Ita musti haraik aan hanesan Yesus Kristus
2
Mamaluk sia! Kristus foo lia di'ak wa'in boot baa ita ti'an. Ita bele hakbiit malu neon. Ita bele foo lia tate'an mak nahabut nosi itakaan dadomin. Ita bele moris furak ho malu, tan Na'i Maromak Kmalar Lulik serwisu iha itakaan klaran. Ita moos bele hatudu laran dodan no laran maluak baa malu. 2 Kalo emi hala'ok lia nia hotu-hotu, ha'u neon boot. Liu tan tenik, kalo emi neon mesak, krarain mesak, no hodi lia kabuar atu serwisu hamutuk. 3 Keta halo sa-saa mak buka sotir du'uk. Keta mose aan ma'ak, o maka'as liu ema seluk, tan tuir loos, okaan lokok nia la noo tatuur. Ita musti haraik aan, hodi hafoli ema seluk liu ita. 4 Keta babilan loos emikaan moris du'uk. Mais ita moos musti haree ema seluk.5 Itakaan neon musti hanesan Yesus Kristus neon.
6 Masik Niakaan ilas manesak no Na'i Maromak,
Nia moos Ulun manesak no Na'i Maromak,
mais Nia nabusik Niakaan beran,
no la tau Niakaan kneter-taek.
7 Nia namaan aan tuun mai iha raiklaran ne'e,
tau ilas nu'u ema raiklaran da-daun.
Nia nabusik nela Niakaan beran hotu-hotu,
nodi nalo aan dadi ata.
8 Nia lahoos dadi ata dei,
mais Nia moos nalo aan dadi ema kona lelen,
nodi nalo tuir Na'i Maromak hakaran to'o mate.
Masik ema no'o Nia iha ai karuus to'o mate moos, Nia simu.
Ema no'o Nia, hanesan Nia ne'e, ema aat.
9 Tan Nia naraik aan nunia,
Na'i Maromak foti-nahaas Nia.
Na'i Maromak foo naran boot kaliuk baa Nia.
La noo naran ida tenik mak boot liu naran nia.
10 Na'i Maromak foti-nahaas Niakaan naran nunia,
nebee ema hotu-hotu nakneter Nia.
Ema iha lale'an,
no ema iha raiklaran.
Ema mak moris no ema mak mate.
Nosi ikus, ema hotu-hotu atu nakni'a nodi lo'u-sudur baa Nia.
11 Ema hotu-hotu atu katak na'ak, “Yesus Kristus nia, Ulun tebe-tebes!”
Hodi nunia, sia tonu-naboot Ama Maromak.a
Ita dadi fitun maksinak mak naroma raiklaran
12 Mamaluk sia mak ha'u kadomi! Rona di'a-di'ak! Hori hirak nia, baa oras ha'u ksei iha kota Filipi, emi hanono baa ha'u hodi tuir Kristus dalan loos. Oras ne'e, ita fa'e malu ti'an baa fatin se-seluk. Mais ha'u kusu nebee emi harui aan moris loos, tan kalo la hanono baa Kristus mak sori emi nosi emikaan salan, emi lei haree du'uk. 13 Na'i Maromak du'uk mak serwisu iha emikaan neon. Nia loke dalan nebee emi bele hanono baa Nia. Nia moos foo beran nebee emi bele halo Nia neon di'ak.
14 Emi halo saa dei, keta mamuun aan no keta toe malu. 15 Hodi nunia, emi bele neon moos no la hoo sala. Emi moris iha ema aat no ema tolek teen klaran. Mais keta tuir sia! Emi musti moris moos, tan emi ne'e, Na'i Maromak oan. Emikaan moris musti naksinak natudu dalan baa sia, hanesan fitun maksinak naroma makukun.b 16 Kalo emi moris loos hodi hala'ok Manfatin mak foo moris, emi atu halo ha'u neon boot baa oras Kristus namaan aan mai nikar. Ne'e na'ak, ha'u la kole butan, tan noo folin boot.
17-18 Masik ha'u klatan mohu ha'ukaan moris dadi sera, ha'u ksimu kodi neon di'ak, tan kakara nebee emi bele fiar baa Kristus no hala'ok Niakaan serwisu. [Ha'u klatan to-tomak ha'ukaan moris ne'e, hanesan na'ilulik fakar mohu anggor ween iha sera fatin nodi natetu baa Na'i Maromak.] Emi bele neon di'ak ho ha'u, tan ha'ukaan kolen dadi baa sera mak folin boot.c
Paulus atu solok Timotius baa Filipi
19 Ha'u kaloon nebee, la kleur ona, Na'i Yesus loke dalan nebee ha'u kbele solok Timotius tone nakbiit emikaan neon. Hotu, nia atu fila mai nakbiit nikar ha'ukaan neon nodi nasara baa ha'u nosi emikaan tuur-hariik. 20 Ha'u la ksolok ema seluk. Ha'u ksolok Timotius dei, tan nia mak neon ida no ha'u. Nia moos nadomi emi tebe-tebes. 21 Nia la nu'u mamaluk seluk sia mak nanoin loos siakaan moris du'uk, to'o la babilan lia mak folin bodik Yesus Kristus. 22 Emi hatene ti'an Timotius niakaan serwisu maka'as. Nia serwisu no ha'u, hanesan oan serwisu bodik aman. Nia tulun ha'u ti'an baa katak Manfatin Di'ak iha nabee dei. 23 Kalo sia nakotu ti'an ha'ukaan lia iha ne'e, foin ha'u ksolok Timotius tone. 24 Na'i Maromak nakbiit ha'ukaan neon na'ak, la kleur ona, ha'u moos bele tone karee du'uk emi.
Paulus atu solok fila Epafroditus baa Filipi
25 Uluk, emi solok itakaan maluk Epafroditus mai tulun ha'u. Nia nala'ok Kristus Niakaan serwisu bele-bele no ha'u, ahan nu'u sondadu madinas tuir siakaan ulun hakaran. Mais oras ne'e, ha'u kanoin musti solok fila nia, 26 tan nia beer basuk atu naree nikar emi. Nia neo-neon baa emi, tan nia natene emi rona ti'an ha'ak, nia no'i moras. 27 Tebes. Hori hirak nia, nia moras todan kre'is mate. Mais Na'i Maromak nadomi nia, hotu nadi'ak nola nia. Na'i Maromak moos nadomi ha'u, nodi nadi'ak nola Epafroditus, nebee ha'u keta hetak susar. 28 Tan lia nia, ha'u kakara solok fila nia tone, nebee emi bele hasoru hikar malu hodi neon di'ak. Nunia, foin ha'ukaan neon bele noku. 29-30 Simu nia di'a-di'ak, tan nia, Kristus eman. Emi moos musti hakneter ema hotu-hotu hanesan nia, tan nia nala'ok Kristus Niakaan serwisu to'o kre'is mate. Nia la nakiduk kois, tan nakara tulun ha'u nodi seluk emi. Dadi simu hikar nia hodi laran maluak.