Na' Kornelis anhoen na' Petrus
10
Tabu nane, anmui' solalu 'nakaf tuaf es na'ko pah Roma, in kanan na' Kornelis. In na'naak solalus tuaf nautn es. Sin neman na'kon pah Itali, bale 'loo. In natua nbi koot Kaisarea. 2 In ma in ume nanan amsa' anneek niis Uisneno. Mes atoni mfaun pah Roma sin bian, ka on fa nane. Hae'-hae' in ntulun ama'mui't eun, ma in an'onen piut-piut neu Uisneno. 3 Neno wes, oin nleuk tenu maans ee npeos in niit nok maat meu' anbi mnitas, Uisneno In ameput es na'ko sonaf neno tunan, neem ma nhaman ma nak, “Kornelis!”
4 Na' Kornelis niit ameput nane, on nane in namtau nmaet. Nalalit in nataan am nak, “On mee, pah?”
Ameput nane nataah ma nak, “Uisneno anneen nalail ho onen toits eun, ma In namnau ho nekam alekot meu ale' tuaf bian sin. On nane Uisneno niit ko. 5 On nane tabu ii, amleun tuaf he nnao neu koot Yope, he nhoen neik naan atoni yes, in kanan na' Simon Petrus. 6 In natua et ume yes anbi tasi ninen, nok atoni yes le' in mepu naknino' pasu. In kanan na' Simon amsa'.”
7 Tabu ameput sonaf neno tunan annao nasaitn ee, na' Kornelis anboin in aan ameput tuaf nua', ma nok in solauls es, le' anneek Uisneno msa'. 8 Tabu na' Kornelis an'eut nalail ale' lasi nane te, in anleun haef eun he nnaon neun koot Yope.
Na' Petrus neem na'euk nok na' Kornelis
9 Nookf aa on nane te, oin maans ee na'fufu', na' Kornelis in haef eun anhaumak-maak koot Yope. Tabu nane, na' Petrus ansae ma n'onen anbi na' Simon in ume pupun atfeis.
10 Na' Petrus an'onen, mes in natniin ate in namnaah. In anpao asoent eun nabaalb eun bukaet. Ma tabu in an'onen on nane te, Uisneno nakliil aa mnitas. 11 Nak, on le' in niit neno antalfei', ma muti' mainuan es anbool neem. Muti' nane mafutu' ma makfili' anbi in suusn eun haa sin. Muti' nane ansaun neem. 12 Anbi muti' nane in nanan, in niit mu'it huma'-huma', es le': mui' hae haa', anonok, ma kolo huma'-huma'.
13 Ma in nneen haanf es anlenu ma nak, “Pe'u! Amfeen nai! Amlool mui't eun le' ii. Nalalit mubalab sin ma mbukae!”
14 Mes na' Petrus nataah ma nak, “Ka nabei' fa, pah! Kais on le' nane! Natuin au ka 'euk 'iit fa mu'it huma'-huma' nane sin siisk eun! Hai atoni Yahudis mikaena' mui't eun le' nane sin siisk eun!”
15 Mes hanaf nane nataah ma nak, “Kaul Uisneno nak saa' es aknino' te, ho kaisa' mak nalaih!” 16 Muti' le' nane, anpoi hae teun, ma na'aiti on anfain neu neno tnanan.
17 Nalalit na' Petrus natenab neu-mneem anmatoom nok amnitas nane in otan saa'. Nok tabu nane, na' Kornelis in haef eun neem antian na' Simon in ume. Sin anhake nlalin anbin eno'. 18 On nane sin nboin uim tuaf nane ma nataan am nak, “Hoi, pah! Hai eim maim tuaf es, le' natua ntahan et ume le' ii. In kanan, na' Simon Petrus. Hi mihiin ee, kah?”
19 Tabu nane, na' Petrus fe' natenab mnitas nane in otan, mes Uisneno In Ismana Knino' n'eut ma nak, “Hae, Pe'u. Anmui' atonia neem naim ko et a'pinan aa. 20 Amsaun he mnao mutuina' sin nai. Kaisa' mubait ho nekam. Meski sin le' nane ka atoin Yahudis fa, mes kais amma'nisin sin, ai' maan sin anlalin atoin alahit, mutuin halat atoni Yahudis. Natuin Au es le' a'leun sin he neem naan ko.” 21 Nalalit na' Petrus ansaun ma na'euk nok atoin eun nane, ma nak sin im nak, “Au le' ii, es le' hi mami ye. Hi mpaluu saa'?”
22 Nalalit sin nataah am nak, “A'naak solalus pah Roma tuaf es, in es le' anleun kai he eim meu ii. In na'naak solalus natun mese'. In neekn aa nateeb ma namnau Uisneno. Atoni Yahudis amfaun nahiin atoni' ii in alekot. Afi neon ii, Uisneno In ameput sonaf neno tunan neem ma nleun hai a'nakat, he ntoit ko aam, he oum meu in ume, natuin in he nneen ko, pah.”
23 Anneen anlail on nane te, na' Petrus antoit sin he ntupan fai yes anbi ume nane. Nookf aa on nane te, sin nfenan, ma na' Petrus annao nabua nok sin. Anmui' tuaf fauk na'ko Usif Yesus Inin le' abiit eun Yope, annaon nabuan nok sin.
24 Mabe' nane, sin ntupan anbi lanan tnanan'. Nookf aa on nane te, na' sin antian koot Kaisarea. Tabu sin antian na' Kornelis in ume, in npao nain sin. In nabuab in noont eun ma in aon-bian no 'tem-teme' anbin nane. 25 Tabu na' Petrus he ntaam neu ume nane te, na' Kornelis naen ansenu nbi mone', ma in nli'tuu anbi na' Petrus in haen, ma na'luli' he na'bees neu na' Petrus. 26 Mes na' Petrus anfiit nahakeb ama Kornelis ma na'uab am nak, “Bae'! Amfeen amhaek nai! Kais mu'bees meu kau! Fun au le' ii, mansian on le' ho msa'.”
27 Anneen on nane te, na' Kornelis anfeen anhaek. Oka te naa' Kornelis ma na' Petrus na'uab eun, ma sin annaon ntaman neu ume nanan. Na' Petrus niit too mfaun nabuan anbi nane, sin npao nani ye. 28 In nkius natefan sin, nalalit in na'uab am nak, “Sin au bae' ma benu' aal ki! Hi mihiin main hai atoin Yahudis hai halat. Kaul tatuin halat nane, ka nabei' fa he hai mseol mok atoni pah a'teta'. Saa' antein he mtaam meu sin ume. Mes Uisneno neikn On naklila' neu kau ma nak, kaul In es le' na'uab am nak, saa' es aknino', ka nabei' fa he au 'ak saa' nane nalaih. Es nane tabu le' ii, au ka 'ma'nisin fa tuaf bian antein. Au he 'aan sin anlalin au nonot anbin au ume nanan. 29 Es nane te, tabu hi eim maan kau te, au 'feen ma a'nao 'oum 'ain. Au ka u'nia' ok fa, natuin Uisneno n'eut nalail kau. On nane hi m'eut kau fe'! Hi mboin kau neu saa'?”
30 Nalalit na' Kornelis anpio' ale' lasi nak, “Neno haa afinit, oni' leuk tenu maans ee npeos, au 'onen a'bi au ume le' ii. Nok askeken te, atoni yes anhake nbi au matak. In blua' pake namaas. 31 Ma in nboin kau ma nak, ‘Kornelis! Uisneno anneen ho onen toits eun, ma In namnau ho nekam alekot neu too mfaun eun. 32 On nane te tabu ii, amleun tuaf he nnao neun koot Yope he nhoen neik naan tuaf es, kanan na' Simon Petrus. In natua ntahan et ume yes anbi tasi ninen, et atoni yes le' biasa naknino' pasu. In kanan na' Simon amsa'.’ 33 Es nane te, au 'leun tuaf he naen neit ma nhoen neik ko oum meu ii, pah. Hai mtoit makasi ma sukuul a'na-'naek, natuin ho mkoen om oum main, pah. On nane tabu ii, hai mibua he mitniin saa'-saa' le' Uisneno nleun ko he m'eut sin meu kai, pah!”
Na' Petrus an'eut Usif Yesus In Laan A'honis neu tuaf le' ka atoni Yahudis fa
34 Nalalit na' Petrus na'uab am nak, “Tabu ii, au fe' uhiin 'ak, Uisneno nane lo nkius mansian aa ok-oke' namnees. In ka npiil fa humaf, nak le' ii atoin Yahudis, ma bian sin ka atoin Yahudis fa'.b 35 Kaul anmui' tuaf na'ko uuf mee-mee le' in neekn aa mneo', ma n'onen piut neu Uisneno, ma natuina' In i'lomin, tuaf nane anhalineb In nekan. 36 Hi mihiin saa' le' Uisneno n'eut nalali neu kai too Isra'el, ma nak In nsonu' nalali Kristus, es le' Na' Yesus. Ma Na' Yesus nane anmaet he nhalan mansian aa nok Uisneno. Ma In anlail A'nakat neu mansian aa ok-oke'.
37 Hi mneen milali msa', saa'-saa' le' anlalin anbi propinsi Yudea anfuun am nateef. Nu'un nane anmulai na'ko na' Yohanis an'eut neu too mfaun eun ma nak, sin lo he nasaitan sin saant eun. Ma sin lo mees he naslanin amsa', he nfani 'taka' nak, sin naleko nfanin nok Uisneno. 38 Nalalit Uisneno nfee In Ismana Knino' neu Na' Yesus, atoni Nasaret nane. Uisneno nfee In kuasat neu Na' Yesus amsa'. Nalalit Na' Yesus anpoi kuan ma ntaam kuan am bale, he nmoe' lais leko neu too mfaun eun. In ntulun ma nbaab tuaf le' niut amle'ut eun sin a'nakat nasusab sin. In nmoe' on le' nane, natuin Uisneno nok Na piut. 39 Hai le' ii miit meik hai maatm eun kiim saa' le' In nmoe' sin anbi koot Yerusalem, ma anbi pah atoni Yahudis sin anbin mee-mee.
Meski on nane msa', mes sin nkuus nakfili' anbi hau nehe tal anmaet. 40 In anmaet namneo-namneo, mes anmeu te, Uisneno namonib nafani' In. Nalalit In naklila' In ta'un, he nlail bukti nak In anmoni nfain. 41 Mes In ka nakliil On fa neu mansian aa oke', ala neu kai mmees. Tabu In nmoni nfain le' nane, hai biasa mbukae mokan. On nane te Uisneno anleun kai he mlail saksii ma mnao m'eut Usif Yesus In Lais Leko nane meu tuaf amfaun anbi mee-mee.
42 On nane te Uisneno es le' anleun kai he mnao m'eut maat-maat, anmatoom nok Atoni le' In anluul nani Ye na'ko afi unu', es le' Na' Yesus. Ma Uisneno nait Na' Yesus amsa' anlail Afeek Lasi, he nafeek nak sekau es le' anmoin piut nok Uisneno, ma sekau es le' kahaf. Na' Yesus nane, es le' nafeek lasi neu amates ma neu amoint eun. 43 Na'ko afi unu', Uisneno In mafefa knino' sin anlulun amsa' neu Na' Yesus nane nak, sekaum-sekau le' anpalsai Ye, Uisneno of ansimo sin ma annoes nani sin sanat ma sin penu sin.”
Tuaf le' ka atoni Yahudis fa, sin nsium Uisneno In Ismana Knino'
44 Tabu na' Petrus fe' na'uab on nane te, nok askeken Uisneno In Ismana Knino' neem antaam anbi bifee ma atoni' sin ok-oke' le' anneen ee. 45 Anbi nane msa', anmui' na' Petrus in nonot sin atoin Yahudis, le' neem nokan na'kon koot Yope neu na' Kornelis in ume anbi koot Kaisarea. Tabu sin niit too mfaun eun ansium Uisneno In Ismana Knino' le' nane, sin nsanmakan, natuin sin fe' nitan, nak Uisneno nfee In Ismana Knino' neu atoni' le' ka atoin Yahudis fa'. 46 Sin nnenan bifee ma atoni le' anbin na' Kornelis in ume, na'uab eun neik uab huma'-huma', ma sin npules ma nbo'is Uisneno.
Nalalit na' Petrus na'uab am nak, 47 “Hi mnuu' kiim! Sin le' ii, ansimo Uisneno In Smanan on le' hit imsa'. On nane te tabu ii, eim he taslain sin nai. Ka tiit fa es, le' he nabei' anpenan antein sin.” 48 Nalalit na' Petrus anleun sin he naslain na' Kornelis nok ale' bifee ma atoni' anbi nane, he sin ntaman too slani' neu Usif Yesus. Nalalit sin ntotin, he na' Petrus natua nabalah nok sin neno fauk antein, na' sin nafetin na' Petrus he nfain-koit neu Yerusalem.