Ema la no'uk rona Maromak
3
Nosi osa no lotuk fuik hotu-hotu mak MAROMAK nase'i ti'an iha raiklaran, samea mak matenek be'ur. Baa dala ida, samea ida nusu feto nia na'ak, “Tebes ka? Na'i Maromak badu na'ak, la bele haa ai fuan nosi to'os ne'e ka?” 2-3 Feto nia nataa na'ak, “Lale! Ami bele haa! Ai huun ida dei iha to'os klaran mak Na'i Maromak badu. Ami la bele haa ai huun nia fuan. Kaer dei moos, la bele, tan ami nanis mate!”
4 Mais samea nataa na'ak, “Lahoos nunia! Emi la mate! 5 Na'i Maromak badu nunia, tan Nia natene kalo emi haa ai fuan nia, emi dadi matenek manesak no Nia! Emi moos bele hatene saa mak di'ak no saa mak aat.”
6 Rona nola nunia, feto nia naree ai huun nia kabaas lo-loos. Fuan moos arumak midar tebes. Nia naneo na'ak, “Kalo ha'u kaa ai fuan ne'e, ha'u nanis matenek ona.” Hotu, nia ku'u nola, naa kedan. Nia moos nodi foo baa la'en. La'en moos naa. 7 Sia rua naa notu, sarebak natene baa, sia nakwalan. Hotu, sia noman ai tahan nodi taka isin lolon, tan sia moe.
8 Loro malirin, sia rona MAROMAK la'o iha to'os laran. Mais sia nakfunin iha ai huun kotuk, nebee MAROMAK la naree sia. 9 Hotu, MAROMAK bolu mane nia na'ak, “Hei Adam! O iha nabee?”
10 Mane nia nataa na'ak, “Ha'u ko'i rona Na'i Maromak lian iha ne'e. Mais ha'u kmoe aan, tan kakwalan. Foin, ha'u kalai baa kakfunin.”
11 Rona nola nunia, Maromak nusu na'ak, “See mak katak na'ak o makwalan? Keta arumak o maa ti'an ai fuan mak Ha'u kbadu nia!”
12 Nia moos nataa na'ak, “Feto mak Na'i Maromak latan namalu ha'u nia, mak foo ha'u kaa ai fuan nia!”
13 Rona nola nunia, MAROMAK nusu feto nia na'ak, “Tan saa o malo nunia?”
Feto nia nataa na'ak, “Tan samea mak be'ur ha'u, foin ha'u kaa ai fuan nia.”
Na'i Maromak natuun kastikar
14 Hotu, MAROMAK natuun kastikar baa samea na'ak,
“Tan okaan hahalok ne'e, ha'u ktaa ukun baa o. Osa no lotuk seluk sia la kona ukun ne'e. Nahuu baa oras ne'e to'o o mate, o mane'e loos modi o kabun no o maa iha rai dei. 15 O mo feto ne'e, funu malu nima-nimak. Emikaan husar-binan moos nunia. Okaan husar-binan atu nadodok ema ain nuban. Mais feto ne'e niakaan husar-binan ida atu nadodok okaan ulun.”
16 Nunia hotu, Maromak katak baa feto nia na'ak,
“Ha'u atu tu'an okaan susar baa oras ko'us, no tu'an moras baa oras mahoris. Masik nunia moos, o sei beer okaan la'en bei-beik! Nia moos ukun o!”
17 Nunia hotu, Maromak katak tenik baa mane na'ak,
“O la tuir Ha'ukaan ukun, mais tuir okaan feen hakaran, to'o o maa ai fuan mak Ha'u kbadu nia. Tan lia nia, o moos kona kastikar. Rai moos kona kastikar. Nahuu baa oras ne'e to'o o mate, o musti serwisu susi ruin fila rai, nebee bele metan haan. Modi serwisu nunia, foin o bele moris. 18 Masik o furi oi-oik moos, rai natubu ai tarak no meik. 19 O musti serwisu susi ruin, foin rai foo haan baa o. O musti serwisu masai kosar nunia, to'o mate. Ha'u kase'i o kosi rai. Oras o mate, o fila mikar baa rai.”
20 Nunia hotu, Adam nanaran feen na'ak Efa, tan nia mak ema horis hotu-hotu inan. (Iha lia Ibrani, efa lia isin na'ak ‘mak moris’.)a
21 Hotu, MAROMAK nola kulit, nalo baa tais, foo baa sia rua natais.
Maromak te'ur sai Adam no Efa
22 Hotu, MAROMAK katak na'ak, “Oras ne'e, ema natene ti'an saa mak di'ak no saa mak aat, hanesan Ita. Keta to'o, sia naa tenik ai fuan nosi ai huun mak foo moris nima-nimak.” 23 Hotu, MAROMAK te'ur sai Adam no Efa nosi to'os Eden, baa fatin seluk atu moris nosi fila rai. Tan ema huun nosi rai, sia musti moris nosi rai. 24 Te'ur sai ti'an, Maromak naruka Niakaan makbukar lale'an mahoo liras sia,b baa daka to'os nia iha lorosa'e. Sia kaer surik lakan nu'u ha'i, bakut baa-mai. Naruka sia taka dalan tataman, tan la no'uk ema ku'u nola ai fuan mak foo moris nima-nimak.