Ami solok hakerek ne'e baa Na'i Maromak eman hotu-hotu mak tuir Yesus Kristus iha kota Filipi. Ami hakara nebee emi mak haliku ema sarani sia, no ema mak naliku emi moos, leno di'a-di'ak hakerek ne'e.

2 Na'i Maromak nia, itakaan Ama. No Kristus nia, itakaan Ulun. Ami hakro'an nebee Sia natudu laran di'ak baa emi, nebee emi bele moris manek no dame.

3 Masik ha'u la karee emi kleur ti'an moos, ha'u la kalu'a emi! Sura oras ha'u kanoin kola emi, ha'u ksera dodan baa Na'i Maromak tan emi fiar baa Nia. 4 Sura oras ha'u kamulak bodik emi, ha'ukaan neon di'ak basuk, 5 tan nahuu nosi oras emi simu Manfatin Di'ak to'o oras ne'e, emi serwisu bele-bele ho ha'u. 6 Lia nia na'ak, Na'i Maromak nahuu serwisu ti'an iha emikaan neon. Ha'u katene Nia moos atu nala'ok nohuun Niakaan serwisu di'ak nia to'o mohu baa oras Yesus Kristus namaan aan mai nikar.

7 Fatan nanis ha'u kadomi emi, tan ha'ukaan neon talin malu no emi hori uluk. Hori hirak nia, emi tuir serwisu ho ha'u baa oras ha'u kalore Yesus Lia Di'ak, no baa oras ha'u kataa kikar baa ema mak sakar Lia Di'ak nia. Masik ha'u ktama bui moos, emi la la'o hela ha'u. 8 Na'i Maromak du'uk natene na'ak, ha'u kanoin emi tebe-tebes, tan ha'u kadomi emi nu'u Yesus Kristus nadomi ita.

9-10 Tan baa nia, ha'u kamulak bodik emi nune'e: Kakro'an nebee emi hetak hadomi malu, to'o emikaan dadomin nia, tu'an tan tenik. Kakro'an nebee Na'i Maromak nalo emi hatene tebe-tebes lia nabee mak di'ak, nebee emi bele moris moos. Hotu, nosi ikus, baa oras Kristus nakotu lia bodik ema hotu-hotu, Nia atu nakotu na'ak emi la hoo sala. 11 Nia du'uk mak namoos emikaan neon, nebee emi bele moris loos. Hodi nunia, ema seluk moos foti-nahaas Na'i Maromak nodi tonu-naboot Nia.

12 Mamaluk sia mak ha'u kadomi! Ha'u kakara nebee emi hatene ha'ak, ema nasusar ha'u to'o natama ha'u baa bui. Masik nunia moos, Kristus Manfatin Di'ak keke lema nohuun 13 to'o sondadu makdaka tofatik no ema seluk moos natene na'ak ha'u ktama bui tan tuir Kristus.^a 14 Naree nunia, mamaluk sia iha ne'e neon biit, to'o la nata'uk ona atu dale loke fore lia Kristus iha nabee dei.

15-17 Iha ne'e noo ema oik rua mak madinas nanorin lia Kristus. Ida serwisu nodi neon loos. Ida tenik, serwisu nodi neon kale'uk. Ema mak serwisu nodi neon loos, natudu laran di'ak baa ha'u. Sia natene na'ak, ha'u katiu susar ne'e tan kala'o ha'ukaan serwisu kodi la kakiduk.

Mais ema mak serwisu nodi neon kale'uk, laran moras tan buka naran. Sia keen karin ema makfiar sia, surak noo ema mak nakara tuir sia. Sia buka dalan nebee bele foti aan na'ak, sia maka'as liu ha'u. Sia moos naneo na'ak, kalo noo ema tuir sia, lia nia atu hetak natodan ha'ukaan susar iha bui laran ne'e.

18 Mais so'in baa dei! Ha'u la ktitu ema nanorin nodi neon loos ka, lale ka, lia nia la folin. Lia mak noo folin, mak sia nanorin lia Kristus. Lia nia mak nalo ha'u neon di'ak.

Ha'u moos neon di'ak tebe-tebes, 19 tan katene emi hamulak bodik ha'u. Yesus Kristus Kmalar Lulik moos tulun ha'u. Tan lia nia, katene rohan di'ak dei! 20 Masik ha'u kmoris ka, mate ka, la saa ida. Surak Na'i Maromak nodi ha'u atu kfoti-kahaas Kristus, kodi la kmoe kanorin Niakaan lia. Lia ne'e mak ha'u kaloon hori uluk aan to'o oras ne'e.

21-23 Ha'u kanoin nune'e: kalo ha'u ksei moris, ne'e na'ak, ha'u kbele moris talin malu ko Kristus kodi kala'ok bei-beik Niakaan serwisu. Lia nia di'ak. Mais kalo ha'u kmate, ha'u ksotir liu tenik. Tan ha'u kbele la'o kela raiklaran ne'e no moris kikar atu kein kamutuk ko Kristus iha lale'an. Tan lia rua ne'e, ha'u kbenar. La katene nabee mak di'ak kaliuk! 24 Mais tan emi sei hakara ha'u ktulun emi, di'ak liu ha'u kein tenik iha raiklaran ne'e. 25 Tebes. Ha'u koran ha'ukaan otas sei naruk. Ha'u kbele kein kamutuk ko emi, tan Na'i Maromak nakara nebee ha'u kakbiit emikaan neon, to'o emi hetak fiar baa Nia hodi neon di'ak. 26 Emi bele foti-hahaas Yesus Kristus naran, tan Nia loke dalan nebee ha'u kbele mai karee kikar emi.

27-28 Masik nunabee moos, emikaan moris musti loos, tan emi ne'e, Na'i Maromak eman. Emi musti moris fatan hodi halo tuir Kristus Manfatin Di'ak. Kalo ha'u kfila mai karee emi, ha'u kakara katene emi moris fatan nafati nunia. Masik ha'u krona loos lia nia kosi ema moos, bele. Ha'u kakara katene emi moris neon ida, tan emi talin malu ho Kmalar ida. Ha'u moos kakara katene emi hariik metin hodi hala'ok bele-bele Kristus Manfatin Di'ak, to'o ema seluk moos fiar tuir. Masik ema sakar emi, emi la hata'uk. Lia nia dadi tadak baa funu sia na'ak, Na'i Maromak atu soe sia. Mais Nia atu sori emi nebee moris nima-nimak ho Nia. 29 Nia loke dalan ti'an nebee emi bele fiar baa Kristus, no dadi Niakaan ema. Nia foo leet baa emi, lahoos atu fiar baa Nia dei, mais emi moos hetan susar tan tuir Nia. 30 Ha'u krona ema sakar emi tan hala'o Kristus Manfatin Di'ak. Hanoin! Hori hirak nia, sia moos sakar ha'u nunia. Oras ne'e moos, sia sei sakar nunia bei-beik.^b