Yesus nadi'ak nola ema moras ida iha Batesda
5
Nunia hotu, loron boot Yahudi ida to'o mai ti'an. Yesus sia fila baa kota Yerusalem atu nadahur loron boot nia. 2 Iha Yerusalem, noo wee lalihuk ida kre'is baa odamatan nanokar ida naran, Odamatan Bibi Malae. Iha siakaan lia Aram, wee lalihuk nia naran ‘Wee Lalihuk Batesda’. Noo tetek lima kre'is baa wee lalihuk nia.a 3 Loro-loron ema mak moras wa'in tuur nein iha tetek nia sia. Nu'u: ema matan delek, ema ain asak, no ema mak la bele koen aan. [Sia nein, to'o wee nia nahuu kakoen. 4 Tan isin ida-idak, Maromak Niakaan makbukar lale'an tama baa kakoen wee nia. Hotu, ema moras mak tama uluk baa wee nia laran, nia di'ak kedas.]b5 Baa oras Yesus sia to'o baa fatin nia, noo ema ida mak moras tinan tolu nulu resin walu ti'an. 6 Titu-naree ema nia no'i toba iha nia, Yesus natene kedan ema nia moras kleur ti'an. Hotu Yesus nusu nia na'ak, “Mau! O makara dadi di'ak ka?”
7 Ema nia nataa na'ak, “Kakara liu Ama Boot. Mais noo sohan boot. Kalo wee kakoen, la noo ema ida mak naka'u natama ha'u baa. Kalo ha'u kakoen atu tama du'uk, ema seluk tama uluk ti'an.”
8 Rona nola nunia, Yesus naruka na'ak, “Mariik! Lulun mola okaan biti, fila ona.” 9 Yesus dale notu nunia, ema nia moos di'ak kedas. Hotu, nia nariik, foti nola niakaan biti atu fila.
Lia nia kona besik baa ema Yahudi siakaan loron hamulak. 10 Tan lia nia, oras ema Yahudi ulun sia naree ema mak foin di'ak nia, sia nasee nia na'ak, “Hoi! O matene ka lale? Ohin loron ne'e, loron hanawa serwisu. Tuir itakaan ukun-badu, ema la bele natiu biti baa loron hanawa serwisu. Tan hatiu biti, ne'e na'ak, serwisu ti'an!”c
11 Ema nia nataa na'ak, “Adeei, ama sia! Keta krakat, tan Ema mak nadi'ak nola ha'u, Nia mak naruka ha'u na'ak: ‘Lulun mola okaan biti, fila ona.’”
12 Hotu ulun sia nusu baa nia na'ak, “Ema mak naruka o nia, see?”
13 Mais ema mak foin di'ak nia la natene Yesus nia, see, tan Yesus la iha nia ti'an. Yesus sai no-nook ti'an, tuir ema wa'in leet.
14 La kleur, Yesus nasoru nikar ema nia iha Uma Hamulak Huun lalawar. Hotu Yesus katak baa nia na'ak, “Manono! Oras ne'e, o di'ak ti'an. Keta malo sala tenik, nebee keta kona lia mak la di'ak liu tan tenik.”
15 Nunia hotu, ema nia baa buka Yahudi ulun sia, nodi katak na'ak, “Ema mak nadi'ak nola ha'u nia, naran Yesus.” 16 Natene nola nunia, Yahudi ulun sia nahuu buka dalan atu nasusar Yesus, tan nadi'ak nola ema kona baa loron hamulak.
17 Mais Yesus katak baa sia na'ak, “Nune'e. Ha'ukaan Ama la natene nanawa serwisu. Tan baa nia, Ha'u moos serwisu bei-beik.”
Yesus katak na'ak Niakaan Aman mak Maromak
18 Nunia hotu, Yahudi ulun sia nasalak Yesus na'ak, Nia nakur siakaan ukun-badu loron hanawa serwisu. Liu tenik, sia nasalak Yesus tan Nia katak na'ak, Niakaan Aman mak Maromak. Nodi dale nunia, Yesus foti aan manesak no Na'i Maromak. Tan lia nia, ulun sia hetak buka dalan atu no'o Yesus.
19 Mais Yesus katak baa sia na'ak, “Rona, tan Ha'ukaan dalen ne'e, tebes no loos: Ha'u la kserwisu tuir Ha'ukaan beer du'uk, mais Ha'u kserwisu tuir saa mak karee kosi Ha'ukaan Ama iha lale'an. Ha'ukaan Ama nalo lia ida, Ha'u moos kalo tuir nunia. 20 Ha'ukaan Ama nadomi tebes Ha'u. Nia natudu baa Ha'u lia hotu-hotu mak Nia nalo. Tebes. Emi blaar tan Ha'u kadi'ak kola ema ohin nia. Mais Ha'ukaan Ama atu natudu baa Ha'u lia maka'as liu tenik, to'o emi hetak blaar! 21 Ha'ukaan Ama bele nalo ema mak mate ti'an moris nikar. Nunia moos, Ha'u kbele foo moris nima-nimak baa se-see dei, tuir Ha'ukaan hakara. 22 Tuir loos, lahoos Ha'ukaan Ama mak taa ukun baa ema. Nia latan beran nia baa Ha'u, tan Ha'u ne'e, Niakaan Oan. Dadi ha'u mak kakotu ka'ak, ema ida loos ka, lale. 23 Ha'ukaan Ama nakara, nebee ema hotu-hotu nakneter Ha'u, nudaar sia nakneter Nia. Ema mak la nakneter Ha'u, mak Ama Oan ne'e, ema nia moos la nakneter Ama mak solok Ha'u kmai.
24 Nunia tebes! Mais rona, tan Ha'ukaan dalen ne'e, tebes no loos: ema mak la nakneter Ha'u, nia moos la nakneter Na'i Maromak. Ha'u kfoo katene ka'ak, ema mak nanono baa Ha'u, nodi fiar baa Na'i Maromak mak solok Ha'u, nia netan moris nima-nimak. Na'i Maromak la kastikar nia tenik. Nia la kona ukun mate ona, mais nia tama ti'an dadi baa ema mak moris nohuun no Na'i Maromak. 25 Ha'ukaan dalen ne'e, tebes no loos: la kleur ona, ema mak mate ti'an sia atu rona Ha'ukaan lian, tan Ha'u ne'e, Na'i Maromak Oan. Tuir loos, oras nia to'o mai ti'an. Ema mak rona Ha'ukaan lian, sia netan moris nima-nimak. 26 Ha'ukaan Ama kaer beran atu foo moris baa ema. Nia latan beran nia baa Ha'u, tan Ha'u ne'e, Niakaan Oan. 27 Nia moos latan beran baa Ha'u atu kakotu lia no taa ukun baa ema raiklaran, tan Ha'u ne'e moos Ema Raiklaran Isin. 28 Keta blaar, tan la kleur ona, ema hotu-hotu mak mate ti'an atu rona Ha'ukaan lian. 29 Sia moris nikar sai nosi rate. Hotu, ema mak uluk nalo lia di'ak, sia netan moris to'o nima-nimak. Mais, ema mak uluk nalo lia aat, sia kona kastikar to'o nima-nimak.”d
Lia kakaer wa'in natebes na'ak Yesus nia, Na'i Maromak Oan
30 Hotu, Yesus dale natutan baa Yahudi ulun sia na'ak, “Ha'u la kbele kalo sa-saa, kalo sei la krona dauk kosi Ha'ukaan Ama. Ha'u krona kola ti'an, foin bele kakotu lia no bele taa ukun baa ema raiklaran. Tan Ha'u krona du'uk kosi Ama, ne'e na'ak, saa mak Ha'u kakotu, nanis tebes no loos. Ha'u la kakotu tuir Ha'ukaan hakara du'uk, mais tuir Ama nakara, tan Nia mak solok Ha'u.
31 Kalo Ha'u mesan ka'ak Na'i Maromak mak solok Ha'u, emi la hatene Ha'ukaan dalen nia, loos ka, lale. 32 Mais, noo mak natebes Ha'ukaan dalen nia. Niakaan dalen moos tebes no loos. 33 Emi du'uk solok ema baa nusu Yohanis nosi Ha'u. Saa mak Yohanis nataa nia, tebes no loos.e 34 Tuir loos, Ha'u la kbuka ema raiklaran atu natebes na'ak Na'i Maromak mak solok Ha'u. Mais, Ha'u kfoo katene lia nia sia baa emi, nebee emi bele hetan moris. 35 Yohanis nia, hanesan badut lolon ida mak nakroma iha makukun. Baa oras sei nakroma, emi neon di'ak. Mais neon di'ak nia, la oras dei.
36 Noo ida mak maka'as liu Yohanis mak bele natebes lia loos nosi Ha'u. Nia mak Ha'ukaan Ama iha lale'an. Nia latan ti'an baa Ha'u serwisu mak Ha'u kmusti kala'o to'o mohu. Serwisu ne'e natudu lia kakaer na'ak, Ha'ukaan Ama mak solok Ha'u. 37 Nia du'uk moos natebes nunia. Mais emi la rona Niakaan lian, la haree Niakaan ilas,f 38 no la rai Niakaan Manfatin baa emikaan neon, tan emi la fiar baa Ha'u mak Nia solok ne'e. 39 Loron-loron emi leno lotu-lotuk Hakerek Moon, tan emi buka dalan baa moris loos hosi Hakerek nia. Tuir loos, Hakerek Moon nia natebes lia nosi Ha'u. 40 Masik nunia moos, emi sei la ho'uk mai baa Ha'u atu simu moris loos nia.
41 Ha'u la kbuka mose nosi ema raiklaran, 42 tan Ha'u katene emi la hadomi Na'i Maromak. 43 Ha'u kmai kodi Ha'ukaan Ama naran, mais emi la simu Ha'u. Kalo ema seluk mai nodi naran du'uk, emi simu nia. 44 Loron-loron emi buka mose malu. Mais la buka mose nosi Na'i Maromak. Tuir loos, Na'i Maromak ida dei! La noo seluk tenik. Mais kalo emi la hikir Nia, oin nunabee emi bele fiar baa Nia?
45 Keta haneo ha'ak, Ha'u mak tula sala baa emi iha Ha'ukaan Ama oin. Lale. Ema mak tula sala baa emi nunia, ne'e mak Bei Musa, tan nia mak foo Ukun-badu baa emi. 46 Kalo emi fiar tebes baa nia, ne'e na'ak emi moos musti fiar baa Ha'u, tan lia saa mak nia nakerek nela moos, kona baa Ha'u. 47 Mais kalo emi la fiar baa saa mak Bei Musa nakerek nela nia, oin nunabee emi bele fiar baa saa mak Ha'u kdale ne'e? La bele dadi!”