Paulus nakerek
bodik hutun sarani sia iha rai
Galatia
Paulus nahuu nakerek baa ema Galatia sia
1
1-2 Tabe nosi ha'u Paulus, mak Yesus Kristus klosan. Ha'u ksolok hakerek ne'e baa emi hutun sarani sia mak iha rai Galatia. Mamaluk mak namutuk no ha'u iha ne'e moos solok tabe baa emi.Ha'u kdadi klosan ne'e, lahoos ema raiklaran mak foti ha'u, mais Ama Maromak no Yesus Kristus du'uk mak foti ha'u. Yesus nia, Kristus mak Na'i Maromak solok mai. Nia mate, mais Na'i Maromak nalo Nia moris nikar. Hotu, Nia solok ha'u baa katak Lia Di'ak nia baa ema.
3 Ha'u kakro'an baa Na'i Maromak itakaan Ama no Yesus Kristus itakaan Na'in, nebee Sia natudu laran di'ak baa emi to'o emi bele moris manek no dame. 4 Kristus latan isin lolon to'o mate nebee kasu mohu itakaan salan no nasai ita nosi a'aat raiklaran. Lia nia sia hotu-hotu tuir Ama Maromak hakaran. 5 Tan baa nia, ita tonu-haboot Nia nohuun! Lia ne'e, tebes!
Paulus krakat tan ema Galatia sia se'i kotuk ti'an baa hanorin loos
6 Mamaluk sia, emi halo ha'u beik karin ti'an! Na'i Maromak boi emi ti'an, tan Nia nakara nebee emi hatene Kristus laran di'ak. Mais tan saa emi se'i kotuk lais nunia, hotu fiar seluk baa hanorin 7 mak la loos? Uluk, ha'u kanorin emi ti'an hanorin loos nosi lia Yesus Kristus. Mais oras ne'e, maktolek teen sia mai naktolek Lia Di'ak nia, to'o nabenar emi.
8 Hanoin di'a-di'ak! Na'i Maromak nanis kastikar ema mak mai nanorin lia seluk mak la manesak no Lia Di'ak mak uluk ami hanorin baa emi. Masik ema nia nosi ami ka, nosi Na'i Maromak Niakaan makbukar lale'an ka, nanis nia kona kastikar! 9 Ami katak kedan ti'an lia ne'e hori uluk. Mais oras ne'e ha'u kakara katak tenik nune'e: Kalo ema mai nanorin seluk nosi Lia Di'ak mak uluk emi simu ti'an nia, habusik Na'i Maromak kastikar ema nia.
10 Ha'u kaka'as aan dale nunia, tan ha'u kbuka Na'i Maromak tonun, lahoos ema raiklaran tonun. Emi haneo ha'u kbuka ema raiklaran tonun ka? Lale! Tan kalo ha'u kbuka ema raiklaran tonun, ha'u la kfatan dadi Kristus ain-liman.
Oin nunabee to'o Paulus dadi baa Kristus klosan
11 Mamaluk sia! Ha'u katak malorek nune'e: Lia Di'ak mak ha'u kanorin baa emi nia, lahoos ema raiklaran mak nase'i. 12 Ha'u la ksimu kosi ema raiklaran. Ema raiklaran ida moos la nanorin baa ha'u. Yesus Kristus du'uk mak nalore baa ha'u.
13 Emi rona nanis lia nosi ha'ukaan moris baa oras sei moris tuir adat Yahudi. Baa oras nia, ha'u ktonan Na'i Maromak eman sia, tan ha'u kbeer kadodok sia.a 14 Ha'u moos katene mohu adat Yahudi, liu nosi mamaluk Yahudi seluk sia mak otas no ha'u. Ha'u mak madinas tebes kala'o amikaan bei uluk siakaan adat hotu-hotu.b
15-16 Masik nunia moos, Na'i Maromak nakotu ti'an atu natudu Oan baa ha'u. Ha'ukaan ina sei la nahoris ha'u dauk, Na'i Maromak boi kedan ha'u ti'an, tan Nia beer natudu laran di'ak baa ha'u. Hotu Nia solok ha'u baa kanorin ema mak lahoos Yahudi. Baa oras Nia solok ha'u, ha'u la kbaa kusu lia tate'an nosi ema seluk.c 17 Ha'u moos la baa kasoru fukun sarani sia iha Yerusalem mak dadi Yesus klosan sia hori uluk. Mais ha'u kbaa kedan rai Arab. Nunia hotu, ha'u kmai kikar kota Damsik.
18 Tinan tolu siku liu lai, foin ha'u kbaa kasoru Petrusd iha Yerusalem. Ha'u kein iha nebaa to'o loron sanulu resin lima.e
19 Baa oras nia, ha'u la kasoru klosan rumak sia. Ha'u kasoru loos Na'i Yesus alin Yakobus, no Petrus. 20 Saa mak ha'u kakerek ne'e, tebes no loos! Na'i Maromak moos natene, ha'u la kaktolek.
21 Nunia hotu, ha'u kbaa rai Siria no rai Kilikia. 22 Oras nia, Kristus eman sia iha rai Yudea sei la natene ha'u dauk. 23 Sia rona loos lia na'ak, “Ema mak uluk nasusar ita nia, oras ne'e nia nanorin Lia Di'ak nosi fiar baa Kristus. Tuir loos, nia mak uluk nakara nadodok itakaan fiar nia.” 24 Rona lia nia, sia tonu-naboot Na'i Maromak tan ha'u kfiar baa Kristus ti'an.