8
1a Na' Saulus nok anbi bale nane msa', ma in nlomi msa' he sin nlool niis na' Stefanus'.
Na' Saulus anha'mui' Usif Yesus In inin
1b-2 Tabu na' Stefanus anmaet, tuaf fauk-fauk le' anneek Uisneno, sin nnaon nait in ta'un, ma neki he nsuub. Sin nkaen nme'-meu'l eun.
Na'ko neno nane, atoni' anmulai nha'mu'i Usif Yesus In inin anbi koot Yerusalem, tal antia sin nsusan nmaten ma nha'mu'i yok. Oka te sin naen anbaits ok neu propinsi Yudea ma propinsi Samaria. Sin aal sin naenan, mes Usif Yesus In haef eun sin es le' nabalan anbin Yerusalem.
3 Na' Saulus naim lanan piut he naleu' pukan apalsait neu Usif Yesus. In naim sin anbin mee-mee. In npoi-ntaam ume he naim sin. In nheek ale' bifee ma atoni, ma nataam sin anbin uim o'of.a
Na' Felipus an'eut Usif Yesus In Lais Leko neu abiit eun propinsi Samaria
4 Meski sin nasusab nonot apalsait neu Usif Yesus tal antia sin naenan nsiksaan ok, mes sin ka nasnasan fa he nsaksii Usif Yesus In Lais Leko neu sekaum-sekau anbi bale mee-mee. 5 On le' tabu nane, na' Felipus annao anbi koot mese' et propinsi Samaria, ma n'eut neu sin ma nak, Na' Yesus nane, es le' Kristus, le' Uisneno anluul ma anleek nani Ye na'ko unu'. 6 Tabu too mfaun eun niit lasi mkakat le' in nmoe' sin, sin nabuan ma natniin nalek-leko' in uaban.
7 Ta'leta' on le': anmui' ale' aniut-saes sin anbin nane amsa'. Ma niut amle'ut sin anpoi nasaitan sin nok haan hunun a'naek. Ale' ameen 'ole ma ameen hae hela' sin, naleok nanin tabu le' nane. 8 Es nane te, abiit eun koot nane anmalinan nmaten.
9 Anbi koot nane, anmui' atoin ahiint es, kanan na' Simon. Nahunut, in npaek in leu' laut eun neu abiit eun Samaria. In na'naeb in ta'un, ma na'uab ma nak, “Sekau on le' au!”
10-11 On nane munif ai' mnasi, bifee ai' atoni' anbi koot nane anteek in kanan piut ma nak, “Ailoo! Atoni' ii, ma'taen le'uf! Saa'-saa' le' in nmoe' sin, neman na'ko Uisneno In kuasat!” Natuin ale' in le'un le' nane, es nane te, sin npake na'ko unu'.
12 Mes tabu le' ii, sin nneen na' Felipus nanoina' sin anmatoom nok Uisneno In iplenat. In n'eut neu sin lanan he nabei' sin antaam anlalin Uisneno In inin, anpaek Usif Yesus In kanan. Tabu sin anneen nalalin, too mfaun eun anpalsain, ma sin antaman anlalin Uisneno In nonot. Bifee ma atoni ntaman on nane. Nalalit naslain sin. 13 Na' Simon anpalsai msa' ma ntaam anfani Usif Yesus In inin. On nane sin naslani. Nalalit in nnao nok na' Felipus anbi mee-mee. Tabu in niit lasi sanmaakt eun le' na' Felipus anmoe' sin, in nki'un ma nak, “Hoi! Le' ii, lo ma'tane'!”
14 Tabu nane, Uisneno In haef eun le' abiit eun Yerusalem annenan nak, abiit eun propinsi Samaria sin anpalsain nalail neu Uisneno In Lais Leko. On nane sin nsonu' na' Petrus ma na' Yohanis he nnaon neu bale nane. 15-17 Tabu sin nua sin antian bale nane te, sin nahinen nak, apalsait eun le' nane fe' ka nsimof Uisneno In Ismana Knino'. Fun sin ala naslanin neki Usif Yesus In kanan. Nalalit na' Petrus nok na' Yohanis antao sin i'niimk eun neu sin, ma sin an'oen eun ma antotin he abiit eun Samaria napein Uisneno In Ismana Knino' msa'. Ma sin napein nain Smana Knino' nane.
18 Tabu nane, na' Simon niit atoin nua' eun nane antao sin i'niimk eun anbi apalsait eun, on nane sin napein Uisneno In Ismana Knino'. Nalalit na' Simon annona' loit neu na' Petrus ma na' Yohanis, ma in ntoti ma nak, 19 “Sin aam eun! Hi mfee kau kuasat nane msa'. Maut he tabu au 'tao au 'nimak neu sekaum-sekau te, sin napenin Uisneno In Ismana Knino' msa'.”
20 Mes na' Petrus ankabal ma nak, “Kasat neu ko, mok ho loit eun nane! Ho mak oin ho mube'i msoos Uisneno In Ismana Knino' meik loit? Kahaf! Ka tiit fa es he nabe'i he nsoos naan Smana Knino'! 21 Ho ka mmui' fa hak saa'-saa' meu Uisneno In Ismana Knino', natuin ho nekam nanan nameis'ook. Ho ala mami yaa akal. 22 Musnaas nai mu'ko ho sanat ma ho penu sin! Leko nneis, ho m'onen ma mtoit meu Uisneno, he kaul leko te, In nnoes nain ho tenab amle'ut nane. 23 Au uhiin 'ak, ho neekm aa naheun nok maufinu ma sinmakat, ma nmui' lais amle'ut amfaun le' fe' anfuut ko!”
24 Nalalit na' Simon antoit sin nua sin ma nak, “Sin ama' aal ki! Kaul on nane te, hi m'onen maan kau fe', he kasat le' hi mteek ee nane, kais antoman kau.”
25 Nalalit na' Petrus ma na' Yohanis an'eut Usif Yesus In Lais Leko ok-oke', ma sin an'etun amsa' Uisneno In A'an ma In Iplenat neu abiit eun koot nane. Nalalit sin nua sin anfain kotin neu Yerusalem. Tabu sin nnaon lanan, sin nleuk nokan kuan-kuan anbi propinsi Samaria, he n'eut Usif Yesus In Lais Leko neu abiit eun nane.
Na' Felipus na'euk nok kase 'naek es na'ko Afrika
26 Nalalit Uisneno in ameput na'ko sonaf neno tunan anleun na' Felipus ma nak, “Bae'! Ho mnao nai mutuin lanan le' an'ain kaliin a'ne'u. Mutuin laan amnaa' na'ko koot Yerusalem ma mnao mfiin meu kuan Gasa.” 27-28 Tabu in nneen on nane te, na' Felipus anpoi ma nnao nain. Tabu in nbi lanan nane, in niit atoni yes. Atoni le' nane, kase 'naek es na'ko pah Etiopia.b In es le' anpao ma n'ulus 'maus eun na'ko uis bifee pah Etiopia. Uis bifee le' nane, sin anteek ate nak, Kandake. Kase 'naek le' nane, fe' nok an'onen anbi koot Yerusalem, ma tabu nane in nsae kleet he nfain-koit neu sin pah. Tabu na' Felipus niit ee, kase nane antook ma nsoi' anbi kleet ee in nanan. In nsoi' anbi sulat na'ko nai' Yesaya, Uisneno In mafefa knino'. 29 Uisneno In Ismana Knino' anleun na' Felipus he nnao nhaumak-maak kleet nane, he na'euk nok kase 'naek nane. 30 Ma tabu in nhaumaak ate, in nneen atoni' nane ansoi' na'ko nai' Yesaya in sulat. On nane in nataan ma nak, “Aam! Ho muhiin saa' le' ho mso'i ye le' nane, ai' kahaf?”
31 Nalalit atoni' nane nataah ma nak, “Kaah fa, pah. Lo mees he nmui' tuaf he n'eut kau fe', hena' au uhiin. Amsae oum he mtook mok kau mbi ii.” 32 Tuis le' in nso'i nane, in hanan nak on ii:
“Sin anhela nfoont ee, on le' atoni' anheel 'bib-kase,
he neki ye he nlolo.
In nfain on le' 'bib-kaes ana' le' atoni ankateil in funun,
mes in ntaa' kuun.
In ka nfei fa in fefan,
ma ka nataah fa fefa' mese' msa'.
33 Nalalit sin na'akan;
Sin nafekan lais poi ntoman.
Tabu nane, sin nlool nisan,
te kahaf, in ka nmui' fa sanat saa'-saa'.
On nane hit he tak saa' antein?”c
34 Ansoi' nalail on nane te, kase 'naek nane nataan na' Felipus ma nak, “On mee? Na' Yesaya antui neu in tau'n aa kah, ai' in ntui anmatoom nok atoni 'teta'?”
35 Nalalit na' Felipus nanoina' kase 'naek nane neik Usif Yesus In Lais Leko. In nmulai na'ko nai' Yesaya in tuis le' nane, ma in n'eut lanan neu Usif Yesus. 36 Tabu sin fe' annaon, kase 'naek nane niit oe. Ma in nsenu nfeek na' Felipus in uaban, neik haan totis ma nak, “Bae'! Ho mnuu' miit fe', anmui' oe es naa. Kaul ho mlomi te, atsaun he ho muslain kau nai.”
37 [Ma na' Felipus nataah ma nak, “Kaul ho mpalsai namneo-namneo meu Usif Yesus ate, ka nmui' fa ekat. Au u'auba' he tsaun he au uslain ko, ahoit.”
Nalalit in nmanauk ma nak, “Au 'palsai namneo-namneo 'ak, Na' Yesus le' nane, Uisneno es le' anluul ma anleek nani Ye na'ko unu'. In le' nane, Uisneno In Anah.”]d
38 On nane atoni' nane anleun he nasnasab in ikleet. Nalalit sin nsanun ma ntaman nbi oe nane in nanan. Ma na' Felipus naslani ye nbi nane.
39 Tabu sin npoin na'ko oe, Uisneno In Ismana Knino' ee neki na' Felipus annao neu bael sona'. Kase 'naek nane ka niit antein ye fa'. Kase nane annao nfiin nok neek malinat a'naek. 40 Na' Felipus anpoi nbi kuan es, in kanan Asotus.e Na'ko bale nane, in nnao piut ma n'eut neu too mfaun eun Usif Yesus In Lais Leko. In anleuk nok kuan-kuan tal antia koot Kaisarea.