3 Ha'u kanorin emi ti'an nosi lia folin kaliuk, mak uluk ema nanorin baa ha'u. Lia nia mak ne'e: Na'i Maromak solok Kristus mai ti'an. Hotu, Kristus mate atu sori ita nosi itakaan salan sia. Lia nia natebes saa mak Maromak mako'an sia nakerek kedan hori uluk iha Hakerek Moon.^a 4 Kristus mate, hotu ema nakoi Nia. Baa wainrua, Na'i Maromak nalo Nia moris nikar. Lia nia moos natebes saa mak mako'an nakerek kedan hori uluk iha Hakerek Moon.^b 5 Nunia hotu, Kristus natadu aan baa mau Petrus^c no baa Niakaan maktuir seluk sia hotu-hotu.^d 6 Hotu, dala ida, Nia natadu aan tenik baa ema makfiar na'in atus lima resin. Sia hotu-hotu naree Nia. Nosi ema nia sia, na'in hira mate ti'an, mais wa'in sei moris. 7 Nunia hotu, Nia natadu aan baa mau Yakobus. Nunia hotu, natadu aan baa Niakaan klosan sia hotu-hotu.

8 To'o ikus basuk, ha'u moos karee Nia. Ha'u hanesan oa ikun mak moris ikus basuk.^e 9 Kristus klosan uluk sia hotu-hotu boot liu ha'u. Ha'u la kfatan dadi baa klosan, tan uluk ha'u mak kasusar no ktonan Kristus eman sia iha fatin hotu-hotu.^f 10 Mais Na'i Maromak natudu laran di'ak baa ha'u nodi nalo ha'u to'o dadi nune'e. Nia tulun ha'u nunia, noo folin. Tan baa ikus, ha'u mak serwisu liu klosan sia hotu-hotu! Lahoos tan ha'u kbiit du'uk. Mais tan Na'i Maromak mak natudu laran di'ak baa ha'u.

11 Dadi, kalo ha'u mak kanorin ema ka, ema seluk mak nanorin, la saa ida. Ami hotu-hotu hanorin Lia Di'ak mesak ida. Lia Di'ak nia, mak emi simu ti'an nia.

12 Ami hanorin ti'an ha'ak, Na'i Maromak solok Kristus mai ti'an, hotu Kristus mate, mais Na'i Maromak nalo Nia moris nikar. Tan lia nia, tan saa emi balu ha'ak, “Ema mak mate ti'an la moris nikar”? Niakaan lia tatuur saa? 13 Kalo ema mak mate ti'an la moris nikar, Kristus moos la moris nikar! 14 Kalo Kristus la moris nikar, lia hotu-hotu mak ami hanorin ti'an la noo folin. Emikaan fiar baa Kristus moos, butan dei! 15-16 Kalo ema mak mate ti'an la moris nikar, ami ne'e, saksiin mak dale bosok hosi Na'i Maromak. Tan ami hanorin loron-loron ha'ak, “Na'i Maromak nalo Kristus moris nikar!” Tebes. Amikaan hanorin nunia tebes. Mais nosi ikus kalo ema mak mate ti'an la moris nikar, ne'e na'ak, Na'i Maromak la nalo Kristus moris nikar. 17 Hanoin kokon lia ne'e: Kalo Kristus la moris nikar, emikaan fiar butan dei! Tan emi sei hatiu emikaan salan sia! 18 Mais lahoos emi mesan dei, tan ema uluk mak mate ti'an sia moos talin aan no Kristus. Kalo Kristus la moris nikar, sia moos mate no kona lelen nosi Na'i Maromak. 19 Ita hakrai aan baa Kristus hodi haloon nebee Nia tulun ita. Mais kalo Nia tulun ita baa oras ita sei iha raiklaran dei, ita haloon butan! Ita moos ema mak susar kaliuk nosi ema hotu-hotu!

20 Mais lahoos nunia. Lia loos, nune'e: Na'i Maromak solok Kristus mai ti'an, hotu Kristus mate, mais Na'i Maromak nalo Nia moris nikar. Tebes. Mais lahoos Kristus mesan dei mak moris nikar, tan nosi ikus ema makfiar hotu-hotu mak mate ti'an, sia moos atu moris nikar. Kristus hanesan fuan ulun, tan Nia loke dalan bodik ita moris hikar hosi mate, hanesan Nia. 21 Uluk aan, ema na'in ida dei mak Adam, nakur Na'i Maromak ukun, hotu kona kastikar mate. Kastikar nia tuun baa ita hotu-hotu. Mais oras ne'e, noo ema ida seluk, mak Kristus. Nia moris tuir Na'i Maromak ukun. Tan Niakaan dadi'ak, ema mak mate ti'an bele moris nikar! 22 Ema hotu-hotu mak tuir Adam nodi nakur Na'i Maromak ukun, sia moos kona kastikar mate hanesan Adam. Nunia moos, ema hotu-hotu mak tuir Kristus. Nosi ikus Na'i Maromak nalo sia moris nikar hanesan Kristus.

23 Mais ida-idak no niakaan oras. Kristus dadi ema uluk fohon mak moris nikar, nia hanesan dalan ulun. Nia namaan aan mai nikar iha raiklaran ne'e lai, foin Niakaan ema sia moris nikar. 24 Nunia hotu, foin rai falu fila to'o mai. Baa oras nia, Kristus atu dadi Na'in mak nadodok beran hotu-hotu, makaer ukun hotu-hotu, no matenek hotu-hotu mak sakar Na'i Maromak. Hotu nunia, Nia latan nikar Niakaan beran nia baa Maromak, Niakaan Ama.

25 Kristus musti kaer ukun to'o Na'i Maromak natoba nola hotu-hotu mak sakar Kristus, nebee sia lo'u baa Nia.^g 26 Noo lia ida tenik mak sakar ita ema raiklaran. Ne'e mak, ita musti mate. Mais ikus basuk, Na'i Maromak moos natoba nola beran mak nalo ema mate. Nunia hotu, ema la mate ona. 27 Hakerek Moon na'ak, “Na'i Maromak atu nalo funu hotu-hotu foti liman baa Ema mak Nia nameno atu solok mai nia.” Malorek ti'an baa ita na'ak, Na'i Maromak la foti liman. Tan Nia mak foti Kristus dadi Na'in bodik ema hotu-hotu.^h 28 Hotu-hotu foti liman baa Na'i Maromak Oan lai, foin Oa nia latan nikar hotu-hotu baa Niakaan Ama mak foti Nia. Nunia hotu, Na'i Maromak kaer ukun to'o nima-nimak. Nia ukun ema hotu-hotu iha lia hotu-hotu.

29 Noo ema mak nakara simu sarani atu seluk ema mak mate ti'an mak sei la simu sarani dauk. Mais kalo ema mak mate ti'an la bele moris nikar, siakaan hahalok butan dei.ⁱ 30 Ami du'uk hetan susar wa'in to'o kre'is mate, tan keke lema Lia Di'ak. Mais kalo ema mak mate ti'an la moris nikar, tan saa ami haksakar aan halo nunia? Butan dei! 31 Sura loron ha'u kre'is mate tan serwisu ne'e. Mais kalo ha'u kmate, la saa ida. Tebes. Mamaluk sia mak ha'u kadomi, masik ha'u kmate moos, ha'u kbele kfoti oin, tan emi talin malu ho itakaan Na'in Yesus Kristus mak Na'i Maromak solok mai ti'an nia. 32 Hori hirak nia, baa oras ha'u ksei iha kota Efesus, ema mak aat nu'u asu fuik, sia mai lisuk ha'u. Kalo ha'u kterus susar nunia bodik ha'u du'uk, lahoos bodik Kristus, ha'ukaan susar nia butan dei. Kalo ema mak mate ti'an la moris nikar, di'ak liu ita kalolon tuir ema mak dale na'ak,

33 Keta kona be'ur to'o tuir dale nia. Noo lia fuan seluk mak na'ak,

34 Tan lia nia, keta halo aat ona! Bali aan, halo lia loos! Emi musti horan moe, tan noo ema iha emikaan klaran mak sei la natene Na'i Maromak dauk.

35 Noo ema mak nusu na'ak, “Oin nunabee to'o ema mak mate ti'an bele moris nikar? Siakaan isin lolon atu dadi nunabee?”

36 Hoi momok sia! Lia nune'e. Kalo kuda fini, fini nia musti dodok iha rai laran lai, foin bele tubu, bele moris, no bele nadikin. 37 Fini mak ita kuda, niakaan ilas la manesak no ai horis mak nadikin no nataha. Fini nia, fini maran nu'u fini tora , fini hare, no fini seluk sia. 38 Kuda hotu, ida-idak tubu no moris tuir Na'i Maromak hakaran. Tan Nia mak nakotu ti'an ai horis ida-idak niakaan ilas.

39 Buat horis sia moos nunia. Ida-idak noo niakaan ilas tuir Na'i Maromak hakaran. Ema raiklaran isin lolon, tuir ema raiklaran niakaan ilas. Osa no lotuk isin, ida-idak noo niakaan ilas. Manu ai leten, ida-idak noo niakaan ilas. Na'an tasi, ida-idak noo niakaan ilas. Seluk tenik moos noo siakaan ilas du'uk.

40 Noo buat iha lale'an, noo buat iha raiklaran. Buat lale'an noo siakaan kabaas du'uk, tan siakaan kabaas nia, seluk nosi buat raiklaran. Buat raiklaran moos noo siakaan kabaas du'uk, tan siakaan kabaas nia, seluk nosi buat lale'an. 41 Iha lale'an, loro matan kabaas seluk; fulan kabaas seluk; fitun kabaas moos seluk. Ida-idak noo niakaan ilas du'uk. Ida-idak noo niakaan kabaas du'uk.

42 Lia nune'e. Ema mak mate ti'an atu moris nikar nu'u fini ohin nia. Kalo hakoi ema maten, niakaan maten aat karin. Mais nosi ikus baa oras rai falu fila, ema nia atu moris nikar nodi isin foun. Nia seluk, tan la mate tenik ona. 43 Oras ita hakoi ema maten, ita horan maten nia sasobo. Mais oras rai falu fila ema nia moris nikar nodi isin foun, nia kabaas, tan dadi moos ti'an! Tebes! Oras ne'e itakaan isin lolon la biit, tan ita atu mate. Mais oras rai falu fila ita moris hikar hodi isin foun, lahoos nunia ona, tan ita atu simu isin lolon foun mak biit tebes. 44 Oras ita sei moris, itakaan isin lolon hatene haneo no horan, nebee ita bele moris iha raiklaran ne'e. Mais oras ita moris hikar, Maromak Kmalar atu foo isin foun baa ita, nebee ita bele moris iha lale'an.

45 Ema raiklaran dala uluk mak manesak no ita, ne'e mak Adam. Hakerek Moon na'ak, “nia dadi ema mak moris nodi natene naneo no noran.” Mais noo ema ida ilas nu'u Adam mak beran boot kaliuk. Ne'e mak Kristus. Niakaan Kmalar bele foo moris loos baa ema raiklaran.^k 46 Oras ita moris iha raiklaran hodi ilas dala uluk nia, ita hatene haneo no horan, hotu ita mate. Mais oras ita moris hikar, ita hetan ilas foun nebee ita bele moris iha lale'an. 47 Ilas dala uluk, ilas ema mak hase'i hosi rai isin atu moris iha raiklaran. Mais ilas dala rua, ilas Kristus mak moris iha lale'an. 48 Ita hotu-hotu, ilas manesak no ema dala uluk nia mak Na'i Maromak nase'i nosi rai isin atu moris iha raiklaran. Mais ita hotu-hotu mak talin malu ho Kristus, itakaan ilas manesak no Kristus mak moris iha lale'an. 49 Oras ne'e itakaan ilas manesak no Adam mak Na'i Maromak nase'i nosi rai isin nia atu moris iha raiklaran. Mais kleu-leur, ita atu seluk hodi ilas foun mak manesak no Kristus mak moris iha lale'an.

50 Mamaluk sia! Oras ne'e, ha'u katak baa emi lia nune'e: iha raiklaran ne'e, itakaan isin lolon dadi nosi raan no ruin, tan tuir ilas dala uluk. Hodi ilas nunia, ita la bele moris iha lale'an no la bele simu sasoin mak Na'i Maromak rai hein bodik Niakaan renu. La bele! Tan ilas nunia, atu mate, hotu aat karin. La bele simu sasoin mak nafati nohuun.

51 Hanono di'a-di'ak, tan ha'u atu kalore lia subar ida baa emi. Oras rai falu fila, ema makfiar balu la mate. Mais ita hotu-hotu dadi seluk hodi ilas foun. 52 Oras to'is nalia dala ikus basuk, lia hotu-hotu ne'e laku matan dadi. Oras nia, ema mak mate ti'an sia moris nikar. Nunia hotu, sia la mate tenik no la aat karin tenik. Nunia moos ita mak sei moris. Ita hotu-hotu dadi ilas foun.^l 53-54 Itakaan isin lolon mak oras ne'e bele aat, atu dadi seluk baa ilas mak la bele aat! Ita mak oras ne'e bele mate, atu dadi seluk baa ilas mak la bele mate! Lia nia natebes lia iha Hakerek Moon na'ak,

56 Tebes nunia. Mais tan saa mamaten beran lisuk ita ema raiklaran? Tan ita halo sala. Tan saa itakaan salan bele lisuk ita nunia? Tan ita sakar Na'i Maromak Ukun-badu. 57 Mais oras ne'e, seluk ti'an! Ita tonu Na'i Maromak, tan Nia nodi itakaan Na'in Yesus Kristus, nalo ita hatoba hola lia aat sia hotu-hotu. Tan hotu-hotu foti liman baa Kristus.

58 Lia nune'e, mamaluk sia! Haterus aan biit! Keta kakoen! Serwisu bodik Na'i Maromak hodi laran maluak, tan emi hatene ti'an emikaan serwisu nia, la butan.