Ema matenek leno fitun mai naree Yesus
2
Baa oras Maria nahoris Yesus iha leo Betlehem iha rai Yudea, Na'i Herodes mak kaer ukun iha nia. Oras nia moos, ema na'in hira mai iha kota Yerusalem nosi fatin dook iha lorosa'e baa. Sia nia, ema matenek leno fitun. 2 To'o Yerusalem baa, sia nusu baa-mai na'ak, “Ema Yahudi siakaan na'i mak foin moris nia, iha nabee? Ami haree ti'an fitun ida iha lorosa'e mak natudu tadak na'ak, Nia moris ti'an. Tan lia nia, ami mai atu lo'u-sudur baa Nia.” 3 Rona nola nunia, Na'i Herodes neon la noku. Ema hotu-hotu iha Yerusalem moos nunia.4 Hotu Na'i Herodes libur nola ema Yahudi siakaan na'ilulik ulun sia no manorik ukun sia hotu-hotu. Nia nusu baa sia na'ak, “Emi katak kokon baa ha'u lai! Kristus mak Na'i Maromak nameno ti'an nia, ema atu nahoris nia iha nabee?”
5 Sia nataa na'ak, “Iha Betlehem, iha rai Yudea, ama na'i. Maromak mako'an Mika nakerek kedan hori uluk nune'e:
6 ‘Hei, emi ema Betlehem iha rai Yudea.
Keta hakraik emikaan leo nia,
leo ki'ik mak la noo folin.
Tan Ema boot ida atu mosu mai nosi nebaa.
Nia atu dadi makbalin bodik Ha'ukaan ema Isra'el sia.’”a
7 Rona nola nunia, Na'i Herodes bolu no-nook ema matenek leno fitun sia. Nia moos nusu baa sia na'ak, “Wainhira emi haree fitun nia mosu iha lale'an?” Sia moos katak baa nia. 8 Rona ti'an, nia naruka sia baa Betlehem nodi nameno na'ak, “Baa buka Oa nia iha Betlehem. Kalo hasoru ti'an, fila mai katak ha'u, tan ha'u moos beer baa lo'u-sudur baa Nia.”
9 Rona notu na'i dale nia, sia moos baa. Hatene hodi baa, sia titu-naree tenik fitun mak uluk sia naree iha lorosa'e nia. Fitun nia mosu iha siakaan oin, hotu la'o uluk sia to'o nanawa besik baa Oa nia moris fatin.
10 Naree fitun nia, sia neon di'ak tebe-tebes. 11 To'o fatin nia, sia tama baa uma laran, hotu naree Oa nia no Niakaan ina Maria. Sia nakni'a lo'u-sudur baa Oa nia. Sia loke siakaan naha, hotu natetu buat folin todan sia baa Oa nia. Buat nia sia, mak mean isin, ai morin no ai morin raan.
12 Baa oras nia moos, sia netan me'i nosi Na'i Maromak na'ak, “Keta fila tenik baa Na'i Herodes.” Tan lia nia, sia fila baa siakaan rai tuir dalan seluk.
Yusuf nodi Maria no Yesus nalai baa Mesir
13 Baa oras ema matenek leno fitun sia fila ti'an, Maromak Niakaan makbukar lale'an ida mai katak baa Yusuf iha me'i laran na'ak, “Yusuf! Madeer lai-lais ona! Malai modi Oan nia no niakaan ina baa rai Mesir nebaa. Hein hafati iha nebaa to'o Ha'u katak wainhira emi bele fila. Tan Na'i Herodes no'i buka atu no'o Oan nia!”
14 Me'i notu, Yusuf nadeer. Baa kalan nia kedan, nia nodi feen no Oan nia, nalai baa Mesir. 15 Sia nein iha nebaa to'o Herodes mate. Lia nia nato'o saa mak Na'i Maromak katak kedan baa mako'an Hosea hori uluk na'ak,
“Ha'u kbolu kikar Ha'ukaan Oan sai nosi Mesir.”b
Na'i Herodes no'o lawarik oan sia iha Betlehem
16 Baa oras Na'i Herodes natene nola ema matenek leno fitun sia tolek nia ti'an, nia nawan sa'e tebe-tebes. Nia naruka niakaan sondadu sia na'ak, “Baa leo Betlehem no leo mak kre'is iha nia sia. Ho'o mohu lawarik mane hotu-hotu mak otas sei la to'o tinan rua dauk.” Herodes naruka nunia, tan nanoin nola ema matenek siakaan lia. Nia sura tinan nahuu nosi sia naree fitun nia mosu iha lale'an.
17 Lia ne'e sia nato'o saa mak Maromak mako'an Yeremia nakerek kedan hori uluk na'ak,
18 “Noo ema mak tanis naboo aan iha leo Rama.c
Rahel tanis ro'an aan,
tan niakaan oan sia mate mohu ti'an.
Nia la no'uk ema mai namaus nia,
tan niakaan oan sia la iha ti'an.”d
Yusuf sia mai nikar nosi Mesir
19 Nosi ikus, Na'i Herodes mate. Oras nia, Yusuf sia sei iha Mesir. Hotu Maromak Niakaan makbukar lale'an ida mai natadu aan baa Yusuf iha me'i laran na'ak, 20 “Yusuf! Madeer ona! Modi mikar Oa nia no niakaan ina baa Isra'el ona. Ema mak buka atu no'o Oa nia, mate ti'an.” 21 Rona nola nunia, Yusuf moos nadeer. Hotu nodi nikar sia baa rai Isra'el.
22 Mais baa oras nia, Na'i Herodes oan Arkalaus dadi nikar na'in iha rai Yudea. Rona nola lia nia, Yusuf nata'uk fila baa Yudea. Hotu Na'i Maromak moos naruka nia iha me'i laran tenik na'ak, “Yusuf! Keta baa mein iha Yudea.” Tan lia nia, Yusuf baa nein iha Galilea, 23 iha leo ida naran Nasaret. Lia nia nato'o saa mak Na'i Maromak katak kedan baa mako'an hori uluk na'ak, “Sia atu temi Nia, Ema Nasaret.”e