Na'i Maromak eman sia simu Mamenon Foun
3
Arumak emi hanoin ha'ak, ami ne'e ibun boot ka? Arumak emi hanoin ha'ak, ami nu'u ema nia sia mak nodi hakerek tonun nosi ema seluk, nebee emi simu sia ka? Lale! Ami la halo nunia. Ami moos la husu hakerek tonun hosi emi atu hodi baa fatin seluk. 2 Ami hoo kedan hakerek tonun ti'an. Hakerek nia, mak emi du'uk. Lia nosi emikaan moris, ami rai ti'an iha amikaan neon. Hotu ami katak baa ema hotu-hotu, nebee sia moos natene emikaan moris. Hodi nunia, sia natene amikaan serwisu folin. 3 Malorek ti'an, emi hanesan hakerek mak Kristus nakerek, hotu latan baa ami. Mais Nia la nakerek nodi ai ween metan. Nia moos la nakerek iha fatuk kabelak ahan nu'u Ukun-badu mak Na'i Maromak latan baa Bei Musa uluk aan nia. Mais Nia nakerek iha emikaan neon nodi beran nosi Maromak Kmalar mak moris.a4 Ami hatene ha'ak, amikaan dalen ne'e tebes no loos, tan Kristus natebes nunia ti'an. 5 Kalo ami du'uk, ami la hoo beran atu halo sa-saa. Mais beran mak ami simu ne'e, mai nosi Na'i Maromak. 6 Nia mak foti ami baa ain-liman atu baa katak Niakaan Mamenon Foun baa ema. Mais Mamenon Foun nia isin, lahoos lia ema nala'ok ukun-badu, mais lia ema moris talin malu no Kmalar Lulik. Kalo ema ida nala'ok ukun-badu nebee Na'i Maromak simu nia, hahalok nia la noo folin, tan nodi ema baa mate. Mais kalo ema ida talin malu no Maromak Kmalar, nia netan moris loos to'o nima-nimak.b
7 Uluk aan, Na'i Maromak ba'at Niakaan Ukun-badu baa fatuk kabelak, hotu foo baa bei Musa. Lia nia, maka'as tebes. Mais lia nune'e mai. Masik ema Isra'el sia nala'ok Ukun-badu nia moos, nosi ikus sia sei kona lelen nosi Na'i Maromak. Baa oras bei Musa simu nola Ukun-badu nia sia, niakaan oin naksinak maka'as basuk. Ema Isra'el sia la bele titu-naree niakaan oin. Dau-dau sinak nia lakon, foin sia bele.c 8 Kalo Ukun-badu mak hakerek iha fatuk bele dadi maka'as nunia, saa tenik Mamenon mak Maromak Kmalar nakerek iha itakaan neon. Nanis, maka'as liu tan tenik. 9 Ukun-badu nia natudu na'ak, ita musti hetan kastikar mate mak naketak ita nosi Maromak, tan ita sakar hotu Ukun-badu nia. Masik nunia moos, ita sei hafoli Ukun-badu nia maka'as. Mais Maromak Kmalar maka'as liu tenik, tan Nia natudu dalan nebee ita bele di'a-di'ak hikar ho Na'i Maromak. 10 Ukun-badu mak uluk ema nafoli maka'as, oras ne'e la nunia ti'an, tan noo Mamenon Foun mak maka'as liu tan tenik. 11 Ukun-badu nia niakaan maka'as, hanesan bei Musa oin mak naksinak la oras, hotu lakon. Mais Na'i Maromak Mamenon Foun maka'as liu tan tenik, tan nafati nohuun.
12 Tan ami haloon baa Na'i Maromak Mamenon Foun mak nafati nia, ami haksakar aan dale malorek no la subar lia. 13 Ami lalika halo nu'u bei Musa mak taka subar oin nodi tais, nebee ema Isra'el sia la bele naree sinak mak lakon nai-naik nia.d 14 Na'i Maromak nalo ema Isra'el siakaan kakutak naktomak. To'o baa oras ne'e moos, kalo sia leno Niakaan Mamenon Tuan iha Hakerek Moon, hanesan noo tais ida mak taka nola siakaan ulun, to'o sia nu'u ema beik. Sia musti fiar baa Kristus lai, foin kakutak nakloke nikar. 15 Nunia tebes. To'o baa oras ne'e moos, kalo ema Yahudi sia leno bei Musa niakaan hakerek, sia rona, mais sia la natene tebe-tebes hakerek isin, tan la tama baa siakaan neon, hanesan noo tais taka nola neon.
16 Mais kalo ema ida fila nikar fiar baa itakaan Na'in, nu'u tais nia nakloke ti'an.e 17 Na'in nia, ne'e mak, Maromak Kmalar. Kalo Kmalar nia moris iha itakaan neon, ita hakbois ti'an. La noo mak saseni ita nosi Na'i Maromak ona. 18 Tais la taka ita ona. Tan baa nia, ita dadi nu'u lalenok mak nasai Na'i Maromak ahar maksinak. Sura loron ita hetak haksinak hasai Niakaan sinak, to'o ita hakfilas dadi hanesan Nia, tan Niakaan Kmalar Lulik tulun ita.