2 Ha'u kaloon baa Na'i Maromak itakaan Ama no Yesus Kristus itakaan Na'in, nebee natudu laran di'ak baa emi to'o bele moris manek no dame.

3 Tonu-haboot Na'i Maromak, itakaan Na'in Yesus Kristus, Aman. Nia natuun matak-malirin oi-oik nosi lale'an bodik ita, tan ita talin malu ho Kristus.

4 Na'i Maromak sei la nase'i raiklaran dauk, Nia nadomi ita no boi kedan ita dadi baa Kristus eman mak moris moos iha Niakaan oin. 5 Nia nakotu kedan hori uluk aan atu nodi Yesus Kristus nalo ita baa Niakaan oan, tan Nia beer basuk nunia. 6 Ita tonu-haboot Nia, tan Nia natudu laran di'ak nunia baa ita ti'an, nebee ita bele moris talin malu ho Yesus mak Nia dadobe.

7 Uluk, ita la moris moos tuir Na'i Maromak dalan moris. Masik nunia moos, Nia natudu laran di'ak nodi solok Oan atu naduar raan to'o mate, nebee Nia bele sori nola ita hosi itakaan salan.^b 8 Nia nadomi ita liu basuk, to'o naroma itakaan neon, nebee ita bele hatene Niakaan hakaran. 9 Uluk, Nia sei la nalore dauk Niakaan hakaran baa ema raiklaran. Mais oras ne'e, Nia nalore ti'an na'ak, hori uluk aan Nia nakotu ti'an atu nodi Yesus Kristus nala'ok Niakaan hakaran. 10 Niakaan hakaran nia nune'e: oras hotu-hotu tetuk ti'an, Yesus Kristus atu dadi Na'in bodik hotu-hotu iha lale'an no raiklaran.

11-12 Tan ita talin malu ho Kristus ti'an, ita bele simu hotu-hotu mak Na'i Maromak nameno kedan atu foo baa Niakaan ema. Hori uluk fohon, Nia boi ti'an ami, ema Yahudi, atu dadi baa Niakaan ema. Nia nakara nodi ami atu loke dalan bodik ema klubun seluk sia, nebee ema hotu-hotu bele fiar baa Kristus. Lia ne'e sia dadi ti'an. Tan baa nia, ita foti-hahaas Na'i Maromak naran.

13 Oras ne'e, emi hosi klubun seluk sia rona ti'an hanorin loos. Emi moos fiar ti'an ha'ak, hanorin nia, Lia Di'ak mak bele sori emi.

Tan emi fiar nunia, Na'i Maromak moos foo Niakaan Kmalar Lulik baa emi. Hodi nunia, Nia nala'ok Niakaan mamenon mak Nia nameno kedan ti'an. Kmalar Lulik nia marak emi nodi tadak na'ak, emi dadi baa Na'i Maromak oan ti'an. 14 Kmalar Lulik dadi kakaer bodik ita ha'ak, Na'i Maromak atu foo hotu-hotu mak Nia nameno ti'an baa ita, tan Nia selu kotu ita dadi baa Niakaan ema. Tan lia nia, ita tonu-haboot Nia.

15 Mamaluk sia! Ha'u krona lia wa'in ti'an kosi emikaan fiar baa itakaan Na'in Yesus Kristus, no emikaan dadomin baa mamaluk makfiar sia. Tan baa nia, 16 ha'u la kanawa sera dodan baa Na'i Maromak. 17 Ha'u kamulak ka'ak, “Ama! Ama ne'e, ha'ukaan Na'in Yesus Kristus, Aman. Ama maka'as kaliuk. Nebee Ama Kmalar Lulik tulun ema Efesus sia, nebee sia bele natene di'a-di'ak Ama. 18 Nebee, Ama loke siakaan kakutak, no naroma siakaan neon, to'o sia bele natene hotu-hotu mak Ama nakara nalo baa ema mak Ama boi ti'an dadi baa Ama Niakaan ema. Nebee, sia bele natene matak-malirin hotu-hotu mak Ama nameno atu foo baa sia. Tan matak-malirin nia, maka'as liu resik! 19 Nebee, sia bele natene di'a-di'ak Ama beran boot mak Ama nodi tulun sia. 20 Ama nodi beran nia nalo Kristus moris nikar nosi mate. Hotu Ama foti sa'e Kristus baa lale'an, hotu latan beran baa Nia no hatuur Nia baa Ama sorin kwana iha fatik mak kneter kaliuk.^c 21 Kristus beran nia, maka'as liu makaer ukun no makaer beran hotu-hotu iha kroman no iha kukun. Nia kaer beran nia lahoos baa oras ne'e dei, mais baa oras mak atu mai no. 22 Ama nalo hotu-hotu lo'u baa Kristus. Ama moos foti Nia dadi Ulun bodik babilan ema makfiar sia hotu-hotu.^d 23 Nia dadi Na'in. Ita makfiar sia dadi Niakaan isin mak hala'o Niakaan hakaran hotu-hotu, tan Nia mak babilan hotu-hotu.^e

Ha'ukaan hamulak bodik emi iha Efesus, nune'e dei.”