4 Loron hitu nulu siku liu ti'an, Yusuf katak baa klosan sia na'ak, “Emi rona! Emi baa hodi ha'ukaan lia fuan ne'e, hasara baa ama na'i ha'ak nune'e: 5 ‘Natoon baa oras ha'ukaan aman kre'is atu mate, nia nusu nebee ha'u kodi niakaan maten, baa kakoi iha rai Kana'an! Tan baa nia, ha'u kusu ama na'i foo leet, nebee ha'u kbele baa kakoi ha'ukaan aman. Hotu ti'an, foin ha'u kfila mai.’”

6 Rona nola nunia, na'in moos nataa na'ak, “Kalo Yusuf namate lia no aman nunia ti'an, ha'u moos kakara. Baa hakoi maten iha nebaa ona!”

7 Hotu, Yusuf baa nakoi aman. Ema wa'in moos tuir. Sia nia mak na'in klosan sia hotu-hotu, no ema boot hotu-hotu nosi Mesir. 8 Yusuf maun-alin no siakaan ema serwisu sia hotu-hotu moos baa bele. Hela mesan feen no lawarik sia no bibi no karau sia iha Gosen. 9 Sondadu wa'in moos tuir. Balu sa'e kareta, balu tenik sa'e kuda. Ema mak tuir maten nia wa'in basuk, to'o ema lolok nia, naruk lo-loos.

10 Ema lolok nia nakur mota Yordan iha fatin ida naran Atad. Ema ta'e nanis hare iha nia. To'o nia, Yusuf sia tanis aman maten. Sia moos daka maten kalan hitu laran tenik.

11 Naree sia susar nunia, ema Kana'an dale baa malu na'ak, “Haree lai! Ema Mesir sia daka maten nodi tanis, to'o nalo ita moos laran moras!” Tan baa nia, ema Kana'an nanaran fatin nia na'ak, Abel-Misraim. Ne'e na'ak ‘ema Mesir siakaan susar’.

12 Hotu, Yakob oan sia nala'ok tuir lia mamenon mak sia nameno ti'an nia. 13 Sia foti nola aman Yakob maten, nodi baa nakoi iha fatuk kuak iha leo Makpela, kre'is baa Mamre. Abraham sosa nola rai nia nosi ema Het ida naran Efron, nalo baa siakaan rate fatik.

14 Nakoi aman ti'an, Yusuf no maun-alin sia fila nikar baa Mesir. Nunia moos, ema mak tuir sia hotu-hotu.

15 To'o Mesir ti'an, Yusuf maun sia nahuu nata'uk, tan siakaan aman Yakob la iha ti'an. Sia dale baa malu na'ak, “Hei! Hanoin lai! Arumak Yusuf sei rai hirus baa ita, hotu atu selu nikar itakaan hahalok aat uluk nia sia. Kalo dadi tebes nunia, nunabee?” 16 Tan baa nia, sia kabuar lia, hotu solok baa Yusuf na'ak, “Ama Na'i! Oras itakaan aman sei moris, nia naruka kedan ami 17 atu katak baa ama nu'u ne'e: ‘Masik ami halo aat baa Yusuf, mais Yusuf musti nalu'a lakon amikaan salan nia.’ Ami ne'e, Maromak atan, mak itakaan ama lo'u-sudur baa. Tan baa nia, ami atu mai husu pardua, tan ami hotu-hotu halo sala ti'an baa ama na'i.”

Rona lia solok nia, Yusuf moos tanis.

18 Hotu Yusuf maun sia moos mai du'uk. Sia lo'u-sudur baa nia nodi na'ak, “Ami mai atu mataroos baa ama.”

19 Mais Yusuf nataa sia na'ak, “Mau sia! Emi lalika hata'uk ona! Maromak mesan no beran kastikar ema! Ha'u ne'e, la ko beran. 20 Tebes! Uluk nia, emi ko'a kabuar lia hodi hahaat ha'u! Mais Na'i Maromak nalo emikaan a'aat nia, dadi baa dadi'ak! Hodi nunia, Nia foti ha'u kdadi ema boot, nebee ema wa'in bele netan moris! 21 Tan lia nia, emi keta hata'uk, tan ha'u kamate lia ti'an atu kaliku emi ho emikaan oan sia hotu-hotu!”

Nodi dale di'a-di'ak nunia, Yusuf nametis niakaan maun sia neon.

22 Hotu, Yusuf tuur nametin aan iha rai Mesir, namutuk no maun-alin sia hotu-hotu. Nia moris to'o tinan atus ida sanulu. 23 Nia sei noo leet naree Efraim oan no bein oan sia. Nia na'in du'uk mak nawa'i Manase bein oan, mak Makir oan sia.

24 Nosi ikus, Yusuf katak baa maun-alin sia na'ak, “Mane malun sia! Ha'u koran ha'ukaan loron mate kre'is ti'an! Mais ha'u kfiar Na'i Maromak nanis naliku emi! Nia atu nala'o emi sai hosi rai ne'e, baa hikar rai mak Nia nameno ti'an no bei Abraham, no bei Isak no ama Yakob!” 25 Hotu, Yusuf nusu sia na'ak, “Emi musti harai aan baa ha'u! Kalo to'o baa oras Na'i Maromak nala'o emi nodi nikar baa rai Kana'an, emi musti foti hodi ha'ukaan maten!”

26 La kleur, Yusuf mate iha Mesir baa otas tinan atus ida sanulu. Sia tebar kedan maten nia, hotu natama baa ai balun.