2
Tan lia nia, ha'u kakotu ti'an ka'ak, ha'u ksei la tone emi dauk, nebee ita hotu-hotu lalika neon susar. 2 Kalo ha'u kmai kasusar emi, see tenik mak bele nalo ha'u neon di'ak? La noo tenik. Hela mesan emi foin bele. Mais kalo ha'u kmai baa oras ne'e, ha'u kmusti kasusar emi, tan emikaan hahalok. 3 Tan lia nia, ha'u kfoo hakerek uluk nia, ka'ak, ha'u ksei la tone dauk emi. Ha'u ksei kein to'o emi hahulin mohu emikaan lia lai, foin ha'u ktone. Hodi nunia, ha'u lalika neon susar tan emikaan lia aat nia sia. Tuir dalan loos, emi musti halo ha'u neon di'ak. Malorek ti'an baa ha'u ka'ak, kalo ha'u neon di'ak, ne'e na'ak, emi moos neon di'ak. 4 Baa oras ha'u kalo hakerek uluk nia, ha'u koran susar no neon todan, tan emikaan hahalok. Ha'u moos tanis wa'in. Mais kakerek kalo nunia kodi katudu ha'ukaan dadomin baa emi. Lahoos atu kodi kasusar emi.Paulus nakara nebee sia foo pardua baa ema mak uluk nalo sala
5 Ema ida iha emikaan hutun sarani nasusar ema wa'in ti'an. Ha'u moos susar tan niakaan hahalok. Tuir loos, hahalok nia la kona ha'u resik, mais kona baa emi. 6 Oras ne'e emi de'an nia to'o nia nanawa ti'an. 7 Tan nia nanawa ti'an, emi musti halu'a lakon niakaan salan, hodi dale di'a-di'ak hikar ho nia. Keta to'o nia neon monu. 8 Ha'u kusu nebee emi hotu-hotu hatudu dadomin baa nia.
9 Ha'u kalo hakerek uluk nia atu kodi sukat emi. Ha'u kakara katene, kalo emi hala'ok lia hotu-hotu mak uluk ha'u karuka baa emi nia. 10 Oras ne'e, kalo emi foo pardua baa ema nia hodi halu'a niakaan salan, ha'u moos kakara. Kalo nia nalo sala baa ha'u, ha'u kalu'a ti'an. Ha'u kalo nunia iha Kristus oin, nebee ha'u dadi knaninuk bodik emi. 11 Ita musti foo pardua baa ema, nebee diabu ulun la noo leet atu nahonu ita. Ita keta momok, tan ita musti hatene hola diabu niakaan kakutak kadoor atu nodi naloti ita.
Paulus solok hakerek dala uluk baa hutun sarani iha Korintus, hotu nein atu rona lia nosi sia
12 Uluk, oras ha'u kbaa kota Troas atu kanorin ema kosi Kristus Niakaan Lia Di'ak, Na'i Maromak loke dalan bodik ha'u. 13 Masik nunia moos, ha'ukaan neon la nakmetin, tan ha'ukaan maluk Titus sei la mai dauk nodi lia nosi emi. Tan baa nia, ha'u kbaa sale ema makfiar sia iha Troas, hotu ha'u kbaa rai Makedonia.a
Kristus natoba nola lia aat sia
14 Masik ha'u iha nabee dei, ha'u ksera dodan wa'in baa Maromak, tan Kristus natoba nola lia aat sia, to'o hotu-hotu la nakfodak. Tan ita soman malu ho Kristus, Na'i Maromak nala'o ita bei-beik ahan Niakaan ema. Baa oras ita katak ema hosi Kristus, hahalok nia hanesan nuhar morin ida mak morin lema ema hotu-hotu. 15-16 Uluk aan, ema Yahudi nalo sera tunun. Knuhar morin nia sa'e baa Maromak, nalo Nia neon di'ak. Ita moos hanesan nuhar morin ida mak sa'e baa Maromak tan ita talin malu ho Kristus. Mais ema mak se'i kotuk baa Maromak, sia filak ita baa nuhar dois, tan ita foo hatene baa sia ha'ak, sia atu dodok tan netan kastikar mak sasa fa'e sia nosi Na'i Maromak. Mais ema mak moris loos, sia filak ita baa nuhar morin, tan ita foo hatene baa sia ha'ak, Kristus sori sia no foo moris nima-nimak baa sia. Ema raiklaran see, mak bele nalo lia nia? La noo. Kristus mesan mak bele nalo.
17 Hanoin. Ami ne'e, lahoos nu'u ema seluk mak nalo aan hanesan Kristus klosan. Sia nanorin Maromak Manfatin atu buka sotir hanesan ema mak fa'an sa-saa. Emi hotu-hotu bele haree malorek ti'an ha'ak, ami la nunia, tan ami hanorin hodi neon loos. Amikaan dale nahabut baa Maromak. Amikaan moris talin malu ho Kristus.