palsait. Ammoe' on le' hi he mpalekas mifani' in lasi. Of hai mseun sin anbi laan atnanan, he hai mlool misan.”
16 Mes na' Paulus in moen feu' aan es anneen sin lais akolat nane. Nalalit in naen neu benteng ma n'eut neu in babaf. 17 Anneen anlail aan mone nane in haan 'etus ate, na' Paulus anboin naan solalu 'nakaf es ma nak, “Ii, au anah. Ho meki ye mnao he labah meu ho a'nakat, fun in he n'eut naan uab es.”
18 On nane te solalus nane neik aan mone nane neu in solalu 'nakaf. In an'eut ma nak, “Aam! Na' Paulus le' hit ttaahn ee nane, in nleun kau he 'eik aan mone ii neem neu ko. In he n'eut naan ko lais ma'tan-taen es.”
19 Nalalit solalu 'nakaf nane anheel neik li'ana nane neu bael luumn es, he sin nua sin anmesen. On nane te in nataan ee ma nak, “Ho he m'eut kau uab saa'?”
20 Nalalit li'aan mone nane an'eutn ee ma nak, “Anmui' naan atoin Yahudis fauk anma'akool eun he sin nlool niis au baba', na' Paulus. Sin he neman ntoit ko, pah, he noka' te, ho meik au baba' mnao meu bael feek lais palsait. Nak, sin asa'faun eun he npalekas au baba' in lasi ye namnuut. 21 Mes ho kaisa' mutuin sin loimk eun nane, pah. Natuin of anmui' naan tuaf bo' haa', sin of anpao ki nbi lanan he nlool niis au baba', na' Paulus. Natuin sin nsuup nalalin nak, sin ka nahan ma ninun fa, kaul sin fe' ka nlool naan fa au baba' Paulus. Tabu ii, sin nabaalb eun nalalin. Aal sin npao ko, he ho mtuta' mak saa', pah.”
22 Anneen nalail aan mone nane in uaban te, solalu 'nakaf nane nak ee ma nak, “Ho kais am'eut meu tuaf es mak ho oum am'eut kau lasi ii.” In na'uab nalail on nane te, in nleun aan mone nane he nfain.
Sin neik na' Paulus neu gubernur Feliks et koot Kaisarea
23 Nalalit solalu 'nakaf anesit nane, anboin in solaul a'nakat tuaf nua'. In naplenat sin ma nak, “Miloitan maan solalus, tuaf natun nua'; ma solalus le' ansae bikase, tuaf bo' hiut; ma solalus amneik auni, tuaf natun nua'. Hi mnao nai mabe' ii, oin leuk sio, amnao meu koot Kaisarea. 24 Hi miloitan bikase es neu na' Paulus. Hi mnao mimaat ee nok lek-leko ntia gubernur Feliks.”
25 Nalalit in ntui sulat neu gubernur Feliks nak, on ii:
26 “Ama' gubernur Feliks le' au 'tola' 'ani ye. Tabe, ahoit. Ao-mina' ao-leko na'ko kau, Klaudius Lisias.
27 Atoni' le' au 'soun ee neem neu ko ii, kanan na' Paulus. Atoin Yahudis sin anheek ye, ala kle'o te, sin he nlool nisan. Neno nane, au solauls eun es anheel napoitn ee na'ko atoin Yahudis sin i'niimk enu. Nalalit au uhiin amsa' nak in nmui' hak too Romas. 28 Au 'aim he uhiin, nasaa' am es atoin Yahudis sin he nlolo ee. Etun es au 'eki ye nnao neu atoin Yahudis sin bale feek lais palsait. 29 Mes sin ka napein fa in nsaan saa'-saa'. Namneo', in ka nmoe' fa maufinut saa'-saa'. On nane te atoni' ii, in ka nabei' fa he ntaam o'of, ma ka nabei' fa he thukun ta'maet ye. Te kahaf, afeek lasin le' anbin bale feek lais palsait nane, sin anmatoen, natuin sin noin' eun anmatoom nok lais palsait eun nasulin. On nane te au 'eik atoni' ii anbi benteng. 30 Nookf ate, au upein hanaf nak, atoin Yahudis anma'akool eun nlalin he sin nlolo we. On nane te au es le' uplenat he sin neki ye neem neu ko, ahoit. Au 'eut amsa' neu atoin Yahudis sin le' anlasin nok atoni' ii, he sin neman nbaiseun ko. Maut he ho es le' amneen kuum na'ko sin, saa' le' sin nasaan ee neu ne.
Au sulat le' ii, on le' nane, ahoit. Na'ko au Klaudius Lisias kau, ahoit.”
31 Nalalit solauls eun le' nane naloitn eun nlalin, he nanaoba' plenat na'ko sin solalu 'nakaf. Mabe' le' nane, sin nok nain na' Paulus annaon tal antia koot es, kanan Antipatris. 32 Nookf ate, solaul asae bikaes eun aa, sin nnaon nanaat na' Paulus anfiin tal antia koot Kaisarea. Mes solalus bian sin, antebin nfanin neu Yerusalem. 33 Tabu sin antian Kaisarea te, sin nnona' sulat nane neu gubernur. Ma sin nana'at na' Paulus neu ne msa'. 34 Ansoi' nalail sulat nane te, gubernur ee nataan na' Paulus ma nak, “Ho atoni' mu'ko mee?”
Nalalit na' Paulus nataah ma nak, “Aam, au le' ii, atoni' u'ko propinsi Kilikia.”
35 Anneen na' Paulus nak on nane te, gubernur ee nahiin nain nak na' Paulus anmui' hak too Romas. Oka te in na'uab am nak, “Au es le' anaa' aplenat a'bi ii. On nane te au es le' he ufeek ho lasi. Mes hit tpao tuaf eun le' sin ankalaak ko ntia ii fe', hena' au 'palekas ho lasi.” Nalalit in nleun in solauls eun he ntahan na' Paulus anbi sin bale es anbi sonaf gubernur, le' nahunut usif Herodes anmoe' nani ye.