Timotius namalu no Paulus no Silas
16
Nunia hotu, Paulus no Silas la'o baa kota Derbe. To'o ti'an, sia liu tenik baa kota Listra. Iha Listra sia nasoru mane nurak ida, naran Timotius. Timotius aman, ema Yunani. Mais inan, feto Yahudi mak fiar baa Yesus ti'an. Timotius moos tuir Yesus ti'an. 2 Ema sarani hotu-hotu iha kota Listra no kota Ikonium natene Timotius nia, ema di'ak. 3 Nasoru Timotius ti'an, Paulus nakara Timotius namalu nia no Silas. Mais ema Yahudi iha nia natene na'ak Timotius aman, ema Yunani. Ema Yunani la namane aan nu'u ema Yahudi. Tan baa nia, Paulus nahulin nebee Timotius moos namane aan.a 4 Nunia hotu, sia la'o nosi fatin ida baa fatin ida atu nalore lia kakotun mak Kristus klosan sia no fukun sarani seluk sia nakotu iha Yerusalem. 5 Hodi nunia, sia hetak nakbiit Yesus eman sia neon. Sura loron, ema makfiar sia hetak tu'an.
Na'i Maromak bolu Paulus baa Makedonia
6 Hotu Paulus sia la'o nasirin rai Frigia no rai Galatia, tan Kmalar Lulik nakahik sia nebee keta baa nalore Maromak Manfatin iha rai Asia. 7 To'o rai ida kladik no rai Misia, sia nakara tama baa rai Bitinia. Mais Yesus Kmalar Lulik nakahik sia.b 8 Tan baa nia, sia la'o liu rai Misia, to'o kota Troas.
9 Kalan nia, nu'u Paulus me'i. Nia titu-naree ema ida nariik iha tasi balu iha rai Makedonia tasi tehen. Ema nia nahii nusu tulun na'ak, “Ama! Mai tulun ami iha Makedonia ne'e lai!” 10 Titu-naree nunia, amic hakotu atu baa Makedonia. Ami hanoin Na'i Maromak naruka nunia, nebee ami baa katak Lia Di'ak baa ema iha tasi balu baa. Tan lia nia, Nia nakahik ami nebee keta baa fatin seluk.
Feto ida naran Lidia fiar baa Yesus iha kota Filipi
11 Nunia hotu, ami sa'e roo tasi iha kota Troas, baa rai ki'ik ida naran Samotrake. Baa awan, ami liu to'o kota ida naran Neapolis. Ami moos tuun iha nia. 12 Hotu ami la'o rai baa kota ida naran Filipi. (Kota Filipi ne'e, kota boot basuk iha rai Makedonia. Ukunrai Roma kaer ukun iha nia.) To'o Filipi ti'an, ami hein loron hira sia iha nia.
13 Natoon baa ema Yahudi siakaan loron boot, ami baa buka siakaan hamulak fatin iha kota nia. Ami sura, hamulak fatin nia iha mota di'in. Ami la'o soruk oda hosi kota, to'o mota ida. Iha nia ami hasoru feto na'in hira.d Ami moos tuur dale ho sia. 14 Nosi feto nia sia, ida naran Lidia. Nia nosi kota Tiatira mak dook iha rai Asia. Nia makfa'an tais baa ema boot sia. Tais nia sia, ilas mean asuaten mak folin todan. Nia moos madinas namulak baa Na'i Maromak. Tan nunia, oras feto nia rona Paulus dale, nia simu kedas.
15 Hotu ami sarani feto nia no niakaan ema uma laran hotu. Sarani ti'an, nia tene ami na'ak, “Ama sia. Kalo ama sia hanoin ha'u ne'e fiar tebe-tebes Na'i Yesus, mai hein iha ha'ukaan uma.” Nia namaus bei-beik, to'o ami moos tuir.
Ema natama Paulus no Silas baa bui iha kota Filipi
16 Loron ida, oras ami la'o baa hamulak fatin, ami hasoru hola feto nurak ida iha dalan. Nia ne'e, ema atan. Diabu kaer nia, to'o nia bele natene ema niakaan sotir. Nia moos natene lia huun-dikin. Tan nunia, ema wa'in selu osan, nebee nia leno siakaan sotir. Niakaan ulun sia soi ti'an, tan sia mak netan osan nia. 17 Loron nia, oras ami la'o, feto nia tuir ami bei-beik. Nia nahii na'ak, “Ema ne'e sia, klosan nosi Maromak Mak Beran Kaliuk. Sia mai natudu dalan nebee ema bele netan moris no sai nosi sala!”
18 Sura oras ami la'o, feto nia nahii bei-beik nunia. Kleu-leur Paulus moos lekan rona feto nia nahii. Nia se'i oin mana baa feto nia, nodi naruka na'ak, “Hoi, diabu aat! Kodi Yesus Kristus beran, ha'u karuka o sai mosi feto ne'e, oras ne'e ona!” Dale hotu nunia, diabu sai kedas.
19 Oras niakaan ulun sia natene ata nia beran lakon ti'an, sia krakat tan la netan osan ona. Hotu sia kohi Paulus no Silas, dada nodi baa fatin hakotu lia iha ema lear oin. 20 Hotu sia nahii maka'as na'ak, “Hoi! Ema ne'e sia mai nahaat itakaan kota! Sia ema Yahudi maktabar mak mai tokar lauk ita. 21 Siakaan hanorin la kona malu no ukunrai Roma hanorin. Ami ema Roma la bele simu sia.”
22 Rona nola nunia, ema wa'in moos krakat. Sia ta'e Paulus no Silas. Ulun ida naruka ema baa loke siakaan tais, hotu no'at nalik sia. 23 No'at notu, sia natama Paulus no Silas baa bui. Hotu sia naruka bui ulun, nebee daka di'a-di'ak ema rua nia, keta to'o sia nalai sai. 24 Rona nola nunia, bui ulun natama sia baa ke'an ida iha bui laran. Nia moos nabit siakaan ain nodi ai dadur.
25 Kalan boot, Paulus no Silas namulak no nananu tonu-naboot Na'i Maromak. Ema bui seluk sia moos rona sia nananu nunia. 26 Teki-tekis rai kakekuk, to'o uma bui kakoen. Bui odamatan moos nakloke maluak. Ema bui siakaan besi talik moos nakbudi sai.
27 Baa oras nia, bui ulun sarebak nadeer. Naree bui odamatan sia nakloke maluak, nia naneo na'ak, arumak ema bui sia hotu-hotu nalai lakon ti'an. Hotu nia losu surik atu no'o aan. 28 Mais Paulus nahii maka'as na'ak, “Hei, Ama! Keta mo'o aan! Ami hotu-hotu sei iha ne'e.”
29 Rona lia maliak nia, bui ulun naruka ema nodi klonus. Nia nalai tama baa bui nodi isin nata'uk. Hotu nia nakni'a iha Paulus no Silas ain.
30 Hotu nia nala'o sai sia nosi bui nodi nusu na'ak, “Ama sia! Ha'u ne'e, susar tebes! Ha'u kmusti kalo saa, atu sai kosi susar ne'e?”
31 Paulus nataa na'ak, “Lia nune'e: O musti fiar Na'i Yesus, nebee Nia sori o mo okaan ema uma laran sia.” 32 Hotu Paulus no Silas nalore lia nosi Na'i Yesus baa nia no niakaan ema uma laran hotu. 33 Baa oras nia moos, bui ulun no sia baa namoos siakaan kanek nosi ema no'at hori sehik nia. Hotu sia sarani bui ulun nia no niakaan ema uma laran hotu. 34 Nunia ti'an, bui ulun nodi sia baa niakaan uma atu foo haan baa sia. Nia no niakaan ema uma laran tomak neon boot lo-loos, tan sia fiar baa Na'i Maromak ti'an.
35 Seisawan oan, ema boot makotu lia sia solok ema baa katak bui ulun nia, nebee nabusik sai Paulus no Silas.
36 Rona nola nunia, bui ulun katak baa Paulus no Silas na'ak, “Ama sia! Ema boot sia nakotu ti'an atu nabusik emi. Ama sia bele baa hodi neon di'ak ona.”
37 Mais Paulus la simu. Nia katak fila baa ema mahodi lia na'ak, “La bele nunia! Ami ne'e, ema Roma! Ema boot sia musti tetu amikaan lia ne'e, tuir rai Roma ukun. Hori sehik sia naruka no'at ami iha ema lear oin. La noo lia krarain moos, sia natama ami baa bui. Oras ne'e sia nakara nasai no-nook ami nunia dei. La bele nunia! Haruka ema boot nia sia mai nasai ami du'uk, foin ami simu.”
38 Hotu, ema mahodi lia nia baa nasara Paulus dalen. Rona nunia, ema boot sia foin natene Paulus no Silas moos ema Roma. Sia nata'uk tebes. 39 Hotu sia mai nasoru Paulus no Silas iha bui. Sia nusu pardua, hotu nasai sia nosi bui nodi nusu nebee sia rua la'o nela kota nia. 40 Sai nosi bui ti'an, Paulus no Silas baa Lidia uman. Iha nia sia libur malu no mamaluk makfiar sia. Sia nakbiit tenik mamaluk sia neon, hotu sia la'o nela kota nia.