2
Hodi nunia, Maromak nase'i lale'an no raiklaran no sasoin hotu-hotu.2 Awan, kona baa loron dala hitu. Baa loron nia, Maromak nanawa serwisu. 3 Hodi nunia, Nia nalo loron dala hitu nia, dadi baa loron boot. Nia nalo nunia, tan hotu-hotu mak Nia nase'i nia, tetuk no nesan ti'an. Hotu Nia nanawa baa loron dala hitu. 4a Lia Maromak nase'i lale'an no raiklaran, nunia.
Lia Maromak nase'i feto no mane
4b MAROMAK foin nahuu nase'i lale'an no raiklaran, 5-6 ai horis la noo dauk, tan MAROMAK la natuun udan dauk. Baa oras nia, ababun dei sa'e nosi rai, nabotes rai. Ema bodik nalo to'os moos, la noo dauk. 7 Hotu MAROMAK nola rai isin oan ida, nodi nase'i ema. Nia nuu natama nawan baa ema nia inun, hotu ema nia moris.
8 Hotu MAROMAK loke to'os ida iha rai Eden lorosa'e. Nia natama ema nia nein iha to'os nia. 9 Iha to'os nia laran, MAROMAK nahoris ai horis kabaas oi-oik mak ema bele naa. Nia moos nahoris ai huun rua iha to'os klaran. Kalo ema naa ai huun ida fuan, bele moris nima-nimak. Naa ai huun ida seluk fuan, bele natene saa mak di'ak no saa mak aat.
10 Noo mota ida mak suli nabotes to'os nia. Suli sai nosi to'os nia, noo sorun haat. 11 Sorun ida, naran Pison. Sorun nia, suli nalik rai Hawila mak noo mean wa'in. 12 Iha nia, noo mean isin, ai horis mahoo raan morin no fatuk mahoo matan leen. 13 Mota sorun ida tenik, naran Gihon. Sorun nia nalik rai Kus.a 14 Mota sorun ida tenik, naran Tigris. Sorun ne'e, dadi kladik iha rai Asyurb lorosa'e. Mota sorun ida tenik, naran Efrat.
15 MAROMAK natama ema nia baa to'os Eden atu babilan to'os nia di'a-di'ak. 16 Nia naruka na'ak, “O bele maa ai fuan hotu-hotu iha to'os ne'e laran. 17 Mais noo ai fuan ida mak o la bele maa. Ai fuan nia, nosi ai huun mak foo natene saa mak di'ak no saa mak aat. Kalo o maa ai fuan nia, o nanis mate.”
18 Hotu MAROMAK katak na'ak, “La furak ema ne'e moris mesan. Di'ak liu, Ha'u kase'i foo maluk ida mak makonak no nia.”
19-20 Baa oras nia, MAROMAK ra'ut nola rai isin nalo baa osa no lotuk no manu oi-oik. Hotu, Nia nodi sia baa ema nia, nebee ema nia tau naran baa sia. Ema nia nanaran kedan osa no lotuk no manu nia sia, ida-idak no naran du'uk. Mais nia du'uk, la noo maluk makonak.
21 Hotu MAROMAK nalo ema nia toba dukur. Oras toba dukur, MAROMAK nasai nola nosen ruin ida, hotu taka nikar kanek nia. 22 Nia nase'i feto ida nosi nosen ruin nia, hotu latan baa ema nia. 23 Naree feto nia, ema nia dale na'ak,
“Haa! Ne'e lai! Ne'e foin kona baa ha'u!
Niakaan ruin manesak no ha'ukaan.
Niakaan isin moos manesak no ha'ukaan.
Ha'u kanaran nia ‘feto’, tan nia dadi nosi mane.”c
24 Tan lia nia, mane musti la'o nela inan no aman,
nebee moris neon ida no feen,
tan sia dadi mesak ti'an.
25 Oras nia, sia rua sei nakwalan, mais sia la moe.