Paulus nakerek
bodik ema makfiar sia iha kota
Kolose
Paulus nahuu nakerek
1
Tabe nosi ha'u, Paulus. Na'i Maromak du'uk mak boi ha'u dadi baa Yesus Kristus klosan. Itakaan maluk Timotius iha ne'e moos solok tabe.2 Ha'u kakerek bodik emi mak Na'i Maromak eman sia iha kota Kolose. Emi ne'e, amikaan mamaluk mak fiar metin baa Yesus Kristus ti'an.
Ami hakro'an nebee Ama Maromak natudu laran di'ak baa emi, nebee bele moris manek no dame.
Paulus namulak bodik ema makfiar sia iha Kolose
3 Sura oras ami hamulak bodik emi, ami sera dodan baa Na'i Maromak, itakaan Na'in Yesus Kristus Aman, 4 tan ami rona lia wa'in ti'an nosi emikaan fiar baa Yesus Kristus, no emikaan dadomin baa ema makfiar sia hotu-hotu. 5 Emi halo nunia, tan emi hatene ti'an Na'i Maromak rai nein lia di'ak sia bodik emi iha lale'an. Emi hatene lia nia, tan emi rona hosi Maromak Manfatin Di'ak. Manfatin nia, tebes no loos. 6 Manfatin nia keke lema ti'an iha raiklaran ne'e, to'o netan folin boot. Manfatin nia bele filas ema neon, dadi di'ak. Emikaan neon nahuu nakfilas di'ak nunia, baa oras emi foin rona Manfatin Di'ak no baa oras emi foin hatene Na'i Maromak laran di'ak.
7 Mau Epafras mak nanorin lia ne'e sia baa emi. Nia, amikaan maluk serwisu mak ami hadomi. Nia madinas nala'o Kristus Niakaan serwisu iha emikaan klaran.a 8 Nia mak katak baa ami iha ne'e, nosi emikaan dadomin mak Maromak Kmalar Lulik natuun baa emi ti'an.
9 Tan baa nia, ami la hanawa hamulak bodik emi. Nahuu baa oras ami foin rona hosi emi, ami hakro'an nebee emi bele hatene tebe-tebes Na'i Maromak hakaran, no emi bele hatene lia hotu-hotu mak Niakaan Kmalar Lulik beer nanorin baa emi. 10 Hodi nunia, emi bele moris fatan nu'u Na'i Maromak eman, no bele halo di'ak Niakaan neon iha lia hotu-hotu. Kalo emi hala'ok serwisu nunia, Na'i Maromak foo folin boot baa emi. Emi moos hetak hatene Nia.
11-14 Ami moos hamulak hodi hakro'an nebee Na'i Maromak natuun Niakaan beran maka'as, nebee emi bele hatiu lia hotu-hotu hodi heti neon. Nebee emikaan neon di'ak bei-beik, to'o emi sera dodan baa Ama Maromak, tan Nia loke dalan atu sori emi nosi beran aat mak moris iha kukun laran. Nia latan Oan Yesus Kristus nebee selu nola emi, no kasu mohu emikaan salan. Hotu, Nia foti Oan dadobe nia, dadi baa emikaan Na'in, nebee emi bele simu fafa'ek hosi sasoin iha lale'an. Sasoin nia, Na'i Maromak atu foo baa ema mak natene Yesus Kristus no ema mak moris iha kroman laran.b
Kristus aas liu hotu-hotu
15 Masik ita ema raiklaran la bele titu-haree Na'i Maromak,
mais ita titu-haree ti'an Kristus mak ilas ida no Na'i Maromak.
Lale'an no raiklaran la iha dauk, Kristus iha kedan ti'an.
Nia, Ulun nosi hotu-hotu mak Na'i Maromak nase'i.
16 Na'i Maromak nodi Nia
nase'i sasoin hotu-hotu iha lale'an no raiklaran.
Nase'i hotu-hotu mak ema raiklaran bele titu-naree,
no hotu-hotu mak ema raiklaran la bele titu-naree.
Makaer ukun sia ka, makaer beran sia ka,
na'i sia ka, ulun sia ka, Nia mak nase'i hotu-hotu.
Hotu-hotu mak Na'i Maromak nase'i nia,
nase'i nodi Yesus Kristus,
no nase'i bodik Yesus Kristus.
17 Hotu-hotu sei la iha dauk,
Kristus iha kedan ti'an.
Hotu-hotu mak iha,
Nia mak babilan.
18 Nia mak Ulun bodik ita ema sarani,
no ita dadi baa Niakaan isin.
Nia mak moris huun.
Nia mak uluk fohon mate no moris nikar.
Nia mak aas kaliuk.c
19 Na'i Maromak Niakaan maka'as hotu-hotu moos,
iha Yesus Kristus.
Tan lia nia, Na'i Maromak neon di'ak.
20 Na'i Maromak nodi Yesus Kristus,
nalo dame no hotu-hotu mak Nia nase'i ti'an.
Nia latan Niakaan Oan,
dadi baa sera, nodi naduar raan,
to'o mate iha ai karuus,
nebee hotu-hotu iha lale'an no raiklaran,
bele dame nikar no Na'i Maromak.d
21 Uluk, emi du'uk moris salin aan hosi Na'i Maromak. Emi funu Nia hodi emikaan neon dois no emikaan hahalok aat. 22 Masik nunia moos, oras ne'e Nia loke dalan ti'an nebee emi bele dame hikar ho Nia. Nia solok Niakaan Oan Yesus Kristus, dadi ema raiklaran. Nia moos latan Oan nia, dadi baa sera to'o mate iha ai karuus. Yesus Kristus simu mate nunia, nebee Nia bele nodi emi baa hariik iha Na'i Maromak oin, tan emi dadi ema moos ti'an, no ema neon loos mak la hoo sala. 23 Surak emi haterus aan ho emikaan fiar. Kaer metis fiar nia, nebee keta nawae. Keta hakiduk hosi Manfatin Di'ak mak emi simu ti'an nia. Ema nalore ti'an Manfatin Di'ak nia iha raiklaran tomak. Na'i Maromak moos solok ha'u, Paulus ne'e, nebee ha'u moos baa kalore Manfatin Di'ak nia.
Paulus serwisu nodi naliku Na'i Maromak eman sia
24 Baa oras Kristus moris iha raiklaran, nia netan susar wa'in. Oras ne'e ha'u moos katiu susar oi-oik. Masik nunia moos, ha'ukaan neon di'ak bei-beik, tan ha'u katiu susar nia bodik emi, hanesan Kristus natiu susar bodik ema sarani sia mak dadi baa Niakaan isin. 25 Na'i Maromak latan serwisu baa ha'u, nebee kaliku Niakaan ema sia. Nia moos naruka ha'u atu kanorin Niakaan Manfatin to'o lotu-lotuk baa emi mak lahoos ema Yahudi. 26-27 Hori uluk fohon, ema rona ti'an Maromak Manfatin, mais sia la natene malorek dauk Manfatin nia isin, tan Manfatin isin sei lia subar. Mais oras ne'e, Na'i Maromak nakotu ti'an atu loke fore Manfatin nia isin bodik Niakaan ema. Manfatin nia, folin boot kaliuk bodik ema klubun hotu-hotu iha raiklaran ne'e. Manfatin nia, mak ne'e:
Na'i Maromak nakara nebee, Kristus moris iha emikaan neon.
Lia nia mak nalo emi fiar nohuun ha'ak,
Nia atu nalo lia di'ak bodik emi iha lale'an.
Lia ne'e mak ita ema raiklaran hein hori uluk aan.
28 Tan baa nia, ami katak lia Kristus baa ema hotu-hotu. Ami moos hanorin ema hotu-hotu no foo hatene baa ema hotu-hotu tuir matenek hotu-hotu mak Na'i Maromak foo baa ami. Hodi nunia, ami bele hakbiit tu'an ema hotu-hotu mak tuir Kristus, to'o sia la moe iha Niakaan oin, tan sia moris loos nohuun. 29 Ha'u kserwisu susi ruin kala'o lia nia sia. Ha'u kbele katerus aan, tan Kristus beran maka'as mak nakbiit ha'u.