Paulus de'an ema Korintus sia tan ida nalo lia kfo'er
5
Ha'u krona emi ida nalo lia kfo'er. Ema nia niakaan a'aat liu tan ema mak la natene Maromak, tan nia nalo fo'er nikar no aman feen.a 2 Masik nunia moos, emi sei loko aan no la horan moe! Tuir loos, emi musti moe aan hodi lelen lakon ema oin nunia.3 Masik ita dook baa malu, ha'ukaan neon namutuk no emi. Ha'u kakotu kedan musti taa ukun baa ema aat nia. 4 Ha'u koo beran kakotu lia nunia, tan ha'u ne'e, Na'i Yesus klosan. Ha'u kakara nebee emi libur malu, hakotu lia nia hodi itakaan Na'in naran. Ha'ukaan neon tuir namutuk bele no emi. 5 Hotu latan ema nia baa diabu ulun, nebee kleu-leur nia du'uk soe lakon a'aat nia. Hodi nunia, baa oras itakaan Na'in namaan aan mai nikar, Nia bele sori nola ema nia.
6 Keta to'o emi loko aan. Keta halu'a ha'ak, tua teen oan ida dei bele nasa'e tubi tomak boot ida. Ema hahalok aat nia, hanesan tua teen nia. Kalo habusik nalo aat bei-beik iha emikaan leet, nia kahur nola mamaluk sarani seluk sia to'o tuir nalo aat!b 7 Tan lia nia, emi musti lelen lakon ema aat nia, foin emi bele moris moos hikar. Ema Yahudi uluk aan no'o bibi malae oan sala lalek, nalo baa sera Paska atu nodi namoos aan. Nosi ikus, ema no'o Kristus, Ema Moon nia. Nia moos dadi baa sera atu namoos itakaan neon.c 8 Uluk, ema Yahudi naa tubi bakae mak tua teen lalek atu nadahur Paska. Oras ne'e, ita nu'u tubi nia. Ita musti daka aan, nebee keta halo lia aat, no keta halo ema seluk laran moras. Ita musti dale loos. Hodi nunia, ema naree itakaan lala'ok hotu-hotu, tuir itakaan laran di'ak.d
9 Uluk, ha'u kakerek ti'an ka'ak, “Keta kahur ho ema mak nakur biti-kluni no ema mak nalo lia kfo'er.” 10 Mais ha'ukaan hakara nia, keta kahur ho ema sarani mak nalo sala nunia. Lahoos keta kahur ho ema mak la fiar baa Na'i Maromak, hanesan ema rotus teen, ema tolek teen mak be'ur nola ema siakaan naha, no ema mak lo'u-sudur baa ai'oi lulik. Tan kalo emi halo nunia, emi musti hakfa'ek aan hosi ema hotu-hotu iha raiklaran ne'e. 11 Ha'ukaan hakara nune'e: keta kahur ho ema mak na'ak, “Ha'u ne'e, ema sarani.” Mais tuir loos, ema nia nalo sala nu'u nakur biti-kluni, rotus teen, lo'u-sudur baa ai'oi lulik, nahaat ema naran, lanuk todan, no tolek atu nola ema niakaan naha. Keta kahur ho ema oin nunia sia. Tuur haa ho sia moos, keta!